Yohana 10
[1] Isa vɛɛ ai yɛ: «Ǹ'i tuɲa fɔ ài yɛ, mɔɔ min tɛ donna saa wɛlɛ da la, fɔ ka jɛlɛ ka don fan gbɛlɛ, wo tii yi son ni benganikɛba le le.
[2] Kɛɛ mɔɔ min do yi donna a da la, wo tii le saakunnasiiba bɛlɛ le.
[3] Dakunnasiiba yi da lakale a yɛ. Saalu y'a kan mɛnna. A aa saalu kilila, a bɛ ni a tɔɔ, ka bɔ ai le kɛnɛma.
[4] A vɛ aa saa bɛ labɔla, wo vɛ kɛla a yi bila ai ɲa ka taa. Ado saalu yi bilala a kɔ, baa ai ka a kan lɔn.
[5] Ai tɛ bilala mɔɔ gbɛlɛ kɔ, fɔ ka bɔli a ɲa, baa ai ma wo kan lɔn.»
[6] Isa ka sana wo la ai yɛ, ai do ma a kɔlɔ ɲaye.
[7] Wo le y'a ma, a ka kuma ai yɛ kɔtunun, a vɛɛ: «Ǹ'i tuɲa fɔ ài yɛ, ǹe le saa wɛlɛ da wo le.
[8] Mɔɔ minnu nanin ǹ ɲa, son ni benganikɛba le wo bɛ le. Kɛɛ saalu ma ai tolo malɔ ai la.
[9] Ǹe le donda le. Ni mɔɔ mɔɔ vɛ donna da wo la, wo tii kisitɔle. A do kɛtɔ don ni bɔ kɛla ka balo sɔlɔn.
[10] Son tɛ nala ko suu suu lɔ mafɔ suɲali, faali, ani tiɲali. Ǹe kɔni nanin fɔsa mɔɔlu yi nimaya sɔlɔn lawasa lɔ.
[11] «Ǹe le saakunnasiiba ɲuma le min nɔbɛnnin ka faa saalu ya ko lɔ.
[12] Baaleden min yi salala k'a fɔ a a jando saalu lɔ, saakunnasiiba bɛlɛ tɛ wo le. Saalu do tɛ a ta le. Wo le y'a kɛla, ni a ka soo fali dɔ natɔ ye, a yi bɔlile ka saalu to a kɔ. Wo lɔ, soo fali yi saa dɔlu minale ka a tɔlu lɔjɛnzɛn.
[13] A yi bɔlile, k'a masɔlɔn ale yi wɔliɲininba le le dein. Saalu hina tɛ a la.
[14] Ǹe le saakunnasiiba ɲuma le. Ǹ ka ǹa saalu lɔn, ai do ka ǹ lɔn.
[15] Iwo ǹ Fa Ala ka ǹ lɔn teme, ǹ ka a lɔn ten ne gbazan. Ǹ nɔbɛnnin ne ka faa ǹa saalu ya ko lɔ.
[16] Saa gbɛlɛlu yi m̀ bolo, minnu tɛ wɛlɛ min nɔ. Fɔ ǹ'i na wolu gbazan ne. Ai do kɛtɔ ǹ kan mɛnna. Wo vɛ kɛla, ai bɛ kɛtɔ saa kulu kelen ne le, ka kɛ saakunnasiiba kelen bolo.
[17] Wo le y'a ma, ǹ diyanin ǹ Fa Ala yɛ, baa ǹ kɛtɔ ǹ nin dila, fɔsa ǹ a sɔlɔn kɔtunun.
[18] Mɔɔ suu suu tɛ se ǹ nin minala ǹ na, fɔ m̀'ɛ diɲala a ma. Ǹe gbu yi sene ǹ nin dila ka a sɔlɔn kɔtunun, iwo ǹ Fa Ala na ǹ lɔla teme.»
[19] Jahudiya kundiilu lɔ ka tala kɔtunun k'a masɔlɔn kuma wolu fɛ.
[20] Ai siyama vɛɛ: «Jina le vɛ fa bila a lɔ. Mindɛ lɔ ài y'ài tolo malɔla a la?»
[21] A dɔgbɛlɛlu vɛɛ: «A yi kuma minnu fɔla, jinatɔ tɛ kuma suu wo fɔla dɛ! Jina yi sene ɲagbɛ ɲa lakala?»
[22] Jahudiyalu ya Lɔhɔlɔmabonba Selilon min yi kɛla Jelusalɛm san san, wo ka se. Wo le bɛnnin tɛɛ nɛnɛbɔ waate ma.
[23] Isa tɛɛ i lɔjaalajaalala lɔhɔlɔmabonba lu ma, nabi Sulemana ya bolon kɔlɔ.
[24] Jahudiya dɔlu vɛ ai ladɛnna Isa laminin nɔ je. Ai do vɛɛ a yɛ: «I kɛtɔ sika bɔla mɔ lɔ waate mindɛ? Ni ile le Masa Tɔɔmasenin ne, i y'a fɔ mɔ yɛ k'a lagbɛ.»
[25] Isa k'ai javi, a vɛɛ: «Ǹ na wo le fɔla ài yɛ kɔlɔkɔlɔ le, kɛɛ do ài ma la ǹ na. Ǹ'i ko minnu kɛla ǹ Fa ya setiiya lɔ, wolu le yi seleya dila ǹa ko lɔ.
[26] Kɛɛ ài tɛ lala ǹ na, k'a masɔlɔn ài fɛ tɛ ǹa saa kulu la.
[27] Ǹa saalu y'ai tolo malɔla ǹ kan na. Ǹ k'ai lɔn, ai do yi bilala ǹ kɔ.
[28] Ǹ'i nimaya banbali dila ai ma, ai do tɛnala halakila tuun, kumatɛ mɔɔ y'ai bɔ m̀ bolo.
[29] Ǹ Fa Ala min na ai dila m̀ ma, wo le buɲanin bɛ le, ani mɔɔ suu suu tɛ se ai bɔla ǹ Fa bolo.
[30] Ǹe ni ǹ Fa yi kelen ne le.»
[31] Wo fɔ, Jahudiya kundiilu ka kawakulunnu ta kɔtunun ko ai y'a bon ka a faa.
[32] Isa do vɛɛ ai yɛ wo lɔ: «Ǹ na kokein siyama kɛla ài ɲana min bɔnin ǹ Fa fɛ. Ài y'a fɛ ka m̀ bon a mindɛ lɔ?»
[33] Ai k'a javi, ai vɛɛ: «Mɔ t'a fɛ k'i bon kokein dɔ ya ko lɔ, fɔ iya Alalɔnbaliyakan. Baa i tɛ foi le fɔ adamaden, kɛɛ i i jɛlɛ kɛla mɔ Tii le le.»
[34] Isa vɛɛ: «A sɛvɛnin àiya seliya kitabu lɔ ko Ala vɛɛ: ‹M̀'ɛ a fɔ ài ma ko tiilu.›
[35] Mɔ k'a lɔn Ala na min fɔla aa kitabu kɔnɔ, wo ma tɛ se falinna. Ala na aa kuma lasena mɔɔ minnu ma, a a fɔla wolu ma ko tiilu.
[36] Ǹe kɔni, ǹ Fa Ala na ǹ tala ka ǹ kela dunuɲa. A yi di wo lɔ? Ni m̀'ɛ a fɔ ǹ ko Ala Den ne ǹ ne, mindɛ lɔ ài vɛɛ ko m̀'ɛ Alalɔnbaliyakan fɔ?
[37] Ni m̀ ma kɛ ǹ Fa kɛkolu kɛla, ài kà la ǹ na.
[38] Kɛɛ ni ǹ'i wolu le kɛla, ài yi la wolu la, hali ni ài ma la ǹe la, fɔsa ài y'a lɔn k'a gbɛ ko ǹ kafonnin ǹ Fa kan, a do kafonin ǹ kan.»
[39] Ai k'i wuli kɔtunun k'a fɔ ai y'a minala, kɛɛ a k'i polokoso ka bɔ ai bolo.
[40] A do ka bɔ je ka taa Jɔdan kɔɔ kɔma kɔtunun ka se dingila dɔ lɔ, Yaya tɛɛ mɔɔlu makola tɛɛ min ja sɔn. A do ka lɔɔtɛ dana kɛ je.
[41] Mɔɔ siyama ka na a fɛlɔ, ai vɛɛ: «Yaya ma kawanako tɔɔmase foi kɛ. Kɛɛ a na ko min bɛ fɔla kɛ́ min ya ko lɔ, wo bɛ yi tuɲa le le.»
[42] Ado mɔɔ siyama ka limandeya a ma je.