[1] Ina daan pag betek in gobirnador Irodis karengey in barita panawen kay Isos.
[2] Kansiyo siyabi sa kansiyo mga sogowan keyen, Ina Owan in Agpamaotismo. Kaya siyo kabaloy agpangwat ina pag mga makasoyo angkataw siyo batang matay tagoli wakay boway.
[3] -
[4] Angkataw taite kay Irodis piyagpangelel Owan keyen, Daeten in kao komwa kay Irodiyas in babai kaimo belag Pilipi. Kalbas Irodis agpadakep kay Owan matang biyakos osai piyabilanggo.
[5] Kansiyo beet Owan bonowen kamay siyo agkalimo sa mga Odyo angkataw kansiro atawanan Owan osai ka poropita.
[6] Paka rateng wa in ibeng kaboslot Irodis in kay Irodiyas daraga somayaw sa adap in mga mangyan. Kalbas Irodis maloba wa anggayan.
[7] Kalbas kansiyo piyangako maloba sa daraga keyen, Kangay wa batay tiyaboy sa kaimo in kamayba nakay kaimo piyagayay.
[8] Kalbas panawen sa siyabi kansiyo inang in daraga keyen, Ngona wa daan kaimo taboyen sa kangay sa osai ka palanggana in olo Owan in Agpamaotismo.
[9] Kalbas Irodis agrongkot. Kamay panawen arengeyan in mga mangyan in kansiyo pangako, kansiyo siyogo keyen, Taboyen wa sa daraga in kansiyo piyagayay.
[10] Kalbas Owan kansiyo piyapogot sa bilanggowan.
[11] Kalbas yaangan wa sa palanggana in olo, bayo tiyaboy sa daraga, kalbas toloy wakay kansiyo biyaba sa kansiyo inang.
[12] Rateng in mga agadar kay Owan, kansiro kiyowa in kansiyo bilog, kalbas liyebeng, kalbas pataboy wakay kay Isos agbarita.
[13] In Isos karengey ina siyo somakay sa osai ka bangka, siyo agboktong pataboy sa osai ka betek. Ina abaritaan in mga mangyan, siro panaw sa mga bayan, mangagak sa kansiyo kamay agipanaw sa balabaan dagatte.
[14] In lompot Isos sa balabaan kansiyo ngiitan in karowen in mangyan, kalbas siyo agpakayawte sa kansiro. Kalbas piyaoraw in mga apo maskit kansiro piyagbaba.
[15] Agkabayapon wa in kansiyo mga agadar pasabangen kay Isos. Siro keyen, Anda adayonaw pag kobat, agkalabo wa in ibeng. Na kaimo wa palpasen in mga mangyan matang pataboy sa mga balay matang siro kabili pamangnen.
[16] Isos keyen, Kamaybawa idwa siro panaw. Kamo wa in agpakan pamangnen sa kansiro.
[17] Siro keyen, In atai kantam lima waget ka tinapay dowai ka isda.
[18] Keyen Isos, Amba, atai wa babaen.
[19] In mga mangyan kansiyo piyatokkaw sa lalosenan. Kalbas kansiyo kiyowa in lima ka tinapay osai in dowai ka isda. Siyo manangra sa langit, agpasalamat sa Diyos. Kalbas kansiyo piyandodo in mga tinapay. Kansiyo wa siyogo in mga agadar keyen, Panaboyen wa sa mga mangyan.
[20] Siro boo malpamangan, anggan bosog. In mga agadar agtipon in mga mitera piyandodo. In kansiro matipon labing dowai ka galang makno kay.
[21] Lima ka libo ka kaliyakiyan in mamangan. Apo din mga kagbaiyan, osai in mga bodang.
[22] Toloy kay Isos piyasakay sa bangka in mga agadar, piyatokaw sa ripay dagatte, anggan kansiyo wa piyapanaw in mga mangyan.
[23] Paka panaw wa in mga mangyan siyo monaker wa sa boksor batay mandalangin. Abayaponan siyo agboktong sa boksor.
[24] In bangka sa kagwaraan wa dagatte, piyagsabongan alon angkataw piyagtagbo kowaya.
[25] Paka agkaboka wa Isos mangagak sa kansiro agipanaw aglaed sa sapa.
[26] Paka siyo ngiitan in mga agadar alimowan, mangirabot, mango keyen, Kablag.
[27] Isos toloy miplaong keyen, Kamo ayaw alimowan. Ako daan. Pakaeyaten in kanyo remrem.
[28] Miplaong Pidro keyen, Laki Kapwan, no kao in Kapwan, na ako pataboyen asin sa kaimo papanawen palaeden sa sapa.
[29] Keyen Isos, Aywawa. Pidro lomabo sa bangka agbikang wa sa sapa, pataboy kay Isos.
[30] Paka ngiitan siyo in lakonaw pag kowaya siyo alimowan wa, agparakay agkaleggeb. Siyo mango keyen, Kapwan, ako kowaen wa.
[31] Isos toloy omatang kay Pidro, miplaong keyen, Kalakoyte in kaimo paniwala. Nakay batang kaimo remrem piyagbaslag?
[32] In siro omakyat sa bangka omempet wa in kowaya.
[33] In mga sa bangka toloy wa agmaal sa kansiyo keyen, Kao ngani in Bodang Diyos.
[34] Paka kapotol wa sa dagat, tomakdang sa kobat Ginisarit, siro lompot.
[35] Isos atawanan in mga taga asin, Toloy wa piyagpabarita sa mga balabaan keyen, Isos asina wa. Kalbas biyaba sa kansiyo in boo apo maskit.
[36] Kansiro siyabi sa kansiyo keyen, Pakapkapen kamayba sa tangrawan waget kaimo lambong. In boo komapkap maoraw wakay, idapo wa in maskit.