Yohana 18
[1] Isa bannin wo fɔla, ale ni aa kɔbiladennu ka bɔ je ka taa Kedɔlɔn folon kɔma, gbele dɔ tɛɛ tɛɛ min ja. Ai do ka don gbele wo lɔ.
[2] A janvande Judasi gbazan tɛɛ ka wo ja lɔn k'a masɔlɔn Isa ni aa kɔbiladennu deinin tɛɛ ai ladɛnna je.
[3] Wo lɔ, a ka sɔdasi jama ta ani lakanaliba dɔlu minnu lɔnin tɛɛ salakalaseba kundii ni Falisilu bolo ka taa gbele wo lɔ. Fitina ni kalamɛnɛn ni kɛlɛkɛfennu tɛɛ ai bolo.
[4] Isa tɛɛ k'a lɔn ko minnu kɛtɔ kɛla a la. Wo lɔ, a k'i dɔɔni madon k'a fɔ ai yɛ, a vɛɛ: «Ài yi jene kɔ?»
[5] Ai vɛɛ: «Isa Nazalɛtika.» Wo lɔ, Isa vɛɛ: «Ǹe le.» Judasi min tɛɛ a janvande le, wo lɔnin tɛɛ ai fɛ je.
[6] Isa k'a fɔ ai yɛ mingɛ ko: «Ǹe le», wo lɔ ai ka taa ai kɔma k'ai ben duu ma.
[7] A do k'ai maɲininga kɔtunun, a vɛɛ: «Ài yi jene kɔ?» Ai do vɛɛ: «Isa Nazalɛtika.»
[8] A do vɛɛ: «M̀ m'a fɔ ai yɛ ǹ ko ǹe le? Ni ài yi ǹe le kɔ, ài yi kɛ́ minnu to je, ai yi taa.»
[9] Wo do ka kɛ sa Isa na kuma min fɔla, wo ma yi fa ko: «Ǹ Fa, i na mɔɔ minnu dila m̀ ma, hali ai lɔ kelen ma tunun m̀ bolo.»
[10] Wo k'a talan siyamifan dɔ tɛɛ Simɔn Piɛl bolo. A ka wo labɔ aa ɲaa lɔ ka salakalaseba kundii ya jɔn bolokinin tolo tɛɛ a la. Jɔn wo tɔɔ le tɛɛ ko Maakɔ.
[11] Isa do vɛɛ Piɛl yɛ: «Iya siyamifan don a ɲaa lɔ! Ǹ Fa na tɔlɔya min natɛɛla m̀ ma, ǹ'i m̀ banne wo lɔ?»
[12] Wo kɛnin, sɔdasilu ni aiya ɲamɔɔ ani Jahudiya kundiilu ya lakanalibalu, ai bɛ Isa mina ka a bolo sili.
[13] Ai ka taa a le Anasi fɛlɔ kunfɔlɔ le. Kayife min tɛɛ salakalaseba kundiiba le san wo la, Anasi tɛɛ wo bilankɛ le le.
[14] Kayife le tɛɛ ka Jahudiya kundiilu lali kɔlɔkɔlɔ le ko a fisayanin mɔɔ kelen yi faa mɔɔlu ya ko lɔ.
[15] Ai taatɔla Isa le, Simɔn Piɛl ni kɔbiladen dɔgbɛlɛ ka bila jama kɔ. Lɔnbaya tɛɛ kɔbiladen wo ni salakalaseba kundiiba wotɛ. Wo lɔ, jama senin salakalaseba kundiiba ya lu ma, a ka don Isa fɛ lu ma.
[16] Kɛɛ Piɛl ma don, fɔ k'i lɔ lu da la je. Wo lɔ, kɔbiladen min tɛɛ ka salakalaseba kundiiba lɔn, wo ka bɔ lu ma ka kuma bɔlidenmoso yɛ, min tɛɛ da lakanala. Wo kɛ, a ka don Piɛl le lu kɔnɔ.
[17] Piɛl dontɔla, bɔlidenmoso wo ka a maɲininga, a vɛɛ: «Ile gbazan tɛ kɛ́ wo ya kɔbiladen dɔ le, kɛlɛ?» Piɛl do vɛɛ: «Ɛnɛn, ǹe tɛ wo le.»
[18] Wo k'a talan nɛnɛ tɛɛ bɔla. Wo lɔ, bɔliden ni lakanalibalu ka taa bila kimi la, ai v'ai lɔla k'ai ja wo dafɛ. Piɛl gbazan lɔnin tɛɛ ai fɛ je a v'i jala.
[19] Wo waate lɔ, salakalaseba kundiiba tɛɛ Isa maɲiningala aa kɔbiladennu ma ani aa kalan.
[20] Isa do k'a javi, a vɛɛ: «Ǹ na kumala mɔɔ bɛ ɲana bala le lɔ. Ǹ na mɔɔlu kalanna Aladalibonnu la ani lɔhɔlɔmabonba la waate bɛ, Jahudiyalu y'ai ladɛnna dingila minnu lɔ. Ǹe do ma ko ko fɔ doon nɔ.
[21] Mindɛ lɔ i yi m̀ maɲiningala? Mɔɔ minnu na ǹa kuma mɛnna, i yi wolu le maɲininga. Ǹ na min fɔla yi ne, ai ka wo lɔn.»
[22] Wo fɔnin, lakanaliba dɔ ka to je ka Isa fɛɛ a tama lɔ. A do vɛɛ a yɛ: «I yi salakalaseba kundiiba le javila wo ɲa ma?»
[23] Isa do vɛɛ a yɛ: «Ni ǹ na koyon ne fɔla, i yi wo jiya mɔɔ bɛ la. Kɛɛ ni do ǹ jo le, mindɛ lɔ i yi m̀ gbasila?»
[24] Wo kɛnin, Anasi ka a silinin lataa salakalaseba kundiiba Kayife ma.
[25] Wo k'a talan Simɔn Piɛl lɔnin tɛɛ taa dafɛ a v'i jala. Mɔɔ dɔlu vɛɛ a yɛ wo lɔ: «Ile gbazan yi wo ya kɔbiladen dɔ le le, kɛlɛ?» A do m'i lɔ a la fɔ k'a fɔ, a vɛɛ: «Ɛnɛn, ǹe tɛ wo le dɛǃ»
[26] Piɛl tɛɛ ka kɛ́ min tolo tɛɛ a la, wo badenmakɛ dɔ tɛɛ je. Salakalaseba kundiiba ya jɔn dɔ le tɛɛ. Wo do vɛɛ Piɛl yɛ: «Ǹ na ile ni Isa yena gbele lɔ, kɛlɛ?»
[27] Piɛl m'i lɔ a lɔ kɔtunun. Ado donon ka kumun telemanin.
[28] Sɔɔma danin na, Jahudiya kundiilu ka bɔ Kayife ya lu ma ka taa Isa le Lɔmu jamanatii ya bon na. Kɛɛ ailu gbu ma don bon na, k'a masɔlɔn ai tɛɛ tɛ a fɛ ai la tɛɛ nɔɔ ka bɛn laana ma, fɔsa ai tɛɛ Timinkunna Selilon dɔnni kɛ.
[29] Wo lɔ, Pilati ka taa ai fɛlɔ kɛnɛma k'ai maɲininga, a vɛɛ: «A yi di? Ài yi kɛ́ min jalakila ko suu mindɛ lɔ?»
[30] Ai k'a javi, ai vɛɛ: «Kɛ́ min yi konyonkɛba le le. Ni wo tɛ, mɔ tɛɛ tɛ a don i bolo.»
[31] Pilati do vɛɛ ai yɛ: «Ài y'a mina ka taa a le. Àilu gbu yi taa ka aa kiti tɛɛ ka bɛn àiya seliya ma.» Jahudiya kundiilu k'a fɔ a yɛ wo lɔ, ai vɛɛ: «Ka kolatɔn kɛ faali boloma, wo ladaannin tɛ mɔ ma.»
[32] Wo ka kɛ fɔsa Isa ya kuma min ma tɛɛ fa, ka bɛn a na ale gbu faaɲa jiyala teme.
[33] Wo lɔ, Pilati ka don bon na kɔtunun ka Isa kili k'a maɲininga, a vɛɛ: «Ile le Jahudiyalu ya masakɛ le?»
[34] Isa k'a javi, a vɛɛ: «I na ko min fɔla yi ne, ile gbu miliya le wo le baa mɔɔ gbɛlɛ le na ǹa ko fɔla i yɛ?»
[35] Pilati do vɛɛ: «Jahudiya tɛ ǹ ne. Ile jɛlɛ sibolomaɲɔɔlu le nanin i le jan ani àiya salakalaseba kundiilu. I na ko suu mindɛ le kɛla?»
[36] Isa do vɛɛ a yɛ wo lɔ: «Ǹa masaya tɛ dunuɲa ta le. Ni wo tɛ, ǹa kɔbilabalu tɛɛ Jahudiya kundiilu kɛlɛle, sa ai tɛɛ tɛ se m̀ minala. Alalaa ǹa masaya ma bɔ dunuɲa jan nɔ.»
[37] Wo kɛ, Pilati vɛɛ a yɛ: «Jalasa i yi masakɛ le le wo lɔ?» Isa do vɛɛ: «Ile gbu vɛɛ ko ǹ'i masakɛ le le. Ǹ nanin dunuɲa tuɲa fɔ kan ne ma. Ǹ sɔlɔn kun ne wo le. Tuɲa diyanin mɔɔ min yɛ, wo tii y'a tolo malɔla ǹ na.»
[38] Wo lɔ, Pilati vɛɛ a yɛ: «Tuɲa yi ko suu mindɛ le?» Wo fɔnin, a ka taa Jahudiyalu fɛlɔ kɛnɛma kɔtunun. A do vɛɛ ai yɛ: «M̀ ma faa kun ye kɛ́ min na.
[39] Kɛɛ ka bɛn laana ma, ǹ deinin kasoden kelen ne bilala ài yɛ Timinkunna Selilon. Wo lɔ, ài y'a fɛ ǹ'i Jahudiyalu ya masakɛ le bila?»
[40] Wo lɔ, jama do vɛ gbanɔla a ma, ai vɛɛ: «Ɛnɛn dɛ, i kà wo bila. I yi Balabasi le bila!» Ado Balabasi tɛɛ benganikɛba le le.