Yohana 9
[1] Ka Isa timintɔ to, a ka kɛ́ dɔ ye, min ɲagbɛnin tɛɛ k'a ta a sɔlɔn ma.
[2] Wo lɔ, aa kɔbiladennu ka a maɲininga, ai vɛɛ: «Kalanmɔɔ, jene ya julumbu kɛnin sabu le, kɛ́ min sɔlɔnnin ɲagbɛya lɔ? Ale jɛlɛ ta baa a sɔlɔnbalu?»
[3] Isa k'ai javi, a vɛɛ: «Kɛ́ min ya julumbu sabu tɛ, ni wo tɛ a sɔlɔnbalu ta. Min kɛnin ne fɔsa Ala ya foniseleya la yi nkɛnɛmaya a fɛ.
[4] Ni tele le lɔ yi, fɔ m'i kɛ ǹ kelaba ya baale le la. Su kotɔle, ado mɔɔ tɛ se baale kɛla wo lɔ.
[5] Ni kɔni ǹ'i dunuɲa jan ne, ǹe le kɛnɛya le dunuɲa mɔɔlu yɛ.»
[6] Wo fɔnin, a ka a daji bɔn duu ma ka wo kɛ bɔɔ le ka a sisa ɲagbɛ ɲa kɔkan.
[7] A do vɛɛ a yɛ: «Taa i ɲa lako Silom ji diɲa lɔ.» Silom kɔlɔ le ko keladen. Kɛ́ do ka taa a ɲa lako je ka seikɔ lu ma k'a talan a yi yeni kɛla.
[8] A siiɲɔɔ ni minnu deinnin tɛɛ a siinin yena dailila, wolu vɛɛ: «Ɛɛ! Kɛ́ min siinin tɛɛ dailila, wo le ne?»
[9] A dɔlu vɛɛ: «Wo le kɛ.» A dɔgbɛlɛlu vɛɛ: «Ale tɛ, kɛɛ a bɔnin a la.» Kɛɛ ale gbu ka to a fɔla, a vɛɛ: «Ǹe le jɔ!»
[10] Ai k'a maɲininga, ai vɛɛ: «I ɲa la na kala di wo lɔ?»
[11] A k'ai javi, a vɛɛ: «Kɛ́ min tɔɔ yi ko Isa, wo le na bɔɔ ladanna ka a sisa ǹ ɲa kɔkan, ko ǹ'i taa ǹ ɲa lako Silom ji diɲa lɔ. Ǹ na taala ǹ ɲa lakola mingɛ, ǹ ɲa la na kala.»
[12] Ai ka a maɲininga, ai vɛɛ: «Kɛ́ wo yi min ne?» A vɛɛ: «M̀ ma a dingila lɔn.»
[13] Ai ka taa ɲagbɛtɔ kɔlɔ wo le Falisilu fɛ.
[14] Isa tɛɛ ka bɔɔ ladan ka a ɲa laka lon min, wo ka kɛ Nɔningɛlon dɔ le.
[15] Wo lɔ, Falisilu gbazan ka kɛ́ maɲininga a ɲa laka ko ma, ai vɛɛ: «I ɲa la na kala di?» A k'ai javi, a vɛɛ: «A na bɔɔ le sisala ǹ ɲa kɔkan. Wo kɔ, ǹ ka taa ǹ ɲa lako. Ado ǹ'i yeni kɛla butu.»
[16] Falisi dɔlu vɛɛ: «Kɛ́ min ma bɔ Ala fɛlɔ baa a tɛ Nɔningɛlon buɲala.» Kɛɛ dɔlu vɛɛ: «Ni a ka kɛ julumbutɔ le, a yi se ko suu min kɛla di?» Wo lɔ, ai ka falan a ma.
[17] Ai ka ɲagbɛtɔ kɔlɔ maɲininga kɔtunun, ai vɛɛ: «I bolo di ka bɛn a ma, baa ale le na i ɲa lakala?» A k'ai javi, a vɛɛ: «Kela le a le.»
[18] Kɛɛ Jahudiya kundiilu ma la a la feu k'a fɔ kɛ́ min yi yeni kɛla ne, wo sɔlɔnnin tɛɛ ɲagbɛya le lɔ. Wo le k'a kɛ, ai ka a sɔlɔnbalu kili
[19] ka ɲiningali kɛ ai la, ai vɛɛ: «Ài den ne min ne, ài n'a fɔla min ma ko a sɔlɔnnin ɲagbɛya le lɔ? A do yi yeni kɛla di ngɛ butu?»
[20] Kɛ́ sɔlɔnbalu k'ai javi, ai vɛɛ: «Mɔ k'a lɔn mɔ den ne min ne. A do sɔlɔnnin tɛɛ ɲagbɛya le lɔ.
[21] Kɛɛ ko min n'a kɛla a yi yeni kɛla butu, mɔ ma wo lɔn. Mɔɔ min na a ɲa lakala, mɔ do wo tii lɔn. Ài y'ale gbu maɲininga. A tɛ dennin ne butu. A yi sene a ɲafɔla.»
[22] Kɛ́ sɔlɔnbalu ka javili kɛ ten k'a masɔlɔn ai tɛɛ siyanna Jahudiya kundiilu ɲa. Baa wolu tɛɛ vɛ bɛn a ma ko ni mɔɔ mɔɔ k'i lɔ a la k'a fɔ ko Isa le yi Masa Tɔɔmasenin ne le, ko ai kɛtɔ wo tii gbɛnna aiya Aladalibon na.
[23] Wo lɔ, kɛ́ sɔlɔnbalu vɛɛ: «Ài y'ale gbu maɲininga. A tɛ dennin ne butu.»
[24] Kɛ́ min sɔlɔnnin tɛɛ ɲagbɛya lɔ, ai ka a kili kɔtunun k'a fɔ a yɛ, ai vɛɛ: «I i kalin Ala la ko i kɛtɔ tuɲa fɔla. Alalaa mɔ k'a lɔn k'a fɔ ko kɛ́ wo yi julumbutɔ le.»
[25] Kɛ́ vɛɛ: «Ni julumbutɔ le ni wo tɛ ni julumbutɔ tɛ, m̀ ma wo lɔn. Kɛɛ ǹ ka ko kelen ne lɔn. Ǹ ɲa le gbɛnin tɛɛ, kɛɛ ǹ'i yeni kɛla butu.»
[26] Ai k'a maɲininga, ai vɛɛ: «A na mindɛ kɛla i la? A n'i ɲa lakala di?»
[27] Kɛ́ vɛɛ: «M̀'ɛ ban wo fɔla ài yɛ. Kɛɛ ài do ma ài tolo malɔ ǹ na. Mindɛ lɔ ài y'a fɛ k'a mɛn kɔtunun? A yi di? Àilu gbu a fɛ ka kɛ aa kɔbiladen ne?»
[28] Wo fɔ, ai vɛ a jɛvɛla, ai vɛɛ: «I yi kɛ́ wo ya kɔbiladen ne le, kɛɛ ǹu do yi kela Musa ya kɔbiladen ne le.
[29] Mɔ k'a lɔn Ala na kumala kela Musa yɛ. Kɛ́ wo kɔni, hali mɔ ma a bɔya lɔn.»
[30] Kɛ́ do vɛɛ: «Min ko yi ǹ tɛɛnɛɛ yi la k'a fɔ ài ma kɛ́ wo bɔya lɔn, ale min na ǹ ɲa lakala.
[31] Mɔ k'a lɔn Ala tɛ julumbutɔ ya madaili minala. Kɛɛ ni mɔɔ min y'a batola k'a sawo kɛ, Ala yi wo ya madaili le minala.
[32] K'a ta dunuɲa dan ma, mɔɔ m'a mɛn ba bene ko mɔɔ dɔ vɛ ɲagbɛ ɲa laka, min sɔlɔnnin tɛɛ ɲagbɛya lɔ.
[33] Ni kɛ́ min tɛɛ ma bɔ Ala fɛlɔ, a tɛɛ tɛ se wo suu kɛla.»
[34] Falisilu vɛɛ a yɛ: «Ile min buɲanin julumbu lɔ k'a dan naban, i y'a fɛ ka mɔ kalan yi ne?» Ai do ka a gbɛn Aladalibon na.
[35] Isa k'a mɛn ko ai vɛ a gbɛn. Wo lɔ, a k'a ɲinin k'a maɲininga, a vɛɛ: «I limandeyanin Mɔɔnivin Tanin ma?»
[36] A do ka Isa javi, a vɛɛ: «Ǹ fa, jene yi wo le? I y'a jiya ǹ na sa ǹ'i limandeya a ma.»
[37] Isa vɛɛ: «I ɲa vɛ la a kan. Ale le yi kumala i fɛ yi ne.»
[38] Kɛ́ vɛɛ: «Fanma, m̀'ɛ limandeya.» A do k'i mabilin Isa kɔlɔ ka a bato.
[39] Isa vɛɛ: «Ǹ nanin dunuɲa kititɛɛ ko lɔ fɔsa ɲagbɛlu yi ɲa la yi ka, ani minnu vɛɛ ko ai yi yeni kɛla, wolu ɲa yi gbɛ.»
[40] Falisi minnu min tɛɛ a dafɛ je, wo dɔlu ka kuma wo mɛn k'a maɲininga, ai vɛɛ: «A yi di? Ǹu gbazan yi ɲagbɛ le le?»
[41] Isa vɛɛ ai yɛ: «Ni ài tɛɛ kɛ ɲagbɛ le, ài tɛɛ tɛnala kɛla hakɛtaba le. Kɛɛ ài vɛɛ ko ài yi yeni kɛla. Wo le n'a kɛla, hakɛ y'ài ma hali bi.»