[1] Paka kalbas, Isos piyaanggat in Abyan Diyos sa moyod matang piyagtepeng in diyablo.
[2] Apatnapo ka ibeng Isos yewed mamangan kamayba din yabi, kalbas siyo agkayawes wa.
[3] Rateng wa sa kansiyo in diyablo in agpanepeng keyen, No ngani kao in Bodang Diyos, na sogowen ina pag mga bato matang mipangwat pamangnen.
[4] Kamay Isos keyen, In Agisolat keyen, Yewed sa pamangnen waget in mangyan agkaboway, dayem sa baatte agiplaong piyagsabi in Diyos.
[5] Paka kalbas ina Isos piyaanggat in diyablo sa Irosalim, in Bayan lakoy iidang Diyos. Siyo piyataydek sa tangrawan in bobongan sa balay lakoy Diyos.
[6] Siyabi in diyablo keyen, No ngani kao in Bodang Diyos, na kao palabo asin. Kataw in Agisolat keyen, In Diyos batay agsogo kansiyo mga angil, kao batay kansiro piyagalapet, Kao batay piyagatang kansiro mga bakwaw karam kao batay asolpo sa bato.
[7] Keyen wakay Isos, Agisolat din keyen, Ayaw kaimo agtepengen in Diyos in kaimo Kapwan.
[8] Kalbas Isos piyaanggat wakay in diyablo sa mabwat lakoy pag boksor. Isos piyarongaw piyapangkit sa kansiyo in boo mga sakopan sa boo kobat, kadayo in boo mga kasangkapan.
[9] Keyen in diyablo, No kao patalegeb, agmaal sa kangay, na ina pag boo kangay batay piyagpasakop sa kaimo.
[10] Siyabi wakay Isos keyen, Kao bali wa Katanas, angkataw in Agisolat keyen, Diyos waget in kaimo pagmaalen. Siyo in kaimo Kapwan. Siyo waget in kaimo paniwalaen.
[11] Isos biyaliwan wa in diyablo. Kalbas in mga angil wakay in rateng, agtolong sa kansiyo.
[12] Paka Isos abaritaan keyen biilanggo wa Owan, siyo moli wakay sa Galiliya.
[13] Siyo idwa agbalay sa Nasarit, dayem sa Kapirnaom wa. Ina pag bayan sa balabaan dagatte Galiliya, sa kobat Sabolon osai Niptali.
[14] Matang mibaloy wa in siyabi Isaiyas, in poropita keyen,
[15] In kobat Sabolon, osai Niptali, sa dalan agtaboy sa dagat, sa ripay Ordan, Galiliya pagbalayan in mga yewed Odyo.
[16] In mga mangyan datiyan agbalay sa lened kangitan wa tinglaw agrawa wano. Ina pag tinglaw in agrawa sa kansiro, sa mga agibolalang piyaglened katayan.
[17] Ina pag betek Isos agparakay wa agpatoldo keyen, Benglayen wa in kanyo mga daet, kataw in Diyos bangen wa agpapoon.
[18] In Isos agbalaba sa dagatte Galiliya, kansiyo ngiitan tayari agpangisda, in osai Simon piyagawit Pidro, in osai Anris. Siro agpanlambat.
[19] Siyabi Isos sa kansiro keyen, Kamo miyanggat sa kangay, kamo kangay batay piyagpatoldo agpangkabel mangyan matang maniwala.
[20] Toloy siro miyanggat kay Isos, biyaliwan in kansiro mga lambat.
[21] Siro panaw wa asin, ista kayte agbangen kansiyo wakay ngiitan tayari Santiyago osai Owan, mga bodang Sibidiyo. Siro talamayan sa bangka, agpakapya kansiro lambat. In dokalaki biyerya din Isos.
[22] Siro toloy miyanggat kay Isos. Kansiro biyaliwan in amang, kadayo in kansiro bangka.
[23] Diyalan wa Isos in boo kobat Galiliya. Siyo agpatoldo sa mga baiay pagpaniponan, in Maal pag Barita kansiyo piyatoldo keyen, In Diyos bangen wa agpapoon. Kansiyo piyaoraw in baatte maskit osai momoy sa mga mangyan.
[24] Siyo biyaritaan sa boo kobat Siriya, kalbas biyaba sa kansiyo in boo apo maskit, in boo din mga piyagmomoy, osai in mga piyaglowasan mamaw, mga agpameypey, kadayo in mga pilay. Siro boo kansiyo piyaoraw.
[25] Miyanggat sa kansiyo in karowan wano pag mga mangyan batang sa Galiliya, batang sa Dikapolis, osai sa Irosalim, sa Odiya, kadayo sa ripay Ordan.