Yohana 20
[1] Wo lɔ, Lailon duusa gbɛ, Moyamu Magidalaka ka taa kabulu dala subaa divi ma ka kawakulun ba bɔnin ye kabulu wo da la.
[2] A do vɛ bɔlila ka taa Simɔn Piɛl fɛlɔ, ani kɔbiladen min diyanin tɛɛ Isa yɛ. A do vɛɛ ai yɛ: «Ai na Fanma fuleni labɔla kabulu lɔ. Mɔ do ma a bilaya lɔn.»
[3] Piɛl ni kɔbiladen wo ka wo mɛn mingɛ, ai ka bɔ je ka taa kabulu dala.
[4] Ai mɔɔ fila le tɛɛ bɔlila i ɲɔɔn fɛ, kɛɛ kɔbiladen wo ka Piɛl to ka se a ɲa kabulu dala.
[5] Wo lɔ, a ka a kun majii k'a ɲa kaa kabulu lɔ. A do ka kasange lanin ye, kɛɛ a ma don kabulu kɔnɔ.
[6] Wo kɛ, Simɔn Piɛl min tɛɛ a salanna, wo ka na ka don kabulu kɔnɔ, ka kasange lanin ye.
[7] Isa kun masilinin tɛɛ faani min nɔ, a ka wo gbazan mamɔlɔmɔlɔnin ye a ta fan.
[8] Wo kɛ, kɔbiladen dɔ min ka se kabulu dala kunfɔlɔ le, wo gbazan ka don. A do ka wo bɛ ye ka la a la.
[9] Wo bɛ lɔ, ai tɛɛ ma a ɲaye ba bene min sɛvɛnin kitabu lɔ k'a fɔ ko fɔ Isa yi wuli ka bɔ saya lɔ.
[10] Wo kɔ, kɔbiladen wolu ka seikɔ aiya lu ma.
[11] Kɛɛ Moyamu lɔnin ka to kabulu dala a vɛ kasila. K'a to kasila, a ka a kun majii k'a ɲa kaa kabulu lɔ.
[12] A do ka mɛlɛka fila siinin ye Isa fuleni laya kɔlɔ lɔ, faani gbɛ pepe tɛɛ ai kanna. Kelen tɛɛ a kunkɔlɔ fannɔ, kelen tɛɛ a senkɔlɔ fannɔ.
[13] Mɛlɛkalu do vɛɛ a yɛ: «Moso, mindɛ kɛnin i yi kasila?» A vɛɛ ai yɛ: «Ai vɛ ǹa Fanma fuleni ta. M̀ m'a lɔn ai na a bilala tɛɛ min ja.»
[14] Wo fɔnin, a k'i kɔdon ka Isa lɔnin ye, kɛɛ a ka fili a ma.
[15] Isa do vɛɛ a yɛ: «Moso, mindɛ kɛnin i yi kasila? I yi jene ɲininna?» A tɛɛ Moyamu kɔnɔ ko gbelekunnasiiba le. Wo lɔ, a k'a javi, a vɛɛ: «Ǹ fa, ni ile le na a fuleni tala, i y'a fɔ ǹ yɛ i na a bilala tɛɛ min ja. Ǹ'i taa a ta.»
[16] Isa do vɛɛ a yɛ: «Moyamu!» Wo fɔ, Moyamu k'i kɔdon k'a fɔ a yɛ Hebulukan nɔ, a vɛɛ: «Laboni!» Wo kɔlɔ le ko kalanmɔɔ.
[17] Ado Isa vɛɛ a yɛ: «I k'i bolo tuu ǹ na, baa m̀ ma jɛlɛ ba bene ka taa ǹ Fa fɛlɔ. Fɔ i yi taa a fɔ ǹa kɔbiladennu yɛ ko ǹ jɛlɛtɔ ka taa ǹe ni ailu Fa fɛlɔ, min yi ǹe ni ailu Tii le.»
[18] Wo lɔ, Moyamu Magidalaka ka taa a fɔ kɔbiladennu yɛ ko a vɛ Fanma ye. Isa tɛɛ ka min fɔ a yɛ, a ka wo lase ai ma.
[19] Wo lon kelen wula fɛ, min tɛɛ Lailon ne, kɔbiladennu k'ai ladɛn bon dɔ la ka dalu sɔɔ ai kɔma k'a masɔlɔn ai tɛɛ siyanna Jahudiya kundiilu ɲa. Wo kɛ, Isa ka na i lɔ ai tɛma k'a fɔ ai yɛ, a vɛɛ: «Hɛlɛ yi kɛ ài yɛ.»
[20] A ka wo fɔ mingɛ, a ka a bolo ni a fulu jiya ai la. Ai do sawanin ne tɛɛ bubale ka Fanma ye.
[21] Isa do vɛɛ ai yɛ kɔtunun: «Hɛlɛ yi kɛ ài yɛ. Ǹ Fa na ǹ kelala teme, ǹe gbazan y'ài kelala ten ne.»
[22] Wo fɔ, a ka a dafɔɲɛ kɛ ai kan k'a fɔ ai yɛ, a vɛɛ: «Ài yi Lɔhɔlɔma Fɔɲɛ sɔlɔn.
[23] Ni ài ka mɔɔ min ya julumbu lɔkoto, wo tii ma yi kotole. Kɛɛ ni ài ma mɔɔ min ya julumbu lɔkoto, wo tii ma tɛ koto.»
[24] Isa ya keladen mɔɔ tan ni fila dɔ, min tɔɔ tɛɛ ko Tomasi, ai tɛɛ a fɔla min ma ko Mɔɔ Fila, wo tɛɛ tɛ a keladenɲɔɔlu fɛ Isa na waate.
[25] Wo lɔ, ai k'a fɔ a yɛ, ai vɛɛ: «Mɔ vɛ Fanma ye.» Kɛɛ a do vɛɛ ai yɛ: «Ǹ tɛnala lala wo la tuun, fɔ m̀'ɛ pɔnde nɔ yena a bolo la ka m̀ bolokɔni ladon a lɔ ani ka m̀ bolo ladon tama nɔ lɔ a fulu fɛ.»
[26] Lɔɔtɛ kelen timinnin kɔ, kɔbiladennu ladɛnnin ka to bon na kɔtunun. Ado Tomasi gbazan tɛɛ je. Hali dalu sɔɔnin tɛɛ, kɛɛ Isa ka na i lɔ ai tɛma, a do vɛɛ ai yɛ: «Hɛlɛ yi kɛ ài yɛ.»
[27] Wo kɛ, a k'a fɔ Tomasi yɛ, a vɛɛ: «I bolokɔni lɔsama jan, i yi m̀ bololu lasaa ani i bolo lɔsama, i y'a ladon ǹ fulu fɛ. I kà sikasika, fɔ ka limandeya.»
[28] Tomasi k'a javi, a vɛɛ: «Ile le ǹa Fanma ni ǹ Tii le.»
[29] Isa do vɛɛ a yɛ: «Jalasa i vɛ limandeya baa i vɛ ǹ ye? Mɔɔ minnu vɛ limandeyala, k'a talan ai ma ǹ ye, wolu le duwawuden ne.»
[30] Ado Isa ka kawanako tɔɔmase kaijakaijalu kɛ aa kɔbiladennu ɲana, min bɛ ma sɛvɛ kitabu min nɔ.
[31] Kɛɛ ko minnu sɛvɛnin fɔsa ài yi limandeya k'a fɔ Isa le Masa Tɔɔmasenin ne ani Ala Den. Ài do vɛ limadeyala a ma, ài kɛtɔ nimaya sɔlɔnna a tɔɔ le fɛ.