[1] Isos tagoli misoroy sa balay pagpaniponan. Asin apo kaliyakiyan makenet wa in osai ka bakwaw.
[2] Apo din asin mga mangyan agpamangkit dailan matang Isos masombong, matang siro agriwa sa kansiyo no siyo batay agpaoraw asin pag lalaki sa Ibeng Pamainga.
[3] Kalbas biyerya Isos in makenet in bakwaw keyen, Amba, kao atai sa kagwaraan.
[4] Siyabi Isos sa mga mangyan keyen, Nakay agbangen in betek sa kantam mga batas, osai in agpangwat maal sa Ibeng Pamainga, osai in agpangwat daet? Nakay ngani in maal, osai in agpaboway, osai in agbono? Kamay siro idapo somagot.
[5] Kalbas Isos tomerek sa mga mangyan sa kansiyo balabaan, siyo agkabais, agrongkot panawen marigen in kansiro remrem. Kalbas kansiyo siyabi sa kenet in bakwaw keyen, Kaimo paodoyen in kaimo bakwaw. Toloy kansiyo piyaodoy, in kansiyo bakwaw maal wakay.
[6] Kalbas maypanlabo in mga Parisiyo, toloy maypolongan osai in mga agiyagem kay Irodis, no nangkataw Isos kansiro batay mabono.
[7] Isos panaw, pataboy sa dagatte Galiliya, miyanggat in kansiyo mga agadar. Kalbas mangagak sa kansiyo maloba karowan pag mga mangyan. Siro mga taga kobat Galiliya. Apo din mga taga kobat Odiya,
[8] taga bayan Irosalim, taga kobat Idomiya, taga ripay sapa Ordan, osai taga balabaan mga bayan Tiro, osai Sidon. Maloba karowan pag mangyan in malitaboy kay Isos, panawen siro abaritaan in boo kansiyo mga piyagpangwat.
[9] Kalbas keyen Isos sa kansiyo mga agadar, Ako sandataanen osai ka bangkate matang ako yewed liiget in karowan.
[10] Angkataw aronaw wa in kansiyo piyaoraw, anggan ngona siyo piyagliget in boo mga apo maskit, beet kakapkap sa kansiyo.
[11] In mga piyaglowasan, paka kangitan sa kansiyo in mga mamaw, siro patalegeb sa kansiyo bangen, agpango keyen, Kao in Bodang Diyos.
[12] Kamay siro maloba yaayaw Isos keyen, Ako ayaw kanyo agpatoldowen no nakay ako.
[13] Kalbas Isos monaker sa bolod. Kansiyo piyaanggat in kansiyo mga iidang. Siro ista omaron.
[14] Kalbas siyo omidang Labing Dowai ka kaliyakiyan, siro kansiyo piyangwat mga katiwala, matang siro kansiyo sarig, osai matang siro kansiyo batay piyagsogo agpatoldo,
[15] osai siro piyagpakan kabaloyan agpamoyaw sa mga mamaw.
[16] Anda wa in Labing Dowai kansiyo iidang. In osai Simon kansiyo piyagawit Pidro.
[17] In kadowai osai in katolo Santiyago osai Owan mga bodang Sibidiyo. Siro tayari kansiyo piyagawit Bowanirdis, in beet siyabi ina kagwali dalegdeg.
[18] In kaopat Anris, in kalima Pilipi, in kaenem Bartolomi, in kapito Matiyo, in kawalo Tomas, in kasiyam Santiyago bodang Alpiyo, in kasampo Tadyo, in kalabing osai Simon in piyagawit Ribildi,
[19] in kalabing dowai Odas Iskaryoti, siyo in batay agpadakep kay Isos.
[20] Paka Isos moli wakay, omarigbo wakay sa kansiyo in karowan mangyan, anggan kora rsos idwa katokor agkoman.
[21] In abaritaan ina in kansiyo mga kabelagan, siro asin pataboy matang nges siyo piyaanggat, angkataw in amat mga mangyan keyen, Siyo idapo wa bait.
[22] Kalbas in mga agpatoldo in mga Batas Diyos, in mga batang sa Irosalim siro keyen, Isos piyaglowasan Bilsibol, in poon mga mamaw, ina in agpakan sa kansiyo kabaloyan agpamoyaw sa mga mamaw.
[23] Kalbas in mga mangyan piyasabangen Isos, siyabi sa kansiro sa mga alimbawa keyen, Nangkataw batay mibaloy Katanas in agboyaw sa kansiyo sadiri?
[24] No in mga mangyan sa osai ka sakopan agpalawayan, na batay masida ina pag sakopan.
[25] Osai no agpalawayan in agpaykamalayan, na batay din masida ina pag agpaykamalayan.
[26] Na kataw din ina Katanas. No siyo aglaban sa kansiyo sadiri, no agpalawayan in kansiyo mga sakop, na ina idbatay dogay, agkaidapo wa in kansiyo sakopan.
[27] Kamay in mangyan idbatay kaisoroy sa balay maeyat pag mangyan, matang panakawen in kansiyo mga sangkap, no yewed tokaw kansiyo biyakos in kapwan. No mabakos wa, na batay mapanakaw in sa kansiyo balay.
[28] Totoo in kangay piyagsabi sa kanyo keyen, In boo mga daet maal liibangaw Diyos, kamaybawa in aglibak sa kansiyo.
[29] Kamay no in mangyan aglibak sa Betek pag Abyan, na in Diyos idbatay ngani aglibangaw asin pag daet. Ina pag mangyan apo ngani daet idapo kalobosan.
[30] Kaya siyabi Isos kataw ina, angkataw in kalaati keyen, Siyo piyaglowasan mamaw.
[31] Kalbas rateng wa in kay Isos mga belag, osai in inang. Siro agtaydek sa tongkodan agsogo agberya kay Isos.
[32] Aronaw in agpalpanokkaw sa bangen Isos. Siro keyen, Baati, sa tongkodan in kaimo inang, osai kaimo mga belag. Kao piyagpamangkit.
[33] Kalbas siyo keyen, Nakay in kangay inang? Nakay in kangay mga belag?
[34] Kalbas siyo manriwa sa mga agpalpanokkaw sa kansiyo bangen, siyabi sa agberya sa kansiyo keyen, Anda dayem in kangay inang, osai in kangay mga belag,
[35] angkataw no siyo in agpangwat in beet Diyos, na siyo wa in kangay belag osai inang.