[1] Isos keyen, In Diyos agpapoon kataw in osai ka kapwan osai ka kobat. Siyo pasodip agpamangkit batay agpanawen sa kansiyo kobat.
[2] Siro maypolong in bayad sa boo ibeng agpanawen. Paka kasondo wa, siro siyogo wa agpanawen.
[3] Paka pangitlogan wa in ibeng siyo panaw wakay. Kansiyo ngiitan sa bayan mga agtaydek waget idapo agpanawen.
[4] Siyabi sa kansiro keyen, Kamo pataboy sa kangay, agpanawen sa kangay kobat. Kamo pakanen in sibay pag bayad. Siro toloy panaw.
[5] Paka morto in ibeng siyo mangkit wakay, mangiriyan mangkit wakay. Apo wakay ngiitan agtaydek, siyogo wakay.
[6] Paka agapon wa in ibeng mangkit wakay, apo wakay ngiitan agtaydek. Siyo keyen, Nakay batang kamo agtaydek waget boo ibeng?
[7] Siro keyen, Idapo batay agtaboy panawen. Siyo keyen, No kataw ina, na kamo pataboy sa kangay, agpanawen sa kangay kobat.
[8] Paka agkalened wa siyabi in kapwan sa kansiyo sogowan keyen, Beryaen wa in dokalakiyan, piyagbayadan wa. In paori rateng, ina in tokaw pakanen, in sa tokawan papaoriyen.
[9] In mga paori rateng in baatte osai piyakan bayad sibay sa osai ka boo ibeng.
[10] Paka biyerya wakay in mga tokaw in kansiro remrem siro piyagpakan labi kayte kalakoy. Kamay in baatte osai piyakan daan in bayad sa boo ibeng.
[11] Paka siro piyakan wa siro daeten wa in remrem sa kapwan kobat.
[12] Keyen, Osai wagette ka oras siro agpanawen, kami kamaybawa maibeng boo ibeng agpanawen. Na nakay batang piyaytikkalakoyan in bayad kami boo?
[13] In kapwan miplaong sa osai ka lalaki keyen, Laki, kao yewed kangay piyadaya. Kao piyakan in sibay in kanta polong karai sa boo ibeng.
[14] Kowaen in kaimo, kao panaw wa. Beet daan kangay biyayadan in mga paori kataw daan in kanyo.
[15] Ako in kapwan in kowarta. Nakay, yewed mana maal ako agremrem in kangay kowarta agbayad sa kanyo? Kao lames agkairis panawen ako mabait? Ina wa in kalobosan in kay Isos alimbawa.
[16] Kalbas siyo keyen, Na in mipaori agipatokaw, in tokaw agipaori.
[17] In Isos agonaker batay sa Irosalim, kansiyo piyasoway sa karowan in Labing Dowai ka agadar. Kansiyo siyabi
[18] keyen, Kitam agonaker wa agtaboy sa Irosalim. Ista ako in Bodang Mangyan batay piyadakep sa mga poon sasirdoti osai sa mga agpatoldo in mga Batas. Kansiro batay piyolong ako bonowen.
[19] Kalbas ako batay piyagtaboy sa mga yewed Odyo, batay piyagmesa, piyagpamogbog, kalbas piyagpako sa kodos. Kamay sa katolo ka ibeng ako batay wakay piyaboway.
[20] Pasabangen kay Isos in kay Sibidiyo babai, agyanggat in kansiyo mga bodang. Siyo apo piyagayay matang siyo agpaereng wa sa bangen Isos.
[21] Kalbas keyen Isos, Nakay in kaimo beet? Kalbas keyen in inang, Dayem nges anda in kangay dowai ka bodang, dogayan paka kao agpapoon wa lakoy, na kaimo patokkawen sa kaimo balabaan agtolong sa kaimo agpapoon, in osai sa pamalang agbangen, in osai sa tagwala agbangen.
[22] Siyabi Isos sa kansiro keyen, Kamo yewed katawan in beet siyabi in kanyo piyagayay sa kangay. Kamo lames batay katiis sa kaidapan kangay batay diyalan? Siro keyen, Batay din.
[23] Keyen Isos, In kaidapan batay kangay diyalan na kanyo din batay piyagdalan. Kamay yewed sa kangay in agsabi no nakay in batay agtokkaw sa kangay pamalang osai sa kangay tagwala. Ina pag mga tongkolin wara kangay Amang no sa nakay agbangen in kansiyo piyagtaboy ina.
[24] Paka karengey ina in sampo ka agadar siro agkagalit wa kay dokalaki.
[25] Kalbas biyerya Isos in kansiyo labing dowai ka agadar. Siyo keyen, Kanyo atawanan, sa mga yewed Odyo in kansiro mga poon agpansakop sa kansiro, in kansiro mga lakonaw agpapoon sa kansiro.
[26] Kamay sa kanyo ayaw kataw ina. Dayem no nakay in beet sa kanyo lakonaw, na kailangan siyo sogowan.
[27] Osai no nakay in beet poon na siyo batay kanyo piyagalapet sogowan.
[28] Kataw ako in Bodang Mangyan, kaya atai pataboy yewed batay agsogo, no yewed batay sogowan, osai piyagtaboy kangay boway matang bayad sa karowan.
[29] In siro agipanaw sa bayan Iriko, Isos yaanggatan in aronaw mangyan.
[30] Apo dowai ka kaliyakiyan beleg agtokkaw sa balabaan dalan. In siro katawan Isos asin agdalan siro agpango lakoy keyen, Laki Kasokponan Dabid, kami ayawte.
[31] Siro siyabiyan in mga mangyan, yaayaw aglalae. Kamay siro labi kayno aglalae keyen, Laki Kasokponan Dabid, kami ayawte.
[32] Isos tomaydek wa, siro biyerya, kalbas tiyanong keyen, Nakay in kanyo beet kangay piyangwat sa kanyo?
[33] Siro keyen, Laki, in kanyam beet kami kangitan wakay.
[34] Isos agpakayawte sa kansiro, yaatang kansiro mga mata. Toloy wakay siro kangitan, miyanggat sa kansiyo.