[1] Osai ka Ibeng Pamainga, kora Isos mipadalan sa osai ka agay. Agkayawes wa in kansiyo mga agadar, siro manlotok takway, kansiro liyokka, kalbas kiyoman wa in begas.
[2] Paka ina ngiitan in mga Parisiyo kansiro siyabi kay Isos keyen, Kao mangkit, in piyagpangwat kaimo mga agadar. Ina piyagayaw sa Ibeng Pamainga.
[3] Keyen Isos, Yewed mana kanyo biyasa in piyangwat Dabid in siyo agkayawes wa, osai in kansiyo mga sarig.
[4] Siyo misoroy sa balay Diyos, kansiro kiyoman in tinapay piyaandog sa Diyos. Piyagayaw in mga Batas ina pag tinapay kansiro kiyoman, no yewed in mga sasirdoti waget in maal mamangan ina.
[5] Yewed din mana kanyo biyasa sa Batas no betek Ibeng Pamainga na in mga sasirdoti sa balay lakoy Diyos agpanawen daan, kamay ina yewed daet.
[6] Kangay piyagsabi sa kanyo, in atai labi kay kalakoy sa balay lakoy Diyos.
[7] No nges kanyo atawanan in beet siyabi in Agisolat keyen, In makaanggay sa kangay yewed waget in agsamba, dayem kadayo in agpakayawte sa mga amat, na yewed kanyo piyadaet in mga mangyan yewed daet.
[8] Ako in Bodang Mangyan Kapwan din in Ibeng Pamainga.
[9] Isos panaw wa pataboy sa kansiro balay pagpaniponan.
[10] Ista apo osai ka kaliyakiyan makenet wa in osai ka bakwaw. Ista din in mga mangyan agkabeet Isos sombongen, matang siro agtanong keyen, Maal lames sa Batas in agpaoraw sa Ibeng Pamainga?
[11] Keyen Isos, No kamo apo ayop malabo sa langa sa Ibeng Pamainga na nakay, idbatay wa mana kanyo kiyowa?
[12] Labi kay maal in mangyan osai in ayop. Na maal sa Batas in agpangwat maal kamayba sa Ibeng Pamainga.
[13] Kalbas kansiyo siyabi sa kaliyakiyan keyen, Odoyen wa in kaimo bakwaw. Kalbas yoodoy ngani kansiyo bakwaw, toloy wakay maal, mibaloy wakay kataw in osai agbangen.
[14] Kalbas panaw in mga Parisiyo, maypolongan no nangkataw lames batay mabono Isos.
[15] Amatangan Isos in kansiro piyagremrem, matang siyo panaw wa asin. Aronaw in miyanggat sa kansiyo. Kalbas kansiyo piyaoraw in boo mga apo maskit.
[16] Kamay siro maloba kansiyo piyagayaw agpamaton sa roma na siyo in agpaoraw.
[17] Matang mibaloy wa in siyabi Isaiyas in poropita keyen,
[18] Baanda, in sogowan kangay iidang, kangay piyagmaal gayed, in kangay ngani piyagkaanggayan. Kangay batay piyabalay sa kansiyo in kangay Abyan. In kansiyo batay piyalowas in kangay mga remrem sa boo mangyan.
[19] Idbatay siyo daegan, idbatay agpango, idbatay maksen in kansiyo agiplaongan sa mga tongkodan,
[20] Idbatay kansiyo piyaidapo kabolowan in mainaen, idbatay kiyaplep in tinglaw agkaplek wa, anggan ina pag remrem Diyos mandaeg wa gayed.
[21] In boo mga mangyan batay agpasandig sa kansiyo kabaloyan.
[22] Biyaba kay Isos in osai ka kaliyakiyan piyaglowasan mamaw, beleg, osai yewed kaiplaong. Siyo piyaoraw Isos, kaiplaong wakay, kangitan wakay din.
[23] In boo mangyan agsoyo keyen, Isos wa lames in kay Dabid Kasokponan?
[24] Kamay paka ina arengeyan in mga Parisiyo kansiro siyabi keyen, Kaya ina pag mangyan kabaloy agboyaw mga mamaw angkataw in poon mga mamaw Bilsibol in agtaboy sa kansiyo in kabaloyan agboyaw.
[25] Atawanan Isos in kansiro piyagremrem, matang siyo keyen, In baatte sakopan no agpalawayan, na batay masida. Osai in baatte bayan osai talnakiyan no agpalawayan, na batay wa din masida.
[26] Na kataw din ina Katanas no siyo agboyaw kay Katanas, na siyo daan in aglaban sa kansiyo sadiri, na batay masida in kansiyo sakopan.
[27] No kanyo piyagsabi in Bilsibol in agpakan kabaloyan sa kangay agboyaw mamaw, na in galem ina pag siyabi kadayo in mga agpaniwala sa kanyo, batang din kay Bilsibol in kansiro kabaloyan agboyaw mamaw. Na siro wa din in batay agsabi keyen, Kamo baribid.
[28] Kamay no in Abyan Diyos in agpakan sa kangay in kabaloyan agboyaw mamaw na in beet siyabi in Diyos agparakay wa agpapoon sa kanyo.
[29] Nangkataw batay aisoroy in balay in osai ka mangyan maeyat, no yewed tokaw biyakos in kapwan? No mabakos wa na bayo batay aisoroy in balay, matakaw in kansiyo mga sangkap.
[30] In yewed agiyagem sa kangay, na aglaban sa kangay. In yewed agtolong sa kangay agtipon, na agpanripatak.
[31] Na kangay piyagsabi sa kanyo, batay piyaglibangaw in boo daet osai aglibak. Dayem in aglibak sa Abyan Diyos, ina idbatay piyaglibangaw.
[32] In miplaong aglaban sa Bodang Mangyan ina batay liibangaw sa kansiyo, kamay in agiplaong aglaban sa Betek pag Abyan na idbatay wa daan malibangaw in kansiyo daet kamayba ngona, kamayba dogayan.
[33] Siyabi din Isos sa mga Parisiyo keyen, Kantam remrem no maalen in raweg na maalen din in poon yangaw, kamay no daeten in raweg na daeten din in poon yangaw, angkataw sa raweg atawanan in poon.
[34] Kamo mga aleleng, mga kagwali dopong, na nangkataw kamo batay kasabi in maal? Angkataw no nakay in piyaglakonaw in mangyan sa kansiro remrem na ina in kansiyo piyagsabi.
[35] Maal in piyagsabi in maal pag mangyan batang sa kansiyo maal pag remrem. Daeten in piyagsabi in daeten pag mangyan angkataw kansiyo remrem makno daet.
[36] Kangay piyagsabi sa kanyo keyen, Sa Ibeng in Diyos agosap in baatte mangyan batay piyagbotog panawen sa baatte kansiyo ngona agiplaong idapo kabolowan.
[37] Angkataw no daeten in kanyo agiplaong na kamo batay piyarosa. No maalen in kanyo agiplaong na kamo idbatay piyarosa.
[38] In mga Parisiyo osai mga agpatoldo in mga Batas Diyos agsabi kay Isos keyen, Laki Agpamatoldo, papangkiten sa kanyam in makasoyo pag panawen matang atawanan kao apo in kabaloyan Diyos.
[39] Keyen Isos, Kamo pag mga mangyan daeten, yewed betek sa Diyos. Kamo agpamangkit in makasoyo pag panawen. Kamo idbatay piyapangkit makasoyo no yewed ina waget in makasoyo pag mibaloy kay Onas in poropita.
[40] No kataw Onas tolo ka ibeng, tolo ka yaabi mataw sa galem boyon isda lakoy, na kataw din ina ako in Bodang Mangyan batay mataw sa galem diya tolo ka ibeng.
[41] Sa Ibeng Agparosa in mga taga Ninibi batay tomaydek agsabi keyen parosaen in ngona pag mga mangyan. Angkataw in Onas agpatoldo sa kansiro siro mamarengey wa, biyenglay wa in kansiro mga daet. Kamay ngona apo atai labi kay kalakoy in kay Onas piyagpatoldo.
[42] Sa Ibeng Agparosa in kagbaiyan poon lakoy sa kobat Siba batay agsabi keyen parosaen in ngona pag mga mangyan. Angkataw siyo pataboy kay Solomon batang sa tangrawan kobat matang parengeyen in kansiyo betek pag agiplaong. Kamay ngona apo atai labi kay kalakoy in kay Solomon agiplaong.
[43] Isos keyen kay, Paka biyoyaw in mamaw sa osai ka mangyan, in mamaw agipanawan wa sa mamara pag kobat agpamangkit pagbalayan. No idapo ngiitan,
[44] na siyo batay keyen, Ako batay wakay moli sa kangay taite pagbalayan. Rateng wakay sa mangyan, kansiyo ngiitan piyakapya wa kamay idapo galem.
[45] Na siyo panaw wakay, batay kay agpaanggat pito ka mamaw labi kay kaloba siyo, misoroy wakay sa mangyan asina wakay in agbalay, matang in piyaglowasan maloba wa gayed labi kay sa datiyan. Na batay din kataw ina in mga mangyan agkaboway ngona.
[46] Isos agiplaong kay sa mga mangyan, rateng sa tongkodan kansiyo inang, kansiyo mga ariyan, agkabeet manggisodan sa kansiyo.
[47] Apo agiplaong sa kansiyo keyen, Asina sa tongkodan kaimo inang, kaimo mga belag agkapatagbo sa kaimo.
[48] Keyen Isos, Nakay? Kangay inang? Kangay mga belag?
[49] Kansiyo piyatoldo in kansiyo mga agadar, keyen, Anda dayem in kangay inang, in kangay mga belag.
[50] Angkataw no siyo in agpangwat in beet kangay Amang sa langit, na siyo wa in kangay inang, osai belag.