[1] Paka kadalan enem ka ibeng kay Isos piyaanggat kora Pidro osai Santiyago osai in kansiyo belag Owan. Siro monaker sa osai ka mabwat pag boksor.
[2] In siro ista kansiro ngiitan Isos miyalis, in kansiyo mata agrawa kagwali ibeng, in kansiyo damit maboksi wano agbalawas.
[3] Kalbas kansiro ngiitan Mowisis osai Iliyas agpanggisodan kay Isos.
[4] Kalbas kay Pidro siyabi kay Isos keyen, Laki Kapwan, maal in kami atai. No kao beet na ako batay agpangwat tolo ka barangas, in osai sa kaimo, in osai kay Mowisis, in osai kay Iliyas.
[5] Pidro agiplaong kay siro riirongan wa osai ka libo agrawa. Apo miplaong batang asin keyen, Anda wa in kangay piyagpakayawte pag Bodang, maloba wano ako anggayan sa kansiyo. Kamo mamarengey sa kansiyo.
[6] Paka arengeyan ina in mga agadar, siro maloba wano alimowan. Siro patalegeb wa.
[7] Isos pasabangen sa kansiro, kalbas siro yaatang keyen, Kamo tomaydek wa, ayaw wa agkalimo.
[8] Paka siro manriwa, idapo wa siro ngiitan no yewed Isos waget.
[9] In siro agongali wa sa boksor keyen Isos, In kanyo ngiitan ayaw kanyo agsabiyen kamayba kay nakay, anggan ako in Bodang Mangyan yewed kay batang matay kalbas boway wakay.
[10] Isos tiyanong in mga agadar keyen, Nakay batang piyagsabi in mga agpatoldo in mga Batas keyen kailangan tokaw rateng Iliyas?
[11] Siyo keyen, Iliyas ngani batay atai matang agpakapya in boote.
[12] Kamay kangay piyagsabi sa kanyo Iliyas atai wa. Kamay siyo yewed atawanan in mga mangyan. Kansiro piyangwat sa kansiyo in kansiro mga beet. Na kataw daan din ina kansiro batay piyagpaidapan ako in Bodang Mangyan.
[13] Kalbas atawanan in mga agadar keyen in kansiyo piyagsabi Owan in Agpamaotismo.
[14] Paka siro rateng wakay sa karowan mangyan osai ka kaliyakiyan pasabangen kay Isos, agpaselang sa kansiyo,
[15] keyen, Laki Kapwan kao agpakayawte sa kangay bodang kaliyakiyan. Siyo peypeyen, maloba piyagpaidapan. Mapret siyo misiba sa baya, no yewed misogbo sa sapa.
[16] Kangay wa biyaba sa kaimo mga agadar, kamay yewed kansiro apaoraw.
[17] Keyen Isos, Kamo in mga mangyan ngona mga baribid, mga yewed agpaniwala. Anggan nangkadogay kay kailangan ako mataw kay sa kanyo? Anggan nangkadogay kailangan ako agbanta kay sa kanyo? Atai babaen in bodang.
[18] In mamaw siyabiyan Isos, panaw wa sa bodang. Toloy wa maoraw in bodang.
[19] Kalbas in mga agadar kay Isos siro waget agtanong keyen, Nakay batang yewed kanyam apamoyaw in mamaw?
[20] Keyen Isos, Panawen sa kalakoyte in kanyo paniwala. Ayaw alibangawan anda, no in kanyo agpasandig sa Diyos kamayba kalakoytete kataw in beter moktasa na kamo kabaloy agsabi atai pag bolod keyen kao panaw wa, ista wa pataboy. Na ina batay panaw. In boote kanyo batay abaloyan.
[22] In agpaysarigan in mga agadar sa kobat Galiliya siyabi Isos sa kansiro keyen, Ako in Bodang Mangyan batay piyadakep sa mga mangyan,
[23] batay biyono. Kamay sa katolo ka ibeng ako batay wakay piyaboway. Kalbas in mga agadar maloba wa manremrem.
[24] Paka siro rateng sa bayan Kapirnaom pasabangen kay Pidro in mga agpaningil bowis sa balay lakoy Diyos. Siro keyen, In kanyo lames agpamatoldo agbayad bowis sa balay lakoy Diyos?
[25] Keyen Pidro, Aon. In siyo misoroy sa balay, siyo yewed kay miplaong, siyabi Isos keyen, Laki Simon, nakay in kaimo remrem? In mga poon lakoy atai sa kobat, sa nakay agbangen in kansiro piyagkowaan bowis, osai sa kansiro mga bodang, osai sa mga panyawan?
[26] Keyen Pidro, Sa mga panyawan. Keyen Isos, No kataw ina, na idwa piyagpabayadan in mga bodang.
[27] Kamay matang siro yewed agkagalit sa kanta, kao pataboy wa sa dagat, benglayen wa in biktang. Kowaen in tokaw pag isda kaimo abel, ngangaen wa in bibi, kao apo ngiitan kowarta pilak. Na kowaen, ista taboyen, bayad kanta bowis.