[1] Paka omaga wa toloy maypolongan in mga poon sasirdoti, osai in mga koyay, kadayo in mga agpatoldo in mga Batas Diyos, osai in amat kay pag mga tanongan. Kalbas Isos kansiro piyabakos, biyaba kay Pilato.
[2] Siyabi Pilato sa kansiyo keyen, Kao lames in Poon lakoy mga Odyo? Isos keyen, Kao wa in agsabi.
[3] Karowan pag sombong kay Isos in siyabi in mga poon sasirdoti.
[4] Pilato keyen kay, Nakay batang kao idbatay meles? Kao karengey in kalobaen in kansiro mga sombong sa kaimo.
[5] Kamay Isos yewed din meles, matang Pilato agsoyo.
[6] In ogali Pilato baatte piyasta Paskowa siyo agpalpas osai ka bilanggo, no nakay in iidang in mga mangyan.
[7] Ina pag betek apo mangyan piyagbilanggo in ngaran Barabas. Barabas osai in kansiyo mga sarig, siro mga ribildi, mga batang agbono mangyan sa agpalawayan lakoy.
[8] Kalbas in mga mangyan pasabangen miplaong kay Pilato keyen, Pangwaten wa in kaimo ogali agpalpas bilanggo.
[9] Siyo keyen, Nakay, kanyo beet kangay wa palpasen Isos in Poon lakoy mga Odyo?
[10] Pilato katawan kaya Isos piyaadap sa kansiyo in mga poon sasirdoti angkataw siro agpanagiri kay Isos.
[11] Kamay in mga mangyan piyangolokan in mga poon sasirdoti keyen, Barabas wa in ayayen.
[12] Siyabi Pilato keyen, Na no kataw ina nakay wa in kangay pangwaten atai pag mangyan in kanyo piyagawit Poon lakoy mga Odyo?
[13] Kalbas mango in mga mangyan keyen, Pakowen wa sa kodos.
[14] Keyen Pilato, Nakay batang? Nakay in kansiyo piyangwat daet? Kamay labi kay malpangowan in mga mangyan keyen, Pakowen wa sa kodos.
[15] In beet Pilato in mga mangyan anggayan, matang kansiyo piyalpas Barabas. Isos kansiyo piyabogbog, kalbas tiyaboy wa sa mga sondalo matang piyako sa kodos.
[16] Isos biyaba in mga sondalo sa galem in tongkodan in balay lakoy gobirnador. Kansiro tiipon in boo barkadaan mga sondalo.
[17] Isos kansiro siyoroyan osai ka lambong mapola wano. Siro agsolapid balagen dogiyen, piyasarikaw sa kansiyo.
[18] Siro agpakagwali agmaal sa kansiyo. Siro keyen, Boway wa in Poon lakoy mga Odyo.
[19] Kalbas Isos piyamogbog oway sa olo, piyanopayan. Siro agpaselang kagwali agdaing sa kansiyo.
[20] Paka siro kalbas wa agmesa sa kansiyo, kansiro wakay kiyowa in mapola wano, siyoroy wakay in kansiyo lambong, piyapanaw wa, batay piyako sa kodos.
[21] Sa dalan wa kansiro atagbo osai ka kaliyakiyan, in ngaran Simon taga Sirini, amang Aliyanro osai Ropo. Siyo piilitan in mga sondalo keyen, Babaen kao in kay Isos kodos.
[22] Isos kansiro biyaba sa kobat piyagawit Golgota, in beet siyabi bitol olo.
[23] Isos piyakan nges alak piyaageman gamot piyagawit mira, kamay siyo dayo minem.
[24] Isos kansiro piyako sa kodos. Kalbas in agbagi kansiyo mga damit, in mga sondalo agpostaan matang atawanan no nakay in batay kabel ina.
[25] Omaga kay in ibeng in Isos piyako sa kodos.
[26] Apo siyolat sa kansiyo ogbos in sombong sa kansiyo keyen, In Poon lakoy mga Odyo.
[27] Dowai ka ribildi piyako sa mga kodos bangen kay Isos, in osai sa pamalang agbangen, in osai sa tagwala agbangen.
[29] Isos piyamalowasan in mga agpaypanlawey, aglinglingay, agsabi keyen, Aas, kao pag batay kono agregnas in balay lakoy Diyos, kalbas tolo waget ka ibeng tagoli wakay mipangwat.
[30] Amba, kao lompot wa sa kodos, pabowayen in kaimo bilog.
[31] Kadayo din in mga poon sasirdoti agpatawa sa kansiyo, osai in mga agpatoldo in mga Batas Diyos, agpalpansabiyan keyen, Siyo kono agpaboway sa mga amat, kamay in kansiyo bilog yewed kansiyo apaboway.
[32] No kantam ngani ngiitan siyo lompot sa kodos na kantam atawanan siyo in Kiristo in Poon lakoy mga kasokponan Israil, na kitam maniwala wa sa kansiyo. Kadayo din in kansiyo mga sarig agipako sa mga kodos, siro agpamalowas din sa kansiyo.
[33] Tangali wa in ibeng malened wa in boo kobat anggan mangiriyan lakoy.
[34] Mangiriyan wa Isos mango lakoy keyen, Iloy, iloy, lama sabaktani? Na in beet siyabi keyen, Kangay Diyos, kangay Diyos, nakay batang ako kaimo biyaliwan?
[35] In kalaati asin agtaydek karengey in kansiyo siyabi. Siro keyen, Baina, kansiyo piyagberya Iliyas.
[36] In osai toloy domalagan, komwa kagwali lomot, piyaistebek sa tanrak, biyobowan kagwali toba, matang somopsop Isos. Kalbas keyen, Ayaw kay. Kantam pangkiten no rateng Iliyas batay agpalompot sa kansiyo.
[37] Isos mango lakoy, kalbas matay wa.
[38] In damit pamengbeng sa galem balay lakoy Diyos toloy marognit sa kagwaraan malsoway.
[39] In kapitan sondalo agtaydek sa bangen kodos kangitan in Isos matay kataw ina. Matang siyo keyen, Totoo mana ngani ina pag mangyan Bodang Diyos.
[40] Apo din mga kagbaiyan sa adayonaw agriwa. Kadayo Mariya taga Magdala, kadayo Salomi, kadayo Mariya inang tayari Santiyagote osai Osi.
[41] Tangona daan sa Galiliya siro agyanggat wa kay Isos agtolong. Asina din in amat kay pag mga kagbaiyan in mga batang sarig Isos in siyo agonaker agtaboy sa Irosalim.
[42] -
[43] Ina ibeng agsandata, goribas wa in Ibeng Pamainga. Panawen agkabayapon wa kaya Osi pataboy kay Pilato, maeyat in remrem agayay in bilog Isos. Ina Osi taga Arimatiya. Siyo osai ka tanongan in mga Odyo piyaglakonaw in mga mangyan. Siyo agpanaya din sa kabetek in Diyos agpapoon.
[44] Pilato agsoyo keyen, Nakay, matay wa mana? Matang kansiyo piyaberya in kapitan sondalo, keyen, Nakay, matay wa ngani Isos?
[45] Keyen in kapitan, Matay wa ngani. Matang keyen wakay Pilato kay Osi, Na dali wa, kaimo wa kowaen in bilog.
[46] Kalbas Osi bomili benang lino. In bilog Isos kansiyo piyalompot, tiyeem sa benang, piyabolalang sa leyang kiyali sa bato lintoy lakoy. Kalbas in sakbawan biyengbeng wakay bato lakoy.
[47] Mariya taga Magdala agriwa osai Mariya inang Osi. Kansiro ngiitan no saano in aglebeng kay Isos.