Yohana 8
[1] Isa ka taa se Zeituna tini kɔkan.
[2] Wo duusa gbɛ, a ka seikɔ lɔhɔlɔmabonba la. Mɔɔlu bɛ k'ai madon a la. A do k'i sii k'ai kalan damina.
[3] Wo kɛ, seliya kalanmɔɔ ni Falisilu ka na moso dɔ le, ko ai na a minala jalɔnya la. Ai ka moso lalɔ jama tɛma
[4] k'a fɔ Isa yɛ, ai vɛɛ: «Kalanmɔɔ, ai na moso min minala jalɔnya la.
[5] Nabi Musa na jamali dila aa Taulati lɔ ko fɔ m'i moso suu min bon kawa la ka a faa. Wo ma, i bolo di?»
[6] Ai ka wo fɔ a lɔsuman ko le lɔ, sa ai yi se a minala a dalakan fɛ. Kɛɛ Isa v'i bilinna ka sɛvɛli kɛ duu ma a bolokɔni la.
[7] K'ai to ɲiningalila, Isa k'i lɔ k'a fɔ ai yɛ, a vɛɛ: «Ni mɔɔ dɔ ka kɛ ài lɔ, min ma julumbu ta ba bene, fɔ wo tii le yi kɛ mɔɔ kunfɔlɔ le ka moso min bon kawakulun ne.»
[8] Wo fɔnin, a v'i bilinna kɔtunun ka sɛvɛli kɛ duu ma.
[9] Ai ka kuma wo mɛn mingɛ, ai kelenkelenna vɛ bɔla je ka taa, ka damina kɛmɔɔbalu ma. Isa kelen ka to je ani moso min lɔnin tɛɛ a kɛɛna.
[10] A do k'i latelen k'a fɔ moso yɛ, a vɛɛ: «Ile moso, mɔɔ wolu yi min? Mɔɔ ma to jan k'i jalaki?»
[11] Moso vɛɛ: «Kalanmɔɔ, hali kelen gbu ma to jan.» Isa vɛɛ: «Ǹe gbazan tɛnala i jalakila. Taa vɛ, kɛɛ i do kà julumbu ta butu.»
[12] Isa k'a fɔ mɔɔlu yɛ kɔtunun, a vɛɛ: «Ǹe le kɛnɛya le dunuɲa mɔɔlu yɛ. Ni mɔɔ min ka bila ǹ kɔ, wo tii tɛnala taamana divi lɔ butu tuun. A totɔ kɛnɛya le lɔ, kɛnɛya min yi nimaya dila.»
[13] Falisilu k'a javi wo lɔ, ai vɛɛ: «I yi seleya dila ile gbu ya ko lɔ. I yi kuma fuu le fɔla wo le.»
[14] Isa vɛɛ: «Hali ni ǹe gbu ka seleya di ǹa ko lɔ, ǹa seleya yi tuɲa le le k'a masɔlɔn ǹ ka m̀ bɔya ni ǹ taaya lɔn. Kɛɛ àilu do ma m̀ bɔya lɔn ni wo tɛ ǹ taaya.
[15] Ài yi kiti tɛɛla ka bɛn adamadennu ya jateli le ma. Kɛɛ ǹe do tɛ mɔɔ suu suu ya kiti tɛɛla.
[16] Hali ni ǹe ka kiti tɛɛ, jo yi kiti wo lɔ, baa ǹe kelen tɛ wo tɛɛba le, fɔ ǹe ni ǹ Fa min na ǹ kelala.
[17] A sɛvɛnin àiya seliya kitabu lɔ ko ni mɔɔ fila ya seleya ka bɛn kuma kelen ma, ko seleya wo yi tuɲa le le.
[18] Ǹe gbu le m̀ masele le, ani ǹ Fa min na ǹ kelala, wo gbazan yi ǹ sele le.»
[19] Ai ka a maɲininga wo lɔ, ai vɛɛ: «I fa yi min?» Isa vɛɛ: «Ài ma ǹ lɔn, ni wo tɛ ǹ Fa. Ni ài tɛɛ ka ǹ lɔnne bɛlɛbɛlɛ le, ài tɛɛ ǹ Fa gbazan lɔnne.»
[20] Isa ka kuma wo bɛ fɔ k'a to mɔɔlu kalanna jaabila kesulu dafɛ lɔhɔlɔmabonba la. Mɔɔ ma a mina k'a masɔlɔn aa waate tɛɛ ma se ba.
[21] Isa vɛɛ ai yɛ kɔtunun: «Ǹ natɔle taala. Ài do kɛtɔ ǹ ɲininna, kɛɛ ài faatɔle k'ài to àiya julumbulu lɔ. Ǹ taatɔ tɛɛ min ja, ài tɛnala sena taala wo ja.»
[22] Jahudiya kundiilu k'a fɔ i ɲɔɔn yɛ, ai vɛɛ: «Ɛɛ! A vɛɛ ko a natɔ taala tɛɛ min ja, ko mɔ tɛnala sena taala wo ja. Wo kɔlɔ yi mindɛ le? A kɛtɔle a jɛlɛ faala wo lɔ?»
[23] Isa vɛɛ ai yɛ: «Ài sɔlɔnnin duukolo kan jan ne, kɛɛ ǹe do bɔnin san ne ma. Dunuɲa ta le ài le, kɛɛ dunuɲa ta tɛ ǹe le.
[24] Wo le n'a kɛla, ǹ n'a fɔla ài yɛ, ǹ ko ài faatɔle k'ài to àiya julumbulu lɔ. Ǹ ko ni ài ma limandeya k'a fɔ ǹ'i mɔɔ min ne ǹe le wo le, wo vɛ kɛla ài yi faatɔle k'ài to àiya julumbulu lɔ.»
[25] Ai ka Isa maɲininga, ai vɛɛ: «Jene i le le?» Isa vɛɛ: «Ǹ'i mɔɔ min ne, m̀'ɛ wo fɔ ài yɛ k'a ta a damina ma.
[26] Ǹ'i sene ko siyama fɔla àiya ko lɔ ani ǹ'i sene ài jo baliyala ko siyaman nɔ. Kɛɛ ǹ kelaba le yi tuɲande le. Ǹ na min mɛnna a da, ǹ'i wo le fɔla dein àilu dunuɲa mɔɔlu yɛ.»
[27] Ai do tɛɛ ma a ɲaye k'a fɔ a tɛɛ kumala ai yɛ ka bɛn a Fa Ala le ma.
[28] Wo lɔ, a vɛɛ ai yɛ: «Ài vɛ ǹe Mɔɔnivin Tanin najɛlɛla kɔlɔman ma waate min nɔ, ài kɛtɔ a lɔnna ko, ǹ'i mɔɔ min ne, ǹ'i wo le le. Ani ài kɛtɔ a lɔnna gbazan ko ǹ tɛ foi kɛla ǹe gbu ya setiiya lɔ. Ǹe do tɛ foi fɔla, fɔ ǹ Fa na ǹ kalanna minnu la dein.
[29] Ǹ Fa min na ǹ kelala, a yi ǹ fɛ. A do ma ǹe kelen to k'a masɔlɔn ǹ a diyanan kolu le kɛla kudein.»
[30] K'a to kuma wolu fɔla, mɔɔ siyama ka limandeya a ma.
[31] Wo lɔ, Isa k'a fɔ Jahudiyalu yɛ, minnu limandeyanin tɛɛ a ma, a vɛɛ: «Ni ài vɛ kɛla ǹa kumalu labatola, wo vɛ kɛla ǹa kɔbiladen bɛlɛbɛlɛ le ài le.
[32] Ài kɛtɔ tuɲa lɔnna, ado tuɲa kɛtɔ ài lafɛlɛla.»
[33] Ai ka Isa javi, ai vɛɛ: «Ǹu yi bema Ibulahima bɔzɔn ne le. Mɔ do ma kɛ ba mɔɔ suu suu ya jɔn ne bene. I y'a fɔla di wo lɔ ko mɔ lafɛlɛtɔ?»
[34] Isa vɛɛ: «Ǹ'i tuɲa fɔ ài yɛ, mɔɔ minnu yi julumbu tala, wolu yi julumbu ya jɔn ne le.
[35] Ado jɔn tɛ jatela aa jɔnfa ya bon dongo dɔ le kudein, kɛɛ do jɔnfa denkɛ wo yi je le kudein.
[36] Wo lɔ saa, ni ǹe Ala Den vɛ ài lafɛlɛla, ài lafɛlɛtɔle feu.
[37] Ǹ k'a lɔn ne k'a fɔ Ibulahima bɔzɔn ne ài le. Wo bɛ n'a kɛ, ài yi ǹ faa ko ɲa ɲininna, baa ài ma diɲa ǹa kuma ma.
[38] Ǹ Fa Ala na min jiyala ǹ na a fɛlɔ, ǹ'i wo le fɔla. Àilu do na min mɛnna ài fa da, ài yi wo le kɛla.»
[39] Ai do k'a javi, ai vɛɛ: «Mɔ bema le nabi Ibulahima le.» Isa vɛɛ: «Ni ài tɛɛ kɛ Ibulahima bɔzɔn bɛlɛ le, ài tɛɛ a kɛko ɲɔɔlu kɛle.
[40] Kɛɛ ài yi ǹ faa ko le ɲa ɲininna yi ne, ǹe min na tuɲa fɔla ài yɛ, ǹ na min mɛnna Ala da. Ibulahima tɛɛ tɛnala wo suu kɛla.
[41] Alalaa ài yi min na yi ne, ài fa gbazan tɛɛ wo suu le kɛla.» Ai k'a javi, ai vɛɛ: «Mɔ tɛ ɲɔmɔden ne dɛ! Fa kelenpesa le mɔ bolo, wo le Ala le.»
[42] Isa vɛɛ ai yɛ: «Ni Ala tɛɛ kɛ ài fa bɛlɛbɛlɛ le, ǹa ko tɛɛ diyale ài yɛ k'a masɔlɔn m̀ bɔnin Ala le fɛlɔ, ado ǹ'i jan ne butu. Ani m̀ ma na ǹe gbu ya setiiya lɔ, mafɔ ale min na ǹ kelala.
[43] Ǹ'i min fɔla yi ne, mindɛ lɔ ài tɛ wo ɲayena? A yi ten ne baa ài ma diɲa k'ài tolo malɔ ǹa kuma ma.
[44] Ài bɔnin ài fa Soɛtana le la ani ài do y'a fɛ k'ài fa sawo le kɛ. Mɔɔfaba le tɛɛ a le haan k'a damina a jusii ma ka na a sii bi la. Tuɲa ko diyanin tɛ a yɛ k'a masɔlɔn hali tuɲa den kelen tɛ a lɔ. A yi faɲa suu suu fɔla, wo yi ale gbu dajoo le le k'a masɔlɔn faɲafɔba le a le ani faɲafɔbalu fa.
[45] Kɛɛ do ǹ'i kɛla tuɲa fɔla mingɛ, wo le y'a kɛla, ài tɛ lala ǹ na.
[46] Jene y'ài lɔ, min yi se ǹ jo baliyala ka bɛn julumbu ko ma? Ni ǹe do yi kɛla tuɲa le fɔla ài yɛ, mindɛ lɔ ài tɛ lala ǹ na?
[47] Mɔɔ min yi Ala ta le, wo tii le y'a tolo malɔla Ala ya kumalu ma. Kɛɛ do àilu tɛ Ala ta le. Wo le y'a kɛla, ài tɛ ài tolo malɔla.»
[48] Jahudiya kundiilu k'a fɔ Isa yɛ, ai vɛɛ: «Mɔ n'a fɔla Samalika le i le, ani jinatɔ. Mɔ jo le wo lɔ, kɛlɛ?»
[49] Isa vɛɛ: «Jinatɔ tɛ ǹ ne. Ǹ'i ǹ Fa le buɲala, kɛɛ do àilu yi ǹ nafɛyala.
[50] Ǹ tɛ ǹe gbu ya buɲali kɔ, kɛɛ a dɔgbɛlɛ yi je min y'a kɔ. Ado kɛtɔ jo dila m̀ ma.
[51] Ǹ'i tuɲa fɔla ài yɛ, ni mɔɔ min vɛ ǹa kuma labatola, wo tii tɛnala sala feu.»
[52] Jahudiya kundiilu vɛɛ a yɛ: «Mɔ v'a lɔn butu k'a fɔ ko jina le i kɔ. Bema Ibulahima ka sa ani kelalu. Ile do y'a fɔla ko mɔɔ min v'i kuma labatola, wo tii tɛnala sala tuun.
[53] Ile buɲanin ne mɔ bema Ibulahima le min sanin, ni wo tɛ kela dɔgbɛlɛlu minnu gbazan sanin? I i jɛlɛ jatela jene le?»
[54] Isa vɛɛ: «Ni ǹ ka ǹe gbu buɲa, buɲali wo tɛ foi le. Ǹ Fa le yi m̀ buɲala, ài do y'a fɔla min ma ko ài Tii.
[55] Wo bɛ n'a kɛ, ài ma a lɔn, kɛɛ ǹe do k'a lɔn ne. Ni ǹ tɛɛ vɛ a fɔla m̀ ma a lɔn, ǹ tɛɛ kɛle ài ɲɔɔzii faɲafɔba dɔ le. Kɛɛ do ǹ ka a lɔn ne, ado ǹ aa kumalu labatola.
[56] Ài bema Ibulahima kɔnɔ ka diya baa Ala ka ǹ nalon jiya a la. A do ka a ye ka sawa.»
[57] Jahudiya kundiilu vɛɛ a yɛ: «Ɛɛ! I sɔlɔn ma san biloolu bɔ ba bene! Ile na Ibulahima yena di wo lɔ?»
[58] Isa vɛɛ ai yɛ: «Ǹ'i tuɲa fɔ ài yɛ, jani bema Ibulahima tɛɛ sɔlɔn, ǹ'i min ne, ǹ'i wo le le.»
[59] Ka bɛn kuma wo ma, ai vɛ kawakulunnu tala ko ai y'a bon. Kɛɛ Isa k'i doon ka bɔ lɔhɔlɔmabonba la ka taa.