Yohana 16
[1] «M̀'ɛ ko min bɛ fɔ ài yɛ, sa ài kunnɔ kana tɛɛ ka limandeya siya bila.
[2] Ai kɛtɔ ài gbɛnna k'ài labɔ Aladalibonnu la. Ado lon dɔ natɔ, mɔɔ minnu v'ài faala, a kɛtɔ ai kɔnɔ ko ai yi Ala ya baale le la.
[3] Ai kɛtɔ ko wo suu kɛla ài la k'a masɔlɔn ai ma ǹ Fa lɔn, kumatɛ ǹe ma.
[4] Kɛɛ m̀'ɛ ko min bɛ fɔ ài yɛ, fɔsa waate wo vɛ sena, ài hangili yi bila a lɔ ko ǹ na wo le fɔla ài yɛ. Ǹ tɛɛ ma wo fɔ ài yɛ k'a ta a damina ma, k'a masɔlɔn ǹ tɛɛ ài fɛ.
[5] Kɛɛ ǹ taatɔle ǹ kelaba fɛlɔ, ado ài suu suu tɛ m̀ maɲininga ko: ‹I taatɔ min?›
[6] Kɛɛ ǹ na kuma minnu fɔla ài yɛ yi ne, wo lɔ ài josoma vɛ kasa.
[7] Wo bɛ ni a kɛ, ǹ'i tuɲa fɔ ài yɛ, ǹ taa ko le fisayanin ài ma. K'a masɔlɔn ni m̀ ma taa, Lailiba wo tɛnala nala ài ma. Kɛɛ m̀'ɛ taala, ǹ kɛtɔ a lanala ài ma.
[8] A do vɛ nala, a kɛtɔ julumbu ko ni telentiiya ko ni Ala ya kiti ko lagbɛla dunuɲa mɔɔlu yɛ ka ai jo baliya wo bɛ lɔ.
[9] Ai jo tɛ julumbu ko lɔ k'a masɔlɔn ai ma limandeya m̀ ma.
[10] Ai jo tɛ telentiiya ko lɔ k'a masɔlɔn ǹ taatɔle ǹ Fa Ala fɛlɔ. Wo vɛ kɛla, ài tɛnala ǹ yena butu.
[11] Ai jo tɛ Ala ya kititɛɛ ko lɔ k'a masɔlɔn dunuɲa malaba vɛ ban jalakila.
[12] Ko siyama le yi ǹ kɔnɔ bene k'a fɔ ài yɛ, kɛɛ ài tɛ se wolu kɔlɔ butu.
[13] Lɔhɔlɔma Fɔɲɛ, min yi tuɲa lankɛnɛmayala ka bɛn Ala ma, wo vɛ nala, a kɛtɔ tuɲa bɛ jiyala ài la. A vɛ min fɔla, wo tɛnala bɔla ale jɛlɛ lɔ, fɔ a na min bɛ mɛnna ǹ Fa da. Ko minnu natɔ kɛla, a kɛtɔ wolu gbazan fɔla ài yɛ.
[14] A kɛtɔ m̀ buɲala, baa a na kuma min bɛ mɛnna ǹ da, a kɛtɔ wolu le lasena ài ma.
[15] Min bɛ yi ǹ Fa ta le, wo bɛ yi ǹ ta le le. Wo lɔ, ǹ ko Lɔhɔlɔma Fɔɲɛ kɛtɔ ǹa kuma lasena ài ma.»
[16] Wo kɔ, Isa vɛɛ aa kɔbiladennu yɛ: «Waateni vɛ timinna, ài tɛnala ǹ yena butu. Kɛɛ waateni vɛ timinna wo kɔ, ài kɛtɔ ǹ yena kɔtunun.»
[17] Aa kɔbiladen dɔlu k'i ɲɔɔn maɲininga wo lɔ, ai vɛɛ: «A na min fɔla mɔ yɛ tan, wo kɔlɔ yi mindɛ le? A vɛɛ ko waateni vɛ timinna, mɔ tɛnala a yena butu. Ko waateni vɛ timinna wo kɔ, mɔ kɛtɔ a yena kɔtunun. A vɛɛ gbazan ko wo kɛtɔ k'a masɔlɔn a taatɔ a Fa Ala fɛlɔ.
[18] Waateni wo kɔlɔ yi mindɛ le? A kain yi min ma, mɔ ma wo ɲaye feu!»
[19] Isa tɛɛ k'a lɔn ai tɛɛ a fɛ ka a maɲininga ko wo ma. Wo lɔ, a vɛɛ ai yɛ: «Ǹ n'a fɔla, ǹ ko waateni vɛ timinna, ài tɛnala ǹ yena butu, kɛɛ waateni vɛ timinna wo kɔ, ài kɛtɔ ǹ yena kɔtunun. Ài y'i ɲɔɔn maɲiningala wo kɔlɔ le ma?
[20] Ǹ'i tuɲa fɔ ài yɛ, ài kasitɔ ka maɲumakan fɔ k'a talan dunuɲa mɔɔlu yi sawala. Ài joso maɲumatɔ, kɛɛ àiya maɲuma ko kɛtɔ jɛlɛmala ka kɛ sawa le.
[21] Ni moso ka kɛ tin ma, a buba ma yi ɲuma yi la, k'a masɔlɔn aa tɔlɔya waate vɛ se. Ni a do ɲuma ka jii, aa sawa y'a laɲinale tɔlɔya ba wo bɛ lɔ, baa a vɛ denkulani sɔlɔn.
[22] Àilu gbazan yi ten ne. Ài ninnafinnin ne butu, kɛɛ ǹ kɛtɔ ài yena kɔtunun. Wo vɛ kɛla, ài sawatɔ. Ado mɔɔ mɔɔ tɛnala sena sawa wo bɔla ài bolo.
[23] Wo lon ne, ài tɛnala ǹ maɲiningala fen suu suu ma butu. Ǹ'i tuɲa fɔ ài yɛ, ni ài ka ǹ Fa madali ba fen suu suu la ǹ tɔɔ lɔ, a kɛtɔ wo le dila ài ma.
[24] Haan bi, ài ma ǹ Fa madali ba fen suu suu la ǹ tɔɔ lɔ. Ài y'a madali, a kɛtɔ ài sɔla, sa àiya sawa da yi fa.»
[25] A vɛɛ kɔtunun: «M̀'ɛ ko minnu fɔ ài yɛ sanalu lɔ. Kɛɛ waate dɔ natɔ, ǹ tɛna kumala ài yɛ sana lɔ butu. Ǹ kɛtɔ ǹ Fa ya ko fɔla ài yɛ kuma gbɛnin ne lɔ.
[26] Wo lon ne, ài kɛtɔ ǹ Fa madalila ǹ tɔɔ lɔ. Ǹ t'a fɔ ǹ kɛtɔ a madalila ài yɛ.
[27] K'a masɔlɔn ǹ Fa gbu y'ài kanuna, baa ài vɛ ǹ kanu ani ài limandeyanin k'a fɔ m̀ bɔnin ale le fɛlɔ.
[28] Alalaa m̀ bɔnin ǹ Fa le fɛlɔ ka na dunuɲa, ado m̀ bɔtɔle dunuɲa ka seikɔ ǹ Fa fɛlɔ.»
[29] Aa kɔbiladennu vɛɛ wo lɔ: «Ahan, i yi kuma lagbɛnin ne fɔla butu, sana tɛ.
[30] Mɔ v'a ɲaye butu ko i ka ko bɛ lɔn k'a masɔlɔn jani mɔɔ y'a kɔnɔko fɔ i yɛ, i ka wo lɔn. Wo le y'a ma, mɔ vɛ limandeya k'a fɔ ko i bɔnin Ala le fɛlɔ.»
[31] Isa do vɛɛ ai yɛ: «Ài vɛ limandeya m̀ ma butu?
[32] Alalaa waate dɔ yi nala, a do vɛ se, ài bɛ bɔlitɔ ka jɛnzɛn. Ài bɛ taatɔ àiya lu ma ka ǹe kelen to. Kɛɛ ǹe kelen tɛnala tola, baa ǹ Fa yi ǹ fɛ.
[33] M̀'ɛ ko minnu fɔ ài yɛ yi ne, sa ài joso la yi jii ǹ fɛ. Dunuɲa mɔɔlu kɛtɔ gbalo le lala ài kan, kɛɛ ài joso la yi gbeleya. M̀'ɛ se dunuɲa la.»