Yohana 12
[1] Timinkunna Selilon tɛɛ vɛ to tele wɔɔlɔ, wo lɔ Isa ka taa se Betani soni la ka don Lazali ya bon na, a na min nawulila ka bɔ saya lɔ.
[2] Ai do ka tiili ba kɛ a yɛ je. Maata le tɛɛ dɔnnifen siila ai kɛɛna. Lazali gbazan tɛɛ dɔnnikɛbalu tɛma.
[3] K'ai to wo la, Moyamu ka tulu sumadiyanin dɔ ta, min daa gbeleyanin tɛɛ kosɛvɛ. A vɛ wo munna Isa sen ma ka a matɛ a kunsi la. Tulu wo tɛɛ litili tala ɲɔɔn bɔle. A do suma ka bɔ fan bɛ lɔ bon na.
[4] Kɛɛ Isa ya kɔbiladen dɔ tɛɛ je min tɔɔ tɛɛ ko Judasi Sakaliyɔti, min kɛtɔ a janvala. Wo do vɛɛ:
[5] «Mindɛ lɔ tulu sumadiyanin min ma fele ka a wɔli di bolokolonnu ma? A tɛɛ san kelen sala ɲɔɔn bɔle!»
[6] Kɛɛ a do ma wo fɔ bolokolonnu hina ma. K'a masɔlɔn son ne tɛɛ a le, ani a deinin tɛɛ a dɔ dɔnna aiya wɔlɔ la min tɛɛ a bolo wɔlibilabɔlɔ lɔ.
[7] Wo lɔ, Isa vɛɛ a yɛ: «Moso min to je. A na tulu min nadalola ka bɛn ǹ sudoon lon ne ma.
[8] Bolokolonnu totɔ ài fɛ waate bɛ, kɛɛ do ǹe tɛnala tola ài fɛ kudein.»
[9] Jahudiyalu k'a mɛn mingɛ ko Isa vɛ taa Betani, ai siyama vɛ taala je. Ale kelen ya ko tɛɛ tɛ, mafɔ Lazali ya ko gbazan, a na min nawulila ka bɔ saya lɔ.
[10] Wo lɔ, salakalaseba kundiilu k'i kɔngɔn Lazali gbazan na ko k'a faa,
[11] k'a masɔlɔn Jahudiya siyama tɛɛ bɔla ai kɔ ka limandeya Isa ma ka bɛn aa lawulili ko ma.
[12] Wo kɛnɛbɔ lɔn, jama ba minnu nanin tɛɛ selibɔya lɔ Jelusalɛm, wolu k'a mɛn ko Isa yi nala yi ne.
[13] Wo lɔ, ai vɛ taala tamalo bululu le a labɛnya lɔ. Ai do vɛ ai kan nabɔla, ai vɛɛ: «Tanuli yi Ala yɛ! Min yi nala Mɔtii tɔɔ lɔ, duwawu yi wo tii yɛ! Duwawu yi Isilan masakɛ yɛ!»
[14] Isa ka sofalini bolan dɔ ye ka jɛlɛ wo kɔkan. Wo ka kɛ iwo a sɛvɛnin kitabu kɔnɔ teme ko:
[15] «Jɛlusakɛmkalu, ài kà siyan! A ye, àiya masakɛ yi nala, a do siinin sofalini bolan kɔkan.»
[16] Alalaa ko minnu timinnin yi ne, Isa ya kɔbiladennu ma wolu ɲaye ai kɛ waate. Kɛɛ a ka buɲali sɔlɔn mingɛ, ai hangili ka to a lɔ ko ko minnu sɛvɛnin kitabulu lɔ ka bɛn a ma, ko ai na wolu le kɛla a la yi ne.
[17] Jama min ka Isa ye Lazali kilila ka bɔ kabulu lɔ, wolu ka to seleya dila ka bɛn ko wo ma.
[18] Wo le k'a kɛ, jama ka na a labɛnya lɔ baa ai ka mɛn k'a fɔ ko ale le na kawanako wo kɛla.
[19] Wo lɔ, Falisilu k'a fɔ i ɲɔɔn yɛ, ai vɛɛ: «A ye! Mɔ tɛ foi ɲiala, baa mɔɔ bɛ bilanin a kɔ.»
[20] Mɔɔ minnu nanin tɛɛ selibɔya lɔ Ala bato ko lɔ, wo dɔlu tɛɛ Gɛlɛkika le le.
[21] Wo dɔlu le ka na Fele fɛlɔ, wo min bɔnin Betisaida so kɔnɔ Galile koovi lɔ. Ai do vɛɛ a yɛ: «Mɔ fa, m'a fɛ ka Isa ye.»
[22] Fele ka taa wo fɔ Andele yɛ. Ado ai mɔɔ fila ka taa wo fɔ Isa yɛ.
[23] Wo lɔ, Isa k'ai javi, a vɛɛ: «Waate vɛ se, Ala kɛtɔ ǹe Mɔɔnivin Tanin ya buɲali jiyala waate min.
[24] Ǹ'i tuɲa fɔ ài yɛ, ni malo kama kelen ma sɛnɛ duu lɔ ka tunun, ale kelen ne totɔ. Kɛɛ ni a ka tunun duu lɔ, a yi fɛlɛnne ka ɲia bɛlɛbɛlɛ kɛ.
[25] Wo le y'a ma, mɔɔ min ya nimaya diyanin a yɛ, wo tii bɔnɔtɔle a la. Kɛɛ do mɔɔ min ya dunuɲalɔtɛɛ gbeyanin a yɛ, wo tii kɛtɔ ɲimaya banbali le sɔlɔnna.
[26] Ni mɔɔ min a fɛ ka baale kɛ ǹ yɛ, fɔ wo tii yi bila ǹ kɔ. Ani m̀'ɛ kɛla tɛɛ min ja, ǹa bɔliden gbazan kɛtɔ je le. Ani mɔɔ min yi baale kɛla ǹ yɛ, ǹ Fa Ala kɛtɔ wo tii buɲala.»
[27] «Ǹ joso tɔlɔnin ne. Wo lɔ, ǹ'i mindɛ fɔ? Ǹ a fɔ, ǹ ko: ‹Ǹ Fa, i yi m̀ matanga ka bɔ tɔlɔya waate min ma?› Ɛnɛn, wo tɛ bɛn. Alalaa ǹ nanin dunuɲa tɔlɔya waate min ya ko lɔ.
[28] Ǹ Fa, i tɔɔ buɲa.» Wo fɔnin, kumakan dɔ ka bɔ sanma k'a fɔ, a vɛɛ: «M̀'ɛ ban a buɲala. Ǹe do kɛtɔ a buɲala kɔtunun.»
[29] Jama min ka to je ka mangan wo mɛn, a dɔlu vɛɛ wo lɔ: «Sanfɛlɛkan ne.» A dɔgbɛlɛlu vɛɛ: «Mɛlɛka dɔ le na kumala a fɛ.»
[30] Kɛɛ Isa k'ai javi, a vɛɛ: «Kumakan min ma bɔ ǹa ko lɔ, fɔ àiya ko.
[31] Kititɛɛ waate ve se dunuɲa, a do dunuɲa malaba gbɛntɔle waate min nɔ feu.
[32] Ni ǹe kɔni la ka jɛlɛ ka bɔ duu ma, ǹ kɛtɔ adamaden bɛ masamana ka lana m̀ ma.»
[33] Isa na min fɔla ka a faa ɲa le jiya.
[34] Jama vɛɛ a yɛ wo lɔ: «A sɛvɛnin seliya kitabulu lɔ ko Masa Tɔɔmasenin totɔ nimaya le lɔ kudein. Mɔ vɛ wo mɛn feu. Mindɛ lɔ ile y'a fɔla ko Mɔɔnivin Tanin ka kan ka jɛlɛ ka bɔ duukolo kan? Mɔɔnivin Tanin, wo yi jene le?»
[35] A do ka jama javi, a vɛɛ: «Kɛnɛya totɔ ài tɛma waateni bene. Ka kɛnɛya wo to ài tɛma, ài yi kɛ taamana sa divi kana don k'ài mina. Mɔɔ min yi taamana divi lɔ, wo tii ma a taaya lɔn.
[36] Ka kɛnɛya to ài tɛma, ài yi la a la sa ài yi kɛ kɛnɛya mamɔɔ le.» Isa bannin ko wolu fɔla, a ka bɔ je ka taa i doon ai ma.
[37] Kɛɛ hali a na kawanako tɔɔmase siyama min bɛ kɛla ai ɲana, ai do ma la a la,
[38] Wo ka kɛ fɔsa kuma min fɔnin kela Aizaiya bolo, wo ma yi fa ko: «Mɔtii, mɔ na kelaya kuma min fɔla, jene vɛ diɲa ka limandeya wo ma? I v'i foniseleya jiya jene la?»
[39] Wo le y'a ma, ai ma se limandeyala, baa kela Aizaiya k'a fɔ kɔtunun, a vɛɛ:
[40] «Ala vɛ ai ɲa gbɛ ani k'ai hangili gbeleya, sa ai ɲa kana yeni kɛ, ani ai hangili kana ko ɲaye, fɔsa ai kana ai jɛlɛ lasei m̀ ma sa ǹ ai lakisi.›»
[41] Kela Aizaiya ka min fɔ baa Ala ka Isa ya buɲali jiya a la. A do ka kuma ka bɛn a ma.
[42] Alalaa Jahudiya kundii siyama limandeyanin tɛɛ a ma. Kɛɛ ai ma ai lɔ wo la baa ai tɛɛ siyanna Falisilu ɲa, fɔsa ai kana ai labɔ Aladalibon na.
[43] K'a masɔlɔn adamadennu ya matɔɔli le diyanin tɛɛ ai yɛ ka timin Ala ta la.
[44] Isa do ka a kan nabɔ, a vɛɛ: «Ni mɔɔ min ka limandeya ǹe ma, wo tii ma limandeya ǹe kelen ma, fɔ ǹe ni ǹ kelaba.
[45] Ni do mɔɔ min ka ǹ ye, wo vɛ ǹ kelaba gbazan ye.
[46] Ǹ nanin dunuɲa iwo kɛnɛya, sa m̀ malimandeyamɔɔlu kana to divi lɔ butu.
[47] Ni mɔɔ min ka ǹa kuma mɛn kɛɛ a ma a mina, ǹ tɛnala wo tii jalakila. Baa m̀ ma na dunuɲa mɔɔlu jalaki ko lɔ, fɔ k'ai lakisi.
[48] Ni mɔɔ min k'i ban ǹ nɔ, a do ma ǹa kuma mina, ko dɔ yi je min kɛtɔ wo tii jalakila. Ǹ na kuma min fɔla, wo le kɛtɔ a jalakila dunuɲa laban lon.
[49] K'a masɔlɔn m̀ ma kuma ǹe gbu ya setiiya lɔ. Ǹ Fa Ala min na ǹ kelala, wo le na ǹ jamalila ko ǹ'i min nase.
[50] Ani ǹ k'a lɔn nimaya banbali yi sɔlɔnna aa jamali le fɛ. Wo lɔ, ǹ'i ko minnu lasena iwo ǹ Fa n'a fɔla ǹ yɛ teme.»