[1] Tagoli Isos sa balabaan dagatte agpatoldo. Kalbas maloba karowan in mangyan agkatipon sa kansiyo, matang siyo somakay sa osai ka bangka sa dagatte, siyo asin agtokkaw. In boo karowan agaron sa diya sa balabaan dagatte.
[2] Kalbas siro kansiyo piyatoldo aronaw sa mga alimbawa. Kataw tai in kansiyo siyabi,
[3] Mamarengey. Apo mangyan panaw batay agsabog bini.
[4] In siyo agsabog apo bini maragrag sa bolaos. Kalbas rateng in mga bantog, ina kiyoman.
[5] Apo din maragrag sa batowen, yewed matekba in diya. Ina toloy moslod angkataw yewed malayem in diya.
[6] Kamay paka tangali wa in ibeng, ina aibengan, matay, angkataw korangte in dalig.
[7] Apo din maragrag sa lalosenan. Kalbas mistobo in lalosen, kiyopot in togda, idwa manggalem.
[8] Kalbas in amat wakay maragrag sa maal pag diya, ina mistobo, agtarobos, manggalem. Apo poon manggalem tatlompo ka beter, apo animnapo, apo sangdaan.
[9] Kalbas Isos keyen, In apo talinga na mamarengey wa.
[10] Kalbas paka idapo wa in karowan, in Labing Dowai, kadayo din in mga sa bangen, siro agtanong kay Isos no nakay in beet siyabi in alimbawa.
[11] Keyen Isos, Kamo piyakan wa kabaloyan matang kanyo atawanan wa in tangona piyagbetang panawen sa Diyos agpapoon. Kamay sa roma mga mangyan in boo piyagalimbawa,
[12] matang Kamayba siro agpangkit agpangkit, siro idbatay daan katawan, osai kamayba siro agparengey agparengey, siro idbatay daan katawan. No yewed kataw ina na nges siro patobang wa sa Diyos, kalbas liibangaw in kansiro mga daet.
[13] Kalbas siyabi Isos keyen, Ikkay mana kanyo atawanan ina pag alimbawa? Na nangkataw batay kanyo atawanan in boo mga alimbawa?
[14] In beet siyabi in bini piyagsabog in mangyan ina in Agiplaong Diyos.
[15] In beet siyabi in mga sa bolaos, ina in mga mangyan agparengey sa Agiplaong Diyos, kalbas toloy asina wa Katanas, piyagkowa in Agiplaong mipasabog sa kansiro.
[16] Kataw din ina in mga sa batowen. Ina in mga mangyan paka siro karengey in Agiplaong ina toloy nges kansiro tiyanggap, agkaanggay,
[17] kamay idwa kansiro piyagremrem gayed, no yewed kadogayte waget siro agpaniwala. Paka apo magolo, no yewed siro piyagpaidapan panawen sa Agiplaong, na siro toloy wa atorayan.
[18] Kalbas in amat wakay kataw in mga sa lalosenan, ina in mga karengey in Agiplaong,
[19] kalbas siro agkariyaban wa atai sa kobat, osai agkabeet sa mga kowarta, sa mga sangkap, kalbas piyagliget in Agiplaong, ina idwa manggalem.
[20] Kamay in mga sa maal pag diya, siro in agparengey in Agiplaong, agalapet ina, kalbas manggalem apo tatlompo, apo animnapo, apo sangdaan.
[21] Siyabi Isos keyen, No in mangyan agparaet tinglaw na idbatay piyagtakleb kaldido, idbatay din piyagbetang sa ngato talabang, no yewed batay piyagsokbit sa pagsokbitan tinglaw.
[22] Angkataw in boo mga piyagbetang batay piyagpangkit. In boo mga piyagtago, batay atawanan.
[23] In apo talinga, na mamarengey wa.
[24] Isos keyen kay, Remremen in kanyo piyagparengey. No nangkalakoy in kanyo piyagtaboy, na kalakoy din ina in piyagtaboy wakay Diyos sa kanyo, labi kay.
[25] Angkataw in apo, na batay kay piyagpakan. Kamay in idapo, na batay wakay piyagkowa kamayba nakay in kansiyo piyagremrem kansiyo.
[26] Keyen Isos, In Diyos agpapoon kataw osai ka mangyan agasik bini sa agay.
[27] Kalbas baat yabi agesek, baat ibeng agipanawan. In bini agboslod, agistobo, yewed atawanan in kapwan no nangkataw ina.
[28] In diya in agpaistobo, in tokaw lomwas in daon, kalbas in bonting, kalbas in galem lakoy.
[29] Kamay paka layes wa in galem, in kapwan toloy agani, angkataw rateng wa in tagani.
[30] Keyen Isos, Kataw nakay lames in Diyos agpapoon? Aa. In kangay alimbawa asin keyen,
[31] Ina kagwali osai ka bisloy. Ina kalakoyte wano sa boo mga bini sa kobat,
[32] kamay paka tiyogda siyo mistobo wa lakoy labi kay sa boo mga togda piyagpanggolay, kalbas mansanga lakoy anggan in kansiyo mga sanga sibay wa piyagpogadan mga bantog.
[33] Kataw ina Isos agpatoldo sa kansiro sa mga alimbawa, no nangkalakoy in kansiro abaloyan atawanan.
[34] Siyo yewed agpatoldo sa kansiro no yewed sa mga alimbawa. Kamay paka idapo wakay in mga mangyan kansiyo siyabi sa kansiyo mga agadar in boo beet siyabi in mga alimbawa.
[35] Ina daan pag ibeng, bayapon wa, siyabi Isos sa kansiyo mga agadar keyen, Kitam wa motol sa dagatte.
[36] Matang biyaliwan wa siro in karowan, siro agsakay sa kansiyo datiyan bangka pagtokkawan. Apo din sarig roma pag mga bangka.
[37] Kalbas apo rateng bagyo, in bangka piyagsipwakan lakoy bongkalos anggan agkaleggeb wa.
[38] Isos apo teken agesek sa solit agbangen. Kalbas siyo kansiro piyolaw keyen, Laki Agpamatoldo, kao lames yewed agkalawagen? Kitam batay wa matay.
[39] Kalbas siyo mipolaw, piyangelel in kowaya keyen, Siyana wa. Siyabi sa dagat keyen, Sibay wa. Kalbas maoraw wa in kowaya, apyaan wa gayed in dagat.
[40] Kalbas siyabi Isos sa mga agadar keyen, Nakay batang kamo agkalimo? Kamo mana yewed kay agpasandig sa kangay?
[41] In mga agadar maloba wa agsoyo, maypolongan keyen, Nakay lames pag mangyan ina? Agpaniwala sa kansiyo kamayba in kowaya, kamayba in dagat.