[1] Sabali wa in pista piyagawit Paskowa, in piyagkoman tinapay idapo pamaistobo, na osai in mga poon sasirdoti osai in mga agpatoldo in mga Batas Diyos, siro agpolong agpamangkit padalan agdakep kay Isos in idbatay atawanan in mga mangyan, kalbas siyo batay piyagbono.
[2] Siro keyen, Ayaw wa sa betek piyasta, karam magolo in mga mangyan.
[3] In betek Isos sa bayante Bitanya sa balay Simon in batang apo kagwali panyakit, in betek siyo agkoman, apo rateng osai ka kagbaiyan agbaba pagsoroyan piyangwat batang bato lakonaw in bayad, ina makno pamada piyagawit nardo, lakonaw wano in bayad. Kansiyo biyaslag in botilya, in langis biyobo sa kay Isos olo.
[4] Kamay apo asin mga abaisan, agpalpansabi keyen, Nakay batang siyayang waget in langis?
[5] Bago nges no piyabili na in bayad labi kay tolo ka daan ka ibeng agpanawen, maal nges tiyaboy sa mga maidap. Kalbas kansiro piyangelel in kagbaiyan.
[6] Kamay keyen Isos, Nakay batang siyo kanyo piyagpangelel? Siyo ayaw agladowen. Maalen in kansiyo piyangwat sa kangay.
[7] Palagi daan agyanggat sa kanyo in mga maidap. Kamayba nangkadogay no kanyo beet na kamo katolong kansiro. Kamay ako yewed agyanggat sa kanyo anggan dogayan.
[8] Piyangwat in kagbaiyan in kansiyo abaloyan. Kaya ako kansiyo biyobowan langis matang in kangay bilog piyagsandata batay liyebeng.
[9] Totoo in kangay piyagsabi, kamayba saano piyatoldo in Maal pag Barita na batay din piyagawit ina in kansiyo piyangwat matang siyo idbatay alibangawan.
[10] In osai sa Labing Dowai ka agadar Odas Iskaryoti. Siyo pataboy sa mga poon sasirdoti keyen, Isos kangay batay piyadakep sa kanyo.
[11] Siro agkaanggay asin pag siyabi, matang siro mangako siyo pakanen kowarta. Sogod asin Odas agpamangkit padalan agpadakep kay Isos.
[12] In tokaw pag ibeng piyasta in piyagawit tinapay idapo pamaistobo, in ibeng piyagbono in mga bodang topa sa Paskowa, in kansiyo mga agadar keyen kay Isos, Saano lames in kaimo beet kami agsandata kaimo Yapon sa Paskowa?
[13] Kansiyo siyogo in dowai ka agadar keyen, Kamo ista pataboy sa bayan, apo batay tomagbo sa kanyo osai ka kaliyakiyan agbaba galon sapa. Kamo asina wa miyanggat.
[14] Kalbas no sa nakay pag balay siyo monaik, kanyo sabiyen sa kapwan balay keyen, In Agpamatoldo agsabi no saano lames in maal siyo mamangan in Yapon sa Paskowa, kadayo in kansiyo mga agadar.
[15] Na kansiyo batay piyatoldo sa kanyo in osai ka lakonaw pag basag sa ogbos, apo din mga sangkap. Ista wa kamo agsandata in boote kantam piyagkailangan.
[16] Panaw wa in dokalaki, pataboy sa bayan. Kansiro ngani ngiitan in boo siyabi Isos. Kalbas kansiro wa siyandata in Yapon sa Paskowa.
[17] Bayapon rateng wa Isos agyanggat in Labing Dowai.
[18] In siro agpamangan wa Isos keyen, Totoo in kangay piyagsabi, in osai sa kanyo in kangay mga sarig agkoman in batay agpadakep sa kangay.
[19] Maypanremrem in mga agadar, baatte osai siro agsabi sa kansiyo keyen, Yewed ako, aon?
[20] Isos keyen, Osai sa kanyo in kangay sarig agkoman.
[21] Ako in Bodang Mangyan batay matay kataw in siyolat panawen sa kangay. Kamay makapangirabot in batay parosa sa mangyan agpadakep sa kangay. Maal kay nges asin pag mangyan no siyo idwa biyodang.
[22] In siro agkoman kay, Isos omatang sa tinapay, agpasalamat sa Diyos. Kalbas kansiyo piyandodo, tiyaboy sa mga agadar. Siyo keyen, Anda kanyo kowaen. Anda in kangay bilog.
[23] Kalbas kansiyo yaatang in pagpangineman, agpasalamat din, kalbas tiyaboy sa kansiro. Siro boo malpanginem.
[24] Isos keyen, Ina in kangay daya, panrigen sa kasondowan Diyos osai kansiyo mga bodang, kangay daya in batay piyagbobo panawen sa karowan.
[25] Totoo in kangay piyagsabi, sogod ngona ako idbatay wa minem in sabaw obas anggan dogayan kangay piyaginem in bayo pag sabaw sa sakopan Diyos.
[26] Siro agbaren osai ka awit, kalbas pataboy wa sa boksor Olibowan.
[27] Siyabi Isos sa kansiro keyen, Ako batay biyaliwan kamo boo. Kataw in Agisolat keyen, In agalapet topa kangay batay piyagbono, kalbas batay omarabang in mga topa.
[28] Kamay paka ako piyaboway wakay, ako batay tokaw sa kanyo sa Galiliya.
[29] Pidro keyen, Kamaybawa siro boo agbaliwan sa kaimo, na ako idbatay ngani agbaliwan sa kaimo.
[30] Isos keyen sa kansiyo, Totoo ngani, ngona daan pag yabi bayo tomalaok in manok makadowai, ako kaimo batay piyamangyan makatolo wa.
[31] Kamay Pidro agrigen wano agsabi keyen, Kamaybawa ako biyono kaimo sarig, kao idbatay kangay piyamangyan. In boo agadar kataw din ina.
[32] Kora Isos pataboy sa alamanan piyagawit Gitsimani. Siyabi Isos sa kansiyo mga agadar keyen, Kamo atai daan agtokkaw. Ako ista kayte agbangen agpandalangin kay.
[33] Kamay kansiyo piyaanggat Pidro, osai Santiyago, osai Owan. Kalbas agkagolo in kansiyo remrem, malingetnget wano.
[34] Siyo keyen, Maloba agrongkot in kangay galem, anggan tomag ako batay wa matay. Kamo atai daan, agdamay.
[35] Isos ista kayte, patalegeb sa diya, agpandalangin keyen, No nges maal, na ayaw wa rateng sa kangay in kaidapan.
[36] Amang, kangay Amang, kao kabaloy sa boo. Na kaimo alisen anda pag kaidapan sa kangay. Kamay in pangwaten in kaimo daan beet, ayaw in kangay beet.
[37] Isos moli wakay sa tolo ka agadar siro mana agesek. Kansiyo siyabi kay Pidro keyen, Aa, laki Simon, kao mana agesek? Kao mana yewed kabaloy agdamay osai waget ka oras?
[38] Kamo agdamay wa ngani, mandalangin keyen, Kami ayaw agpatepengen. Sandata wa nges in kanyo remrem, kamay in bilog mainaen.
[39] Siyo panaw wakay, mandalangin wakay, kataw daan in siyabi karai.
[40] Kalbas siyo moli wakay sa kansiyo mga agadar. Agesek daan din, angkataw siro maloba wano agkaesek. Siro idapo wa masabi kay Isos.
[41] In sa katolo wa siyo moli siyo keyen, Kamo mana aglimbang kay, agesek daan? Sibay wa. Ngona wa in kabetek, in ako in Bodang Mangyan batay tiyaboy sa kabaloyan in mga daet pag mangyan.
[42] Tomaydek wa, kitam wa. Anda wa in batay agpadakep sa kangay.
[43] Isos agiplaongan kay, toloy wa rateng Odas, in osai sa Labing Dowai, agyanggat in karowan agpalpamaba mga pisaw lakoy osai mga garoti. Siro siyogo in mga poon sasirdoti, osai in mga agpatoldo in mga Batas Diyos, osai in mga koyay.
[44] In agpadakep kay Isos batang agsabi sa mga batay agdakep keyen, In kangay isag kiyapet, ina wa in kanyo piyagpamangkit. Kanyo dakepen, babaen. Ayaw galot in agdamay.
[45] Paka rateng Odas siyo toloy pasabangen kay Isos, miplaong keyen, Laki Agpamatoldo. Kalbas Isos kiyapet.
[46] Kalbas Isos siyonggaban in karowan, diyakep.
[47] In osai ka agadar aglakso kansiyo pisaw lakoy, piyalang in sogowan in mabwat pag poon sa mga sasirdoti, yaagis in talinga.
[48] Kalbas siyabi Isos sa mga mangyan keyen, Kamo nakay, keyen ako agpanakaw? Baina, kamo malitaboy atai agbaba mga pisaw lakoy mga garoti matang ako diyakep.
[49] Bago ibengibeng daan ako sa balay lakoy Diyos agpatoldo. Kamo ista din, kamay ako yewed kanyo diyakep. Kamay kailangan mibaloy in Agisolat.
[50] Kalbas in boo mga agadar domalagan wa, Isos biyaliwan.
[51] Miyanggat kay Isos osai ka begle, idapo lambong, agislen waget benang. Siyo diyakep nges in mga mangyan,
[52] kamay biyenglay wa in islen, domalagan idapo damit.
[53] Isos kansiro biyaba sa balay in mabwat pag poon sa mga sasirdoti. Agkatipon ista in boo mga poon sasirdoti, osai in mga koyay, osai in mga agpatoldo in mga Batas Diyos.
[54] Pidro mangagak sa kansiyo, kamay adayonaw in paywaraan, anggan sa tongkodan balay, agpaagem sa mga agdamay, agtokkaw, agpanayang sa baya.
[55] In mga poon sasirdoti, osai in mga tanongan in mga Odyo agpamangkit dailan matang Isos batay mabono, kamay siro idapo ngiitan.
[56] Aronaw nges in agpabintang sa kansiyo, kamay yewed tikkatawan in siyabi.
[57] Kalbas apo mga tomaydek agpabintang keyen,
[58] Kami karengey kansiyo siyabi keyen, Kangay batay piyagregnas anda pag balay lakoy Diyos in piyangwat mangyan. Kalbas tolo waget ka ibeng ako agtadyok wakay osai, yewed mangyan in agpangwat.
[59] Kamaybawa kataw ina yewed daan tikkatawan in kansiro mga siyabi.
[60] Tomaydek sa kagwaraan tiponan in mabwat pag poon sa mga sasirdoti, miplaong kay Isos keyen, Nakay batang kao idbatay meles? Nangkataw sa kaimo ina pag mga sombong kataw ina?
[61] Kamay Isos yewed miplaong, idapo siyabi kamayba nakay. Tagoli wakay siyo tiyanong in mabwat pag poon sa mga sasirdoti keyen, Kao lames in Kiristo, in Bodang Diyos in Piyagmaal?
[62] Isos keyen, Ako ngani. Kanyo batay ngiitan in Bodang Mangyan agitokkaw sa pamalang agbangen in Apo Kabaloyan sa boo, kanyo batay piyagngitan agrateng sa mga libo sa langit.
[63] Kalbas toloy wa agalitan in mabwat pag poon sa mga sasirdoti anggan kansiyo wa riyognit in kansiyo daan lambong. Siyabi keyen, Idwa kantam kailangan in mga pasaen.
[64] Kamo karengey wa din in siyo agpakagwali Diyos. Nakay in kantam polong? Siro boo malsiyayonan keyen, Kailangan siyo bonowen.
[65] Isos piyanopayan in kalaati. Tiyabon in mata, kalbas piyanontok, toloy tiyanong keyen, Kaimo sabiyen, Nakay in somontok sa kaimo? Siyo piyanampal din in mga agdamay.
[66] Kamay Pidro baywi kay sa tongkodan. Apo osai ka kagbaiyan lomwas, siyo sogowan in mabwat pag poon sa mga sasirdoti.
[67] Ina pag kagbaiyan kangitan kay Pidro agpanayang sa baya. Kansiyo riyoris gayed, keyen, Kao din sarig ina pag Isos in taga Nasarit.
[68] Kamay Pidro tomanggi keyen, Yewed kangay atawanan, ako yewed katawan in kaimo beet siyabi. Siyo pataboy wa sa sakbawan alabat. Tomalaok wa in manok.
[69] Asina Pidro ngiitan wakay in sogowan kagbaiyan. Siyabi in kagbaiyan sa mga asin keyen, Ina pag mangyan sarig ngani kora Isos.
[70] Kamay Pidro tomanggi wakay. Dogay wakayte siyabi wakay kay Pidro in mga asin agtaydek keyen, Soo, kao din ngani osai ka sarig kora Isos. Baina kao din taga Galiliya.
[71] Kamay Pidro keyen, Kamayba wakayno sa langit, ako yewed ngani katawan ina pag mangyan.
[72] Kalbas tomalaok wakay in manok. Pidro toloy wakay karemrem in siyabi Isos sa kansiyo keyen, Bayo makadowai tomalaok in manok, ako makatolo kaimo batay piyamangyan. Kalbas siyo toloy manangis wa lakoy.