[1] Isos keyen kay, Kamo agingat no kamo agpangwat maal, ayaw agpapangkit waget sa mga mangyan. No kataw ina in kanyo piyagpangwat, na in kantam Amang sa langit idapo batay tiyaboy lakonaw sa kanyo.
[2] Na no kamo agtaboy sa mga maidap ayaw agtolad sa mga agpakagwali waget agpaniwala. No siro agtaboy sa mga maidap, na kansiro piyagpapangkit sa boo mangyan sa mga balay pagpaniponan, sa mga dalan, matang waget siro piyagmaal mga mangyan. Kangay piyagsabi sa kanyo ina waget in kansiro batay abel.
[3] Dayem no kamo agtaboy sa mga maidap, na ayaw kanyo agpaalamen kamayba sa kanyo wano gayed belag,
[4] matang idapo katawan in kamo agtaboy. Na kamo batay piyakan lakonaw in kantam Amang, angkataw siyo in kangitan sa kantam piyagpangwat, in amat idapo katawan.
[5] Isos keyen kay, No kamo agpandalangin ayaw agtolad sa mga agpakagwali waget agpaniwala. Siro agkaanggay agpandalangin agtaydek sa mga balay pagpaniponan osai sa mga palsangaan dalan, matang ngiitan in mga mangyan. Kangay piyagsabi sa kanyo ina waget in kansiro batay abel.
[6] Dayem no kamo batay agpandalangin na kamo patago matang yewed ngiitan, kalbas kamo mandalangin wa sa kantam Amang yewed kanyo piyagngitan. Na kamo batay piyakan lakonaw in kantam Amang, angkataw siyo in kangitan sa kantam maalno pag piyagpangwat idapo katawan in amat.
[7] No kamo agpandalangin ayaw agolitolit sa idapo kabolowan kataw in piyagpangwat in mga yewed agpaniwala. In kansiro remrem siro batay piyagparengey panawen sa dogay pag agpandalangin.
[8] Kamo ayaw agtolad sa kansiro, angkataw bayo kitam mangayay, atawanan wa in kantam Amang in kantam mga kailangan.
[9] Kamo mandalangin kataw tai, Kanyam Amang sa langit, kaimo waget ngaran in pagmaalen wa in boo.
[10] Kao wa ngani in agpapoon sa boo. In kaimo beet pangwaten wa in boo mangyan. No nangkataw ina sa langit, na pangwaten din kataw ina atai sa kobat.
[11] Ngona pag ibeng kami pakanen in kanyam piyagkailangan pamangnen.
[12] Kaimo wa libangawen in kanyam mga daet, angkataw kami aglibangaw sa mga daet piyagpangwat sa kanyam.
[13] Kami ayaw agpadalanen sa maloba pag tepeng. Kaimo boyawen in Daeten sa kanyam. Kataw ina in agpandalangin.
[14] Angkataw no kamo aglibangaw sa mga daet piyangwat sa kanyo, na in kanyo mga daet batay din piyaglibangaw in kantam Amang sa langit.
[15] Kamay no yewed kanyo piyaglibangaw in mga daet piyagpangwat sa kanyo, na in kanyo mga daet idbatay liibangaw in kantam Amang.
[16] No betek kamo idwa agkoman matang dogay agpandalangin, na ayaw agtolad sa mga agpakagwali waget agpaniwala. Siro agrongkot anggan soraboten, matang atawanan in mga mangyan siro yewed agkoman. Kangay piyagsabi sa kanyo ina waget in kansiro batay abel.
[17] No betek kamo idwa agkoman na kamo agogas daan mata, agsokray daan,
[18] matang ayaw atawanan in roma kamo yewed agkoman. In kantam Amang yewed piyagngitan, siyo waget in batay katawan, na kamo batay piyakan lakonaw in kantam Amang, angkataw siyo kangitan in kantam piyagpangwat yewed atawanan in amat.
[19] Isos keyen kay, Kamo ayaw agpakaro sangkap atai sa kobat. Atai ina piyagsida ipes, mga kalawang, osai piyagpanakaw.
[20] Dayem paya sa langit in kamo agpakaro sangkap. Ista idapo ipes agpansida, osai kalawang, idapo agpanakaw.
[21] Angkataw no saano agbangen in kanyo mga sangkap, na batay din asin in kanyo remrem.
[22] Isos keyen kay, In kantam mata in kagwali tinglaw sa kantam bilog. Na no matarem in kantam mata, na piyagrawaan din in boo kantam galem,
[23] kamay no malabo in kantam mata, na in kantam galem boo wa din agkalenedan. No kanyo rawa mibaloy wa mana lened, na maloba wano ina pag lened.
[24] Isos keyen kay, In mangyan idbatay kapanawen sa dowai ka kapwan. Angkataw no kataw ina siyo batay agkagalit sa osai agpakayawte wakay sa osai. Siyo batay agpanawen maal sa osai, in osai piyagidapo kabolowan. Kitam idbatay kapanawen sa Diyos kadayo din sa kowarta.
[25] Na kangay piyagsabi sa kanyo keyen, Ayaw agkariyaban keyen, idapo batay kiyoman, osai piyaginem, kantam kailangan matang agkaboway, kadayo sa kantam mga damit sa bilog. Angkataw osai pamangnen osai in boway, in boway agbangen in lakonaw. Osai damit, osai in bilog, in bilog agbangen in lakonaw.
[26] Kanyo remremen in mga bantog. Siro yewed agtogda, yewed din agani, siro yewed din agbetang pamangnen, kamay siro piyagpakoman daan kantam Amang sa ogbos. Kamo agbangen labi kay piyagmaal sa mga bantog.
[27] Sa agkariyaban idapo batay kabaloy agpakadogay sa kansiyo boway kamayba osai wagette ka dodo ibeng. Aon?
[28] Na nakay batang kamo agkariyaban keyen kamo idapo damit? Kanyo remremen in mga betakan agitalo sa kobat. Siro yewed agpanawen, yewed agsimat,
[29] kamay kangay piyagsabi sa kanyo keyen, in poon lakoy Solomon, kamayba siyo mayaman wano, siyo idbatang agsoroy damit kamaalno ina kamayba osai waget asin pag mga betakan.
[30] Na no in mga lalosen, ngona agkaboway goribaste piyagsonog wakay, no ina piyakan din damit Diyos, na kamo labi kay piyagpakan. Kamo mana maloba mainaen sa agpasandig sa Diyos.
[31] Na kamo ayaw agkariyaban panawen sa kanyo pamangnen osai piyaginem, kadayo damit.
[32] Ina in mga piyagkariyaban in mga yewed kay agpaniwala sa Diyos. Atawanan in kantam Amang sa langit ina boo kantam kailangan.
[33] Dayem kitam pasakop sa Diyos, osai kitam agogali in kansiyo beet. Ina in pakalakonawen sa kantam remrem, na in boo kantam kailangan kansiyo batay piyagtaboy.
[34] Na kamo ayaw agkariyaban sa batay mibaloy goribas, dayem ista wa rateng bayo kitam manremrem. In mga makariyaban sa osai ka ibeng sibay wa piyanremrem asin pag ibeng.