Yohana 1
[1] Jani dunuɲa yi dan, Ala aa Kuma tɛɛ a fɛ, ado Kuma wo ni Ala tɛɛ kelen ne le.
[2] A do tɛɛ Ala fɛ a damina lɔ.
[3] Fen bɛ dannin tɛɛ Kuma le fɛ. Fen suu suu ma dan a kɔ.
[4] Nimaya bɛ falannin tɛɛ Kuma le la, ado nimaya wo tɛɛ kɛnɛya dila adamadennu ma.
[5] Wo kɛnɛya yi mɛnɛnmɛnɛnna divi lɔ, kɛɛ divi ma se a nɔla.
[6] Ala ka kɛ́ dɔ kelaya, min tɔɔ yi ko Yaya.
[7] A do ka na ka kɛ sele le kɛnɛya wo ma, sa bɛ yi limandeya wo ma ale fɛ.
[8] Ale jɛlɛ tɛɛ tɛ kɛnɛya wo le, mafɔ a ka na ka kɛ sele le kɛnɛya wo ma.
[9] Kɛnɛya bɛlɛ wo, min yi kolu lankɛnɛmayala bɛ yɛ, wo tɛɛ nala dunuɲa.
[10] A do tɛɛ dunuɲa kɔlɔkɔlɔ le. Hali dunuɲa dannin tɛɛ ale fɛ, kɛɛ dunuɲa mɔɔlu tɛɛ ma a lɔn.
[11] A ka na aa mɔɔlu fɛlɔ, kɛɛ aa mɔɔlu ma ai bolo sii a kɔlɔ.
[12] Kɛɛ mɔɔ minnu k'ai bolo sii a kɔlɔ ka limandeya a ma, a ka se di wolu ma ka kɛ Ala den ne.
[13] Ai ma kɛ Ala den ne iwo adamadennu yi den sɔlɔnna teme. Ai tɛɛ tɛ sɔlɔnna mɔɔlu sawo lɔ, fɔ Ala sawo.
[14] Ado Ala ya Kuma ka kɛ adamaden ne k'i sii mɔ tɛma, a vɛ ko bɛ kɛla ɲumayandeya ni tuɲandeya lɔ. Mɔ do vɛ aa buɲali ye, a na min sɔlɔnna baa ale yi den kelenpesa le le ka bɔ a Fa Ala fɛlɔ.
[15] Yaya ka seleya di aa ko lɔ. A tɛɛ a kan nabɔla k'a magbeleya, a vɛɛ: «Ǹ kain tɛɛ mɔɔ min ma, ǹ ko a natɔ ǹ kɔ, ale le min ne. A buɲanin ne ǹ ne, baa jani ǹ'i sɔlɔn, ale tɛɛ je.»
[16] Ka bɛn a ɲumayandeya ba ma, a vɛ aa lɔhɔlɔma la mɔ kan jobojaba.
[17] Ala na seliya kitabu dila nabi Musa ma. A do vɛ aa ɲumayandeya ni tuɲandeya lankɛnɛmaya mɔ yɛ Masa Tɔɔmasenin Isa le fɛ.
[18] Mɔɔ suu suu ma Ala ye ba a ɲa la bene, ado min siinin Va Ala tɔɔfɛ, wo ni Ala yi kelen ne le, ale vɛ Va Ala lankɛnɛmaya.
[19] Yaya ya seleya le ne. Jahudiya kundiilu ka salakalaseba dɔlu kelaya Yaya ma, ani Levi kabiladen dɔlu. Wolu ka bɔ Jelusalɛm ka taa Yaya maɲininga, ai vɛɛ: «Jene y'i le?»
[20] Ai ka wo fɔ mingɛ, a m'i ban ai javila, fɔ ka a lagbɛ, a vɛɛ: «Ǹ tɛ Masa Tɔɔmasenin ne.»
[21] Ai ka a maɲininga wo lɔ, ai vɛɛ: «Ni wo tɛ, jene i le? I yi kela Iliya le le?» A vɛɛ: «Ɛnɛn. Ǹe tɛ wo le.» Ai ka a maɲininga kɔtunun, ai vɛɛ: «A yi di wo lɔ? Ile le Mɔɔ Salati le min ka kan ka na?» Yaya ka javali kɛ, a vɛɛ: «Ɛnɛn.»
[22] Wo kɛ, ai vɛɛ a yɛ: «Jene i le le wo lɔ? Javili di mɔ ma, fɔsa m'i taa wo fɔ mɔ kelabalu yɛ. I y'a fɔla di i jɛlɛ ma?»
[23] Wo lɔ, Yaya k'ai javi kela Aizaya ya kuma le, a vɛɛ: «Ǹe le mɔɔ kan ne, min yi gbanɔla fuwa lɔ ko ài yi siya latelen Mɔtii yɛ.»
[24] Keladen wo fan kelen tɛɛ Falisilu le le.
[25] Ai ka Yaya maɲininga, ai vɛɛ: «I vɛɛ ko i tɛ Masa Tɔɔmasenin ne, ni wo tɛ kela Iliya, ni wo tɛ Mɔɔ Salati. Mindɛ kɛnin i yi mɔɔlu makola kɔɔ kɔlɔ wo lɔ?»
[26] Yaya k'ai javi, a vɛɛ: «Ǹ'i mɔɔlu makola kɔɔ le kɔlɔ, kɛɛ mɔɔ dɔ y'ài tɛma, ài ma wo lɔn.
[27] Ale natɔ ǹ kɔ, kɛɛ hali ka aa samala julu fɔlin a yɛ, ǹe dɔɔyanin ne wo ma.»
[28] Ko min bɛ ka timin Betani so dafɛ le Jɔdan kɔɔ kɔma, Yaya tɛɛ mɔɔlu makola tɛɛ min ja.
[29] Wo kɛnɛbɔ lon, Yaya ka Isa natɔ ye a ma mingɛ, a vɛɛ mɔɔlu yɛ: «Ài y'a ye! Ala ya Saaden ne ve. Ale kɛtɔ julumbu bɔla dunuɲa mɔɔlu ma.
[30] Ǹ kain tɛɛ mɔɔ min ma, ǹ ko a natɔ ǹ kɔ, ale le min ne. A buɲanin ne ǹ ne, k'a masɔlɔn jani ǹ'i sɔlɔn, ale tɛɛ je.
[31] Ǹe kɔni tɛɛ ma a lɔn kunfɔlɔ le, kɛɛ ǹ nanin mɔɔlu makola kɔɔ le kɔlɔ, fɔsa a la yi nkɛnɛmaya Isilanmɔɔlu yɛ.»
[32] Yaya ka seleya di, a vɛɛ: «Ǹ na Lɔhɔlɔma Fɔɲɛ jiitɔ yena ka bɔ sangbolo lɔ iwo bilini. A do ka to a fɛ.
[33] Ǹe kɔni tɛɛ ma a lɔn kunfɔlɔ le, kɛɛ min na ǹ lɔla mɔɔlu makola kɔɔ kɔlɔ, wo tii le n'a fɔla ǹ yɛ, a vɛɛ: ‹I vɛ Lɔhɔlɔma Fɔɲɛ jiitɔ yena mɔɔ min kan ka to a fɛ, wo tii le kɛtɔ Lɔhɔlɔma Fɔɲɛ lajiila mɔɔlu kan.›
[34] Ǹ na wo kɛnin yena, ani m̀'ɛ seleya di ko Ala Den ne a le.»
[35] Wo kɛnɛbɔ lon, ka Yaya ni aa kɔbiladen fila lɔnin to,
[36] Yaya ka Isa timintɔ ye k'a fɔ, a vɛɛ: «Ài y'a ye! Ala ya Saaden ne ve!»
[37] Aa kɔbiladen mɔɔ fila ka wo mɛn mingɛ, ai vɛ bilala Isa kɔ.
[38] Isa k'i kɔdon mingɛ k'ai ye a kɔ, a k'ai maɲininga, a vɛɛ: «Ài yi mindɛ kɔ?» Ai vɛɛ a yɛ: «Labi, i jiya yi min ne?» (Labi kɔlɔ le ko Kalanmɔɔ).
[39] Isa k'ai javi, a vɛɛ: «Ài yi na, ǹ kɛtɔ je jiya ài la.» Ai ka taa a fɛlɔ ye ka tele tɔ kɛ je, baa tele ma tɛɛ vɛ jii.
[40] Kɔbiladen fila min ka Yaya ya kuma mɛn ka bila Isa kɔ, wo kelen tɔɔ yi ko Andele. Andele kɔlɔkɛ le tɛɛ Simɔn Piɛl le.
[41] Andele ka taa kunfɔlɔ le ka a kɔlɔkɛ Simɔn talan k'a fɔ a yɛ, a vɛɛ: «Mɔ na Alimasihu yena.» (Alimasihu kɔlɔ le ko Masa Tɔɔmasenin.)
[42] Wo lɔ, Andele ka taa Simɔn ne Isa fɛ. Wo do v'i ɲa kaana a lɔ k'a fɔ a yɛ, a vɛɛ: «Yaya den Simɔn ne i le, ai do kɛtɔ a fɔla i ma ko Sifɔ.» (Sifɔ ni Piɛl yi tɔɔ kelen ne le. Ai kɔlɔ le ko falakolo.)
[43] Wo duusagbɛ lon, Isa ka miliya ta ko a yi taa Galile koovi lɔ. A ka kɛ́ dɔ talan je, min tɔɔ yi ko Fele. A do k'a fɔ a yɛ, a vɛɛ: «Bila ǹ kɔ.»
[44] Fele wo tɛɛ Betisaidaka le le. Andele ni Piɛl gbazan bɔnin tɛɛ so wo le la.
[45] Fele ka taa Nataɲɛ ye mingɛ, a vɛɛ a yɛ: «Mɔɔ min ya ko sɛvɛnin Kela Musa ya Taulati lɔ ani kela dɔgbɛlɛlu ya kitabulu lɔ, mɔ na wo tii yena. Nazalɛtika Isa le, Jusufu den kɔni.»
[46] Nataɲɛ vɛɛ a yɛ: «Kokein yi sene bɔla Nazalɛti?» Wo lɔ, Fele vɛɛ a yɛ: «Na i y'a ye.»
[47] Isa ka Nataɲɛ natɔla ye a ma mingɛ, a ka kuma ka bɛn a ma, a vɛɛ: «Isilanka gbu gbu le min ne, min joso lɔgbɛnin ne.»
[48] Wo lɔ, Nataɲɛ vɛɛ a yɛ: «I ka ǹ lɔn di?» Isa k'a javi, a vɛɛ: «Ǹ na i siinin yena toloju kɔlɔ jani Fele y'i kili.»
[49] Nataɲɛ k'a javi, a vɛɛ: «Kalanmɔɔ, Ala Den ne ile le ani Isilan masakɛ!»
[50] Isa vɛɛ a yɛ: «Ǹ n'a fɔla i yɛ mingɛ, ǹ ko ǹ na i siinin yena toloju kɔlɔ. Wo le n'a kɛla i yi limandeyala m̀ ma? I kɛtɔ ko ba ba siyama yena ka timin min na!»
[51] A vɛɛ kɔtunun: «Ǹ'i tuɲa fɔ ài yɛ, lon dɔ ài kɛtɔ sangbolo dalakanin yena ka Ala ya mɛlɛkalu ye jii ni jɛlɛla ǹe Mɔɔnivin Tanin kunna.»