[1] Isos somakay sa bangka, pataboy sa ripay, rateng wa sa kansiyo bayan.
[2] Osai ka mangyan yewed wano kapaglebey biyaba kay Isos, siyo piyagosong sa yaiyan. Paka kay Isos ngiitan in kalobaen in siro agpasandig sa kansiyo, kansiyo siyabi sa apo maskit keyen, Kale, pakaeyaten in kaimo remrem, liibangaw wa in kaimo mga daet.
[3] Riyemrem in kalaati mga agpatoldo in mga Batas keyen, In agsabi kataw ina, ina pag lalaki aglibak sa Diyos.
[4] Kamay atawanan Isos in kansiro remrem. Siyo keyen, Nakay batang kamo agremrem daet?
[5] Nakay agbangen in yewed maidap sabiyen, in osai keyen, Liibangaw wa in kaimo mga daet, in osai keyen, Kao tomaydek wa, panaw?
[6] Amba kamo mangkit. Ako in Bodang Mangyan apo din kabaloyan atai sa kobat aglibangaw sa mga daet. Kalbas siyo miplaong wakay sa apo maskit keyen, Amba laki, kao tomaydek wa, babaen wakay in yaiyan, kao moli wa.
[7] In kaliyakiyan toloy wa ngani tomaydek, moli wa.
[8] Alimowan in mga mangyan kangitan ina. Siro agmaal sa Diyos in agpakan ina pag kabaloyan lakoy sa mga mangyan.
[9] Isos panaw wa asin pag kobat. In siyo agipanaw kansiyo ngiitan osai ka mangyan in ngaran Matiyo. Siyo agitokkaw sa opisina agpaningil bowis. Keyen Isos, Kao miyanggat wa sa kangay. Tomaydek wa ngani Matiyo, miyanggat sa kansiyo.
[10] In Isos sa kay Matiyo balay agkoman osai in kansiyo mga agadar, rateng in aronaw mga agpaningil bowis osai in mga agpamangwat daet. Siro maybelagan, malpamangan.
[11] In ina ngiitan in mga Parisiyo kansiro tiyanong in mga agadar keyen, Nakay batang in agpatoldo sa kanyo agpabelag agkoman sa mga agpaningil bowis osai sa roma kay pag mga agpamangwat daet?
[12] Paka kay Isos arengeyan ina siyo keyen, In idapo maskit idapo kailangan agpanggamot, dayem in apo maskit.
[13] Kamo panaw wa, remremen in siyabi sa Agisolat keyen, In makaanggay sa kangay yewed waget in agsamba, dayem kadayo in agpakayawte sa mga amat. Kaya ako atai pataboy matang beryaen in mga apo daet, yewed in mga keyen siro idapo daet.
[14] Pasabangen kay Isos in mga agadar kay Owan in Agbaotismo. Siro keyen, Kami, osai din in mga Parisiyo apo ogali yewed agpamangan dayem agpandalangin waget. Nakay batang in kaimo mga agadar idapo kataw ina pag ogali?
[15] Keyen Isos, In mga mangyan pataboy sa kasalan idbatay agrongkot anggan baywi kay kansiro sarig in kaliyakiyan batay taybalang. Kamay dogayan in kaliyakiyan piyagkowa wakay. Na ina pag betek siro idbatay wa agkoman.
[16] Isos keyen kay, Idapo batay agsimat ikkay mikeres pag damit sa dogay wa pag lambong. Angkataw no isag mikeres in bayo pag damit, na mistobo wa gayed in rognit sa simatan.
[17] Osai in bayo pag alak idbatay siyoroy sa dogay wa balat pagsoroyan. Angkataw no kataw ina, na isag mangkoltik wa in balat, mabobo wa in alak kadayo in pagsoroyan masida wa din. In bayo pag alak piyagsoroy sa bayo pag balat, na tanan idbatay masida.
[18] Isos agiplaong kay, rateng in osai ka poon mga Odyo. Siyo agpaselang kay Isos agdaing keyen, In kangay bodang kagbaiyan matay karai wate. Kamay miyanggat kao sa kangay, siyo paaponanen kaimo bakwaw na siyo batay wakay boway.
[19] Isos tomaydek, miyanggat sa kansiyo, miyanggat sa kansiyo in mga agadar.
[20] Osai ka kagbaiyan labing dowai wa ka dagon piyagpanalowan miyanggat kay Isos paoriyan. Kansiyo kiyapkap in tangrawan kay Isos lambong.
[21] Angkataw kansiyo remrem keyen, No kangay wa makapkap kay Isos lambong, na toloy wa ako batay maoraw sa kangay maskit.
[22] Isos mangkit sa kansiyo paoriyan, kansiyo ngiitan in kagbaiyan, keyen, Laki, Pakaeyaten in kaimo remrem, kaya piyaoraw in kaimo maskit panawen kao agpasandig sa Diyos. Ina daan pag betek maoraw wa, maal wakay in kagbaiyan.
[23] Paka Isos rateng sa balay in poon, kansiyo ngiitan in mga agbangsi, osai aronaw mangyan aglalae anggan.
[24] Isos keyen, Kamo bali wa. Yewed matay in bodang, agesek waget. Isos piyagpatawaan wa.
[25] Kamay paka kansiyo piyalompot wa in mga mangyan, siyo misoroy sa balay. Kansiyo yaatang sa bakwaw in bodang. Kadogayte miyorog wa toloy in bodang.
[26] Ina pag mibaloy biyarita asin pag boo kobat.
[27] In Isos agipanaw asin pag kobat apo dowai ka kaliyakiyan beleg miyanggat sa kansiyo. Siro agpango keyen, Laki Kasokponan Dabid, kami pakayawteen.
[28] In Isos monaik sa balay in mga beleg pasabangen sa kansiyo. Isos agtanong sa kansiro keyen, Sa kanyo remrem nakay, ina kangay abaloyan? Siro keyen, Aon, Laki Kapwan.
[29] Kalbas kansiyo kiyapkap kansiro mata, keyen, No nangkataw in kanyo paniwala na mibaloy wa.
[30] Kalbas siro kangitan wa ngani. Isos maloba wa agbilin sa kansiro keyen, Kamayba kay nakay, ina ayaw kanyo agsabiyen.
[31] Kamay in siro panaw wa Isos kansiro piyagbarita asin pag boo kobat.
[32] Paka panaw wa in dokalaki, apo wakay biyaba kay Isos osai ka piyaglowasan mamaw yewed din kaiplaong.
[33] Paka biyoyaw Isos in mamaw, in kaliyakiyan miplaong wa. In mga mangyan agsoyo keyen, Atai sa Israil idapo batang ngiitan kataw ina.
[34] Kamay siyabi in mga Parisiyo keyen, Batang daan sa poon mga mamaw in kansiyo kabaloyan agpamoyaw mamaw.
[35] Isos agipanawan sa boo mga bayan lakoy anggan sa mga bayante, siyo agpatoldo sa mga balay pagpaniponan. Kansiyo piyagpatoldo in Maal pag Barita in Diyos agpapoon wa, osai din kansiyo piyaoraw in mga maskit, kamayba wa nakay pag mga maskit.
[36] In kansiyo ngiitan in karowan wano pag mga mangyan siyo apakayawtean sa kansiro, angkataw siro agkagolo, mabyat in remrem, kagwali mga topa idapo agalapet.
[37] Matang kansiyo siyabi sa kansiyo mga agadar keyen, Lakonaw in aniyen, kamay korangte in batay agani.
[38] Na kanyo ayayen sa Kapwan aniyen, keyen kansiyo wa sogowen in mga batay agani.