<Yohana 2

[1] Tele fila a sawana, kɔɲɛmalɔ tolon dɔ ka kɛ Kana so la, Galile koovi lɔ. Ado Isa ba tɛɛ je.

[2] Isa ni aa kɔbiladennu gbazan kilinin tɛɛ je.

[3] K'ai to kɔɲɛmalɔ tolon na, lɛzɛnji ka ban. Isa ba ka taa a fɔ a yɛ, a vɛɛ: «Aiya lɛzɛnji vɛ ban.»

[4] Isa do vɛɛ a yɛ: «M̀ ba, ǹa ko tɛ wo le. Ǹa waate ma se ba bene.»

[5] Wo kɛ, Isa ba vɛɛ bɔlidennu yɛ je: «A vɛ ko ko fɔla ài yɛ, ài yi wo kɛ.»

[6] Wo k'a talan kawa daa wɔɔlɔ siinin tɛɛ je. Ji litili bisein ɲɔɔn haan litili kɛmɛ ni muan ɲɔɔn yi se kɛla daa wolu kelenkelenna bɛ kɔnɔ. Ka bɛn aiya diina laana ma, Jahudiyalu tɛɛ ai bolo makola ji wo le la.

[7] Isa vɛɛ bɔlidennu yɛ: «Ài yi daalu lafa ji la.» Bɔlidennu ka wo bɛ lafa fɔɔ ka se ai da la.

[8] Wo kɛnin, Isa vɛɛ ai yɛ: «Ài yi ji dɔ soi butu ka taa a le fulusɔlɔnfa fɛ.» Ai ka wo kɛ.

[9] Fulusɔlɔnfa ka ji dɔɔni mafɛlɛn k'a talan wo tɛɛ vɛ jɛlɛma ka kɛ lɛzɛnji le. A tɛɛ ma lɛzɛnji bɔya lɔn. Ado bɔliden minnu ka ji wo soi ka na a le, wolu tɛɛ k'a lɔn. Wo lɔ, fulusɔlɔnfa ka kɔɲɛfa kili

[10] k'a fɔ a yɛ, a vɛɛ: «Mɔɔlu deinnin lɛzɛnji diyanin ne dila mɔɔlu ma kunfɔlɔ le. Ai vɛ wo minna kosɛvɛ, wo kɔ ai kɛtɔ lɛzɛnji gbeyanin ne dila. Kɛɛ ile vɛ dɔ diyanin nadalo fɔɔ tandainɔ!»

[11] Isa ka aa kawanako tɔɔmase kunfɔlɔ min kɛ Kana so la, Galile koovi lɔ. Wo ka aa magbiliyali lankɛnɛmaya. A do ya kɔbiladennu ka limandeya a ma.

[12] Wo timinnin kɔ, Isa ni a ba ni a dɔɔnilu ni aa kɔbiladennu bɛ ka taa Kapɛlɛnam so kɔnɔ ka tele dana kɛ je.

[13] K'a talan Jahudiyalu ya Timinkunna Selilon ma tɛɛ vɛ sulunya, Isa ka taa Jelusalɛm.

[14] A ka don lɔhɔlɔmabonba lu kɔnɔ ka wɔlifalinbalu siinin ye aiya tabalilu la ani juwalu minnu tɛɛ nisi ni saa ni bilinilu felela.

[15] Wo lɔ, a ka julu dɔlu kɛ gbusan ne k'ai bɛ gbɛn lɔhɔlɔmabonba lu ma, ani saa ni nisilu. A ka wɔlifalinbalu ya wɔli jɛnzɛn k'aiya tabalilu labenben.

[16] A do vɛɛ bilini felebalu yɛ: «Ài yi fen minnu bɔ jan. Ài kà ǹ Fa ya bon kɛ juwayakɛya le.»

[17] Isa ka wo kɛ mingɛ, aa kɔbiladennu hangili ka to a lɔ ko a sɛvɛnin kitabu kɔnɔ, ko: «Iya bon ya ko gbaannin ǹ josokun na, haan ka se ǹ halaki ko ma.»

[18] Jahudiya kundiilu ka Isa maɲininga, ai vɛɛ: «I yi se kawanako tɔɔmase suu mindɛ le kɛla k'a jiya mɔ la ko jo y'i fɛ ka ko minnu kɛ?»

[19] Isa k'ai javi, a vɛɛ: «Ài yi lɔhɔlɔmabonba min te, ado ǹ kɛtɔ a lɔ yi la kɔtunun tele sawa kɔlɔ.»

[20] Wo lɔ, Jahudiya kundiilu vɛɛ: «Haan! San binaani ni wɔɔlɔ le kɛnin lɔhɔlɔmabonba min lɔla. I do kɛtɔ a lɔla kɔtunun tele sawa kɔlɔ?»

[21] Kɛɛ Isa kain tɛɛ lɔhɔlɔmabonba min ma, wo tɛɛ a fali le le.

[22] A wulinin ka bɔ saya lɔ, aa kɔbiladennu hangili ka to aa kuma fɔnin wo lɔ. Wo le k'a kɛ, ai ka limandeya kitabulu ma ani Isa ya kuma fɔnin.

[23] Ka Isa to Jelusalɛm Timinkunna Selibɔya, mɔɔ siyama ka limandeya a ma, baa ai ka aa kawanako tɔɔmase kɛninnu ye ai ɲa la.

[24] Kɛɛ Isa kɔni ma la ai la, k'a masɔlɔn a tɛɛ ka adamaden bɛ josokun lɔn.

[25] A mako tɛɛ tɛ a la ko mɔɔ yi adamaden ya ko ɲafɔ a yɛ, baa ale gbu tɛɛ ka mɔɔ bɛ josokun lɔn kosɛvɛ.