[1] Paka omaga wa agpolong wakay in mga poon sasirdoti osai in mga koyay sa mga Odyo. In kansiro piyagpolong no nangkataw in batay agbono kay Isos.
[2] Kadogay kansiro biyakos, biyaba sa gobirnador, in ngaran Pilato.
[3] Odas in agpadakep kay Isos, paka kansiyo atawanan Isos batay wa biyono, siyo toloy wakay manremrem. Kansiyo wakay piyaoli sa mga poon sasirdoti osai sa mga koyay in tatlompo ka kowarta.
[4] Siyo keyen, Ako agpangwat wa lakoy daet. In mangyan idapo daet kangay piyadakep matang siyo biyono. Kamay siro keyen, Ina nakay wakay sa kanyam? Saken kao.
[5] Toloy biyenglay Odas sa galem balay lakoy Diyos in mga kowarta, kalbas siyo panaw wa, pasesel wa.
[6] Piyamorot wakay in mga poon sasirdoti in kowarta. Siro keyen, Anda pag kowarta bayad sa daya in beet siyabi apo osai ka mangyan biyono. Idwa mayadi piyaagem sa kowarta sa balay lakoy Diyos.
[7] Matang siro maypolongan wa keyen, Anda pag kowarta pabayaden wa sa kobat in agpamangwat keden, kalbas pangwaten lebengan sa mga taga adayonaw.
[8] Matang ibat asin anggan ngona ina pag kobat piyagawit wa kobat daya anggan ngona.
[9] Kataw ina mibaloy wa in siyabi Irimiyas in poropita keyen, Kansiro kiyowa in tatlompo ka kowarta pilak in piyabayad sa kansiyo. Sa mga kasokponan Israil kalakoy ina in bayad mangyan.
[10] Kalbas kansiro wa piyabayad sa kobat in agpamangwat keden, kataw ina in biilin in Kapwan sa kangay.
[11] Isos piyataydek sa adap gobirnador. Siyo biyotog in gobirnador keyen, Kao lames ngani in Poon lakoy in mga Odyo? Keyen Isos, Kao wa in agsabi.
[12] Kamay in siyo piyamabintangan in mga poon sasirdoti osai in mga koyay siyo idapo meles.
[13] Matang siyabi Pilato sa kansiyo keyen, Kao nakay, karengey in karowen kansiro mga bintang sa kaimo?
[14] Kamay Isos idapo din meles kamayba osai waget ka agiplaong. Matang in gobirnador agsoyo wano.
[15] In ogali in gobirnador baatte piyasta piyagawit Paskowa siyo agpalpas osai ka mangyan piyagbilanggo, no nakay in piyagkabeet in mga mangyan.
[16] Ina pag betek apo mangyan piyagbilanggo atawanan in boo mga mangyan, in ngaran Isos Barabas.
[17] Matang paka in mga mangyan matipon wa, Pilato miplaong sa kansiro keyen, Nakay agbangen in kanyo beet kangay palpasen, in osai Barabas, in osai Isos piyagawit Kiristo?
[18] Pilato katawan kaya Isos biyaba sa kansiyo, panawen agpanagiri in mga koyay mga Odyo.
[19] In Pilato agtokkaw sa kansiyo lakoy pagpanokkawan agosap, in kansiyo babai agsogo mangyan agsabi sa kansiyo keyen, Ayaw agpanlado asin pag mangyan, idapo daet. Karai yabi ako manaynep panawen sa kansiyo, kalbas ako piyaidapan wano.
[20] Kamay in mga mangyan piyangolokan in mga poon sasirdoti osai in mga koyay keyen, In kanyo ayayen kay Pilato Barabas in palpasen. Isos agbangen bonowen wa.
[21] In mga mangyan tiyanong wakay in gobirnador keyen, Nakay agbangen in kanyo piyagayay kangay palpasen? Siro keyen, Barabas wa.
[22] Keyen wakay Pilato, No kataw ina na nakay in kangay batay piyangwat kay Isos in piyagawit Kiristo? Siro boo keyen, Pakowen wa sa kodos.
[23] Pilato keyen, Nakay batang? Nakay in kansiyo piyangwat daet? Kamay mango wakay gayedte in mga mangyan keyen, Pakowen sa kodos.
[24] Paka kataw ina wa, Pilato katawan siyo idapo wa batay mibaloy, labi kay batay magolo in mga mangyan. Matang siyo omayay sapa, agogas wa kansiyo bakwaw sa pangkit in mga mangyan. Siyo keyen, Ako idapo daet. Yewed ako in agpabono ina pag mangyan idapo daet. Wara kamo.
[25] Keyen in boo mga mangyan, Bayansiyo wa kanyam anggan sa kanyam mga bodang in parosa panawen asina pag matay.
[26] Kalbas Barabas wa in piyalpas Pilato. Kamay Isos agbangen kansiyo piyabogbog, tiyaboy sa kansiro matang piyako sa kodos.
[27] Isos biyaba wa in mga sondalo gobirnador sa kampo. Asin siyo piyagribok in karowan mga sondalo piyagmesa kataw anda.
[28] Kansiro kiyowa in kansiyo lambong, piyaislenan wakay mapola wano.
[29] Kalbas kansiro siyolapid balagen dogiyen, piyasarikaw sa kansiyo. Piyaatang sa kansiyo pamalang osai ka tanrak. Siro agpaselang kagwali agdaing sa kansiyo agmesa waget keyen, Pakalakoyen in Poon lakoy mga Odyo.
[30] Kalbas siyo piyanopayan wa, kiyowa wakay in tanrak, siyo piyanampek sa olo.
[31] Paka kalbas wa miyesa, kiyowa wa in islen, siyoroy wakay in kansiyo lambong. Siyo kansiro wa piyapanaw matang piyako sa kodos.
[32] Paka lampas wa sa sormokan kansiro atagbo osai ka kaliyakiyan taga Sirini piyagawit Simon. Siyo kansiro piilitan agbaba in kay Isos kodos.
[33] Siro rateng sa kobat piyagawit Golgota, in beet siyabi Kobat Bitol Olo.
[34] Asin Isos piyakan nges alak piyaageman panas, kamay paka kansiyo tiyepeng idwa kansiyo iinem.
[35] Kalbas siyo piyako wa sa kodos. Kansiro piyostaan in kansiyo lambong in kansiro piyagpalbagiyan.
[36] Siro malpanokkaw wa asin, agdamay sa kansiyo.
[37] Sa ogbos kansiyo olo apo solat piyaiskapet, in sombong sa kansiyo keyen, Anda Isos, in Poon lakoy in mga Odyo.
[38] Ina daan pag betek apo din dowai ka agpanakaw piyako sa mga kodos, in osai sa kay Isos pamalang agbangen in osai sa tagwala agbangen.
[39] Siyo piyamalowasan in mga asin domalan, agpelespeles in olo
[40] keyen, Yewed mana kao in batay agregnas in balay lakoy Diyos, kalbas kaimo wakay piyagtadyok tolo waget ka ibeng? Na amba dali, in kaimo bilog pabowayen. No kao ngani in Bodang Diyos, na lompot wa sa kodos.
[41] Kadayo din in mga poon sasirdoti, in mga agpatoldo in mga Batas, osai in mga koyay, Isos kansiro din piyamalowasan
[42] keyen, Kansiyo piyaboway in mga roma, kamay in kansiyo bilog yewed apaboway. Siyo kono in Poon lakoy sa mga kasokponan Israil. No ngona siyo lompot sa kodos, na kami batay wa din maniwala sa kansiyo.
[43] Siyo kono agpasandig sa Diyos, siyo keyen din siyo Bodang Diyos, na wara in Diyos in agpaboway sa kansiyo no siyo piyagkabeet Diyos.
[44] Kadayo in mga agpanakaw agipako sa mga kodos sa kansiyo bangen, siro kataw din ina agpangimok sa kansiyo.
[45] Ibat tangali anggan mangiriyan lakoy makelep wa in boo kobat.
[46] Paka mangiriyan wa lakoy mango Isos keyen, Ili, Ili, lama sabaktani? In beet siyabi, Kangay Diyos, kangay Diyos, nakay batang ako kaimo biyaliwan?
[47] In kalaati asin agitaydek karengey ina matang siro keyen, Kansiyo piyagberya Iliyas.
[48] In osai toloy domalagan komwa kagwali lomot, siyogbo sa toba, piyaistebek sa tanrak, piyasopsop kay Isos.
[49] Kamay in amat wakay keyen, Ayaw kay ngani, kantam panayaen no Iliyas ngani batay rateng agpaboway sa kansiyo.
[50] Isos mango wakay lakoy. Kalbas mabogloy wa in payeng.
[51] Ina daan pag betek sa balay lakoy Diyos toloy marognit in damit pamengbeng ibat sa ogbos anggan sa ngato. Manloni wa lakoy, mangabaslag in bato asin pag kobat.
[52] Mabolwat in mga lebengan, pangkabowayan in mga bodang Diyos mga matay wa.
[53] Siro panaw wa sa mga lebengan, kalbas paka Isos boway wakay siro pataboy sa Irosalim, in Maal wano pag Bayan, siro lomwas asin sa karowan mangyan.
[54] In kapitan osai in kansiyo mga sarig agdamay kay Isos, paka lomoni wa osai ngiitan in mga mibaloy, siro pangkalimowan wano agpangirabot. Siro keyen, Ina mana ngani Bodang Diyos.
[55] Aronaw din mga kagbaiyan sa adayonaw kayte agriwa. Ibat daan sa Galiliya siro agyanggat agtolong kay Isos sa kansiyo mga kailangan.
[56] Kadayo Mariya in taga Magdala, osai Mariya in kay kora Santiyago inang osai kay Osi, kadayo in inang Santiyago osai Owan.
[57] Paka malabo wa in ibeng apo rateng osai ka kaliyakiyan in ngaran Osi taga Arimatiya. Siyo mayaman, agadar din kay Isos.
[58] Siyo pataboy kay Pilato, kansiyo yaayay in bilog Isos. Pilato agsogo keyen, Taboyen wa.
[59] Matang kiyowa wa Osi in bilog Isos, kansiyo tiyeem bayo daan pag benang lino.
[60] Kansiyo piyabolalang sa kansiyo batay lebengan, in bayo kay kiyali piyangwat leyang sa bato lakoy. Kalbas kansiro liigan osai ka bato lakoy piyabengbeng sa bibi leyang. Kalbas siyo panaw wa.
[61] Asina din Mariya in taga Magdala osai in osai ka Mariya, siro agtokkaw sa bangen lebengan.
[62] Paka goribas wa, in beet siyabi paka kadalan wa in Biirnis, in mga poon sasirdoti osai in mga Parisiyo maysarigan pataboy kay Pilato.
[63] Siro keyen, Laki Gobirnador, kanyam piyagremrem in siyabi ina pag bosliyen. Taite kay in siyo agkaboway kay kansiyo siyabi keyen, Sa katolo ka ibeng ako batay wakay boway.
[64] Na in maal kao agsogo agdamay gayed sa lebengan anggan sa katolo ka ibeng. Karam no asin pataboy in kansiyo mga agadar tiyakaw in bilog, kalbas kansiro wakay piyagbarita sa mga mangyan keyen siyo boway wakay, no kataw ina na in siro batay agpadaya labi kay kataw in datiyan.
[65] Pilato keyen, Dali wa, kamo komwa wa mga sondalo, ista wa kamo, kanyo pakarigenen in lebengan. Wara kamo sa kanyo abaloyan.
[66] Kadogay siro ista ngani, kansiro tiyandaan in bibi lebengan matang atawanan no batang wa biyoswang. Kalbas piyadamayan wa.