Yohana 19
[1] Wo kɛ, Pilati ka sɔdasilu lɔ Isa gbasila bubale gbusan ne.
[2] Wo kɔ, ai ka wonin julu dɔ mamɔlɔmɔlɔ ka wo kɛ masafula sawula le k'a bilin a kunna, ani ka masafaani wulɛn dɔ bila a kanna.
[3] Ai do tɛɛ ai madonna a la ka to a fɛɛla, ai vɛɛ: «Jahudiyalu ya masakɛ, m'i fola!»
[4] Pilati ka bɔ kɛnɛma kɔtunun k'a fɔ Jahudiyalu yɛ, a vɛɛ: «Ài tolo malɔ! Ǹ a lanala ài ma kɛnɛma jan, sa ài y'a lɔn m̀ ma faa kun ye a la.»
[5] Wo lɔ, ai ka bɔ Isa le wo boloɲa ma. A masilinin tɛɛ wonin fula ni faani wulɛn na. Ado Pilati k'a fɔ jama yɛ, a vɛɛ: «Ài yi kɛ́ ye!»
[6] Salakalaseba kundii ni lɔhɔlɔmabonba lakanalibalu ka Isa ye mingɛ, ai do vɛ gbanɔla, ai vɛɛ: «A gbaan kɔlɔman ma ka a faa! A gbaan kɔlɔman ma ka a faa!» Pilati do vɛɛ ai yɛ: «Àilu gbu y'a mina ka taa a gbaan kɔlɔman ma. Ǹe kɔni ma faa kun ye a la.»
[7] Jahudiya kundiilu do ka a javi, ai vɛɛ: «Seliya dɔ yi mɔ bolo. Ado ka bɛn seliya wo ma, a ka kan ka faa baa a bolo ko Ala Den ne a le.»
[8] Pilati ka kuma wo mɛn mingɛ, a ka siyan ka timin kunfɔlɔ ta la.
[9] A do ka don bon na kɔtunun ka Isa maɲininga, a vɛɛ: «I bɔnin min?» Kɛɛ Isa do ma a javi.
[10] Wo lɔ, Pilati do vɛɛ a yɛ: «I bannin ǹ javila? I m'a lɔn k'a fɔ a se yi ǹ yɛ k'i bila, ni wo tɛ k'i gbaan kɔlɔman ma?»
[11] Isa k'a javi, a vɛɛ: «Se foi tɛ i yɛ ǹ kan, fɔ Ala na min dila i ma. Wo lɔ, mɔɔ min na ǹ donna i bolo, wo ya julumbu buɲanin ne i ta le.»
[12] Pilati ka wo mɛn mingɛ, a vɛ Isa bila ko ɲa ɲininna. Kɛɛ jama ka gbanɔ, ai vɛɛ: «I vɛ kɛ́ min bilala, i tɛ Lɔmu masakɛba Sezale tɔva le. Mɔɔ min vɛ a jɛlɛ kɛla masakɛ le, wo tii yi Sezale juu le le.»
[13] Pilati ka kuma wo mɛn mingɛ, a ka Isa labɔ lu ma kɔtunun. Lu wo ma ladannin tɛɛ kawa fɛdɛn ne le. Ai y'a fɔla wo ja le ma Hebulukan nɔ ko Gabata. Ado Pilati k'i sii kititɛɛ siifen nɔ je.
[14] Wo lon duusagbɛlon ne tɛɛ Timinkunna Selilon ne, ado telelatelen waate le tɛɛ.Wo lɔ, Pilati k'a fɔ Jahudiyalu yɛ, a vɛɛ: «Àiya masakɛ tɛɛ.»
[15] Ai do vɛ gbanɔla, ai vɛɛ: «A labɔ jan! A labɔ jan! A gbaan kɔlɔman ma!» Ado Pilati k'ai maɲininga, a vɛɛ: «Ǹ àiya masakɛ gbaan kɔlɔman ma?» Salakalaseba kundiilu k'a javi, ai vɛɛ: «Masakɛ gbɛlɛ tɛ mɔ bolo ka bɔ Sezale kɔ.»
[16] Wo lɔ, Pilati ka a don sɔdasilu bolo ko ka a faa.
[17] Ai do ka Isa ta ka taa a le. A vɛ bɔla so kɔnɔ, a gbaankɔlɔman vɛ a kanma, ka se tɛɛ dɔ lɔ, min tɔɔ yi ko Kunkolo Dingila. Ai y'a fɔla wo ja le ma Hebulukan nɔ ko Gɔligota.
[18] Ai ka a gbaan kɔlɔman ma je, ka mɔɔ fila gbɛlɛ gbaan kɔlɔmannu ma a tɔɔfɛ. Dɔ tɛɛ a bolokinin fɛ, dɔ tɛɛ a bolonunma fɛ, Isa tɛɛ ai tɛma.
[19] Pilati ka mɔɔ dɔ lɔ sɛvɛla wala ma ka wo gbaan Isa kunma. A sɛvɛnin tɛɛ ko: «Isa Nazalɛtika, Jahudiyalu ya masakɛ.»
[20] Sɛvɛ wo ka kɛ Hebulukan ne lɔ, ani Lɔmukan, ni Gɛlɛkikan. Jahudiya siyama ka sɛvɛ wo kalan k'a masɔlɔn Isa gbaannin tɛɛ tɛɛ min ja, wo ja masulunyanin ne tɛɛ so kɔnɔ la.
[21] Wo lɔ, salakalaseba kundiilu ka taa Pilati fɛlɔ k'a fɔ a yɛ, ai vɛɛ: «I kà a sɛvɛ ko ‹Jahudiyalu ya masakɛ›, mafɔ: ‹Kɛ́ min bolo ko: Ǹe le Jahudiyalu ya masakɛ le.›»
[22] Pilati do k'ai javi, a vɛɛ: «Ǹ na mɔɔ lɔla min sɛvɛla, ale le wo le.»
[23] Sɔdasilu bannin Isa gbanna kɔlɔman ma, ai ka aa faani lɔtalatala ka a kɛ sii naanin ne, sɔdasi kelen a sii kelen. Ai do ka aa faani kɔlɔbila gbazan ta, min tɛɛ sii kelen ne. Kalaya foi tɛɛ tɛ a ma k'a damina a sanma haan fɔɔ a kɔlɔ.
[24] Wo lɔ, ai k'a fɔ i ɲɔɔn yɛ, ai vɛɛ: «Mɔ kà faaniba kɔlɔbila wo lɔfalafala. M'i tombola kɛ. Tombola vɛ bɛnna mɔɔ min ne, wo tii yi faaniba kɔlɔbila ta.» Wo ka kɛ fɔsa min sɛvɛnin kitabu lɔ, wo ma yi fa, ko: «Ai na ǹa faanilu lɔtalala i ɲɔɔn tɛ, ka tombola kɛ ǹa faani kan.» Alalaa sɔdasilu ka wo le kɛ.
[25] Wo waate lɔ, Isa ba ni a tɛnɛn lɔnin tɛɛ a gbaankɔlɔman dafɛ ani Kilopa moso Moyamu ni Magidalaka Moyamu.
[26] Isa ka a ba ye mingɛ ani aa kɔbiladen min diyanin tɛɛ a yɛ, wo lɔnin tɛɛ je, wo lɔ a vɛɛ a ba yɛ: «Moso, i den ne ve.»
[27] A do k'a fɔ kɔbiladen wo yɛ, a vɛɛ: «I ba le ve.» K'a ta wo lon ma, kɔbiladen wo k'a jando Isa ba lɔ aa bon na.
[28] Wo kɔ, Isa tɛɛ k'a lɔn Ala na baale min bɛ dila a ma, wo vɛ dafa. Wo lɔ, a vɛɛ: «Minkɛlɔɔ yi ǹ na.» A ka wo fɔ fɔsa min sɛvɛnin kitabu lɔ, wo ma yi fa.
[29] Wo k'a talan daa dɔ siinin tɛɛ je, wo lafanin tɛɛ gbɛ kumunnin na. Ai do ka fu dɔ ta ka a sun gbɛ wo lɔ ka a sili hisopeju kɔlɔman dɔ la ka wo lɔ Isa da la.
[30] Isa ka gbɛ kumunnin wo dɔ min mingɛ, a vɛɛ: «A bɛ da vɛ fa.» Wo kɛ, a do ka a kun nabilin ka sa.
[31] Wo waate lɔ, Jahudiya kundiilu ka taa Pilati madiya ko a yi diɲa mɔɔ gbaanninnu sen nɔ yi kali sa ai yi faa telemanin. Ko wo boloma, ai su la yi sene jiila ka bɔ kɔlɔman ma. Baa Jumalon ne tɛɛ, ado Jahudiyalu tɛɛ ai lɔbɛnna Nɔningɛlon ma. Ai tɛɛ tɛ a fɛ sulu yi to kɔlɔman ma ka Nɔningɛlon se, baa Nɔningɛlon wo tɛɛ lonba le le.
[32] Wo lɔ, sɔdasilu ka na mɔɔ kunfɔlɔ sen nɔkali ka ban ka taa wo suu kɛ mɔɔ filanan na, minnu gbaanin tɛɛ Isa dafɛ.
[33] Kɛɛ ai ka se Isa ma mingɛ, a tɛɛ vɛ sa, ai do ma a sen nɔkali.
[34] Kɛɛ wo bɛ n'a kɛ, sɔdasi kelen ka a sɔɔ a fulu fɛ tama le. Wo lɔ, ji ni jeli vɛ bɔla telemanin.
[35] Mɔɔ min na ko min kɛnin yena a ɲa la, wo tii le na seleya min dila. Ado aa seleya yi tuɲa le le baa a k'a lɔn a yi tuɲa le fɔla. A na seleya min dila, fɔsa àilu gbazan yi limandiya Isa ma.
[36] Baa ko minnu kɛnin ne fɔsa min sɛvɛnin kitabu lɔ, wo ma yi fa ko: «Hali a kolo kelen nɔ tɛnala kalila.»
[37] A sɛvɛnin dingila gbɛlɛ lɔ gbazan ko: «Ai na mɔɔ min sɔɔla, ai kɛtɔ wo lasaala.»
[38] Wo kɔ, Jusufu Alimateka ka taa Pilati madiya ko a yi diɲa a yi taa Isa fuleni lajii ka a bɔ kɔlɔman ma. Pilati do ka diɲa. Wo lɔ, a ka taa a fuleni ta ka taa a le. A do tɛɛ Isa ya kɔbiladen dɔ le le, kɛɛ a ka wo lɔdoon baa a tɛɛ siyanna Jahudiya kundiilu ɲa.
[39] Ani Nikodemɔ, min ka taa Isa ma su lɔ kɔlɔkɔlɔ le, wo gbazan ka na basi sumadiyanin suu fila le, min ɲaaminnin tɛɛ. Kelen tɔɔ yi ko milu, a tɔ kelen tɔɔ yi ko alo. Wo bɛ ladɛnnin ka kilo bisawa ɲɔɔn bɔ.
[40] Wo lɔ, ai ka Isa fuleni ta ka a mamɔlɔmɔlɔ kasange lɔ ka basi sumadiyanin wo kɛ a kan. Jahudiyalu ya sudoon ɲa le ve.
[41] Isa gbaannin tɛɛ tɛɛ min ja, gbele dɔ masulunyanin tɛɛ wo ja la, ado kabulu kula dɔ tɛɛ je, su tɛɛ ma don ba wo lɔ bene.
[42] Ka masɔlɔn Jahudiyalu tɛɛ ai lɔbɛnna Nɔningɛlon ma wo lon ne ani kabulu wo masuluyanin tɛɛ Isa faaya la, wo lɔ, ai ka a sudoon wo lɔ.