[1] Kalbas Isos panaw asin, pataboy sa bayan kansiyo iistobowan. Agyanggat in kansiyo mga agadar.
[2] Sa Ibeng Pamainga, siyo agparakay agpatoldo sa balay pagpaniponan. Agsoyo in aronaw agparengey sa kansiyo. Siro keyen, Nakay batang lames Isos katawan ina pag boo? Keyen kay, Nakay ina pag atawanan in tiyaboy sa kansiyo? Osai keyen, In kalakoyen in kansiyo mga piyagpangwat.
[3] Yewed mana ina in panday, in bodang Mariya, in belag Santiyago, osai Osi, osai Odas, osai Simon? Atai din agbalay in kansiyo mga belag kagbaiyan, aon? Kalbas Isos kansiro piyangidangan.
[4] Kalbas Isos keyen, In poropita piyagmaal in mga mangyan. In mga waget taga kansiyo kobat, in kansiyo mga kamalay, osai in kansiyo mga kabelagan, siro waget in yewed agmaal sa kansiyo.
[5] Kalbas siyo yewed kapangwat asin kamayba nakay pag makasoyo pag panawen, no yewed kansiyo waget yaatang in korangte apo maskit, siro piyaoraw.
[6] Isos agsoyo panawen siro yewed agpaniwala. Kalbas Isos agipanawan agpatoldo sa mga bayante.
[7] Kalbas kansiyo biyerya in Labing Dowai, kansiyo siyogo baatte dowai. Siro kansiyo piyakan kabaloyan agpamoyaw sa mga mamaw.
[8] -
[9] Kansiyo piyabilin keyen, Kamo ayaw agbaba kamayba nakay sa agipanaw, kamayba pamangnen, kamayba begyas, kamayba kowarta sa sokloban, kamayba lambong, no yewed sikkor waget. Soroyen in tapatos.
[10] Kalbas kansiyo kay siyabi sa kansiro keyen, Kamayba sa nakay pag balay kamo piyaesek, na asina wa agpamataw anggan kamo panaw wakay asin pag bayan.
[11] Kamayba nakay pag bayan, no siro dayo agpabelag sa kanyo, no siro dayo agparengey sa kanyo, na kamo panaw wa asin pag bayan, ragragen in bogabo sa kanyo darapa, in beet siyabi siro batay piyagparosa.
[12] Kalbas panaw wa in Labing Dowai, agpatoldo sa mga mangyan keyen, Benglayen wa in daet.
[13] Osai kansiro piyamoyaw in mga mamaw sa mga piyaglowasan, kansiro yoodyodan langis in aronaw apo maskit, piyaoraw.
[14] In gobirnador Irodis abaritaan panawen sa mga piyagpangwat Isos, angkataw mibarita wa in kansiyo ngaran. Apo mga agsabi keyen, Siyo wakay Owan in agpamaotismo, siyo batang matay, piyaboway wakay. Ina in dailan kaya siyo apo ina pag kabaloyan.
[15] Kamay in mga amat keyen, Siyo Iliyas. In amat wakay keyen, Siyo osai ka poropita kataw in tangona pag mga poropita.
[16] Kamay in Irodis abaritaan panawen kay Isos kansiyo siyabi keyen, Ina Owan, in kangay tangona piyapogot ngona piyaboway wakay.
[17] Angkataw Irodis ngani in agpadakep, in agpabakos, in agpakolong kay Owan, matang makaanggay kay Irodiyas. Ina nges in babai Pilipi belag Irodis, kamay kay Irodis tiyaban.
[18] Owan batang agpangelel kay Irodis keyen, Daet sa Diyos in kaimo kiyowa in babai kaimo belag.
[19] Kalbas Irodiyas agkabais kay Owan, beet biyono. Kamay siyo yewed kabaloy,
[20] angkataw Irodis agmaal kay Owan, angkataw kansiyo atawanan siyo betek, maalno pag mangyan. Matang Owan kansiyo piyagayaw piyagbono. Siyo agkaanggay agparengey kay Owan, kamayba malingetnget in kansiyo remrem sa piyagsabi.
[21] Kamay paka kabetek wa in ibeng kay Irodis kaboslot Irodiyas kangitan wa padalan. Biyerya Irodis in kansiyo mga konsiyal, osai in mga kapitan, kadayo in mga mayaman sa Galiliya, matang malpamangan sa kansiyo siyandata pamangnen.
[22] Misoroy in kay Irodiyas daraga, somayaw. Irodis anggayan sa kansiyo agsayaw, osai in mga agpalpamangan. Kalbas siyabi Irodis sa daraga keyen, Ayayen sa kangay kamayba nakay in kaimo beet, kangay batay piyagtaboy sa kaimo.
[23] Kansiyo piyangako wa gayed keyen, Kamayba nakay in kaimo piyagayay, kangay batay piyagtaboy sa kaimo, kamayba in kalaati kangay sakopan.
[24] Kalbas in daraga lomabo, siyabi sa kansiyo inang keyen, Nakay in kangay ayayen? Keyen in inang, Ayayen in kay Owan olo, in agpamaotismo.
[25] Toloy moli wakay in daraga sa poon, keyen, In kangay beet ngona wa daan kaimo wa taboyen sa kangay in olo Owan in agpamaotismo sa osai ka palanggana.
[26] Kalbas Irodis agalwasi wa gayed kay Owan, kamay siyo agkarikoy agayaw in yaayay in daraga panawen in kansiyo pangako piyarengey in mga agpalpamangan.
[27] Matang in poon toloy agsogo sa osai ka sondalo keyen, Atai wa babaen in olo Owan. Kalbas panaw in sondalo, pataboy sa kolongan, piyogot in olo Owan,
[28] piyabolalang sa osai ka palanggana, biyaba, tiyaboy sa daraga. Ina tiyaboy wakay in daraga sa kansiyo inang.
[29] Paka ina abaritaan in kay Owan mga agadar, siro ista pataboy, kiyowa in bilog Owan, siyangat.
[30] In kay Isos mga katiwala moli wakay sa kansiyo, giisod sa kansiyo in boo kansiro piyangwat, osai in boo piyatoldo.
[31] Kamay aronaw mangyan in agpaypanrateng osai agpalipanaw, anggan kora Isos idwa katokor agkoman. Matang kay Isos siyabi keyen, Kitam wa pataboy sa osai ka moyod, matang adayonaw sa karowan, kamo kapainga wakayte.
[32] Kalbas siro panaw, somakay sa bangka, pataboy sa osai ka moyod.
[33] Kamay aronaw in kangitan sa kansiro agipanaw, mga katawan sa kansiro. In mga mangyan batang sa boo mga bayan maykabiglaan pataboy kay Isos pagtaboyan, tokaw wakay rateng sa kansiyo.
[34] Kalbas in Isos aglabo sa bangka kansiyo ngiitan maloba karowan, siyo agpakayawte sa kansiro, angkataw siro kagwali mga topa idapo agalapet. Kalbas siyo agpatoldo sa kansiro in boote.
[35] Agkalabo wa in ibeng, pasabangen kay Isos in mga agadar keyen, Ngona agkalabo wa in ibeng, anda pag kobat moyod,
[36] na kaimo wa palpasen in mga mangyan matang siro pataboy sa mga balay sa bangen osai sa mga bayan matang kabili pamangnen.
[37] Kamay keyen Isos sa kansiro, Kamo wa in agtaboy pamangnen sa kansiro. Siro keyen, Nakay? Kami wa in panaw mamili pamangnen alaga dowai ka daan ka ibeng agpanawen, kalbas kanyam piyagpakoman sa kansiro?
[38] Keyen Isos, Asin sa kanyo nangkaro ka tinapay? Dali wa, kanyo pangkiten. Paka kansiro piyangkit siro keyen, Apo lima ka tinapay, apo din dowai ka isda.
[39] Kalbas in mga agadar siyogo Isos keyen, Kanyo patokkawen in mga mangyan, mayaronan siro sa mga lalosenan.
[40] Kalbas siro boo malpanokkaw, in mga aronan apo mga sangdaan, apo mga limampo.
[41] Kalbas kiyowa Isos in lima ka tinapay, osai in dowai ka isda. Siyo manangra sa langit, agpasalamat sa Diyos. Kalbas kansiyo piyandodo in mga tinapay, tiyaboy sa mga agadar matang bagiyen sa mga mangyan. Kalbas kansiyo din biyagi in dowai ka isda.
[42] Siro boo malpamangan, mga bosog.
[43] Tiipon wakay in mga agadar in mitera pamangnen, labing dowai ka galang makno.
[44] In mga malpamangan, in mga kaliyakiyan agbangen, siro lima ka libo.
[45] Toloy siyogo Isos in kansiyo mga agadar somakay sa bangka, siro piyatokaw wa sa Bitsayda sa ripay dagatte, anggan kansiyo piyagpalpas in mga mangyan.
[46] Siyo keyen sa mga mangyan, Ako din agipanaw wa. Kalbas siyo pataboy sa boksor matang mandalangin.
[47] Paka yabi wa in mga agadar sa bangka sa kagwaraan wa dagatte, Isos agboktong waget sa kobat.
[48] Siyo kangitan sa mga agadar aidapan wa ageyat agsagwan, angkataw siro piyagtagbo in kowaya. Paka agkaboka wa Isos mangagak sa kansiro agipanaw aglaed sa sapa, batay nges aglampas sa kansiro.
[49] Kamay paka ngiitan in mga agadar siyo agipanaw aglaed sa sapa, siro mango angkataw kansiro remrem siyo kablag.
[50] Siro boo alimowan. Kamay siyo toloy miplaong sa kansiro keyen, Ayaw agkalimo. Ako dayem Isos. Pakaeyaten in kanyo remrem.
[51] Siyo monaik wa din sa bangka, kalbas maoraw in kowaya. Siro maloba agsoyo,
[52] angkataw yewed kansiro atawanan in beet siyabi in piyangwat Isos sa tinapay kansiyo biyagi. Ina yewed kay abel kansiro remrem.
[53] Siro motol sa dagatte, rateng wa sa kobat Ginisarit in bangka yeeket wa.
[54] Siro lomabo, Isos toloy atawanan in mga taga asin,
[55] matang in mga mangyan toloy agberya sa boo sa mga bangen, matang in boo apo maskit yoosong piyagbaba kay Isos kamaybawa saano kansiro abaritaan ista siyo.
[56] Kamayba saano siyo rateng, kamayba sa mga bayante, kamayba sa mga bayan lakoy, kamayba sa kobat, in mga apo maskit piyagbaba sa mga pagpangaronan. Siro agdaing kay Isos keyen, Siro pakapkapen kamayba sa tangrawan waget kaimo lambong. Kalbas in boo kaatang maal wakay.