[1] Paka Isos kangitan in karowan wano pag mga mangyan, siyo monaker sa boksor, siyo asin agaron, osai in kansiyo mga agadar.
[2] Siro piyatoldo keyen,
[3] Boway wa in mga idapo piyagpasandigan no yewed in Diyos waget, angkataw siro kansiyo wa ngani mga bodang.
[4] Boway wa in mga agrongkot, angkataw siro batay piyagayat Diyos.
[5] Boway wa in mga agpakabwatte remrem, angkataw kansiro batay abel in mga piyangako Diyos.
[6] Boway wa in mga beet wano gayed agpangwat in beet Diyos, angkataw siro batay piyakan in kansiro piyagkabeet.
[7] Boway wa in mga katawan agpakayawte, angkataw siro batay din piyagpakayawte in Diyos.
[8] Boway wa in mga idapo piyagtago sa Diyos, angkataw siro batay katawan sa Diyos.
[9] Boway wa in mga agpatoldo agpaybelagan, angkataw siro batay piyagawit Diyos kansiyo mga bodang.
[10] Boway wa in mga piyagpaidapan panawen siro agpangwat in beet Diyos, angkataw siro kansiyo wa ngani mga bodang.
[11] Kamo ngani boway wa no kamo piyagpamalowasan panawen kamo agpaniwala sa kangay, osai piyagpaidapan piyagpabintangan boo mga daet.
[12] No apo ina pag mga kaidapan na kamo boway wa, angkataw lakonaw in batay piyagtaboy sa kanyo sa langit. Kataw daan din ina in piyangwat sa mga poropita in mga tokaw kay sa kanyo.
[13] Isos keyen kay, Kamo kagwali asing sa mga mangyan. No in asing idapo wa matamis na idbatay wa matamis wakay tagoli. Ina idapo wa kabolowan, no yewed piyagbenglay wa piyagpanlaedan mga mangyan.
[14] Kamo kagwali tinglaw sa mga mangyan. In osai ka bayan no sa latayan na piyagngitan gayed.
[15] In agparaet tinglaw idbatay agpabolalang sa galem baldi. Dayem sa datiyan daan pag pamabolalangan, matang agrawa daan sa boo galem balay.
[16] Na kataw din ina, kanyo parawaen in kanyo tinglaw sa boo mangyan, matang kansiro piyagngitan in kanyo mga maalen pag ogali, kalbas batay piyagpakalakonaw in kantam Amang sa langit.
[17] Kamo ayaw keyen kaya ako atai pataboy matang biyenglay in mga Batas Diyos, osai in piyatoldo in mga poropita. Kaya ako atai pataboy yewed matang ina biyenglay, no yewed agpatoldo in beet gayed siyabi.
[18] Kamo ayaw agkanawey, in langit batay maidapo, kadayo in kobat, kamay sa mga Batas Diyos idapo batay maidapo kamayba in kalakoyte waget pag toldok anggan yewed kay piyangwat ina pag boo.
[19] Na no siyo agpaidapo kabolowan sa mga Batas Diyos, kamayba in kalakoyte waget, osai agpatoldo kataw ina sa mga amat, na siyo in batay kalakoyte wano sa mga bodang Diyos. Kamay in agpangwat in mga Batas Diyos, osai agpatoldo keyen ina pangwaten, na siyo in batay lakonaw sa mga bodang Diyos.
[20] Kangay piyagsabi no in kamo agpangwat in beet Diyos kalakoy waget in piyagpangwat in mga agpatoldo in mga Batas Diyos, osai in mga Parisiyo, na kamo idbatay mibaloy mga bodang Diyos.
[21] Isos keyen kay, Kanyo atawanan in siyabi tangona keyen, Ayaw agbono mangyan. In agbono mangyan batay piyagparosa.
[22] Kamay in kangay agbangen piyagsabi sa kanyo, no siyo agkagalit sa kansiyo belag, na batay din piyarosa. In agsabi sa kansiyo belag keyen, Kao idapo kabolowan, na siyo batay piyagparosaan in mga tanongan in mga Odyo. In agsabi sa kansiyo belag keyen, Kao idapo bait, na siyo batay piyagbenglay sa baya lakoy sa toyongan.
[23] Na no kao sa balay Diyos, apo batay piyagtaboy sa Diyos, kalbas kaimo aremreman kao apo piyangwat daet sa kaimo belag,
[24] na kaimo kay baliwanen ngonate sa balay Diyos in kaimo batay piyagtaboy, kalbas kao ista wakay, pabelag. Bayo kao moli wakay sa balay Diyos, kalbas in kaimo piyagtaboy taboyen wa sa Diyos.
[25] No kao apo kaaway batay agabla sa kaimo, na sa dalan kay kao manggisodan sa kansiyo yewed kay rateng sa osap. No yewed kao kansiyo batay piyagpaosap sa mga poon lakoy, kao batay piyagtaboy sa mga polis, batay piyagbilanggo.
[26] Kangay piyagsabi kao idbatay ngani piyagpalpas anggan apo kay tera in kaimo otang kamayba osai wagette ka sintimos.
[27] Isos keyen kay, Kanyo atawanan in siyabi keyen, Ayaw agpanggaraw.
[28] Kamay in kangay agbangen piyagsabi sa kanyo kamayba siyo agpangkit sa osai ka kagbaiyan, apo bait agkabeet, na in kansiyo remrem manggaraw wa asin pag kagbaiyan.
[29] No in kaimo mata agakay sa kaimo matang kao agpangwat daet, na maal kay kasloten wa, kalbas benglayen. Angkataw maal kay maidapo in osai ka sangkap sa kaimo bilog ayaw ngaro in boo kaimo bilog biyenglay sa toyongan.
[30] No in kaimo pamalang pag bakwaw agakay sa kaimo matang kao agpangwat daet, na dodowen wa, benglayen wa. Angkataw maal kay maidapo in osai ka sangkap kaimo bilog, ayaw ngaro in boo kaimo bilog biyenglay sa toyongan.
[31] Isos keyen kay, Apo din siyabi keyen, No biyaliwan in osai ka kaliyakiyan in kansiyo babai, na in babai pangwatanen kasondowan malsoway wa.
[32] Kamay in kangay agbangen piyagsabi sa kanyo, No kaliyakiyan agbaliwan sa kansiyo babai, kamayba in babai idbatang agpanggaraw, kalbas in batang babai mamangkit wakay lalaki, na in agbaliwan agbangen in apo daet angkataw siyo in dailan kaya manggaraw in kansiyo batang babai. Osai in kaliyakiyan wakay in miskapet sa kagbaiyan biyaliwan na siyo agpanggaraw din.
[33] Kanyo din atawanan apo tangona siyabi keyen, No kanyo riigen in kanyo pangako, na ayaw agsala, dayem pangwaten ngani in kanyo piyangako sa Kapwan.
[34] Kamay in kangay agbangen piyagsabi, ayaw agrigenen kanyo pangako. Ayaw agrigenen keyen kamaybawa sa langit, angkataw in langit pagtokkawan lakoy Diyos.
[35] Ayaw agrigenen keyen, kamaybawa sa kobat, angkataw in kobat paglaedan Diyos. Ayaw din agrigenen keyen kamaybawa sa Irosalim, angkataw ina bayan in lakonaw pag Poon Lakoy.
[36] Ayaw din agrigenen keyen kamaybawa ako matay, angkataw kamayba osai wagette ka abok sa kaimo olo yewed kaimo apaboksi, idbatay din kaimo mipangwat maitem.
[37] No in kaimo siyabi aon, na sibay wa in aon. No in kaimo siyabi yewed na sibay wa din in yewed. Angkataw kamayba nakay pag agiplaong marigen in asin piyadagdag, ina batang sa diyablo.
[38] Isos keyen kay, Kanyo atawanan in siyabi keyen, No osai ka mangyan agkaslot sa osai ka mangyan mata, na kasloten wakay din in kansiyo mata. No in osai ka mangyan agsowal sa ngipen sa osai, na sowalen wakay din in kansiyo ngipen.
[39] Kamay in kangay agbangen piyagsabi sa kanyo ayaw kanyo aglabananen in mga daeten pag mangyan. No apo somampek sa kaimo osai ka pisngi, na kaimo patobangen wakay sa kansiyo in osai.
[40] No kao yaabla in osai ka mangyan matang abel kaimo lambong, na kaimo taboyen kadayo in kaimo islen.
[41] No kao piyagpilit agbaba palnowan osai ka kilomitro, na kaimo babaen anggan dowai ka kilomitro.
[42] In agayay sa kaimo pakanen. In agpabeles sa kaimo pabelesen.
[43] Kanyo atawanan in siyabi keyen, Pakayawteen in kaimo belag, kamay kalobante agkabais sa kaimo kaaway.
[44] Kamay in kangay agbangen piyagsabi kanyo keyen, Pakayawteen din in kanyo mga kaaway. Kanyo pandalanginen in mga agpaidap sa kanyo,
[45] matang kamo bodang ngani in kantam Amang sa langit. Angkataw kansiyo piyagpalowas in kansiyo ibeng sa mga mangyan maalno, kadayo sa mga mangyan daeten. Osai kansiyo piyagpaodanan in mga mangyan agpamangwat maal, kadayo in mga agpamangwat daet.
[46] No kamo agpakayawte waget sa mga agpakayawte sa kanyo, na in Diyos idapo batay tiyaboy lakonaw sa kanyo. Ina dayem piyagpangwat din in mga daeten pag mga mangyan.
[47] No kamo agpabelag waget sa kanyo mga belag, na kamo idapo piyangwat labi kay sa mga roma. Ina dayem piyagpangwat din in mga yewed agpaniwala.
[48] Kailangan ngani kamo agpakayawte wano gayed, kataw din in kantam Amang sa langit.