[1] Apo mga omaron sa bangen Isos, siro mga Parisiyo. Apo din mga agpatoldo in mga Batas Diyos, siro batang sa Irosalim.
[2] Kansiro ngiitan in kalaati kay Isos mga agadar agpamangan in bakwaw yewed yoogas kataw in ogali piyagpatoldo in mga Parisiyo.
[3] In mga Odyo na labi kay in mga Parisiyo idbatay mamangan anggan in bakwaw yewed kay yoogas kataw in ogali piyatoldo in kansiro mga kakoyayan.
[4] Yewed din agpamangan kamayba nakay in biili sa bayan no yewed kay yoogas. Aronaw kay din mga piyatoldo kansiro piyagpaniwalaan, kataw in mga padalan agogas sa mga pagineman, sa mga palato, sa mga kaldido, kadayo sa mga damig.
[5] Isos tiyanong in mga Parisiyo osai in mga agpatoldo in mga Batas Diyos keyen, Nakay batang in kaimo mga agadar yewed agpaniwala sa mga piyatoldo in kantam mga kakoyayan? Baina, siro agpamangan yewed yoogas in bakwaw kataw in ogali sa agogas.
[6] Isos keyen, Betek in kay Isaiyas siyabi batang sa Diyos panawen sa kanyo. Kamo mga agpakagwali waget agpaniwala. Kataw in siyolat Isaiyas keyen, Keyen in Diyos, Agmaal sa kangay in kansiro mga agiplaong, kamay in kansiro mga remrem adayonaw sa kangay.
[7] Idapo kabolowan in siro agsamba sa kangay. Angkataw siro keyen siro agpatoldo in Agiplaong Diyos, kamay ina piyagsabi waget mangyan.
[8] Isos keyen kay, Kanyo piyagidapo kabolowan in Batas Diyos, in mga piyagpatoldo waget mga mangyan in kanyo piyagalapet.
[9] Kalbas Isos miplaong kay keyen, Kamo katawan wano agbenglay in Batas Diyos matang kanyo piyagpangwat in kanyo waget piyagpatoldo.
[10] Baina in yootos Mowisis keyen, Pagmaalen in kanyo mga koyay. In aglibak sa kansiyo mga koyay na siyo bonowen.
[11] Kamay kanyo wakay piyatoldo keyen, Kalobante siyabi osai ka mangyan sa kansiyo koyay keyen, Anda in batay nges kangay tiyaboy sa kaimo idwa maal angkataw kangay wa tiyaboy sa Diyos.
[12] Na in kamo agpatoldo kataw ina siyo kanyo wa piyagayaw agtolong sa kansiyo koyay.
[13] Na kataw ina in Agiplaong Diyos kanyo piyagidapo kabolowan sa kanyo mga piyagpatoldo sa mga amat. Osai aronaw kay din mga kataw ina in kanyo piyagpangwat.
[14] Tagoli wakay biyerya Isos in mga mangyan, siyabi sa kansiro keyen, Kamo boo mamarengey, remremen in kangay batay piyagsabi.
[15] In piyagsoroy sa bibi yewed makarames sa mangyan sa pangkit Diyos, dayem in mga batang sa remrem mangyan na ina in makarames sa kansiyo.
[17] Kay Isos biyaliwan in mga mangyan. Paka misoroy sa balay siyo tiyanong in kansiyo mga agadar panawen sa kansiyo siyabi karai.
[18] Keyen Isos, Kamo mana idapo kay katawanan? Yewed kay mana kanyo atawanan? Yewed makarames sa mangyan in kansiyo piyagkoman,
[19] kataw ina yewed agisoroy sa kansiyo remrem, no yewed sa boyon, kalbas paka kadalan lampas wakay. In beet siyabi ina in boote pamangnen maal kiyoman.
[20] Siyo agaway agiplaong keyen, In aglowas batang sa remrem mangyan in agpakarames sa kansiyo sa pangkit Diyos.
[21] Angkataw sa galem, sa remrem mangyan, agrakay in mga daet remrem kaya siyo agpanggaraw, agpanakaw, agbono mangyan,
[22] agpanaban, agkabeet sa yewed kansiyo, agpamangwat in boo mga daet, mga agpamadaya, marames pag ogali, agpanagiri, agpamasaen, agyabang, yewed agremrem sa Diyos.
[23] Ina pag boo batang sa remrem mangyan. Ina in agparames sa kansiyo sa pangkit Diyos.
[24] Isos panaw ista pataboy wa sa kobat sa bangen bayan Tiro, mamataw sa osai ka balay ista. Siyo beet ayaw nges atawanan in mga mangyan siyo asina, kamay atawanan daan.
[25] Osai ka inang apo bodangte kagbaiyan piyaglowasan mamaw karengey barita keyen rateng wa Isos. Siyo toloy pataboy kay Isos, agpaselang wano sa kansiyo.
[26] Ina pag kagbaiyan yewed Odyo, siyo taga Siropinisya. Siyo agdaing kay IsoS keyen, Pamoyawen in mamaw Sa kangay bodang.
[27] Kamay siyabi Isos sa kansiyo keyen, Kailangan tokaw pabosogen in mga bodang. Yewed maal kiyowa in pamangnen sa mga bodang, matang biyenglay sa mga titote.
[28] Keyen in kagbaiyan, Kamay, laki Kapwan, in mga titote sa ngato agpamangan in mga poypor agpangaragrag sa mga bodang.
[29] Matang kay Isos siyabi keyen, Panawen sa kaimo siyabi dali wa, maal wa moli kao, panaw wa in mamaw sa kaimo bodang.
[30] Kalbas moli wa in kagbaiyan, kansiyo aratengan in bodang agipalibay sa esekan. Idapo wa ngani in mamaw.
[31] In Isos agoli wakay batang sa bangen bayan Tiro, siyo domalan sa bayan Sidon, kalbas sa kagwaraan kobat Dikapolis, anggan rateng sa dagatte Galiliya.
[32] Biyaba sa kansiyo osai ka kaliyakiyan bingi, yewed gayed kaiplaong. Siro agdaing kay Isos keyen, Kaimo atangen anda pag mangyan.
[33] Kalbas siyo piyaanggat ISos adayonaw sa karowan mangyan. Siyoroy Isos in kansiyo mga solo sa mga talinga in bingi. Paka kiyowa wakay siyo manopay sa solo, piyayodyod sa dila in mangyan.
[34] Manangra sa langit Isos, mamayeng lakoy, siyabi sa mangyan keyen, Ipata, in beet siyabi Maboswang wa.
[35] Kalbas siyo karengey wa, idwa mabyat in dila, kaiplaong wa maal.
[36] Siyabi Isos sa mga mangyan keyen, Ayaw wano agpamarita in mibaloy kamaybawa saano. Kamay in siyo agayaw agayaw siro labi kay agbarita agbarita.
[37] Siro maloba agsoyo keyen, Maal wano in boote kansiyo piyangwat. Baina, karengey wa in mga bingi, kaiplaong wa in mga yewed kaiplaong.