[1] Paka kadalan ina pag mga ibeng tagoli wakay agkatipon kay Isos in karowan mangyan. Siro idapo wa pamangnen, matang biyerya Isos in kansiyo mga agadar, siyabi sa kansiro keyen,
[2] Ako agpakayawte sa mga mangyan angkataw tolo wa ka ibeng siro agyanggat kangay, kalbas ngona siro alobosan wa pamangnen.
[3] No siro kangay piyaoli agkayawes sa kansiro mga balay, na siro batay piyaidapan sa dalan. Batang kay sa adayonaw siro in amat.
[4] Keyen in mga agadar, Sa nakay kitam batay kangitan pamangnen atai sa moyod sibay sa karo tai in mangyan?
[5] Keyen Isos, Angkalakoy in kanyo pamangnen? Siro keyen, Pito ka bilog tinapay.
[6] Kalbas in mga mangyan piyatokkaw Isos sa diya. Kalbas kansiyo kiyowa in pito ka tinapay, siyo agpasalamat sa Diyos, kansiyo piyandodo in tinapay, tiyaboy sa mga agadar matang biyagi sa mga mangyan. Kataw ngani ina in piyangwat in mga agadar.
[7] Siro apo dinte mga isda. Ina din kansiyo piyasalamat sa Diyos, kalbas kansiyo siyogo keyen, Anda din taboyen sa mga mangyan.
[8] Kalbas siro boo malpamangan, anggan bosog. Tiipon in tera in mga pandodowan tinapay, pito ka galang lakoy makno.
[9] In mamangan opat ka libo ka mangyan. Kalbas piyaoli Isos in mga mangyan.
[10] Kalbas siyo somakay sa bangka, sarig in kansiyo mga agadar, pataboy sa kobat Dalmanota.
[11] Apo rateng mga Parisiyo, agmatiwid kay Isos. Kansiro beet siyo arikoyan, matang kansiro yaayay keyen, Kao agpapangkit lakonaw pag panawen matang atawanan kao sogowan Diyos.
[12] Kalbas Isos mamayeng lakoy, kansiyo siyabi keyen, Nakay batang kamo in mga agkaboway kay ngona agpamangkit tandaan? Kangay piyagsabi sa kanyo, kamo idbatay ngani piyakan tandaan.
[13] Isos panaw wa sa kansiro, somakay sa bangka, pataboy sa ripay dagatte.
[14] In mga agadar alibangawan agbaba pamangnen. In kansiro pamangnen sa bangka osai waget ka tinapay.
[15] Isos miplaong sa kansiro keyen, Kamo agingat, ayaw agalapet in sa mga Parisiyo pag pamaistobo tinapay osai in kay Irodis.
[16] Kalbas in mga agadar agpolong keyen, Kaya ina siyabi Isos, angkataw kitam idapo piyagbaba pamangnen.
[17] Ina atawanan Isos, matang siyo keyen, Nakay batang kanyo piyagpaypolongan keyen, Kitam idapo piyagbaba pamangnen? Ikkay mana kanyo atawanan, ikkay atawanan? Marigen kay lames kanyo remrem?
[18] Kamo nges apo mata, kamay yewed mana kangitan? Kamo nges apo talinga, kamay yewed mana karengey? Kamo mana agkalibangaw wa?
[19] In kangay piyandodo in lima ka tinapay sa lima ka libo ka mangyan angkaro ka galang in makno in tera in pandodowan tinapay? Siro keyen, Labing dowai.
[20] Keyen wakay Isos, In kangay piyandodo in pito ka bilog tinapay sa opat ka libo ka mangyan angkaro ka galang in makno in tera? Siro keyen, Pito.
[21] Keyen siyo, Kalbas ina mana yewed kay daan kanyo atawanan?
[22] Kora Isos rateng sa bayante Bitsayda. Osai ka kaliyakiyan beleg biyaba kay Isos, keyen, Siyo atangen.
[23] Kay Isos yaatang sa bakwaw in beleg, yaakay sa awak bayan. Kalbas in mata kansiyo tiyopayan, yaatang. Kalbas keyen, Kao kangitan kamayba nakay?
[24] In kaliyakiyan mangkit, kalbas keyen, Ako kangitan mga mangyan, kamay siro kagwali poon yangaw agipanawan.
[25] Tagoli wakay yaatang Isos kansiyo mata. Kalbas in beleg mangkit gayed, kangitan wa gayed.
[26] Siyo piyaoli wa Isos sa kansiyo balay keyen, Ayaw wa domalan sa bayan.
[27] Isos, osai in kansiyo mga agadar, ista pataboy sa mga bayante sa bangen Sisariya Pilipo. In siro agipanaw sa dalan kansiyo tiyanong in mga agadar keyen, Nakay in piyagsabi in mga mangyan, nakay kono pag mangyan ako?
[28] Siro keyen, In siyabi in amat kao kono Owan in agpamaotismo, in amat wakay keyen kao Iliyas, apo din keyen kao osai sa mga poropita.
[29] Kamay keyen Isos, Kamo wakay nakay? Ako nakay pag mangyan? Pidro keyen, Kao in Kiristo.
[30] Kalbas Isos agbilin sa kansiro keyen, Ayaw wano agsabi kamayba kay nakay keyen ako in Kiristo.
[31] Piyarakay ina betek Isos agpatoldo sa kansiyo mga agadar keyen, Ako in Bodang Mangyan kailangan piyagpaidapan aronaw. Ako batay piyagidangan in mga koyay osai in mga poon sasirdoti, kadayo in mga agpatoldo in mga Batas Diyos. Kalbas ako batay biyono, kamay sa katolo ka ibeng ako boway wakay.
[32] Ina kansiyo siyabi mapawa sa kansiro. Kalbas Isos piyasoway Pidro sa amat, siyabi keyen, Ayaw wa agkataw ina.
[33] Kamay Isos agpangkit sa kansiyo mga agadar, agpangelel kay Pidro keyen, Katanas, kao bali wa. In kaimo remrem yewed batang sa Diyos no yewed batang sa mga mangyan.
[34] Biyerya Isos in mga mangyan, kadayo in kansiyo mga agadar, kansiyo siyabi keyen, No siyo in beet miyanggat sa kangay, na papaoriyen in kansiyo sadiri remrem, pasanen in kansiyo kodos, miyanggat sa kangay.
[35] Angkataw no in mangyan agaman sa kansiyo boway, na siyo batay aidapowan. Kamay in yewed agaman kansiyo boway panawen sa kangay osai panawen sa Maal pag Barita na siyo batay kabel boway.
[36] Idapo kabolowan sa osai ka mangyan no kansiyo abel in boo kobat kamay in kapalit in kansiyo boway.
[37] In mangyan idapo batay mataboy kapalit matang piyaoli in kansiyo boway.
[38] Ngona pag betek aronaw in mga agpamangwat daet, na no in mangyan ngona dayo agpabelag sa kangay, agkarikoy agbarita in kangay agiplaong asin sa mga agpamangwat daet, na dogayan ako in Bodang Mangyan idbatay din agpabelag sa kansiyo, dogayan in ako rateng wakay apo piyagngitan in kabaloyan lakoy kangay Amang, sarig in mga angil.