[1] Kora Isos bangen wa sa Irosalim, sa latayan boksor Olibowan. Piyagrongaw wa in mga bayante Bitpagi osai Bitanya. Piyatokaw Isos in dowai ka agadar,
[2] keyen, Kamo pataboy ista sa bayan Bitanya. Paka kamo rateng wa toloy kanyo batay ngiitan osai ka asno piyagawit asno piyageket. Siyo bodang kay, idbatang kay siyakayan mangyan. Kanyo lowaten, atai babaen.
[3] No apo agsabi sa kanyo keyen nakay batang kanyo piyaglowat, na kanyo sabiyen keyen, Piyagkailangan in Kapwan, toloy wakay din piyagpaoli.
[4] Kalbas panaw wa in dokalaki, ngiitan ngani in bodang asno sa balabaan dalan piyageket sa sakbawan osai ka balay. In kansiro wa piyaglowat in asno,
[5] in mga mangyan ista agtaydek keyen, Nakay batang kanyo piyaglowat ina?
[6] Kansiro siyabi in bilin Isos kalbas siro piyapanaw.
[7] Biyaba kay Isos in bodang asno, piyadamig sa awak in kansiro mga islen, kalbas Isos somakay.
[8] Aronaw mangyan agpadamig kansiro mga islen sa kansiyo batay dalan agmaal kay Isos. In kalaati wakay mandodo palongpong sa kobat, piyadamig sa dalan agmaal kay Isos.
[9] In mga mangyan tokaw kay Isos, osai in sa paoriyan siro agpango keyen, Pagmaalen in Diyos. Kansiyo pabowayen in agrateng apo in kabaloyan in Kapwan.
[10] Pabowayen Diyos in sakopan Dabid, kantam tangona kakoyayan, in sakopan tagoli wakay piyagpangwat. Pagmaalen ngani in Diyos sa ogbos.
[11] Isos rateng sa Irosalim, misoroy sa balay lakoy Diyos. Kansiyo wa piyangkit in boote ista, kalbas siyo lomabo, moli wakay sa Bitanya, sarig in Labing Dowai, angkataw ina yabi wa.
[12] Goribas wakay in siro agoli wakay batang sa Bitanya, agkayawes wa Isos.
[13] Kansiyo ngiitan sa adayonaw osai ka poon igos daonan. Siyo pasabangen, ina piyangkit no nges apo raweg. Kamay idapo ngiitan, no yewed mga daon waget, kataw ina yewed kay betek panggalem igos.
[14] Kalbas kansiyo siyabi sa poon igos keyen, Sogod ngona idapo wa batay mamangan raweg sa kaimo. In kansiyo mga agadar karengey ina pag siyabi.
[15] Siro rateng wakay sa Irosalim, Isos misoroy sa balay lakoy Diyos. Kansiyo piyamoyaw in mga asin agpamabili, osai in mga agpamili sa galem balay lakoy Diyos, piyanligan in mga lamisa in mga agpamariya kowarta, osai in mga pagpanokkawan in mga agpamabili bantog kalapati.
[16] In mga agbaba waget palnowan, kansiyo piyagayaw agpandalan sa galem balay lakoy Diyos.
[17] Kansiyo piyatoldo in mga mangyan keyen, Apo siyolat sa mga Agisolat keyen, Keyen in Diyos, In kangay balay batay piyagawit balay pagpandalanginan sa boo mga mangyan. Ina in siyabi kamay anda pag balay kanyo piyangwat pagpatagowan mga agpanakaw.
[18] Paka karengey ina in mga poon sasirdoti osai in mga agpatoldo in mga Batas Diyos, siro agpamangkit padalan matang Isos mabono, angkataw siro agkalimo sa kansiyo, panawen in boo mga mangyan agsoyo sa kansiyo piyagpatoldo.
[19] Kalbas yabi wa Isos panaw wakay sa bayan, kadayo in kansiyo mga agadar.
[20] Goribas wakay siro domalan wakay sa poon igos, kansiro ngiitan matay wa gayed.
[21] Kay Pidro riyemrem in siyabi kaponi Isos, matang siyo keyen, Laki Agpamatoldo, kaimo pangkiten, matonga wa in poon igos, in kaimo siyompa.
[22] Keyen Isos, Kamo agpasandig wa sa Diyos.
[23] Totoo in kangay piyagsabi sa kanyo, no in mangyan agsabi atai pag boksor keyen panaw wa kao asin, kao somogbo wa sa dagat, na no siyo maniwala keyen batay ngani mibaloy in kansiyo siyabi, no yewed piyagbaslag in kansiyo remrem, na in kansiyo yaayay batay tiyaboy Diyos sa kansiyo, batay ngani mibaloy.
[24] Matang kangay piyagsabi sa kanyo keyen, No kamo agpandalangin apo piyagayay na maniwala kamo keyen, Ina tiyaboy wa, na batay ngani tiyaboy sa kanyo.
[25] No kamo agpandalangin na libangawen wa in mga daet piyangwat sa kanyo, matang in kanyo mga daet liibangaw din in kantam Amang sa langit.
[27] Kora Isos pataboy wakay sa Irosalim. In siyo agipanawan sa balay lakoy Diyos, siyo piyasabangenan in mga poon sasirdoti, osai in mga agpatoldo in mga Batas Diyos, osai in mga koyay.
[28] Siro keyen, Nakay in kaimo kabaloyan agpangwat ina pag mga kataw ina? Nakay in agsogo sa kaimo agpangwat?
[29] Keyen Isos, Ako din apo tanong sa kanyo. No kamo kasagot in kangay, na kangay batay din piyagsabi sa kanyo no nakay in agsogo sa kangay agpangwat ina pag mga kataw ina.
[30] In Owan agpamaotismo, nakay in agsogo sa kansiyo, no in Diyos, no in mga mangyan? Amba, nakay in kanyo sagot?
[31] Kalbas siro wakayte agpaypolongan keyen, No kitam keyen in Diyos, na isag siyo keyen, Na nakay batang kamo yewed maniwala kay Owan?
[32] Kamay no kitam keyen in mangyan, ai ... Siro agkalimo sa mga mangyan, angkataw sa remrem in boo mangyan Owan osai ka poropita.
[33] Matang kansiro siyabi kay Isos keyen, Kami yewed katawan. Siyabi wakay Isos sa kansiro keyen, Na ako din idbatay agsabi sa kanyo no nakay in agsogo sa kangay agpangwat ina pag mga kataw ina.