<Yohana 3

[1] Kɛ́ dɔ tɛɛ je, min tɔɔ yi ko Nikodemɔ. A fɛ tɛɛ Jahudiya diina kundiiya dɔ la, ai y'a fɔla min ma ko Falisi.

[2] A ka taa Isa fɛlɔ su lɔ k'a fɔ a yɛ, a vɛɛ: «Kalanmɔɔ, mɔ k'a lɔn Ala le na i kelayala ka na mɔ kalan k'a masɔlɔn i yi kawanako tɔɔmase minnu kɛla, mɔɔ suu suu tɛ se wo ɲɔɔn kɛla fɔ Ala vɛ kɛla min fɛ.»

[3] Isa k'a javi, a vɛɛ: «Ǹ'i tuɲa fɔ i yɛ, ni mɔɔ ma sɔlɔn kula kɛ, a tɛ se donna Ala ya masaya kɔlɔ.»

[4] Nikodemɔ vɛɛ: «Haan! Mɔɔ vɛ kɔlɔyala, a yi se sɔlɔnna kula kɛ ɲa mindɛ ma? A yi sene seikɔla a ba kɔnɔ ka sɔlɔn kula le?»

[5] Isa vɛɛ: «Ǹ'i tuɲa fɔ i yɛ, ni mɔɔ ma sɔlɔn kula kɛ ji ni Lɔhɔlɔma Fɔɲɛ bolo, a tɛ se donna Ala ya masaya kɔlɔ.

[6] Falikolo yi falikolo le sɔlɔnna, kɛɛ mɔɔlu yi nimaya kula le sɔlɔnna Lɔhɔlɔma Fɔɲɛ bolo.

[7] I kà kawakoya baa ǹ n'a fɔla i yɛ, ǹ ko fɔ ài bɛ yi sɔlɔn kula kɛ.

[8] Tɛɛ min diyanin fɔɲɛ yɛ, a yi bɔla wo ja le. I y'a mangan le mɛnna, kɛɛ i ma a bɔya lɔn, ni wo tɛ a taaya. Mɔɔ minnu sɔlɔnnin Lɔhɔlɔma Fɔɲɛ bolo, wolu kɛnin ten ne.»

[9] Nikodemɔ do k'a maɲininga, a vɛɛ: «Ko wolu yi se kɛla di?»

[10] Isa k'a javi, a vɛɛ: «Ile min yi Isilanmɔɔlu ya kalanmɔɔ ba le, i ma ko minnu lɔn?

[11] Ǹ'i tuɲa fɔ i yɛ, mɔ ka min lɔn, m'i wo le fɔla. Mɔ do vɛ min ye, m'i wo le seleya dila. Kɛɛ ài t'a fɛ ka diɲa maa seleya ma.

[12] Ǹ na dunuɲa kolu fɔla ài yɛ, ài do ma la wo la. Ni ǹ ka haijɛnɛ kolu fɔ ài yɛ do? Ài yi lale wo la di?

[13] Mɔɔ mɔɔ ma jɛlɛ ba ka taa haijɛnɛ bene fɔ ǹe Mɔɔnivin Tanin, min jiinin ka bɔ je.

[14] Iwo kela Musa na sa sawula lajɛlɛla kɔlɔman ma fuwa lɔ teme, fɔ ǹe Mɔɔnivin Tanin gbazan la yi jɛlɛ ten ne,

[15] fɔsa ni mɔɔ mɔɔ vɛ limandeyala m̀ ma, wo tii yi nimaya banbali sɔlɔn.

[16] Baa Ala na dunuɲa mɔɔlu kanula boloɲa min ne ma, a ka a den kelenpesa kela, sa ni mɔɔ mɔɔ vɛ limandeyala a ma, wo tii tɛ halaki, fɔ a ka nimaya banbali sɔlɔn.

[17] Baa Ala ma a Den kela dunuɲa lɔ ka mɔɔlu jalaki, fɔ ka dunuɲa mɔɔlu lakisi a fɛ.

[18] Ni mɔɔ min vɛ limandeyala a ma, jalakili tɛ wo ma butu. Kɛɛ mɔɔ min do ma limandeya a ma, wo tii vɛ ban jalakila. K'a masɔlɔn a ma limandeya Ala Den kelenpesa ma.

[19] Wo jalakili kun ne ne: Ala ya kɛnɛya vɛ na dunuɲa, kɛɛ divi le diyanin mɔɔlu yɛ ka timin kɛnɛya la, k'a masɔlɔn ai kɛkolu le kɛwonyanin.

[20] Mɔɔ min yi koyonnu kɛla, kɛnɛya diyanin tɛ wo tii yɛ feu. A do tɛ diɲa kɛnɛya yi bɔ a ma, sa aa koyonnu la kana nkɛnɛmaya.

[21] Kɛɛ mɔɔ min do yi kobɛlɛlu kɛla, wo tii yi diɲale kɛnɛya yi bɔ a ma, sa a kɛkolu la yi nkɛnɛmaya mɔɔlu ɲakɔlɔ, ani ai y'a lɔn k'a fɔ a yi Ala siya kan.»

[22] Wo timinnin kɔ, Isa ni aa kɔbiladennu ka taa Jude koovi lɔ. A do ka to ai fɛ je ka to mɔɔlu makola kɔɔ kɔlɔ.

[23] Yaya gbazan tɛɛ mɔɔlu makola Enɔn, Salim so dafɛ, k'a masɔlɔn ji siyama tɛɛ wo ja. Mɔɔlu tɛɛ nala Yaya ma ko a ai mako.

[24] Wo waate, Yaya tɛɛ ma bila ba kaso la bene.

[25] Lon dɔ, sɔsɔyali dɔ k'i wuli Yaya ya kɔbiladen dɔlu ni Jahudiya kɛ́ dɔ wotɛ ka bɛn diina ya sɛnɛya laana ma.

[26] Ai do ka taa Yaya fɛlɔ k'a fɔ a yɛ, ai vɛɛ: «Kalanmɔɔ, ile ni kɛ́ min tɛɛ i ɲɔɔn fɛ Jɔdan kɔɔ kɔma, i na kumala min ya ko ma kɔni: a ye, a yi mɔɔlu makola butu. Bɛ yi taala a kɔ.»

[27] Yaya k'ai javi, a vɛɛ: «Mɔɔ tɛ se fen fen sɔlɔnna ni Ala ma min di i ma.

[28] Ǹ n'a fɔla, ǹ ko ǹ tɛ Masa Tɔɔmasenin ne. Ala na ǹ lɔla ka siya lɔbɛn a ɲa dein. Àilu gbu le m̀ masele le wo lɔ.

[29] Kɔɲɛmoso yi kɔɲɛfa le bolo. Kɛɛ kɔɲɛfa tɔva lɔnin a a tolo malɔla a la. A do vɛ kɔɲɛfa kumakan mɛnna, a yi sawale kosɛvɛ. Ǹa sawa walanin ne ten ne, fɔɔ ka dafa.

[30] Fɔ ale yi buɲa, ǹe yi dɔɔya.

[31] K'a masɔlɔn mɔɔ min bɔnin Ala fɛlɔ, wo tii le buɲanin mɔɔ bɛ le feu. Kɛɛ mɔɔ min sɔlɔnnin dunuɲa, wo yi dunuɲa ta le le, wo do yi dunuɲa kolu le fɔla. Min do bɔnin haijɛnɛ, wo tii le buɲanin mɔɔ bɛ le.

[32] A na min yena ani ka min mɛn, a yi wo le seleya dila. Kɛɛ mɔɔlu tɛ lala aa seleya la.

[33] Ni mɔɔ min do ka la aa seleya la, wo tii y'a jiyale ko Ala yi tuɲande le le.

[34] Ala na min kelala, wo le yi Ala aa kuma lasena, baa Ala yi Lɔhɔlɔma Fɔɲɛ dila a ma jobojaba.

[35] Va Ala y'a Den kanula. A do vɛ fen bɛ bila a fanga kɔlɔ.

[36] Mɔɔ min vɛ limandeya a Den ma, nimaya banbali yi wo tii le bolo. Kɛɛ ni mɔɔ min k'i ban a Den nɔ, wo tii tɛnala nimaya sɔlɔnna, fɔ a ka to Ala ya mɔnɛya kɔlɔ.»