[1] Isos agaway agiplaong sa mga mangyan, kamay ngona in kansiyo siyabi sa mga alimbawa. Siyo keyen, Apo osai ka mangyan agtogda sa kansiyo alamanan mga balagen piyagawit obas. Kansiyo yaalabat. Kalbas siyo agkali sa bato pesaan raweg, agtadyok paltawan batay pagdamayan. Kalbas kansiyo piyaalapet in obasan sa mga mangyan, siyo pataboy sa adayonaw pag kobat.
[2] Paka kaobasen wa, in kapwan agsogo osai ka mangyan, komwa nges sa mga agalapet in kansiyo bagiyan.
[3] Kamay in sogowan diyakep in mga agalapet, biyogbog, piyaoli idapo piyagbaba.
[4] In kapwan agsogo wakay osai, kamay siyo kansiro siyampek sa olo, piyangwatan wano daet.
[5] Kansiyo wakay siyogo osai kay, kadogay kansiro biyono. Aronaw kay in kansiyo siyogo, kamay kataw daan din ina in kansiro piyangwat, in kalaati biyogbog in kalaati biyono.
[6] Osai waget in maal kay kansiyo piyagsogo sa kansiro, in kansiyo piyagpakayawte pag bodang. Siyo in paori piyataboy. In kansiyo remrem keyen, Kansiro batay piyagmaal in kangay bodang. Keyen in kansiyo bait.
[7] Kamay in mga agalapet obasan maypolongan keyen, Anda wa in batay kapwan dogayan. Na dali, bonowen wa, matang kantam wa dogayan in batay nges kansiyo kobat.
[8] Kalbas siyo kansiro ngani diyakep, biyono, biyenglay sa awak alabat.
[9] Na nakay in batay piyangwat in kapwan obasan? Siyo batay ista pataboy, batay kansiyo piyamono ina pag mga agalapet, kalbas in obasan batay piyaalapet sa roma wakay pag mga mangyan.
[10] Yewed kay mana kanyo biyasa in sa mga Agisolat keyen, In bato in piyangidangan in mga agtadyok balay, na ina wa mibaloy in lakonaw sa boo.
[11] Ina in Kapwan in agpangwat. Ina makasoyo sa kantam.
[12] In mga poon Odyo katawan wa siro in piyagtamaan kansiyo alimbawa matang Isos kansiro nges piyagdakep. Kamay siro agkalimo sa mga mangyan, matang siro idapo piyangwat sa kansiyo. Siro panaw wa.
[13] Apo mga Parisiyo, osai mga agiyagem kay Irodis siro siyogo in mga poon kay Isos matang nges siyo abel sa kansiyo agiplaong.
[14] Siro pasabangen sa kansiyo, siyabi keyen, Laki Agpamatoldo, kanyam atawanan kao betek, kao idapo piyagdowai in piyagsabi, kataw in boo mga mangyan tikkatawan sa kaimo pangkit. Totoo in kaimo piyagpatoldo in mga ogali piyagpamangkit Diyos sa mga mangyan. Na nakay in maal sa mga Batas, no agbayad bowis sa poon lakoy Sisar no ayaw wa?
[15] Maal lames in agbayad bowis? Nakay, ayaw? Kamay Isos katawan siro agpakagwali waget, matang siyo keyen, Nakay batang ako kanyo nges piyagkabel? Ako paatangen osai ka kowarta bakal, ako papangkiten.
[16] Kalbas siyo piyaatang. Isos keyen, In rarawan atai, nakay pag mangyante? Kay nakay ngaran in atai agisolat? Siro keyen, Kay Sisar.
[17] Isos keyen, Na kantam taboyen kay Sisar in sa kansiyo, osai in sa Diyos sa kansiyo. Kalbas siro agsoyo kay Isos.
[18] Apo mga Sadosiyo pasabangen kay Isos. In mga Sadosiyo keyen in mga matay idbatay boway wakay.
[19] Siro keyen kay Isos, Laki Agpamatoldo, siyolat Mowisis sa kantam keyen, No apo taybalang matay in lalaki idapo kay bodang, na kailangan in babai kowaen wakay in kansiyo belag. No apo bodang na paapowen sa ngaran in matay.
[20] Na, apo osai ka tayariyan pito ka kaliyakiyan. Taybalang in panganay, kalbas matay, idapo bodang.
[21] Miskapet wakay sa balo in waraan, matay wakay idapo din bodang. Kataw daan ina in mibaloy sa katolo, osai sa mga paori kay.
[22] Ina boo miskapet asin pag kagbaiyan. Ina pag pito ka tayariyan, siro boo matay idapo bodang. Kalbas matay wa din in kagbaiyan.
[23] Na sa dogayan pag boway asin pag pito nakay in batay kansiyo lalaki? Angkataw kansiyo wa liyalaki siro boo.
[24] Keyen Isos, Kamo somala lakoy, angkataw yewed kanyo atawanan in mga Agisolat, osai in kabaloyan Diyos.
[25] Angkataw sa dogayan pag boway in mga mangyan idbatay wa taybalang. Siro kataw wa mga angil sa langit.
[26] No ngani kanyo piyagpanremrem no batay wakay piyaboway in mga matay, na basaen in siyolat Mowisis sa betek apo in poon yangawte agigang. Asin apo siyabi in Diyos kay Mowisis keyen, Ako in Diyos in piyagmaal Abraam, Isaak, osai Akob.
[27] Na no kora Abraam agmaal sa Diyos na in beet siyabi kamayba siro matay siro boway wakay. Kamo somala lakoy.
[28] Osai ka agpatoldo in mga Batas Diyos karengey in siro agpalsisagotan. Kansiyo remrem maal in sagot Isos sa mga Sadosiyo, matang siyo pasabangen kay Isos keyen, Nakay pag Batas in lakonaw?
[29] Isos keyen, Anda in lakonaw pag Batas, in keyen, Laki kasokponan Israil mamarengey, in Kapwan kantam Diyos, siyo waget in Kapwan.
[30] Pagmaalen in Kapwan kantam Diyos in boo kantam galem, in boo abyan, osai in boo remrem, osai in boo eyat.
[31] Anda wakay in kadowai, kitam agpakayawte sa roma mangyan kataw daan in agpakayawte sa kantam sadiri. Idapo wa roma Batas labi kay kalakoy asin pag dowai.
[32] In agpatoldo in mga Batas Diyos keyen, Betek ngani, laki Agpamatoldo. Totoo ngani in kao keyen osai waget in Diyos. Idapo wa roma no yewed siyo waget.
[33] No kitam boo galem, boo remrem, boo eyat agmaal sa Diyos, osai agpakayawte sa kapwa kataw in sa kantam sadiri, na ina labi kay lakonaw sa agtaboy mga ayop piyagsonog, osai in mga ayop piyagbono piyagtaboy sa Diyos.
[34] Ngiitan Isos maalen in kansiyo sagot, matang siyo keyen, Kao bangen wa mipaagem sa mga piyagsakop Diyos. Sogod asin idapo wa kapangaas agtanong kay Isos.
[35] In Isos agpatoldo sa balay lakoy Diyos, siyo keyen, Nakay batang piyagsabi in mga agpatoldo in mga Batas Diyos keyen, In Kiristo kasokponan Dabid?
[36] Bago Dabid wa daan in agsabi batang sa Betek pag Abyan keyen, Siyabi in Kapwan sa kangay Kapwan keyen, Tomokkaw wa kao sa kangay pamalang agbangen, Kao kangay bisi anggan in mga aglaban sa kaimo boo wa kangay piyasakop sa kaimo.
[37] Dabid wa daan in agawit kay Kiristo keyen Kapwan. Na nangkataw ngani batay masabi siyo kasokponan Dabid? In karowan mangyan agkasadapan agparengey kay Isos.
[38] In Isos agpatoldo siyo keyen, Kamo agingat sa mga agpatoldo in mga Batas Diyos. Siro agkasadapan aglambong maaba in siro agipanawan, osai beet siro piyagpakalakonaw in mga mangyan sa mga bayan.
[39] In kansiro din beet in mga maal pag panokkawan sa mga balay pagpaniponan. Beet siro tokaw piyakan sa mga piyasta.
[40] Siro agpapangkit sa mga mangyan siro agpandalangin dogay kamay siro agpanggolpi sa mga kagbaiyan balo. Maloba in batay parosa sa kansiro.
[41] Isos tomokkaw sa balay lakoy Diyos sa bangen pagpanyanganan andog. Kansiyo piyagriwa in mga mangyan agtaboy kowarta. Aronaw in mga mayaman agtaboy lakonaw.
[42] Pasabangen wakay in osai ka kagbaiyan balo maidap, siyo agtaboy dowaite ka kowarta, in kalakoyen osai ka sintimos.
[43] Kay Isos piyasabangen in kansiyo mga agadar keyen, Kangay piyagsabi sa kanyo ina pag balo maidap, kansiyo tiyaboy lakonaw kay sa boo mga tiyaboy.
[44] Angkataw siro boo, kansiro tiyaboy in idwa kansiro kailangan, kamay ina pag balo, ka mayba maidap wano, kansiyo tiyaboy in boo kansiyo pangkowa pamangnen.