Yohana 7
[1] Wo timinnin kɔ, Isa tɛɛ timintiminna Galile solu la. A ma diɲa ka taa Jude koovi lɔ k'a masɔlɔn Jahudiya kundiilu tɛɛ a faa ko lɔ.
[2] Wo k'a talan, Jahudiyalu ya Gbaakɔlɔsii Selilon ma tɛɛ vɛ sulunya.
[3] Wo lɔ, Isa dɔɔnilu vɛɛ a yɛ: «I yi bɔ jan ka taa Jude sa iya kɔbilabalu gbazan y'iya kawanakolu ye wo ja.
[4] Ni mɔɔ min a fɛ a tɔɔ yi bɔ, wo tii tɛ aa baale kɛla doon nɔ. I yi kawanakolu kɛla teme, i yi taa i i jɛlɛ lankɛnɛmaya dunuɲa mɔɔlu yɛ wo lɔ.»
[5] Ai ka wo fɔ k'a masɔlɔn hali a dɔɔnilu tɛɛ ma limandeya a ma.
[6] Isa do k'ai javi, a vɛɛ: «Ǹ ta waate ma se ba bene. Kɛɛ àilu kɔni, waate suu suu bɛnnin ne ài ma.
[7] Dailu tɛ dunuɲa mɔɔlu bolo k'a fɔ ai y'ài lagbeyaɲɛ, kɛɛ do ǹe gbeyanin ne ai yɛ, baa ǹ'i seleya dila ǹ ko ai kɛkolu kɛwonyanin.
[8] Ài yi taa selibɔya lɔ, kɛɛ ǹe tɛ taala, baa ǹa waate ma se ba.»
[9] Isa bannin wo fɔla, a ka to Galile.
[10] A dɔɔnilu taanin kɔ selibɔya lɔ, ale gbazan ka taa. Kɛɛ a ma taa gbɛ la, fɔ doon nɔ.
[11] Wo k'a talan Jahudiya kundiilu tɛɛ a ɲininna selibɔya lɔ, ai vɛɛ: «Kɛ́ wo yi min?»
[12] Mɔɔ siyama tɛɛ kumala ai dakɔlɔ i ɲɔɔn yɛ ka bɛn a ma. A dɔlu vɛɛ: «Mɔɔ bɛlɛ le a le.» A dɔgbɛlɛlu vɛɛ: «Wo tɛ. A yi mɔɔlu lafilila dein.»
[13] Kɛɛ mɔɔ suu suu ma foi fɔ aa ko lɔ gbɛ la k'a masɔlɔn ai tɛɛ siyanna Jahudiya kundiilu ɲa.
[14] Selilon tɛma lon senin, Isa ka don lɔhɔlɔmabonba la ka mɔɔlu kalan damina.
[15] Aa kalanɲa ka Jahudiya kundiilu kawakoya, ai vɛɛ: «Kɛ́ kalanbali min na lɔnni min sɔlɔnna min ne?»
[16] Isa k'ai javi, a vɛɛ: «Ǹa kalan ma bɔ ǹe gbu lɔ, fɔ ǹ kelaba.
[17] Ni mɔɔ min a fɛ ka Ala sawo kɛ, wo tii kɛtɔ a lɔnna ni ǹa kalan bɔnin Ala le lɔ, ni wo tɛ ni ǹ'i kumala ǹe gbu ya setiiya le lɔ.
[18] Mɔɔ min yi kumala ale gbu ya setiiya lɔ, wo tii yi mɔɔlu ya buɲali le kɔ. Kɛɛ mɔɔ min y'a kelaba ya buɲali kɔ, wo tii le yi tuɲande le le, a do tɛ faɲa suu suu fɔla.
[19] Jalasa nabi Musa le na seliyalu dila ài ma, kɛlɛ? Kɛɛ ài suu suu tɛ seliya wo dɔ buɲala yi ne. Mindɛ lɔ ài y'a fɛ ka ǹ faa?»
[20] Jama k'a javi, ai vɛɛ: «Jinatɔ le i le. Jene y'i faa ko lɔ?»
[21] Isa vɛɛ: «Ǹ na kawanako kelen ne kɛla, a do na ài bɛ tɛɛnɛɛla.
[22] Nabi Musa na kɛnɛkɛ ko fɔla ài yɛ, kɛɛ kɛnɛkɛ ko ma bɔ ale lɔ mafɔ mɔ bemanu. Ka bɛn wo ma, hali Nɔningɛlon ài y'ài denkɛlu makɛnɛkɛla.
[23] Ni ài y'ài denkɛlu makɛnɛkɛla Nɔningɛlon sa nabi Musa ya seliya kana tiɲa, mindɛ lɔ vɛ ài mɔnɛnin m̀ ma baa ko ǹ na mɔɔ lakɛnɛyala fefe Nɔningɛlon?
[24] Ài kà ko ye ài ɲa la dein k'a kiti tɛɛ wo ma, mafɔ ài yi kiti tɛɛ telen bolo le ma.»
[25] Wo le k'a kɛ, Jelusalɛmka dɔlu tɛɛ a fɔla i ɲɔɔn yɛ, ai vɛɛ: «Maa kundiilu yi kɛ́ min ɲininna ka a faa, ale tɛ min ne?
[26] A yi kumala bana le ma yi ne, kɛɛ ai tɛ ko ko fɔla a yɛ. A yi di wo lɔ? Jalasa ɲamɔɔlu vɛ a lɔn k'a fɔ ale le Masa Tɔɔmasenin ne?
[27] Ǹu kɔni ka kɛ́ min bɔya lɔn. Kɛɛ Masa Tɔɔmasenin do vɛ nala, mɔɔ suu suu tɛnala a bɔya lɔnna.»
[28] Ka Isa to mɔɔlu kalanna lɔhɔlɔmabonba la, a ka a kan ba labɔ, a vɛɛ: «Ài ka ǹ lɔn, ài do ka m̀ bɔya lɔn. Kɛɛ ǹe do ma na ǹe gbu ya setiiya lɔ. Min na ǹ kelala, wo le tuɲande le. Kɛɛ àilu kɔni ma a lɔn.
[29] Kɛɛ ǹe do ka a lɔn k'a masɔlɔn m̀ bɔnin ale le fɛlɔ. Ale do na ǹ kelala.»
[30] A ka wo fɔ mingɛ, ai tɛɛ a fɛ ka a mina. Kɛɛ mɔɔ suu suu bolo ma se a ma k'a masɔlɔn aa waate tɛɛ ma se ba.
[31] Wo bɛ n'a kɛ, mɔɔ wo siyama ka limandeya a ma, ai vɛɛ: «Masa Tɔɔmasenin vɛ nala, a kɛtɔ kawanako tɔɔmaselu kɛla ka timin kɛ́ min ta la?»
[32] Jama tɛɛ kuma minnu fɔla ai dakɔlɔ ka bɛn Isa ma, Falisi dɔlu ka wo mɛn. Wo lɔ, ailu ni salakalaseba kundiilu ka lakanaliba dɔlu lataa a minaya lɔ.
[33] Isa do k'a fɔ jama yɛ, a vɛɛ: «Ǹ kɛtɔ waateni kɛla ài fɛ bene, wo kɔ ǹ natɔ taala ǹ kelaba ma.
[34] Ài kɛtɔ ǹ dingila ɲininna, kɛɛ do ài tɛnala ǹ yena k'a masɔlɔn ǹ kɛtɔ tɛɛ min ja, ài tɛnala sena taala wo ja.»
[35] Jahudiya kundiilu k'a fɔ i ɲɔɔn yɛ, ai vɛɛ: «Kɛ́ min taatɔ min, a n'a fɔla ko mɔ kɛtɔ a dingila ɲininna ka koli? Maa mɔɔ minnu jɛnzɛnnin kɔɔkan jamanalu lɔ, jalasa a taatɔ wolu le fɛlɔ ka kɔɔkanmɔɔlu kalan je?
[36] A vɛɛ ko mɔ kɛtɔ a dingila ɲininna, kɛɛ mɔ tɛnala a yena. A vɛɛ gbazan ko a kɛtɔ tɛɛ min ja, ko mɔ tɛnala sena taala wo ja. Wo kɔlɔ yi mindɛ le?»
[37] Selilon naban lon, wo ka kɛ lonba le le, Isa k'i lɔ ka a kan nabɔ, a vɛɛ: «Ni minlɔɔ vɛ kɛla mɔɔ min na, wo tii yi na ǹ fɛlɔ k'i min.
[38] Ni do mɔɔ min ka limandeya m̀ ma, ji min yi nimaya dila, wo woyotɔle wo tii kɔnɔlɔ iwo kɔɔkun, iwo a sɛvɛnin kitabu lɔ teme.»
[39] A do kain tɛɛ Lɔhɔlɔma Fɔɲɛ le ma min ditɔ a malimandeyamɔɔlu ma. Baa Lɔhɔlɔma Fɔɲɛ tɛɛ ma di ba bene k'a masɔlɔn Isa la tɛɛ ma jɛlɛ ba ka buɲali sɔlɔn.
[40] Jama ka kuma wolu mɛn mingɛ, a dɔlu vɛɛ: «Mɔɔ Salati min ka kan ka na, ale le min ne jɔ!»
[41] A dɔgbɛlɛlu vɛɛ: «Masa Tɔɔmasenin ne a le le.» Kɛɛ a dɔlu vɛɛ: «Ɛnɛn, Masa Tɔɔmasenin tɛnala bɔla Galile!
[42] Jalasa a sɛvɛnin ne tɛ kitabu kɔnɔ ko Masa Tɔɔmasenin kɛtɔ nabi Dawuda bɔzɔn ne le ka bɔ Dawuda fɛso Bɛtilɛhɛm?»
[43] Jama kan nɔ ka tala fila le Isa ya ko lɔ.
[44] A dɔlu tɛɛ a fɛ ka a mina, kɛɛ a dɔ bolo ma se a ma.
[45] Lakanaliba minnu tɛɛ ka na Isa minaya lɔ, wolu ka seikɔ salakalaseba kundii ni Falisilu fɛlɔ. Ai do ka lakanalibalu maɲininga, ai vɛɛ: «Mindɛ kɛnin ài ma a mina ka na a le?»
[46] Lakanalibalu k'ai javi, ai vɛɛ: «Kɛ́ wo yi kuma minnu fɔla, mɔɔ mɔɔ ma wo suu fɔ ba bene feu!»
[47] Falisilu k'ai javi, ai vɛɛ: «Haan! A vɛ àilu gbazan nafili butu?
[48] A yi di? Maa ɲamɔɔ dɔlu ni wo tɛ Falisi dɔlu vɛ limandeya a ma?
[49] Kɛɛ jama min ma nabi Musa ya seliya lɔn. Wo lɔ, mɔɔ daannin ne ailu le.»
[50] Falisi dɔ tɛɛ ai tɛma je, min tɔɔ yi ko Nikodemɔ. Ale le tɛɛ ka taa Isa fɛlɔ waate lɔ. A vɛɛ Falisi tɔlu yɛ:
[51] «Ka bɛn maa seliya ma, mɔ man kan ka kiti tɛɛ ka mɔɔ jalaki fɔɔ mɔ vɛ mɔ tolo malɔla a la k'a lɔn a yi ko min kɛla.»
[52] Ai k'a javi, ai vɛɛ: «Ile gbazan yi Galileka le le? I vɛ kitabulu kalanna kobɛn, i kɛtɔ a yena kela suu suu tɛ bɔ Galile.»
[53] Wo kɔ, bɛ ka taa aiya lulu ma.