Yohana 4
[1] Falisilu k'a mɛn ko Isa tɛɛ kɔbiladennu sɔlɔnna ka timin Yaya la k'ai mako kɔɔ kɔlɔ. Wo k'a fɔ Isa yɛ mingɛ, a ka bɔ Jude koovi lɔ ka seikɔ Galile. Wo bɛ n'a kɛ, ale gbu tɛɛ tɛ mɔɔlu makola, fɔ aa kɔbiladennu.
[4] Kɛɛ jani a tɛɛ se Galile, fɔ a tɛɛ Samali duu le lɔtimin.
[5] Wo ma, a ka se Samalikalu ya so dɔ la, ai y'a fɔla min ma ko Sikali. Sedina Janguba tɛɛ ka gbɛkɛnɛ min di a den Jusufu ma kɔlɔkɔlɔ le, so wo masulunyanin ne tɛɛ wo ja la.
[6] Sedina Janguba ya kɔlɔn tɛɛ wo ja le. Telelatelen waate, Isa ka taa i sii kɔlɔn wo dafɛ k'a masɔlɔn a sɛɛnin tɛɛ taama bolo.
[7] Ado Samalika moso dɔ ka na jitaya lɔ je. Isa vɛɛ a yɛ: «Ǹ sɔ ji sɔ, ǹ'i m̀ min.»
[8] Wo k'a talan aa kɔbiladennu tɛɛ vɛ taa balo sanya lɔ so kɔnɔ.
[9] Moso ka Isa javi, a vɛɛ: «Jahudiya le ile le. Ǹe do yi Samalika moso le le. I yi m̀ maɲiningala minji la di wo lɔ?» A ka wo fɔ k'a masɔlɔn Samalikalu tɛɛ vɛ ai bolo tuula fen fen na, Jahudiyalu tɛ ai min wo lɔ.
[10] Ado Isa k'a javi, a vɛɛ: «Ni i tɛɛ vɛ Ala ya sɔli lɔnna ani mɔɔ min y'i maɲiningala minkɛji la, i tɛɛ ǹe maɲiningale ji la. Ǹ tɛɛ i sɔ ji dɔ sɔle, min yi nimaya dila mɔɔlu ma.»
[11] Moso vɛɛ: «Ǹ fa, jitafen tɛ i bolo, ado kɔlɔn duunnin. I kɛtɔ nimaya ji wo dɔ sɔlɔnna min ne sa i yi ǹ sɔ wo dɔ sɔ?
[12] Mɔ bema Janguba le na kɔlɔn min senna ka a to mɔ bolo. Ale ni a dennu ni aa kolofennu tɛɛ ji wo le minna. A y'i kɔnɔ i buɲanin mɔ bema Janguba le?»
[13] Isa ka moso javi, a vɛɛ: «Mɔɔ suu suulu yi ji min minna, jilɔɔ kɛtɔ wolu minala kɔtunun.
[14] Kɛɛ ǹ'i ji min dila, mɔɔ mɔɔ vɛ wo dɔ minna, jilɔɔ tɛnala wo tii minala le tuun. Wo kɛtɔle a kɔnɔlɔ iwo kɔɔkun min yi woyola ka nimaya banbali di a ma.»
[15] Moso vɛɛ: «Ǹ fa, i yi ǹ sɔ ji wo sɔ, sa jilɔɔ kana m̀ mina butu ani ǹ kana to nala jan jitaya lɔ.»
[16] Isa vɛɛ a yɛ wo lɔ: «Taa i yi kɛ́ kili, ài yi na jan.»
[17] Moso do k'a javi, a vɛɛ: «Kɛ́ tɛ m̀ bolo.» Isa vɛɛ: «I jo yi ne k'a fɔ kɛ́ t'i bolo,
[18] baa i v'i sii kɛ́ loolu kun. Ado i yi min bolo yi ne, wo t'i fulukɛ le. Wo lɔ, i na tuɲa le fɔla ǹ yɛ.»
[19] Moso vɛɛ: «Ǹ fa, m̀'ɛ a ɲaye butu ko kela le i le.
[20] Mɔ bemanu tɛɛ Ala batola tini min ne kɔkan jan. Kɛɛ àilu Jahudiyalu vɛɛ ko mɔɔlu ka kan ka Ala bato Jelusalɛm le. A yi di wo lɔ?»
[21] Isa k'a javi, a vɛɛ: «Moso, i yi la ǹ na k'a fɔ lon dɔ natɔ, ài tɛnala ǹ Fa Ala batola tini min kɔkan ni wo tɛ Jelusalɛm.
[22] Àilu Samalikalu yi min batola, ài ma wo lɔn. Kɛɛ ǹu Jahudiyalu yi min batola, mɔ ka wo lɔn k'a masɔlɔn kisiko ma yi sɔlɔnna ǹu le fɛ.
[23] Waate dɔ natɔ, a do vɛ se butu, batokɛba bɛlɛlu kɛtɔ ǹ Fa Ala batola siya bɛlɛ le kan k'a masɔlɔn aa Lɔhɔlɔma Fɔɲɛ ya dɛmɛnnin fɛ. Baa ǹ Fa Ala yi wo suulu le ɲininna.
[24] Ala kɛnin ne iwo fɔɲɛ. Wo lɔ, mɔɔ minnu y'a batola, fɔ ai y'a bato siya bɛlɛ le kan k'a masɔlɔn aa Lɔhɔlɔma Fɔɲɛ ya dɛmɛnnin fɛ.
[25] Moso vɛɛ a yɛ: «Ǹ k'a lɔn Alimasihu natɔ, ai y'a fɔla min ma ko Masa Tɔɔmasenin. Wo vɛ nala, a kɛtɔ ko bɛ ɲafɔla mɔ yɛ.»
[26] Isa k'a javi, a vɛɛ: «Ǹe le wo le, min yi kumala i fɛ yi ne.»
[27] Wo waate kelen nɔ, aa kɔbiladennu ka seikɔ ka a ni moso wo ye kumala je. Ai do ka kawakoya wo lɔ. Kɛɛ ai suu suu ma moso maɲininga ko: «I yi mindɛ kɔ?», ni wo tɛ k'a fɔ Isa yɛ ko: «Mindɛ kɛnin i yi kumala moso wo fɛ?»
[28] Wo kɛ, moso ka aa jitafen to je ka taa so kɔnɔ k'a fɔ mɔɔlu yɛ, a vɛɛ:
[29] «Ài yi na ka kɛ́ dɔ ye, min na ǹ kɛko bɛ fɔla ǹ yɛ. Ale tɛ Masa Tɔɔmasenin ne le?»
[30] Wo lɔ, ai vɛ bɔla so kɔnɔ ka na Isa fɛlɔ.
[31] Wo waate lɔ, aa kɔbiladennu tɛɛ a madiyala, ai vɛɛ: «Kalanmɔɔ, na m'i dɔnni kɛ.»
[32] A do vɛɛ ai yɛ: «Balo yi m̀ bolo, ài tɛ min kalama.»
[33] Wo lɔ, aa kɔbiladennu v'a fɔla i ɲɔɔn yɛ, ai vɛɛ: «Tumado mɔɔ dɔ na balo dila a ma.»
[34] Isa do vɛɛ ai yɛ: «Ka ǹ kelaba sawo kɛ ani ka aa baale kɛ ka a dafa, wo le m̀ balo le.
[35] Ài y'a fɔla ko a vɛ to kalo naani, malo kali waate yi se, kɛlɛ? Kɛɛ ǹ a fɔla ài yɛ, ǹ ko ài y'ài kun nawuli ka sɛnɛlu lasaa. Baa malo vɛ mɔn, a do kali waate le ne.
[36] Mɔɔ min yi malo kalila, wo y'a sala sɔlɔnna butu. A do yi malo ladɛnna sa ài yi nimaya banbali sɔlɔn, fɔsa malo falinba ni a kaliba yi sawa i ɲɔɔn fɛ.
[37] Sana min yi tuɲa le le ko: ‹A dɔ yi malo falinna, a dɔgbɛlɛ y'a kalila›.
[38] Ài ma sɛnɛ min kɛ, m̀'ɛ ài lɔ wo kalila. Mɔɔ dɔgbɛlɛlu le ka baale je, ài do yi wo tɔnɔ le sɔlɔnna yi ne.»
[39] Samalika sokɔnɔmɔɔ siyama ka limandeya Isa ma ka bɛn moso wo ya seleya ma, a vɛɛ: «A na ǹ kɛko bɛ fɔla ǹ yɛ.»
[40] Wo le k'a kɛ, Samalikalu ka na Isa fɛlɔ k'a madiya ko a yi waate dɔ kɛ ai fɛlɔ. Wo lɔ, a ka tele fila kɛ je.
[41] Mɔɔ siyama gbɛlɛ ka limandeya a ma ka bɛn aa kuma ma tele fila wo kɔlɔ.
[42] Ai k'a fɔ moso yɛ, ai vɛɛ: «A damina lɔ, mɔ ka limandeya a ma ya kuma lɔ dein. Kɛɛ tandainɔ mɔ bɛ vɛ a kan mɛn mɔ jɛlɛ yɛ k'a lɔn a yi dunuɲa mɔɔlu ya Lakisiliba le le jɔ.»
[43] Tele fila kɔ, Isa vɛ taala Galile.
[44] Baa ale gbu tɛɛ k'a fɔ ko kela tɛ buɲala a fɛso.
[45] Ai senin Galile, Galilekalu k'ai lɔmina kobɛn. Isa tɛɛ ka ko min bɛ kɛ Jelusalɛm selibɔya, wo bɛ ka kɛ Galilekalu ɲana k'a masɔlɔn ailu gbazan taanin tɛɛ je selibɔya lɔ.
[46] Isa ka na Kana kɔtunun, min yi Galile koovi lɔ. A tɛɛ ka ji lajɛlɛma ka kɛ lɛzɛnji le so wo le la. Jamana ɲamɔɔ dɔ tɛɛ Kapɛlɛnam so kɔnɔ, min denkɛ tɛɛ man kɛnɛ.
[47] Ɲamɔɔ wo k'a mɛn mingɛ ko Isa vɛ na Galile ka bɔ Jude, a v'i wulila ka taa a fɛlɔ. A senin a ma, a vɛ a madiyala ko a yi diɲa ka taa a den nakɛnɛya, ko a yi faa bolo le ma.
[48] Isa vɛɛ a yɛ: «Ni ài ma kawanako tɔɔmase ni ko ba balu ye ài ɲa la, ài tɛnala limandeyala m̀ ma tuun.»
[49] Ɲamɔɔ k'a javi, a vɛɛ: «Ǹ fa, i jaani. M'i taa butu jani ǹ den yi sa.»
[50] Isa vɛɛ: «Taa vɛ. I den kisitɔ.» Ɲamɔɔ wo ka la Isa ya kuma la ka taa.
[51] A taatɔla aa lu ma, aa bɔlidennu ka a labɛn k'a fɔ ko a den vɛ kisi.
[52] A k'ai maɲininga, a vɛɛ: «A na fisayala waate mindɛ le lɔ?» Ai vɛɛ: «A fali na sumala telelatelen waate le lɔ kunun.»
[53] Den fa k'a lɔn wo waate kelen ne ko Isa tɛɛ k'a fɔ a yɛ, a vɛɛ: «I den kisitɔ.» Ale ni aa balamɔɔ bɛ ka limandeya Isa ma wo lɔ.
[54] A siɲa filana le tɛɛ ne butu, Isa ka na Galile ka bɔ Jude ka kawanako tɔɔmase kɛ.