[1] In Isos aglabo wa sa balay lakoy Diyos siyabi sa kansiyo in osai ka agadar keyen, Laki Agpamatoldo, kao mangkit, in kalakoyen anda pag balay, in pangkalakoyen in mga bato piyabengbeng atai sa balay lakoy Diyos.
[2] Keyen Isos, Kaimo piyagngitan in kalakoyen ina pag mga balay. Ina dogayan idapo batay mitera bato asina agisapaw sa kansiyo pagaponan bato, in boo mga bato batay piyagpanligan.
[3] In kora Isos agtokkaw sa boksor Olibowan, kansiro piyagngitan in balay lakoy Diyos. Kalbas kora Pidro, osai Santiyago, osai Owan osai Anris, miplaong sa kansiyo idapo roma karengey. Siro keyen,
[4] Nangkadogay kay batay mibaloy ina pag kaimo siyabi? Nakay in tandaan no bangen wa mibaloy ina pag boo?
[5] Siyabi Isos sa kansiro keyen, Kamo agingat, karam kamo batay piyadaya mangyan.
[6] Angkataw aronaw batay atai agalapet kangay ngaran keyen siro in Kiristo. Kalbas kansiro batay piyaglibangaw in karowan.
[7] Kamo ayaw agkalimo kamayba kamo karengey agaleng mga aggira, osai mga barita mga gira. Kailangan ngani mibaloy ina pag mga kataw ina, kamay yewed kay toloy rateng in kalobosan.
[8] Angkataw osai ka tiribo batay aglaban sa osai ka tiribo, osai ka sakopan batay aggira sa osai ka sakopan. Osai batay apo mga loni sa aronaw kobat, apo batay agkayawes. Kamay in mga kaidapan kataw ina parakayan kay waget agpalowas in maal pag kabetek.
[9] Pakaeyaten kamo in agpasandig sa Diyos, angkataw kamo batay piyadakep, piyagosap mga poon, kamo batay piyagbogbog sa mga balay pagpaniponan. Panawen kamo sa kangay kamo batay piyagpaadap sa mga gobirnador, sa mga poon lakoy. Na kamo kasabi sa kansiro in Maal pag Barita.
[10] Bayo rateng in kalobosan kailangan piyatoldo in Maal pag Barita sa boo kobat.
[11] Paka kamo diyakep batay piyagosap, na kamo ayaw agpanremrem no nakay in kanyo batay matiwid. Asin betek kanyo sabiyen in piyatoldo sa kanyo in Betek pag Abyan angkataw siyo wa in agiplaong, idwa kamo.
[12] In belag daan in batay agpadakep kansiyo belag matang biyono, in amang daan in batay agpadakep kansiyo bodang, matang biyono. In mga bodang batay labanan agpabono sa mga koyay.
[13] Kamo batay piyagkabaisan in boo, panawen kamo sa kangay. Kamay in agyanggat sa kangay anggan sa kalobosan, na siyo in batay piyaboway.
[14] Isos agiplaong kay keyen, Kanyo batay piyagngitan agitadyok sa piyagayaw pagtadyokan in makasoka sa Diyos. (In beet siyabi ina kailangan atawanan in agbasa.) Na no ina mibaloy wa, na in mga sa Odiya domalagan wa pataboy sa mga boksor.
[15] In sa ogbos balay toloy lomabo, ayaw wa komwa kamayba nakay sa kansiyo balay.
[16] In sa agay ayaw wa moli matang komwa kanyo islen.
[17] Asin pag mga ibeng ayawte in mga bonting osai in mga agpasoso.
[18] Kanyo pandalanginen ina pag mga kataw ina ayaw mibaloy sa betek pangodan.
[19] Angkataw asin pag betek batay apo lakonaw wano pag kaidapan, sogod piyangwat in Diyos in kobat anggan ngona idapo kay batang kaidapan kalakoy ina. Idapo wakay din batay kalakoy ina kamayba wa nangkadogay.
[20] No ina pag betek yewed piyakadogayte in Diyos na idapo mangyan batay mapaboway. Kamay panawen sa kansiyo mga iidang kansiyo ngani piyakadogayte.
[21] Kalbas no apo agsabi sa kanyo keyen, Atai wa in Kiristo, no keyen, Asina wa siyo, na kamo ayaw maniwala.
[22] Angkataw batay apo lomwas mga agpakagwali Kiristo, mga agsabi keyen siro poropita. Siro batay agpapangkit mga tandaan, mga makasoyo, matang nges liibangaw kadayo in mga iidang in Diyos.
[23] Na kamo agingat wa. Baina, kangay wa piyatokaw siyabi sa kanyo in boote.
[24] Paka kadalan ina pag kaidapan batay lomened in ibeng idbatay agrawa in bolan.
[25] Batay agpangaragrag in mga magirem batang sa langit. Batay piyagpagolo in mga apo kabaloyan sa kiwang.
[26] Ako in Bodang Mangyan batay piyagngitan sa mga libo, agrateng apo kabaloyan lakoy, agrawa lakoy.
[27] Kangay batay piyagsogo in mga angil sa boo kobat matang piyagtipon in mga iidang Diyos batang sa boo mga kobat.
[28] Isos keyen kay, Kanyo remremen in alimbawa in poon igos. No ina mandaon wakay na kanyo atawanan bangen wa in pangibeng.
[29] Na kataw daan ina, no kanyo ngiitan agpangibaloy wa ina in kangay mga siyabi, na kanyo batay atawanan bangen wa in kabetek in ako atai agtaboy, agrateng wa.
[30] Kanyo remremen. Ina pag boote batay wa mibaloy bayo matay in boo mga mangyan agkaboway ngona.
[31] Agkaidapo in langit osai in kobat kamay in kangay mga agiplaong idbatay ngani maidapo.
[32] Isos keyen kay, Ina pag ibeng, ina pag kabetek in agrateng ina, idapo katawan kamayba in mga angil sa langit, kamayba ako in Bodang. Dayem in Amang, siyo waget in katawan ina.
[33] Kamo agingat, agdamay, angkataw yewed kanyo atawanan no nangkadogay ina batay rateng.
[34] Ina kataw osai ka mangyan batay panaw pataboy sa adayonaw pag kobat, piyaalapet in kansiyo pagoliyan sa mga sogowan. In baatte osai kansiyo piyakan panawen, in agdamay sa sakbawan kailangan baatte sandata sa kansiyo wakay agrateng.
[35] Na kamo kataw daan ina, kailangan baatte sandata, angkataw yewed kanyo atawanan no nangkadogay batay rateng in kapwan balay, no bayapon, no kagwaraan yabi, no panalaok wa manok, no omaga.
[36] Karam siyo toloy rateng, kalbas kamo aratengan agesek.
[37] In kangay piyagsabi sa kanyo, kangay piyagsabi sa boo mangyan keyen, Agsandata wa kamo.