Yohana 17
[1] Isa bannin kuma wolu fɔla, a k'a ɲa lajɛlɛ sanma, a vɛɛ: «Ǹ Fa, waate vɛ se. I yi ǹe i Den ya buɲali jiya, fɔsa ǹe gbazan y'iya buɲali jiya.
[2] Baa i vɛ ǹ nasii adamaden bɛ kunna, fɔsa i na mɔɔ minnu dila m̀ ma, ǹ'i nimaya banbali di wo bɛ ma.
[3] Nimaya banbali kɔlɔ le ne, ka ile Ala kelenpesa lɔn ani ka ǹe Masa Tɔɔmasenin Isa lɔn, i na min kelayala.
[4] I na baale min dila m̀ ma, m̀'ɛ ban wo bɛ dafala k'i ya buɲali jiya dunuɲa mɔɔlu la.
[5] Ǹ Fa, buɲali min tɛɛ m̀ bolo i fɛ jani dunuɲa yi dan, i yi wo suu di m̀ ma yi ne i ɲakɔlɔ.
[6] «I na mɔɔ minnu tala ka bɔ dunuɲa mɔɔlu tɛma k'ai di m̀ ma, m̀'ɛ iya ko jiya wolu la, sa ai y'i lɔn. Ai tɛɛ i ta le le, kɛɛ i na ai dila m̀ ma. Ai do v'iya kuma labato.
[7] Ani i na fen suu suu dila m̀ ma, ai k'a lɔn ne butu ko wo bɛ bɔnin ile le fɛ.
[8] K'a masɔlɔn i na kuma minnu fɔla ǹ yɛ, ǹ na wolu le lasena ai ma. Ai do k'ai bolo sii a kɔlɔ. Ai k'a lɔn ne feu ko m̀ bɔnin ile le fɛlɔ, ani ai limandeyanin k'a fɔ ko ile le na ǹ kelala.
[9] «Ǹ'i madailila ailu le yɛ. Ǹ tɛ i madailila dunuɲa mɔɔlu yɛ, mafɔ i na minnu dila m̀ ma k'a masɔlɔn i ta le ai le.
[10] Minnu yi m̀ bolo, i ta le wo bɛ le. Ani minnu y'ile gbazan bolo, ǹ ta le wo bɛ le. Ǹa buɲali la yi nkɛnɛmayala wolu le fɛ.
[11] Ǹ tɛnala tola dunuɲa yi ne. Ǹ taatɔle i fɛlɔ. Kɛɛ ailu totɔ dunuɲa. Lɔhɔlɔma Fa, i na tɔɔ min dila m̀ ma, i y'ai lakana tɔɔ fangama wo fɛ, sa ai yi kɛ kelen ne iwo ǹe ni ile yi kelen ne teme.
[12] Ka ǹ to ai fɛ, ǹ na ai lakanala i tɔɔ fangama le lɔ, i na tɔɔ kelen min dila m̀ ma. Ǹ na ai kunmafɛlɛnna, ado ai suu suu ma tunun, mafɔ halaki ko latɛɛnin tɛɛ mɔɔ min ma, fɔsa min sɛvɛnin kitabu kɔnɔ, wo ma yi fa.
[13] Ǹ taatɔ i fɛlɔ yi ne. Kɛɛ ǹ'i ko minnu fɔla dunuɲa, sa ǹa sawa suu yi kɛ ai yɛ a ɲa gbu gbu ma.
[14] Ǹ na iya kuma fɔla ai yɛ. Wo lɔ, ai gbeyanin dunuɲa mɔɔlu yɛ, baa ai fɛ tɛ ai la iwo ǹ fɛ tɛ dunuɲa mɔɔlu la teme.
[15] Ǹ t'i madalila k'a fɔ i y'ai bɔ dunuɲa, mafɔ i y'ai masutala Soɛtana le ma.
[16] Ai fɛ tɛ dunuɲa mɔɔlu la iwo ǹ fɛ tɛ dunuɲa mɔɔlu la teme.
[17] Ai kɛ i ta le k'ai lasɛnɛya iya kuma fɛ min yi tuɲa le.
[18] I na ǹ kelala dunuɲa teme, ǹ na ai kelala dunuɲa ten ne.
[19] Ǹ'i ǹ jɛlɛ dila i ma aiya ko lɔ lɔ, sa ailu gbazan y'ai jɛlɛ di i ma bɛlɛbɛlɛ kɛ.
[20] «Ǹ t'i madalila ailu kelen yɛ, mafɔ minnu gbazan kɛtɔ limandeyala m̀ ma ka bɛn aiya kuma ma,
[21] fɔsa ai bɛ yi kɛ kelen ne. Ǹ Fa, iwo ǹe ni ile kafonnin i ɲɔɔn kan teme, i y'a to ailu gbazan yi kafon mɔ kan ten, fɔsa dunuɲa mɔɔlu yi limandeya k'a fɔ ile na ǹ kelala.
[22] I na buɲali min dila m̀ ma, ǹ na wo suu le dila ai ma sa ai yi kɛ kelen ne iwo ǹe ni ile yi kelen ne teme.
[23] Ǹ kafonnin ai kan, ado ile ni ǹe kafonnin i ɲɔɔn kan, fɔsa ai gbu yi kɛ kelen ne feu, ani dunuɲa mɔɔlu y'a lɔn k'a fɔ ile na ǹ kelala ani i na ǹ kɔbiladennu kanula iwo i na ǹ kanula teme.
[24] «Ǹ Fa, ile na mɔɔ minnu dila m̀ ma. Ǹ taatɔ tɛɛ min ja, ǹ a fɛ ai yi kɛ ǹ fɛ wo ja sa ai yi ǹa buɲali ye, i na min dila m̀ ma, baa i na ǹ kanu yi na jani dunuɲa yi dan.
[25] «Ǹ Fa telentii, dunuɲa mɔɔlu m'i lɔn, kɛɛ ǹe do k'i lɔn. Ani ǹa kɔbiladennu gbazan k'a lɔn ile na ǹ kelala.
[26] Ǹ na ya ko jiyala ai la, ado ǹ totɔ a jiyala ai la fɔsa ai yi dɔlu kanu iwo i na ǹ kanula teme, ani sa ǹ kafonnin yi to ai kan.»