[1] Isos panaw wa ista, pataboy sa kobat Odiya, kalbas motol sa sapa Ordan. Tagoli wakay siyo piyagtiponan aronaw mangyan. Siyo agpatoldo sa kansiro kataw in kansiyo datiyan ogali.
[2] Apo mga Parisiyo pasabangen kay Isos, kansiro beet siyo abel, matang kansiro siyabi keyen, Maal lames sa mga Batas Diyos no in lalaki agbenglay sa kansiyo babai?
[3] Isos keyen, Nakay in Batas tiyaboy Mowisis sa kanyo?
[4] Siro keyen, Mowisis pomayag keyen, In lalaki maal agbenglay sa kansiyo babai no in babai piyakan wa solat sa agpalsoway.
[5] Kamay siyabi Isos sa kansiro keyen, Kaya kansiyo siyolat ina pag Batas, angkataw marigen in kanyo remrem.
[6] Kamay in siyabi sa mga agisolat keyen, Sa parakayan kay in piyangwat in Diyos in kobat, in mga mangyan kansiyo piyangwat kaliyakiyan osai kagbaiyan.
[7] Ina in dailan kaya piyagbaliwan in kaliyakiyan in kansiyo mga koyay, maysarig wa siro osai in babai.
[8] Siro mibaloy wa osai waget, matang siro idwa dowai, no yewed osai waget.
[9] Na in piyaysarig in Diyos ayaw agpasowayen mangyan.
[10] Paka siro rateng sa balay in mga agadar agtanong wakay kay Isos panawen ina pag kansiyo siyabi.
[11] Siyo keyen, No osai ka kaliyakiyan agbenglay sa kansiyo babai, miskapet wakay sa osai, na siyo agpangwat daet sa kansiyo babai, siyo agpanggaraw.
[12] Osai no in osai ka kagbaiyan agbenglay sa kansiyo lalaki, miskapet wakay sa osai na siyo din agpanggaraw.
[13] Apo mga agbaba mga bodang kay Isos, matang kansiyo atangen. Kamay in mga agbaba piyangelel in mga agadar.
[14] Paka Isos karengey ina, siyo agalitan, siyabi sa mga agadar keyen, In mga bodang pasabangenen sa kangay. Ayaw agayawen, angkataw sa mga kataw ina in Diyos agpapoon.
[15] Totoo in kangay piyagsabi, in yewed agtolad sa bodangte agpasakop sa Diyos, na siyo idbatay ngani sa sakopan Diyos.
[16] Kay Isos kiyapet in mga bodang, yaatang, piyandalangin.
[17] In Isos batay wa panaw, apo osai ka kaliyakiyan domalagan pasabangen sa kansiyo, agpaselang keyen, Maal pag Agpamatoldo, nakay lames in kangay pangwaten matang apo boway idapo kalobosan?
[18] Isos keyen, Nakay batang ako kaimo piyagawit maal? Idapo maal no yewed in Diyos waget.
[19] Kaimo atawanan in mga Batas keyen ayaw agbono mangyan, ayaw manggaraw, ayaw manakaw, ayaw agsabi baribid, ayaw agpamadaya, pagmaalen in kaimo mga koyay.
[20] Keyen in kaliyakiyan, Laki Agpamatoldo, ina pag boo kangay piyagpaniwalaan sogod ako kalakoyte kay.
[21] Kalbas siyo piyangkit Isos, piyagpakayawte. Siyabi keyen, Osai kay in korang sa kaimo. Kao panaw wa, kaimo pabiliyen in kaimo boo piyagalapet, in abel kowarta taboyen sa mga maidap, na kao batay apo sangkap sa langit, kalbas kao atai wakay miyanggat sa kangay.
[22] Agpanremrem in kaliyakiyan asin pag siyabi, siyo panaw wa agrongkot, angkataw aronaw in kansiyo sangkap.
[23] Piyangkit Isos in kansiyo mga agadar, siyabi sa kansiro keyen, Maidap wano sa mangyan aronaw in sangkap in agpasakop sa Diyos.
[24] Kalbas in mga agadar agsoyo sa kansiyo siyabi. Tagoli wakay siyabi Isos keyen, Mga bodang, maidap wano in agpasakop sa Diyos.
[25] Maidap komislot sa salay karayom in osai ka ayop lakoy piyagawit kamilyo, kamay labi kay maidap sa mangyan aronaw in sangkap in agpasakop sa Diyos.
[26] In mga agadar agsoyo labi wa, siyabi sa kansiyo keyen, Na nakay ngani in batay apaboway?
[27] Isos agpangkit sa kansiro keyen, Ina yewed apangwat mangyan, kamay yewed maidap sa Diyos angkataw in boote apangwat Diyos.
[28] Pidro miplaong kay Isos keyen, Baanda, kanyam wa biyaliwan in boote sa kanyam matang miyanggat sa kaimo.
[29] Keyen Isos, Totoo in kangay piyagsabi, no in mangyan agbaliwan kansiyo pagoliyan, kansiyo mga belag, mga koyay, mga bodang, mga agay, panawen sa kangay, osai panawen sa Maal pag Barita,
[30] na ngona wa daan pag boway siyo batay piyakan sangdaan ka mga belag, mga inang, mga bodang, mga kobat, kamay batay din piyagpaidapan. Kalbas dogayan siyo batay agkaboway idapo kalobosan.
[31] Kamay aronaw mga tokaw ngona dogayan apaoriyan, aronaw mga paori ngona dogayan batay manokaw.
[32] Kora Isos agonaker sa dalan agtaboy sa Irosalim. Isos tokawan sa kansiro. In mga agadar agsoyo. Agkalimo in mga mangyan agyanggat sa kansiyo. In Labing Dowai piyasoway Isos sa karowan, siyabi sa kansiro in batay mibaloy sa kansiyo keyen,
[33] Baanda, kitam agonaker agtaboy sa Irosalim. Kalbas ako in Bodang Mangyan batay tiyaboy sa mga poon sasirdoti, osai sa mga agpatoldo in mga Batas Diyos. Siro batay maypolongan keyen bonowen, kalbas ako batay tiyaboy sa mga yewed Odyo.
[34] Ako kansiro batay piyagmesa, piyagtopayan, piyagbogbog, kalbas biyono. Kamay sa katolo ka ibeng ako batay wakay boway.
[35] Pasabangen kay Isos tayari Santiyago, in osai Owan, mga bodang Sibidiyo. Siro keyen, Laki Agpamatoldo, kami nges apo piyagayay sa kaimo.
[36] Keyen Isos, Nakay ina?
[37] Siro keyen, Dogayan paka kao agpapoon lakoy kami nges patokkawen sa kaimo bangen agtolong sa kaimo agpapoon, in osai sa kaimo pamalang agbangen, in osai sa tagwala agbangen.
[38] Kamay keyen Isos, Yewed kanyo atawanan in beet siyabi kanyo piyagayay. Kamo lames batay kabaloy agtiis sa kaidapan kangay batay piyagtiisan? Kamo lames batay kabaloy pasogbo sa kaidapan kataw ako anggan matay?
[39] Siro keyen, Kabaloy. Keyen Isos, Kamo batay ngani agtiis sa kaidapan kangay batay piyagtiisan, kamo batay ngani pasogbo sa kaidapan kataw ako,
[40] kamay yewed sa kangay in agidang no nakay in tomokkaw sa kangay pamalang osai sa kangay tagwala. In Diyos in batay agtaboy ina pag mga tongkolin sa mga piyagsandataan.
[41] In karengey ina in sampo ka agadar siro agalitan sa tayari.
[42] Matang siro piyasabangen Isos keyen, Kamo katawan in mga piyagawit poon sa mga yewed Odyo, na siro agpansakop. In mga lakonaw, na siro in apo kabaloyan.
[43] Kamay kamo ayaw agkataw ina. Kamayba nakay sa kanyo in beet lakonaw, na kailangan siyo kalakoyte.
[44] No siyo beet agpapoon na kailangan siyo sogowan in boo.
[45] Angkataw kamayba ako in Bodang Mangyan, kaya atai pataboy yewed matang ako piyagtolong, no yewed matang ako agtolong, osai matang agtaboy kangay boway agpaboway sa karowan.
[46] Kora Isos rateng sa Iriko. In siyo aglampas wa ista sarig in kansiyo mga agadar, osai aronaw kay amat mangyan, kansiro diyalan apo agtokkaw beleg sa balabaan dalan, agpangayay. In ngaran Bartimiyo, bodang Timiyo.
[47] In siyo katawan ina pag agdalan Isos taga Nasarit, siyo mango keyen, Isos kasokponan Dabid, ako ayawte.
[48] Siyo piyangelel in mga mangyan keyen, Ayaw agkasamang, kamay siyo agpango labi kay keyen, Kasokponan Dabid, ako ayawte.
[49] Isos tomaydek keyen, Siyo beryaen. Kalbas kansiro ngani biyerya in beleg. Siro keyen, Pakaeyaten in kaimo remrem, tomaydek wa, kao piyagberya Isos.
[50] Kansiyo biyenglay in kansiyo islen, bigla tomaydek, pasabangen kay Isos.
[51] Keyen Isos, Nakay in kaimo beet kangay pangwaten sa kaimo? Keyen in beleg, Laki Agpamatoldo, kangay nges beet ako kangitan wakay.
[52] Keyen Isos, Kao maal wa panaw. Maal wa kao panawen kao agpasandig sa kangay. Toloy wakay siyo kangitan, miyanggat kay Isos sa dalan.