Yohana 13
[1] Jani Timinkunna Selilon tɛɛ se, Isa tɛɛ k'a lɔn k'a fɔ ko a taa waate ma vɛ sulunya. A do tɛɛ bɔ bolo le ma dunuɲa ka taa a Fa Ala fɛlɔ. Aa mɔɔ minnu tɛɛ dunuɲa, a tɛɛ wolu le kanuna kudein. A do ka to ai kanuna haan fɔɔ ka taa se a laban na.
[2] Wo lɔ saa, Isa nu tɛɛ wulala dɔnna. Wo k'a talan, Soɛtana tɛɛ vɛ a janva miliya don Judasi Sakaliyɔti josokun nɔ, min tɛɛ Simɔn den ne.
[3] Isa tɛɛ k'a lɔn k'a fɔ ko a Fa Ala vɛ fen bɛ bila a fanga kɔlɔ, ani ko a bɔnin Ala le fɛlɔ, a do seikɔtɔ Ala le fɛlɔ.
[4] Wo lɔ, a k'i wuli tabali kunna ka aa faaniba bɔ a kanna, ka a tɛ sili faani dɔ la.
[5] Wo kɛ, a ka ji dɔ kɛ nɛɛ lɔ ka aa kɔbiladennu sen mako damina, ka a matɛ faani wo la, a tɛ silinin tɛɛ min na.
[6] A ka se Simɔn Piɛl ma mingɛ, wo vɛɛ a yɛ: «Fanma, ile le kɛtɔ ǹ sen makola?»
[7] Isa k'a javi, a vɛɛ: «Ǹ'i min na yi ne, i tɛnala wo kɔlɔ lɔnna bi. Kɛɛ i kɛtɔ a lɔnna kɔfɛ.»
[8] Piɛl vɛɛ: «Ǹ tɛ diɲa i yi ǹ sen mako feu.» Isa do vɛɛ a yɛ: «Ni i ma diɲa ǹ i sen mako, i fɛ tɛ ǹ na.»
[9] Simɔn Piɛl vɛɛ a yɛ wo lɔ: «Fanma, ni wo le, i kà dan ǹ sen ma dein. I yi m̀ bolo ni ǹ kun gbazan mako.»
[10] Isa do k'a javi, a vɛɛ: «Mɔɔ min vɛ bɔla a koya lɔ, wo tii mako tɛ koli gbɛlɛ la, fɔ a sen ne mako dein. Ni wo tɛ, a sɛnɛyanin ne feu. Wo lɔ, ài sɛnɛyanin ne, kɛɛ ài bɛ tɛ dɛ.»
[11] Alalaa Isa tɛɛ k'a lɔn ko mɔɔ min kɛtɔ a janvala. Wo le k'a kɛ, a vɛɛ ko ai bɛ sɛnɛyanin tɛ.
[12] A bannin ai sen makola, a ka aa faaniba bila a kanna k'i sii a siiya lɔ. A do vɛɛ ai yɛ: «Ǹ na min kɛla ài la yi ne, ài ka wo kɔlɔ lɔn?
[13] Ài y'a fɔla m̀ ma ko Kalanmɔɔ ni Fanma. Wo bɛnnin ne, k'a masɔlɔn wo le ǹ ne.
[14] Ǹe min yi àiya Fanma ni Kalanmɔɔ le, m̀'ɛ ài sen mako. Wo lɔ, fɔ àilu gbazan y'i ɲɔɔn sen mako.
[15] M̀'ɛ a misali di ài ma fɔsa ài y'a kɛ iwo ǹ n'a kɛla teme.
[16] Ǹ'i tuɲa fɔ ài yɛ, jɔn buɲanin tɛ aa jɔnfa le. Keladen gbazan buɲanin tɛ a kelaba le.
[17] Ni ài ka ko minnu lɔn ani k'ai kɛ, ài kɛtɔ duwawuden ne le.
[18] Ǹ kain tɛ ài bɛ ma dɛ! Ǹ na mɔɔ minnu tala, ǹ ka wolu suu lɔn. Kɛɛ min sɛvɛnin kitabu kɔnɔ, fɔ wo yi kɛ le. A sɛvɛnin je ko: ‹Ǹe ni mɔɔ min na dɔmuni kɛla nɛɛ kelen nɔ, wo vɛ a jɛlɛ kɛ ǹ juu le.›
[19] Ǹ'i ko min fɔla ài yɛ yi ne jani a yi kɛ, fɔsa a vɛ kɛla, ài yi limandeya k'a fɔ ǹ'i min ne, ǹe wo le le.
[20] Ǹ'i tuɲa fɔ ài yɛ, ni mɔɔ mɔɔ ka ǹa keladen dɔ mina kobɛn, wo tii vɛ m̀ mina kobɛn. Ado ni mɔɔ min ka m̀ mina kobɛn, wo vɛ ǹ kelaba gbazan mina kobɛn.»
[21] Isa bannin wo fɔla, a ninna ka fin. A do vɛɛ ai yɛ k'a lagbɛ: «Ǹ'i tuɲa fɔ ài yɛ, ài lɔ mɔɔ kelen kɛtɔ ǹ janvala.»
[22] Wo lɔ, aa kɔbiladennu v'i ɲɔɔn lasaala, kɛɛ ai tɛɛ m'a lɔn a kain mɔɔ min ma.
[23] Aa kɔbiladen dɔ min diyanin tɛɛ a yɛ, wo siinin tɛɛ a tɔɔfɛ je.
[24] Wo lɔ, Simɔn Piɛl k'a ɲa makali wo tii yɛ fɔsa a yi Isa maɲininga ko a kain yi jene ma.
[25] Kɔbiladen wo do k'a da madon Isa tolo kɔlɔ k'a fɔ a yɛ, a vɛɛ: «Fanma, i kain yi jene ma?»
[26] Isa do k'a javi, a vɛɛ: «M̀'ɛ bulu kulun sunna nɛɛ lɔ ka a di mɔɔ min ma, wo le.» Wo lɔ, a ka bulu sun mafen na ka a di Judasi ma, Simɔn Sakaliyɔti den.
[27] Judasi ka bulu mina mingɛ, Soɛtana ka don a joso lɔ telemanin. Isa do vɛɛ a yɛ: «I yi min kɛ ko lɔ yi ne, i yi wo kɛ falafala.»
[28] Alalaa dɔnnikɛba suu suu m'a ɲaye min n'a kɛla, a na kuma suu wo fɔla Jusasi yɛ.
[29] K'a masɔlɔn Judasi le tɛɛ aiya wɔli ladalola, a do tɛɛ a dɔlu kɔnɔ ko Isa na a lɔla fen dɔ le sanya lɔ selibɔ ko lɔ, ni wo tɛ ka taa bolokolonnu sɔ.
[30] Wo lɔ, a ka bulu kulun wo mingɛ, a k'i wuli ka bɔ telemanin. Ado su tɛɛ vɛ ko.
[31] Judasi bɔ kɔ, Isa vɛɛ: «Ǹe Mɔɔnivin Tanin ya buɲali la vɛ nkɛnɛmaya butu, ado Ala gbazan vɛ aa buɲali lankɛnɛmaya ǹe fɛ.
[32] Ni do Ala vɛ aa buɲali lankɛnɛmaya ǹe fɛ, wo vɛ kɛla Ala gbu le kɛtɔ ǹa buɲali lankɛnɛmayala tandainɔ yi ne.
[33] Ǹ dennilu, ǹ ài fɛ waateni bene. M̀'ɛ taala, ài kɛtɔ ǹ dingila ɲininna. Iwo ǹ n'a fɔla teme Jahudiya kundiilu yɛ wo lon, ǹ'i wo suu le fɔla ài yɛ yi ne kɔtunun, ǹ ko ǹ taatɔ tɛɛ min ja, ài tɛ se taala wo ja.
[34] Ǹ'i jamali kula le dila ài ma yi ne, ǹ ko ài y'i ɲɔɔn kanu. M̀'ɛ ài kanu teme, fɔ àilu gbazan y'i ɲɔɔn kanu tenden ne.
[35] Ni kanundeya vɛ kɛla ài wotɛ, mɔɔ bɛ kɛtɔ a lɔnna wo lɔ k'a fɔ ǹa kɔbiladen ne ài le.»
[36] Simɔn Piɛl do ka Isa maɲininga, a vɛɛ: «Fanma, i taatɔ min ne?» Isa k'a javi, a vɛɛ: «Ǹ taatɔ tɛɛ min ja yi ne, i tɛ se bilala ǹ kɔ butu ka taa je. Kɛɛ lon dɔ i kɛtɔ ǹ salanna.»
[37] Piɛl do vɛɛ: «Fanma, mindɛ lɔ ǹ tɛ bila i kɔ butu ka taa? Ǹ nɔbɛnnin hali ka faa ya ko lɔ.»
[38] Isa k'a javi, a vɛɛ: «I lɔbɛnnin ne ka faa ǹa ko lɔ, kɛlɛ? Ǹ'i tuɲa fɔ i yɛ, jani donon yi kumun sɔɔma, i kɛtɔ a fɔla haan siɲa sawa ko i ma ǹ lɔn.