Yohana 5
[1] Wo kɔ, Isa ka taa Jelusalɛm ka Jahudiyalu ya selilon kɛ je.
[2] Ji diɲa dɔ tɛɛ Jelusalɛm je, mɔɔlu tɛɛ a fɔla min ma Hebulukan nɔ ko Betisaida. Bolon loolu lɔnin tɛɛ ji diɲa wo dafɛ. Wo ja tɛɛ so donda le dafɛ, ai tɛɛ a fɔla min ma ko Saalu donda.
[3] Jangalotɔ siyama lanin tɛɛ bolon wolu kɔlɔ. Ɲagbɛlu tɛɛ je, ani namalanilu, ani falifaamatɔlu.
[5] Kɛ́ dɔ tɛɛ je, min tɛɛ vɛ san bisawa ni sein kɛ jangalo lɔ.
[6] Isa ka kɛ́ wo lanin ye k'a lɔn a tɛɛ vɛ mɛn jangalo lɔ. A k'a maɲininga wo lɔ, a vɛɛ: «I y'a fɛ ka kɛnɛya?»
[7] A ka Isa javi, a vɛɛ: «Ǹ fa, mɔɔ tɛ m̀ bolo ka ǹ najii ji lɔ ji lamaa waate. M̀'ɛ m̀ wulila ka taa je, mɔɔ gbɛlɛ jiitɔ ǹ ɲa.»
[8] Isa vɛɛ a yɛ: «I yi wuli, iya dɛvɛ ta ka taama.»
[9] Wo kɛ, kɛ́ ka kɛnɛya telemanin. A v'i wulila ka aa dɛvɛ ta ka taama damina. Wo ka kɛ Jahudiyalu ya Nɔningɛlon ne.
[10] Wo lɔ, Jahudiya kundiilu vɛɛ kɛ́ yɛ: «Nɔningɛlon ne bi! Wo lɔ, a daannin ne k'a fɔ i iya dɛvɛ ta i bolo ten.»
[11] Kɛ́ do k'ai javi, a vɛɛ: «Min na ǹ nakɛnɛyala, wo le vɛɛ ko ǹ'i ǹa dɛvɛ ta ka taama.»
[12] Ai ka a maɲininga, ai vɛɛ: «Mɔɔ min n'a fɔla ko i iya dɛvɛ ta ka taama, jene yi wo tii le?»
[13] Kɛɛ mɔɔ kelen min ka kɛ́ lakɛnɛya, a tɛɛ ma wo tii tɔɔ lɔn. Isa tɛɛ vɛ tunun a ma je, k'a masɔlɔn jama walanin tɛɛ.
[14] Wo kɔ, Isa ka taa kɛ́ wo talan lɔhɔlɔmabonba kɔnɔ k'a fɔ a yɛ, a vɛɛ: «I tolo malɔ. I la vɛ kɛnɛya butu. I do kà kɛ julumbu tala, jani a kɛwonyanin dɔ yi kɛ i la.»
[15] Kɛ́ wo vɛ taala k'a fɔ Jahudiya kundiilu yɛ ko Isa le na a lakɛnɛyala.
[16] Wo le k'a kɛ, ai ka gbalo la jusii Isa kan, k'a masɔlɔn a deinnin tɛɛ ko suu wolu kɛla Nɔningɛlon.
[17] Kɛɛ Isa vɛɛ ai yɛ: «Ǹ Fa Ala yi baale le la kudein, wo lɔ fɔ ǹe gbazan yi kɛ baale le la.»
[18] Ka bɛn kuma wo ma, Jahudiya kundiilu tɛɛ Isa faa ko ɲa ɲininna ka timin kunfɔlɔ ta la. Nɔningɛlon laana tiɲa ko tɛɛ tɛ dein, kɛɛ a tɛɛ a fɔla Ala ma ko a Fa, ka a jɛlɛ lɔkan Ala ma.
[19] Wo lɔ, Isa k'a fɔ ai yɛ, a vɛɛ: «Ǹ'i tuɲa fɔla ài yɛ, ǹe Ala Den tɛ se foi kɛla ǹ jɛlɛ ma. Fɔ m̀'ɛ ǹ Fa Ala yena min na, ǹ'i wo le kɛla dein. Baa ǹ Fa Ala yi ko ko kɛla, ǹe a Den gbazan yi wo le kɛla.
[20] K'a masɔlɔn ǹ diyanin ǹ Fa Ala yɛ, a yi ko ko kɛla, a yi wo bɛ jiyala ǹ na. A do kɛtɔ ko gbɛlɛlu jiyala ǹ na min buɲanin minnu le, sa ài yi kawakoya.
[21] Ǹ Fa Ala yi fulenilu lawulila ka nimaya kula di ai ma teme, wo ɲa kelen ma, ni ǹe a Den y'a fɛ ka nimaya di minnu ma, ǹ a dila wolu le ma.
[22] Ǹ Fa Ala tɛ mɔɔ suu suu ya kiti tɛɛla, k'a masɔlɔn a na kiti ko bɛ tola m̀ bolo,
[23] sa bɛ yi m̀ buɲa iwo ai yi ǹ Fa Ala buɲala teme. Ni mɔɔ min ma diɲa ka m̀ buɲa, wo tii tɛ ǹ Fa Ala gbazan buɲa, min na ǹ kelala.»
[24] Isa vɛɛ kɔtunun: «Ǹ'i tuɲa fɔla ài yɛ, mɔɔ mɔɔ vɛ ǹ kumakan mɛnna ka limandeya ǹ kelaba ma, nimaya banbali yi wo tii le bolo. Kiti tɛnala bilala wo tii la. A do vɛ bɔ saya lɔ ka don nimaya lɔ.
[25] Ǹ'i tuɲa fɔla ài yɛ, waate dɔ natɔ, a do vɛ se butu, fulenilu kɛtɔ ǹe Ala Den kan mɛnna. Minnu do v'a mɛnna, ai wulitɔ ka bɔ saya lɔ.
[26] A se yi ǹ Fa Ala yɛ ka ni di teme, wo lɔ a vɛ se di ǹe a Den gbazan ma ka ni di ten.
[27] Ani a na kititɛɛ setiiya dila m̀ ma, k'a masɔlɔn ǹe le Mɔɔnivin Tanin ne.
[28] Ài kà kawakoya wo lɔ, k'a masɔlɔn waate dɔ natɔ, fulenilu kɛtɔ ǹ kan mɛnna k'i wuli ka bɔ kabululu lɔ. Mɔɔ minnu na kokeinnu kɛla, wolu kɛtɔ i wulila ka nimaya banbali le sɔlɔn, ani minnu na koyonnu kɛla, wolu kɛtɔ i wulila ka kolatɔn ne sɔlɔn.»
[30] Isa vɛɛ: «Ǹ tɛ se foi kɛla ǹ jɛlɛ ma, ǹ Fa Ala yi min fɔla ǹ yɛ, ǹ'i kiti tɛɛla ka bɛn wo le ma. Wo lɔ ǹa kiti telennin ne, k'a masɔlɔn ǹ tɛ ɲa ɲininna ka ǹe gbu sawo kɛ, fɔ ǹ kelaba sawo dein.
[31] Ni ǹ ka seleya di ǹe gbu ya ko lɔ, ai tɛnala wo jatela tuɲa le.
[32] Kɛɛ a dɔgbɛlɛ yi je, min yi seleya dila ǹa ko lɔ. Ǹe do k'a lɔn wo ya seleya yi tuɲa le le.
[33] Ài na mɔɔ dɔlu kelala Makoliba Yaya ma. A na min fɔla ka bɛn ǹa ko ma, wo yi tuɲa le le.
[34] Wo bɛ n'a kɛ, m̀ mako tɛ adamadennu ya seleya la dɛ! Kɛɛ ǹ'i kuma minnu fɔla ài yɛ, sa ài yi kisi.
[35] Yaya ya kawanili kɛnin ne tɛɛ iwo fitina, min tɛɛ mɛnɛnmɛnɛnna gbesekele. Ài do ka diɲa ka waateni kɛ sawala kɛnɛya wo lɔ.
[36] Kɛɛ fen gbɛlɛ yi seleya dila ǹa ko lɔ, min buɲanin ka timin Yaya ta la. Alalaa ǹ Fa Ala na kokɛta minnu donna m̀ bolo ko ǹ ai kɛ ka dafa, ǹ'i wolu gbu gbu le kɛla yi ne. Wolu le seleya yi ne k'a fɔ ko ǹ Fa Ala le na ǹ kelayala.
[37] Ani ǹ Fa Ala min na ǹ kelala, wo gbu yi seleya dila ǹa ko lɔ. Kɛɛ do ài ma a kan mɛn ba, ài do ma a kɛɲa ye ba.
[38] Aa kuma tɛ ài joso lɔ, k'a masɔlɔn a na mɔɔ min kelala, ài ma la wo tii la.
[39] Ài yi kitabulu mafɛlɛnna kosɛvɛ k'a masɔlɔn a ài kɔnɔ ko ài kɛtɔ nimaya banbali sɔlɔnna wolu le fɛ. Ado kitabu wolu gbu gbu le yi ǹa ko fɔla.
[40] Wo bɛ n'a kɛ, ài t'a fɛ ka la ǹ na sa ài yi nimaya sɔlɔn.
[41] Ǹ tɛ adamadennu ya matɔɔli ɲininna.
[42] Baa ǹ k'ài suu le lɔn k'a fɔ Ala ya kanundeya tɛ ài josokun nɔ.
[43] Ǹ nanin ǹ Fa aa setiiya le lɔ, kɛɛ ài ma diɲa k'ài bolo sii ǹ kɔlɔ. Ni a dɔgbɛlɛ ka na a jɛlɛ ya setiiya lɔ, ài kɛtɔ ài bolo sii le la wo tii kɔlɔ.
[44] Ài ɲɔɔn ya matɔɔli le diyanin ài yɛ. Kɛɛ matɔɔli min yi sɔlɔnna Ala kelenpesa fɛ, ài tɛ wo ɲininna. Ài yi se lala ǹ na di wo lɔ?
[45] Ài k'ài mili k'a fɔ ko ǹe gbu kɛtɔ ài jalakila ǹ Fa ɲakɔlɔ. Mɔɔ min kɛtɔ ài jalakila, wo le kela Musa le, ài jei siinin min na.
[46] Ni ài tɛɛ vɛ lala kela Musa la, ài tɛɛ lale ǹe gbazan na. K'a masɔlɔn ale le na sɛvɛli kɛla ka bɛn m̀ ma aa Taulati lɔ.
[47] Ni do ài ma la aa sɛvɛli wolu la, ài yi la ǹa kumalu la di wo lɔ?»