[1] Sabado in Ibeng Pamainga, paka malabo wa in ibeng, Mariya taga Magdala, osai Salomi, kadayo Mariya inang Santiyago, siro bomili pamada, batay piyagyodyod sa bilog Isos.
[2] Kalbas Linggo omaga, lomwas wa in ibeng, siro pataboy sa lebengan.
[3] Sa dalan kay siro agpanggisodan keyen, Nakay lames isag in kantam batay agkowa in bato agibengbeng sa lebengan?
[4] Kaya siro keyen angkataw ina lakonaw lakoy. Kadogay kansiro piyangkit, kiyowa wa mana in bato, agiboswang wa in sakbawan.
[5] Siro misoroy sa lebengan kalbas kansiro ngiitan osai ka begle agtokkaw sa kansiro agbangen pamalang. In lambong maaba, maboksi wano. Siro alimowan.
[6] Keyen in kaliyakiyan, Ayaw agkalimo. Kanyo piyagpamangkit Isos taga Nasarit, in piyako sa kodos. Siyo idapo wa atai, siyo boway wakay. Baanda in kansiyo batang pagibolalangan.
[7] Ngona kamo panaw wa. Kanyo sabiyen sa mga agadar, labi wa kay Pidro, keyen, Isos tokaw sa kanyo sa Galiliya. Ista siyo kanyo batay ngiitan, kataw in kansiyo siyabi sa kanyo.
[8] Kalbas siro panaw wa sa lebengan, domalagan, panawen siro maloba wano agkalimo. Ina idwa siyabi kamayba kay nakay panawen siro agkalimo.
[9] Isos boway wakay pasodip sa ibeng Linggo. Siyo tokaw papangkit kay Mariya taga Magdala. Pito ka mamaw tangona in biyoyaw Isos asin pag kagbaiyan.
[10] In mga agadar agalwasi kay Isos, agpanangis. Mariya pataboy sa kansiro agbarita in kansiyo ngiitan.
[11] Kamay siro yewed maniwala kay Mariya in siyo keyen Isos boway wakay, kansiyo ngiitan.
[12] Isos papangkit din sa dowai ka agadar agipanaw agtaboy sa agay, kamay miyalis wa in kansiyo bilog.
[13] Kalbas siro moli wakay sa Irosalim, in mibaloy biyarita sa amat mga agadar, kamay siro yewed din maniwala.
[14] Kalbas Isos papangkit wakay sa Labing Osai, sa betek siro agpalpamangan. Siro kansiyo siyabiyan panawen siro yewed agpasandig sa kansiyo, osai panawen marigen in kansiro remrem yewed maniwala sa mga kangitan sa kansiyo in siyo boway wakay.
[15] Kalbas siyo agbilin wa keyen, Kamo agipanawan sa boo kobat, kanyo patoldowen in Maal pag Barita sa boo mga mangyan.
[16] In maniwala osai biyaotismowan batay piyaboway, kamay in yewed maniwala batay piyagparosa.
[17] In mga agpasandig sa kangay batay piyakan kangay kabaloyan, matang kapangwat mga lakonaw pag panawen. Sa kangay kabaloyan siro batay kapamoyaw sa mga mamaw, osai batay kaiplaong in amat wakay agiplaong.
[18] Kamayba siro mipaatang sa olay siro idbatay manakay, kamayba mipainem sa makapolongan. Osai no kansiro kiyapkap in mga apo maskit na batay maoraw.