[1] Apo mga Parisiyo pasabangen kay Isos, osai mga Sadosiyo. Kansiro beet siyo abel sa agiplaong. Siro agayay keyen, Laki Isos, papangkiten sa kanyam osai ka tandaan batang sa langit.
[2] Keyen Isos, In agkalabo wate in ibeng kamo keyen, Goribas pag ibeng maal, baati danggaen in langit.
[3] Sa omaga kamo keyen, Agodan, baina lened in langit. Kamo katawan agpangkit sa mga tanda sa langit kamay yewed kanyo piyagpangkit in mangibaloy wa tandaan ngona pag betek.
[4] In ngona wa pag mga mangyan daeten, aleleng. Kamo agpamangkit in tandaan. Idapo batay piyapangkit sa kanyo no yewed ina waget in mibaloy kay Onas. Kalbas siro biyaliwan wa Isos, siyo panaw wa.
[5] Siro motol sa dagatte. In mga agadar alibangawan agbaba pamangnen tinapay.
[6] Keyen Isos, Agingat kamo sa pamaistobo tinapay sa mga Parisiyo, osai sa mga Sadosiyo.
[7] In mga agadar agpaypolongan keyen, Kaya ina siyabi Isos panawen kitam idapo piyagbaba pamangnen.
[8] Isos katawan daan in kansiro piyagpanggisodan. Siyo keyen, Kalakoyte in kanyo paniwala. Baina kanyo piyagpaypolongan in kamo idapo pamangnen.
[9] Ikkay mana kanyo atawanan? Kamo mana agkalibangaw wa sa lima ka tinapay diyodo, kalbas piyakoman sa lima ka libo ka mangyan. Nangkaro ka galang in tera?
[10] Osai in pito ka tinapay piyakoman sa opat ka libo ka mangyan. Nangkaro ka galang in tera?
[11] Na nakay batang ikkay kanyo atawanan in kangay beet siyabi karai yewed pamangnen?
[12] Kadogay kansiro wa atawanan in piyagsabi Isos yewed keyen agingat sa pamaistobo tinapay no yewed keyen agingat kamo sa piyagpatoldo in mga Parisiyo osai in mga Sadosiyo.
[13] Paka rateng Isos sa bangen bayan Sisariya Pilipos kansiyo tiyanong in kansiyo mga agadar keyen, Nakay in piyagsabi in mga mangyan, nakay kono pag mangyan ako in Bodang Mangyan?
[14] Siro keyen, In siyabi in kalaati keyen kao Owan in Agpamaotismo. Keyen wakay in kalaati kao Iliyas. Apo kay keyen kao Irimiyas, no yewed osai sa mga poropita.
[15] Keyen Isos, Sa kanyo wakay nakay? Ako nakay pag mangyan?
[16] Keyen Simon Pidro, Kao in Kiristo, in Bodang Diyos boway.
[17] Siyabi Isos sa kansiyo keyen, Laki Simon bodang Onas, kao anggayan wa, angkataw yewed mangyan in agpatoldo ina sa kaimo no yewed in kangay Amang sa langit.
[18] Kangay piyagsabi kaimo kao Pidro. Kalbas asin pag bato lakoy, kangay batay piyagtipon in barkadaan kangay mga bodang. Ina idbatay wano adaeg kamaybawa katayan.
[19] Kangay batay piyagtaboy sa kaimo in mga sosi sa sakopan langit. Kamayba nakay in kaimo piyagayaw sa kobat na ina batay din piyagayaw sa langit. In kaimo piyayagan sa kobat, na ina batay din piyayagan sa langit.
[20] Kalbas maloba kansiyo piyagayaw keyen, Ayaw kanyo agsabiyen kamayba kay nakay keyen ako in Kiristo.
[21] Ibat ina pag betek Isos agsabi sa kansiyo mga agadar keyen kailangan siyo pataboy sa Irosalim. Ista siyo batay piyaidapan maloba in mga koyay osai in mga poon sasirdoti osai in mga agpatoldo in mga Batas Diyos. Siyo kansiro batay biyono, kamay sa katolo ka ibeng siyo batay wakay piyaboway.
[22] Isos piyasoway Pidro sa mga amat agadar, kalbas siyabiyan keyen, Laki Kapwan, ayaw kataw ina. Yewed mayadi ina mibaloy sa kaimo.
[23] Kamay Isos patobang kay Pidro keyen, Katanas, kao bali wa. Kao ageleg sa kangay dalan. In kaimo piyagremrem yewed in sa Diyos remrem, dayem in remrem mangyan.
[24] Kalbas siyabi Isos sa kansiyo mga agadar keyen, No in mangyan beet miyanggat sa kangay, na papaoriyen in kansiyo sadiri remrem, pasanen in kansiyo kodos, kalbas miyanggat sa kangay.
[25] Angkataw no in mangyan agaman sa kansiyo boway, na siyo batay aidapowan. Kamay in yewed agaman kansiyo boway panawen siyo agpaniwala sa kangay, na siyo batay kabel boway.
[26] Idapo kabolowan sa osai ka mangyan no kansiyo abel in boo kobat kamay in kapalit in kansiyo boway. In mangyan idapo batay piyagtaboy kapalit kansiyo boway.
[27] Angkataw ako in Bodang Mangyan batay rateng apo in kabaloyan lakoy kangay Amang, agyanggat in kangay mga angil. Ina pag betek batay piyabayadan in baatte mangyan panawen in kansiyo piyangwat.
[28] Kangay piyagsabi sa kanyo keyen, In kalaati atai sa kanyo idbatay matay anggan yewed kay kansiro ngiitan ako in Bodang Mangyan atai agtaboy agpansakop.