[1] Paka Isos kalbas agpatoldo ina pag boo kansiyo siyabi sa kansiyo mga agadar keyen,
[2] Kamo katawan sabali wa in piyasta piyagawit Paskowa. Kalbas in Bodang Mangyan batay wa piyadakep matang piyako sa kodos.
[3] Ina daan pag betek, in mga poon sasirdoti osai in mga koyay sa mga Odyo siro agtipon sa balay lakoy in mabwat pag poon sa mga sasirdoti, in ngaran Kaypas.
[4] In kansiro piyagpolong Isos kansiro piyagbantaan madakep idapo batay katawan, matang siyo mabono.
[5] Matang siro keyen, Ayaw sa betek piyasta. Isag mangagolo in mga mangyan.
[6] In Isos sa bayante Bitanya sa balay Simon in batang apo kagwali panyakit,
[7] in siyo agpamangan, osai ka kagbaiyan pasabangen sa kansiyo apo piyagbaba osai ka pagsoroyan piyangwat batang bato lakonaw in bayad. In galem mala masadap lakonaw wano in bayad. Kalbas ina pag mala masadap boo wa kansiyo biyobo sa olo Isos.
[8] Paka ina ngiitan in mga agadar siro agkagalit wa sa kagbaiyan, keyen, Nakay batang kiyataw waget ina in mala masadap?
[9] No nges karai ina piyabili na lakonaw in abel bayad, kalbas taboyen sa mga maidap.
[10] Kamay Isos katawan daan in kansiro remrem. Matang siyo keyen, Nakay batang kanyo piyagkataw ina in kagbaiyan? Maal wano in kansiyo piyangwat sa kangay.
[11] In mga maidap palagi daan sa kanyo, kamay ako idwa dogay idapo wa.
[12] Kaya kansiyo biyobo in mala masadap sa kangay bilog, matang ako piyagsandata batay liyebeng.
[13] Totoo in kangay piyagsabi, kamayba saano piyatoldo in Maal pag Barita, ista batay din piyagawit in piyangwat ina pag kagbaiyan matang siyo idbatay alibangawan.
[14] In osai sa Labing Dowai ka agadar, in ngaran Odas Iskaryoti, siyo pataboy sa mga poon sasirdoti.
[15] Siyo keyen, No kamo tiyolong matang Isos madakep, na nakay in kanyo batay bayad? Matang siyo piyakan tatlompo lakoy ka kowarta pilak.
[16] Kalbas ibat daan ina pag betek Odas agpamangkit wa padalan agpadakep kay Isos.
[17] In tokaw pag ibeng in Piyasta in piyagkoman tinapay idapo pamaistobo, pasabangen kay Isos in kansiyo mga agadar, agtanong keyen, Saano kaimo beet kanyam sandataen in kaimo batay Yapon sa Paskowa?
[18] Keyen Isos, Kamo pataboy sa bayan lakoy, pamangkiten ina pag mangyan. Kamo keyen, Anda in bilin in Agpamatoldo, agkabangen wa in kangay kabetek. Sa kaimo wa balay ako batay mamangan in Yapon sa Paskowa, osai in kangay mga agadar.
[19] Piyangwat ngani in mga agadar in bilin Isos, kansiro siyandata in Yapon sa Paskowa.
[20] Paka yabi wa Isos tomokkaw wa batay agkoman, osai in labing dowai ka agadar.
[21] Paka siro agkoman wa Isos miplaong keyen, In kangay piyagsabi in osai sa kanyo batay agpadakep sa kangay.
[22] Kalbas maloba wano malingetnget in kansiro remrem. Siro baatte osai keyen, Laki Kapwan, yewed ako, aon?
[23] Keyen Isos, In osai ka agpalanglang sa kangay, siyo wa in batay agpadakep sa kangay,
[24] kataw in siyabi sa mga Agisolat in Bodang Mangyan batay maablaw. Kamay ayawte wa in batay agpadakep sa kansiyo. Maal kay nges sa kansiyo in siyo ayaw wa biyodang.
[25] Kadayo Odas in batay agpadakep kay Isos, siyo din keyen, Laki Agpamatoldo, yewed ako, aon? Keyen Isos, Kao in agsabi ina.
[26] In siro agpalpamangan Isos omatang sa tinapay, siyo agpasalamat, kalbas kansiyo piyandodo, tiyaboy sa mga agadar. Siyo keyen, Anda in kangay bilog. Kanyo kowaen, komanen.
[27] Kansiyo din yaatang in pagpangineman, kansiyo piyasalamatan, kalbas tiyaboy din sa kansiro keyen, Kamo boo minem asin.
[28] Angkataw ina in kangay daya in panrigen sa kasondowan Diyos osai kansiyo mga bodang, in kangay daya batay piyagbobo panawen sa karowan, matang liibangaw in kansiro mga daet.
[29] Kangay piyagsabi sa kanyo, ibat ngona ako idbatay wa minem in sapa batang sa raweg obas, anggan sa ibeng kitam wakay malpanginem in bayo pag sapa obas sa sakopan kangay Amang.
[30] Paka siro kabaren wa osai ka awit, siro pataboy wa sa boksor Olibowan.
[31] Isos miplaong wakay sa kansiyo mga agadar keyen, Isag yabi ako batay biyaliwan kamo boo, kataw in piyagsabi sa mga Agisolat keyen, In agalapet topa kangay batay biyono, kalbas in mga topa batay omarabang.
[32] Kamay paka ako boway wakay ako batay tokaw sa kanyo sa Galiliya.
[33] Keyen Pidro, Kamayba kao biyaliwan in boo, ako idbatay wano mamaliwan sa kaimo.
[34] Keyen Isos, Totoo ngani, ngona daan pag yabi yewed kay anggan panalaok manok kao makatolo wa agpamangyan sa kangay.
[35] Kamay Pidro keyen, Kamayba ako piyagbono wa sarig kao, ako idbatay wano agpamangyan sa kaimo. Kadayo in boo mga agadar, kataw din ina in siyabi.
[36] Isos rateng sa kobat piyagawit Gitsimani agyanggat in kansiyo mga agadar. Siyo keyen sa kansiro, Kamo atai wa tomokkaw. Ako ista kayte agbangen agpandalangin.
[37] Kamay Pidro osai in dowai ka bodang Sibidiyo kansiyo piyaanggat. Kalbas malingetnget wano in kansiyo remrem, agkabyatan wa gayed.
[38] Kansiyo siyabi sa kansiro keyen, In kalobaen in malingetnget sa kangay galem anggan tomag ako batay wa matay. Kamo atai daan, ako damayen.
[39] Siyo ista kayte agbangen patalegeb, agpandalangin keyen, Kangay Amang, no nges maal, na ayaw wa sa kangay anda pag kaidapan. Kamay ayaw in kangay beet in mibaloy, dayem in kaimo daan.
[40] Siyo moli wakay sa mga agadar, siro aratengan agesek. Siyo keyen kay Pidro, Kamo mana agesek? Kamo mana yewed kabaloy agdamay kangay kamayba kadogayte waget?
[41] Kamo agdamay wa ngani, mandalangin matang paka kamo piyagtepeng wa kamo idbatay diyaeg. Sandata wa nges in kanyo remrem, kamay in bilog mainaen.
[42] Kalbas siyo ista wakay mandalangin keyen, Kangay Amang, no yewed mayadi ako lomawey atai pag kaidapan, no kailangan ngani ako domalan asin, na dali wa, in kaimo beet in pangwaten.
[43] Kalbas siyo moli wakay, kora Pidro aratengan wakay agesek, angkataw siro agrongronga wano.
[44] Matang siro kansiyo wakay biyaliwan. Katolo wa in siyo ista wakay agpandalangin. Kataw daan in siyabi karai.
[45] Paka siyo moli wakay siyo keyen, Kamo mana agesek kay, aglimbang daan? Baati, ngona wa in kabetek, in Bodang Mangyan batay wa piyagpadakep sa mga agpamangwat daet.
[46] Tomaydek wa. Kitam wa. Anda wa in batay agpadakep sa kangay.
[47] Isos agiplaong kay rateng wa Odas in osai sa labing dowai. Siyo aronaw sarig mangyan agbaba mga pisaw lakoy osai mga garoti. Siro siyogo in mga poon sasirdoti osai in mga koyay mga Odyo.
[48] Sa dalan kay Odas agtaboy wa tanda keyen, In kangay isag biyelag kiyapet, na ina wa in kanyo piyagpamangkit. Toloy wa kanyo dakepen.
[49] Paka kalbas, Odas toloy wa pasabangen kay Isos keyen, Ko, laki Agpaadar, kao mana atai? Kalbas toloy kiyapet.
[50] Keyen Isos, Dali wa, laki, pangwaten wa in dailan kaya kao atai pataboy. Kalbas Isos siyonggaban in mga mangyan, siyo diyakep.
[51] In osai sa mga sarig Isos liyakso wa in pisaw lakoy, toloy piyalang in sogowan in mabwat pag poon sa mga sasirdoti, maagis in talinga.
[52] Kamay keyen Isos, Soroyen wakay sa kaloban in kaimo pisaw. Angkataw in mga agpamogot, siro boo batay piyogot.
[53] Kao mana yewed katawan no ako mangayay tolong sa kangay Amang, na ako toloy batay piyakan mga angil, labi kay pito ka laksa.
[54] Kamay no kataw ina na idbatay wa mibaloy in siyabi sa mga Agisolat keyen kailangan anda mibaloy.
[55] Ina pag betek Isos miplaong wakay sa karowan keyen, Ako nakay, tolisan? Baina kamo atai pataboy agpalpamaba mga pisaw lakoy osai mga garoti matang ako madakep. Bago ako ibeng ibeng sa balay lakoy Diyos agtokkaw agpatoldo, ako yewed kanyo diyakep.
[56] Kamay kaya anda boo mibaloy matang mibaloy in siyabi in mga poropita sa mga Agisolat. Kalbas toloy wa mandalagan in boo mga agadar. Isos biyaliwan wa.
[57] Isos biyaba in mga domakep sa kansiyo sa balay lakoy Kaypas in mabwat pag poon sa mga sasirdoti. Ista agkatipon in mga agpatoldo in mga Batas, osai in mga koyay sa mga Odyo.
[58] Pidro mangagak kamay yewed agpasabangen. Siyo anggan sa tongkodan balay in mabwat pag poon sa mga sasirdoti, misoroy sa alabat, tomokkaw sa tongkodan paagem sa mga agdamay, matang ngiitan no nakay in batay kalobosan.
[59] In mga poon sasirdoti osai in boo tanongan in mga Odyo, siro agpamangkit mangyan agpasaen kay Isos, matang siyo mapabono.
[60] Kamay siro idapo wano ngiitan kamayba aronaw in omadap asin agpansabi mga yewed totoo panawen kay Isos. Kadogay apo dowai ka mangyan tomaydek,
[61] miplaong keyen, In siyabi ina pag mangyan siyo kabaloy agregnas in balay lakoy Diyos kalbas kansiyo wakay apangwat tolo waget ka ibeng.
[62] romaydek in mabwat pag poon sa mga sasirdoti, miplaong kay Isos keyen, Kao mana idapo batay beles sa kansiro mga bintang sa kaimo?
[63] Kamay Isos yewed miplaong. Kalbas siyabi in mabwat pag poon sa mga sasirdoti sa kansiyo keyen, Ako sogowan in agkaboway pag Diyos agotos sa kaimo keyen, Kaimo wa sabiyen sa kanyam no kao ngani in Kiristo in Bodang Diyos.
[64] Isos meles wa keyen, Baina, kaimo wa siyabi. Kamay anda in kangay piyagsabi sa kanyo, ibat ngona kanyo batay piyagngitan in Bodang Mangyan agtokkaw sa pamalang agbangen in Apo lakoy Kabaloyan, kalbas batay din agrateng wakay sa mga libo sa langit.
[65] In mabwat pag poon sa mga sasirdoti, paka karengey ina siyo agalitan wa gayed, toloy riyognit in kansiyo lambong. Siyo keyen, Piyawa, agpanonggar sa Diyos ina. Kitam idwa kailangan agpamangkit kay in sombong. Kamo wa daan in karengey ina pag agpanonggar.
[66] Nakay in kanyo remrem? In amat keyen, In maal kay siyo bonowen wa.
[67] Kalbas Isos piyanopayan sa mata, piyanontok. In roma wakay agsampal sa kansiyo,
[68] agiplaongan keyen, Kao pag Kiristo. No kao ngani poropita, na nakay in somampal sa kaimo?
[69] Pidro agtokkaw sa tongkodan. Apo kagbaiyan sogowan pasabangen sa kansiyo keyen, Kao sarig din Isos in taga Galiliya, aon?
[70] Kamay Pidro tomanggi sa pangkit in boo keyen, Ako idapo katawan in kaimo piyagsabi.
[71] Pidro pataboy sa sakbawan alabat. Siyo ngiitan wakay osai ka sogowan kagbaiyan. Keyen in sogowan, Ina pag kaliyakiyan sarig din Isos in taga Nasarit.
[72] Pidro tomanggi wakay keyen, Kamaybawa kayno, ako yewed katawan ina pag mangyan.
[73] Yewed kayte dogay in mga agtaydek asin pasabangen kay Pidro keyen, Kao wa ngani in osai sa kansiro. Baina, kaimo agiplaong kataw ina.
[74] Pidro agpanompa wano keyen, Kamayba ako matay wa, ako yewed ngani katawan ina pag mangyan. Kalbas toloy wa tomalaok in manok.
[75] Kalbas Pidro karemrem in siyabi Isos keyen, Yewed kay panalaok manok kao makatolo agpamangyan sa kangay. Siyo toloy wa panaw, agpanangis wa gayed maloba.