Yohana 14
[1] Isa vɛɛ aa kɔbiladennu yɛ: «Ài joso kà tɔlɔ. Ài yi limandeya Ala ma ka limandeya ǹe gbazan ma.
[2] Siiya walanin ne ǹ Fa aa bon na. Ni a tɛ ten, ǹ tɛɛ a fɔle ài yɛ. Ǹ taatɔ dingila lɔbɛnna ài yɛ je.
[3] M̀'ɛ taala dingila lɔbɛnna ài yɛ, ǹ seikɔtɔ ka na ài ta ka taa ài le, sa ǹ'i tɛɛ min ja, àilu gbazan yi kɛ wo ja.
[4] Ǹ taatɔ tɛɛ min ja yi ne, ài ka wo siya lɔn.»
[5] Tomasi do vɛɛ a yɛ: «Fanma, mɔ m'i taaya lɔn. M'i se siya lɔnna di wo lɔ?»
[6] Isa do vɛɛ a yɛ: «Ǹe le siya le, ani tuɲa, ani nimaya. Mɔɔ suu suu tɛ se taala ǹ Fa fɛlɔ ni a ma timin ǹe fɛ.
[7] Ni ài tɛɛ ka ǹ lɔn, ài tɛɛ ǹ Fa gbazan lɔnne. Kɛɛ k'a ta bi ma ài ka a lɔn, ài do v'a ye gbazan.»
[8] Fele vɛɛ a yɛ: «Fanma, i i Fa jiya mɔ la, wo yi mɔ wasale.»
[9] Isa do vɛɛ a yɛ: «Fele, bi ma m̀ bila ài fɛ. I ma ǹ lɔn ba bene? Mɔɔ min vɛ ǹ yena, wo tii vɛ ǹ Fa ye. Kɛɛ mindɛ kɛnin i vɛɛ ko fɔ ǹ'i ǹ Fa jiya ài la?
[10] I ma limandeya ba bene k'a fɔ ǹ kafonnin ǹ Fa kan, a do kafonnin ǹ kan? Ǹ'i kuma minnu fɔla ài yɛ yi ne, wolu ma bɔ ǹe gbu lɔ, mafɔ ǹ Fa min kafonnin ǹ kan, wo y'aa baale kɛla ten ne.
[11] Ài yi la ǹ na k'a fɔ ǹ kafonnin ǹ Fa kan, a do kafonnin ǹ kan. Ni ài ma la ǹa kumalu ma, ài yi la ǹa kawanako gbu gbu la.
[12] Ǹ'i tuɲa fɔ ài yɛ, mɔɔ min vɛ limandeyala m̀ ma, wo tii kɛtɔ ǹ kɛkolu suu kɛla. A do kɛtɔ a dɔlu kɛla minnu buɲanin ǹ ta le, baa ǹ taatɔle ǹ Fa fɛlɔ.
[13] Ài vɛ fen suu suu madalila ǹ tɔɔ lɔ, ǹ kɛtɔ wo kɛla, sa ǹ Fa ya buɲali yi jiya ǹe a Den fɛ.
[14] Ài do vɛ fen suu suu madalila ǹ tɔɔ lɔ, ǹ kɛtɔ wo kɛla.»
[15] Isa vɛɛ kɔtunun: «Ni ǹ diyani ka kɛ ài yɛ, ài kɛtɔ ǹa kumalu minala.
[16] Ani ǹ kɛtɔ ǹ Fa madalila. Wo vɛ kɛla, a kɛtɔ Lailiba gbɛlɛ dila ài ma, min totɔ ài fɛ kudein.
[17] Lailiba wo yi Lɔhɔlɔma Fɔɲɛ le le, min yi tuɲa lankɛnɛmayala ka bɛn Ala ma. Dunuɲa mɔɔlu tɛ se wo sɔlɔnna, baa ai tɛ a yena, kumatɛ k'a lɔn. Kɛɛ ài ka a lɔn k'a masɔlɔn a ài fɛ, ani a do kɛtɔ ài josokun nɔ.
[18] Ǹ tɛnala àilu kelen tola iwo faiyani. Ǹ natɔ ài ma kɔtunun.
[19] A lɔ tɛnala mɛnna, dunuɲa mɔɔlu tɛnala ǹ yena butu. Kɛɛ ài kɛtɔ ǹ yena kɔtunun. Ǹ totɔ nimaya lɔ, wo le kɛtɔ a kɛla, àilu gbazan totɔ nimaya lɔ.
[20] Wo lon ne, ài kɛtɔ a lɔnna k'a fɔ ǹ kafonnin ǹ Fa kan, ado ǹe ni àilu gbazan kafonnin i ɲɔɔn kan.
[21] Alalaa mɔɔ min yi ǹa kumalu minala ka ǹa siya taama, wo tii le yi ǹ kanula. Ani mɔɔ min vɛ ǹ kanula, ǹ Fa kɛtɔ wo tii le kanula. Ǹe gbazan kɛtɔ a kanula ka ǹ jɛlɛ jiya a la.»
[22] Aa kɔbiladen dɔ tɛɛ je, min tɔɔ yi ko Judasi. Ale ni Judasi Sakaliyɔti tɛ kelen ne. Wo do vɛɛ a yɛ: «Fanma, i kɛtɔ i jɛlɛ jiyala mɔ la di wo lɔ ka dunuɲa mɔɔ tɔlu to je?»
[23] Isa k'a javi, a vɛɛ: «Ni mɔɔ min vɛ ǹ kanula, wo tii kɛtɔ ǹa kuma labatola, ani ǹ Fa gbazan kɛtɔ a kanula. Ǹe ni ǹ Fa kɛtɔ nala a ma ka to a fɛ.
[24] Ni mɔɔ min do ma ǹ kanu, wo tii tɛnala ǹa kuma labatola. Ǹ'i min kuma fɔla ài yɛ yi ne, wo ma bɔ ǹe gbu lɔ, fɔ ǹ Fa min na ǹ kelala.
[25] Ǹ na ko min bɛ fɔla ài yɛ ka ǹ to ài fɛ bene.
[26] Kɛɛ ǹ Fa kɛtɔ Lailiba lanala ǹ tɔɔ lɔ, min yi Lɔhɔlɔma Fɔɲɛ le. A do kɛtɔ ài kalanna ko bɛ la. Ǹ na ko minnu fɔla ài yɛ, a kɛtɔ ài hangili bilala wo bɛ lɔ.
[27] Ǹ'i josolajii le tola ài bolo. Ǹ josolajiinin teme, ǹe kɛtɔ wo suu le dila ài ma. Mɔɔlu yi josolajii min sɔlɔnna dunuɲa, wo ni ǹ ta tɛ kelen ne. Ài joso kà tɔlɔ. Ài do kà siyan.
[28] Ài v'a mɛn ǹ da ko ǹ taatɔle, kɛɛ do ǹ kɛtɔ seikɔla ài ma. Ni ài tɛɛ vɛ ǹ kanula, ài tɛɛ sawale ǹ taa ko lɔ k'a masɔlɔn ǹ taatɔ ǹ Fa le fɛlɔ. Baa ale le buɲanin ǹ ne.
[29] Ani ǹ n'a fɔla ài yɛ jani a yi kɛ, sa wo vɛ kɛla waate min nɔ, ài yi limandeya.
[30] Ǹ tɛnala mɛnna kumala ài fɛ bubale k'a masɔlɔn dunuɲa malaba yi nala ǹ kanma. A do tɛ se foi le kɛla ǹ na.
[31] Kɛɛ fɔ dunuɲa mɔɔlu y'a lɔn k'a fɔ ko ǹ'i ǹ Fa kanuna. Wo le y'a kɛla, ǹ'i ko bɛ kɛla iwo a na ǹ lɔla teme. Ài yi wuli, m'i bɔ jan.»