Yohana 11
[1] Kɛ́ jangalotɔ dɔ tɛɛ Betani so la, min tɔɔ yi ko Lazali. A kɔlɔmoso fila siinin tɛɛ a fɛ je. Wolu tɔɔ yi ko Moyamu ni Maata.
[2] Moyamu min ka tulu sumadiyanin mun Fanma Isa sen ma ka a matɛ a kunsi la, wo le. A dɔɔkɛ Lazali le jangalonin tɛɛ.
[3] Wo lɔ, a kɔlɔmoso fila ka kela lataa Isa ma, ai vɛɛ: «Fanma, i diyanan mɔɔ vɛ jangalo.»
[4] A do ka kela wo mɛn mingɛ, a vɛɛ: «Lazali ya jangalo min na tɛnala banna saya ma. A do kɛnin ne fɔsa Ala yi buɲali sɔlɔn, ani ǹe a Den gbazan yi buɲali sɔlɔn a fɛ.»
[5] Ado Maata ni a dɔɔmoso ni Lazali diyanin tɛɛ Isa yɛ.
[6] Wo bɛ n'a kɛ, a ka Lazali ya jangalo ko mɛn mingɛ, a tɛɛ tɛɛ min ja, a ka to wo ja ka tele fila kɛ.
[7] Wo kɔ, a k'a fɔ aa kɔbiladennu yɛ, a vɛɛ: «M'i seikɔ Jude koovi lɔ.»
[8] Aa kɔbiladennu do vɛɛ: «Kalanmɔɔ, a lɔ ma mɛn ba bene Jahudiya kundiilu tɛɛ a fɛ ka i bon kawakulun na je. I taatɔ wo ja kɔtunun?»
[9] Isa vɛɛ ai yɛ: «Jalasa tele tɛ mɛnɛnna lɛlɛ tan ni fila le kɔlɔ? Ni mɔɔ min vɛ kɛla taamana tele lɔ, wo tii sen tɛ tɛlɛmɛsɛn k'a masɔlɔn a yi dunuɲa kɛnɛya yena.
[10] Kɛɛ do mɔɔ min vɛ kɛla taamana divi lɔ, wo tii sen yi tɛlɛmɛsɛnne k'a masɔlɔn kɛnɛya t'a bolo.»
[11] Isa bannin wo fɔla, a vɛɛ ai yɛ: «Mɔ tɔva Lazali vɛ sunɔɔ. Kɛɛ ǹ taatɔ a lakununna.»
[12] Kɔbiladennu k'a javi wo lɔ, ai vɛɛ: «Fanma, ni a yi sunɔɔ le lɔ, a kisitɔ.»
[13] Alalaa Isa tɛɛ Lazali ya saya ko le fɔla ai yɛ, kɛɛ ai m'a ɲaye. A tɛɛ ai kɔnɔ ko a kain tɛɛ sunɔɔ jɛlɛla le ma.
[14] Wo lɔ, a k'a fɔ ai yɛ k'a lagbɛ, a vɛɛ: «Lazali vɛ sa,
[15] kɛɛ ǹ sawanin ài ta fan nɔ k'a fɔ ǹ tɛɛ tɛ je fɔsa ài la ǹ na. Ài ndaa a fɛlɔ.»
[16] Aa kɔbiladen min tɔɔ yi ko Tomasi, ai yi fɔla min ma ko Mɔɔ Fila, wo vɛɛ a kɔbilaɲɔɔlu yɛ: «M'i taa kalanmɔɔ malɔ sa m'i faa a fɛ.»
[17] Isa senin Betani, a k'a talan Lazali fuleni vɛ tele naanin kɛ kabulu lɔ.
[18] Betani ni Jelusalɛm wotɛ man jaan, fɔ ka kɛ kilo sawa ɲɔɔ le.
[19] Wo lɔ, Jahudiya siyama nanin tɛɛ saya foliya lɔ ka Maata ni Moyamu masawali ai dɔɔni ya saya ko lɔ.
[20] Maata k'a mɛn mingɛ ko Isa yi nala, a ka taa a labɛnya lɔ telemanin. Kɛɛ Moyamu siinin ka to bon na.
[21] Maata do vɛɛ Isa yɛ: «Fanma, ni i tɛɛ vɛ kɛla jan, ǹ dɔɔni tɛɛ tɛnala sala.
[22] Kɛɛ ǹ k'a lɔn k'a fɔ hali butu ni i vɛ Ala dalila ko ko la, a kɛtɔ wo kɛla i yɛ.»
[23] Kɛɛ Isa k'a javi, a vɛɛ: «I dɔɔni wulitɔle.»
[24] Maata do vɛɛ: «Ǹ k'a lɔn k'a fɔ ǹ dɔɔni wulitɔ fuleniluwulilon, dunuɲa laban waate lɔ.»
[25] Isa do k'a javi, a vɛɛ: «Ǹe le fulenilawuliba le, ani nimayadiba. Mɔɔ mɔɔ vɛ limandeyala m̀ ma, wo tii totɔ nimaya le lɔ hali a ka sa,
[26] ani ni mɔɔ min ka to a ni la ka la ǹ na, wo tii tɛnala faala. I limandeyanin wo ma?»
[27] Maata vɛɛ: «Aan, Fanma. M̀'ɛ limandeya k'a fɔ ile le Masa Tɔɔmasenin ne ani Ala Den, Ala ka lahedi ta min ya ko lɔ ko a natɔ dunuɲa.»
[28] Maata bannin wo fɔla, a ka bɔ je ka taa a fɔ a dɔɔmoso Moyamu yɛ doon nɔ, a vɛɛ: «Kalanmɔɔ vɛ na, a y'i kilila.»
[29] Moyamu ka wo mɛn mingɛ, a v'i wulila ka taa Isa fɛlɔ telemanin.
[30] Wo k'a talan Isa tɛɛ ma don ba so kɔnɔ bene. Maata tɛɛ ka a labɛn tɛɛ min ja, a tɛɛ wo ja le bene.
[31] Jahudiya minnu tɛɛ Moyamu dafɛ bon na sayafoliya lɔ, wolu ka a ye ko a v'i wuli fala ka bɔ. Wo kɛ, ai ka bila a kɔ. Ai tɛɛ i milila ko a taatɔ kasikɛya le lɔ kabulu dala.
[32] Moyamu senin je ka Isa ye, a k'i ben a sen kɔlɔ k'a fɔ a yɛ, a vɛɛ: «Fanma, ni i tɛɛ vɛ kɛla jan, ǹ dɔɔni tɛɛ tɛnala sala.»
[33] Isa ka Moyamu ani a dafɛmɔɔlu kasitɔla ye mingɛ, a nila ka fin bubale.
[34] A do vɛɛ: «Ài na a sudoonna min ne ja?» Ai vɛɛ: «Fanma, na i yi je ye.»
[35] Isa ka kasi.
[36] Wo lɔ, Jahudiya vɛɛ: «A ye! Kɛ́ min ya ko diyanin ne tɛɛ a yɛ dɛ!»
[37] Kɛɛ a dɔlu vɛɛ: «Ale min na ɲagbɛ ɲa lakala, a tɛɛ tɛ se ko dɔ kɛla sa Lazali kana sa?»
[38] Isa ka se kabulu ma k'a talan a ninnafinnin bubale kɔtunun. Kawawoo le tɛɛ, min da tununnin tɛɛ kawakulun ba la.
[39] Wo lɔ, Isa vɛɛ: «Ài yi kawakulun bɔ kabulu da la.» Lazali min sanin, wo kɔlɔmoso Maata vɛɛ a yɛ: «Fanma, a suma yi bɔla butu k'a masɔlɔn a tele naanin ne kabulu lɔ bi.»
[40] Isa do k'a javi, a vɛɛ: «M̀ m'a fɔ i yɛ ǹ ko ni i ka la ǹ na, i kɛtɔ Ala ya foniseleya yena?»
[41] Wo kɛ, ai ka kawakulun makulukulu k'a bɔ kabulu da la. Isa k'a ɲa lajɛlɛ sanma k'a fɔ, a vɛɛ: «Ǹ Fa, ǹ'i balika bɔla i yɛ k'a masɔlɔn i na ǹ kan mɛnna.
[42] Ado ǹ k'a lɔn ne i yi ǹ kan mɛnna kudein. Kɛɛ ǹ na wo fɔla ka bɛn ǹ dafɛmɔɔlu ya ko le ma, fɔsa ai yi la a la k'a fɔ ile le na ǹ kelala.»
[43] A bannin wo fɔla, a ka gbanɔ fanga la, a vɛɛ: «Lazali, bɔ kɛnɛma.»
[44] Ado mɔɔ min tɛɛ vɛ sa, wo ka bɔ kabulu lɔ, a bolo ni a sennu ni a ɲakɔlɔla masilinin tɛɛ kasange la. Wo lɔ, Isa vɛɛ ai yɛ: «Ài yi kasange bɔ a ma, a yi taa.»
[45] Jahudiya minnu tɛɛ vɛ na Moyamu fɛlɔ ka Isa ya kokɛnin ye, wo siyama ka la a la.
[46] Kɛɛ a dɔlu ka bɔ je ka taa Falisilu fɛlɔ k'a fɔ ai yɛ ko Isa na min ne kɛla.
[47] Wo lɔ, Falisilu ni salakalaseba kundiilu ka kititɛɛjama ladɛn. Ai vɛɛ: «Kɛ́ min yi kawanako siyaman ne kɛla. M'i mindɛ kɛ wo lɔ?
[48] Ni mɔ ka a to ten, mɔɔ bɛ yi limandeyale a ma. Wo vɛ kɛla, Lɔmukalu natɔ maa lɔhɔlɔmabonba tiɲana ani ka maa siboloma halaki!»
[49] Kɛ́ dɔ tɛɛ ai lɔ je, min tɔɔ yi ko Kayife. Wo le tɛɛ salakalaseba kundiibaya la san wo la. A do vɛɛ ai yɛ: «Ài ma ko lɔn feu!
[50] Ni mɔɔ kelen ka faa mɔɔlu ya ko lɔ sa maa siboloma bɛ kana halaki, wo fisayanin ne ài ma. Ài ma wo ɲaye?»
[51] Alalaa a do ma kuma wo fɔ ale gbu se lɔ, kɛɛ ba bɛn a tɛɛ salakalaseba kundiibaya la wo san na, a ka kelaya kɛ ko Isa satɔ aiya siboloma ya ko lɔ.
[52] Jahudiya siboloma ya ko tɛɛ tɛ dein. Kɛɛ fɔ Isa tɛɛ faale sa Ala ya mɔɔ minnu lɔjɛnzɛnnin dunuɲa fan bɛ lɔ, wolu la tɛɛ dɛn ka kɛ kelen ne.
[53] K'a ta wo lon ma, ai k'i kɔngɔn Isa la ko fɔ a yi faa.
[54] Wo lɔ, a ma a taamantaama gbɛ la butu Jahudiya kundiilu tɛma, fɔ ka bɔ je ka taa se Efilayimu so la fuwa fannɔ. Ado ale ni aa kɔbiladennu ka waateni kɛ je.
[55] Wo k'a talan, Jahudiyalu ya Timinkunna Selilon waati ma tɛɛ vɛ sulunya. Wo lɔ, mɔɔ siyama tɛɛ taala Jelusalɛm ka bɔ tuu kɔlɔ solu la jani selilon yi se, fɔsa ai y'ai jɛlɛ lasɛnɛya ka bɛn aiya laana ma.
[56] Ai do ka to lɔhɔlɔmabonba lu ma, ai vɛ Isa ɲininna. Wo lɔ, ai k'i ɲɔɔn maɲininga, ai vɛɛ: «A yi di? A tɛ nala selibɔya lɔ?»
[57] Wo k'a talan salakalaseba kundii ni Falisilu tɛɛ vɛ jamali di ko ni mɔɔ min ka Isa dingila lɔn, wo y'a fɔ ai yɛ, sa ai y'a mina.