[1] Anda in Maal pag Barita panawen kay IsoKiristo in Bodang Diyos.
[2] Ina agparakay in agibaloy in siyolat tangona in poropita Isaiyas keyen, In Diyos keyen, Baanda, kangay piyagsogo in kangay sogowan tokaw sa kaimo. Kansiyo batay piyakapya in kaimo dalan.
[3] Apo agpango sa moyod keyen, Kanyo pakapyaen in dalan in Kapwan, Kanyo linisen in kansiyo batay dalan.
[4] Na kataw ngani ina lomwas Owan sa moyod. Siyo agbaotismo osai agpatoldo keyen, Benglayen wa in kanyo mga daet, pabaotismo wa, na batay wa liibangaw Diyos in kanyo mga daet.
[5] Kalbas in boo mga mangyan taga kobat Odiya pataboy sa kansiyo, osai in boo mga taga bayan Irosalim. Siro agsabi wa kay Owan in kansiro mga daet, kalbas kansiyo biyaotismowan sa sapa Ordan.
[6] In kay Owan lambong batang boybol kamilyo, in kansiyo sintoron batang balat ayop. In kansiyo piyagkoman doron osai daiket.
[7] Siyo agpatoldo keyen, In agrateng sa kangay paoriyan siyo in apo kabaloyan, labi kay kataw ako. Ako kalakoyte, yewed sibay kamayba sogowan waget aglowat kansiyo tapatos.
[8] Kamo kangay piyagsogbo sa sapa. Kamay siyo in batay agsogbo sa kanyo sa Betek pag Abyan.
[9] Ina daan pag mga betek Isos rateng batang sa bayante Nasarit sa Galiliya. Kalbas siyo biyaotismowan Owan sa sapa Ordan.
[10] Paka siyo patakdang sa sapa, toloy kansiyo ngiitan biyoswang in langit, in Abyan Diyos aglabo sa kansiyo kagwali bantog kalapati.
[11] Osai apo miplaong batang sa langit keyen, Kao in kangay piyagmaal pag Bodang, kao kangay wano piyagkaanggayan.
[12] Kalbas Isos toloy piilit in Abyan Diyos pataboy sa moyod.
[13] Siyo agpamataw ista apatnapo ka ibeng piyagtepeng Katanas no siyo batay agpangwat daet. Siyo asin sa apo mga ayop matapang, kalbas siyo piyagtolong mga angil.
[14] Paka Owan biilanggo wa, Isos pataboy wa sa Galiliya, agpatoldo in Maal pag Barita batang sa Diyos keyen,
[15] Ngona wa in kabetek, in Diyos batay wa agpapoon sa mga mangyan. Benglayen wa in kanyo daet, osai maniwala wa sa Maal pag Barita.
[16] In Isos agdalan sa balabaan dagatte Galiliya, kansiyo ngiitan tayari Simon, in osai Anris, agpanlambat sa dagatte, angkataw isda in kansiro anap boway.
[17] Kalbas keyen Isos, Kamo miyanggat sa kangay, kamo kangay piyagpatoldo agpamangkit mangyan.
[18] Kalbas toloy kansiro biyaliwan in mga lambat, miyanggat sa kansiyo.
[19] Paka adayonaw wate, ngiitan wakay tayari Santiyago, in osai Owan, kay Sibidiyo mga bodang. Siro sa bangka agpakapya din mga lambat.
[20] Kalbas siro din toloy piyaanggat Isos. Kalbas kansiro biyaliwan sa bangka in kansiro amang Sibidiyo, osai in mga katolong piyagbayadan. Siro miyanggat kay Isos.
[21] Siro rateng sa bayan Kapirnaom. Kalbas sa Ibeng Pamainga Isos misoroy sa balay pagpaniponan, agpatoldo.
[22] Kalbas in mga mangyan agsoyo sa kansiyo, angkataw in siyo agpatoldo siyo apo kabaloyan, yewed kataw in mga datiyan agpatoldo in mga Batas Diyos.
[23] Kalbas toloy misoroy sa kansiro balay pagpaniponan osai ka mangyan piyaglowasan maloba pag mamaw. Siyo mango keyen,
[24] Laki Isos taga Nasarit, kami ayaw agladowen. Kaya lames kao atai pataboy matang kami kaimo bonowen? Ako katawan no nakay kao, kao in Betek in siyogo Diyos.
[25] Kalbas siyo piyangelel Isos keyen, Ayaw aglalae. Kao bali wa asin pag lalaki.
[26] Kalbas in mamaw mango lakoy, yoogyog in piyaglowasan. Kalbas domalagan wa in mamaw.
[27] Kalbas in boo asin agsoyo wano anggan siro maltanongan keyen, Nakay lames tai? Bayo wakay pag adar anda. Isos apo mana kabaloyan agsogo kamayba sa mga mamaw. In mga mamaw agpaniwala sa kansiyo.
[28] Kalbas Isos toloy mibarita sa boo mga mangyan sa kobat Galiliya.
[29] Kora Isos anggan Santiyago osai Owan lomabo sa balay pagpaniponan, toloy pataboy sa balay Simon osai Anris.
[30] In kay Simon babai inang agibolalang apo maskit maibeng in bilog. Ina toloy siyabi kay Isos.
[31] Kalbas Isos pataboy sa kansiyo, yaatang sa bakwaw, yoorog. Kalbas idapo wa maibeng in bilog, maal wakay. Siyo agalapet wa kay kora Isos.
[32] Bayapon wa, malabo wa in ibeng, biyaba kay Isos in boo apo maskit, osai in mga piyaglowasan mamaw.
[33] In boo mangyan asin pag bayan agtipon sa bangen sakbawan.
[34] Kalbas Isos agpaoraw sa aronaw apo maskit, kamayba nakay pag maskit, osai agpamoyaw sa aronaw mamaw. Piyagayaw Isos miplaong in mga mamaw, angkataw kansiro atawanan Isos no nakay siyo.
[35] Isos mipolaw agkaboka wa, lened kay, lomabo wa pataboy sa osai ka moyod. Siyo ista agpandalangin.
[36] Kalbas kora Simon agpamangkit sa kansiyo.
[37] Paka Isos ngiitan siro keyen, Laki Isos, kao piyagpamangkit in boo mangyan.
[38] Kamay Isos keyen, Kitam ista wakay pataboy pag mga bayan, matang ako kapatoldo kay din ista, angkataw ina in dailan kaya ako atai pataboy.
[39] Kalbas kansiyo diyalan in boo kobat Galiliya, agpatoldo sa kansiro mga balay pagpaniponan, osai agpamoyaw sa mga mamaw sa mga piyaglowasan.
[40] Apo osai ka mangyan piyagpanyakit agpaselang agdaing kay Isos keyen, No kao beet agpaoraw sa kangay maskit, na kao kabaloy.
[41] Kalbas Isos agpakayawte sa kansiyo, kansiyo yaatang in mangyan, keyen, Ako beet ngani, na dali, maoraw wa ngani.
[42] Ina daan toloy wa maoraw in kagwali panyakit, maal wakay in mangyan.
[43] -
[44] Kalbas Isos maloba wano agbilin sa kansiyo keyen, Kao ista wa sa sasirdoti, papangkit. Kalbas kataw in siyabi sa Batas Mowisis, kao agtaboy andog, na in mga mangyan batay katawan keyen maoraw wa in kaimo maskit. Kamaybawa kay nakay kao ayaw agsabi keyen, Isos in agpaoraw sa kangay. Kalbas siyo toloy piyapanaw Isos.
[45] Kamay siyo panaw, agpamarita wa sa boo mga mangyan keyen, Ako piyaoraw wa Isos. Anggan Isos idwa kapapangkit sa mga bayan, no yewed siyo ista sa adayonaw sa mga moyod. Kalbas in mga mangyan agpalitaboy daan sa kansiyo batang sa boo asin pag mga kobat.