<Yohana 21

[1] Ko wolu timinnin kɔ, Isa ka a jɛlɛ jiya aa kɔbiladennu la kɔtunun Tibɛliya kɔɔ dala. A na a jɛlɛ jiyala teme, wo le ne.

[2] Aa kɔbiladen dɔlu ladɛnnin tɛɛ dingila kelen nɔ. Ado minnu tɛɛ je, wolu le ne: Simɔn Piɛl, Tomasi (ai y'a fɔla min ma ko Mɔɔ Fila), Nataɲɛ min tɛɛ bɔla Kana so kɔnɔ Galile koovi lɔ, Zebede denkɛ fila, ani kɔbiladen mɔɔ fila gbɛlɛ.

[3] Ado Simɔn Piɛl k'a fɔ ai yɛ, a vɛɛ: «Ǹ taatɔ jɛɛ minaya lɔ.» Ai k'a javi, ai vɛɛ: «M'i taa i madɛmɛn.» Wo lɔ, ai bɛ ka don kulun kɔnɔ ka taa kɔɔ kɔkan. Ai do ka su bɛ kɛ, kɛɛ ai ma jɛɛ mina.

[4] Kɛnɛ bɔnin, Isa lɔnin ka to kɔɔ kawun na, kɛɛ aa kɔbiladennu ka fili a ma.

[5] Wo lɔ, Isa vɛɛ ai yɛ: «Ǹ tɔvalu, ài vɛ jɛɛ dɔ mina?» Ai vɛɛ: «Mɔ ma fen fen mina.»

[6] Isa do vɛɛ: «Ài yi jɔ lafili kulun bolokinin fan nɔ, ài kɛtɔ a dɔ minala.» Wo lɔ, ai ka jɔ lafili, kɛɛ ai ma se a samana butu ka bɔ kɔɔ lɔ, ka bɛn jɛɛ ya wala ma.

[7] Kɔbiladen min diyanin tɛɛ Isa yɛ, wo vɛɛ Piɛl yɛ: «Fanma le ve!» Piɛl k'a mɛn mingɛ ko Fanma Isa le, a ka faaniba sili a tɛma k'a masɔlɔn a tɛɛ vɛ a bɔ baale ko lɔ. Wo kɛ, a k'i gban ka bɔ kulun nɔ ka jii kɔɔ lɔ, a v'i nɛɛla.

[8] Kɔbiladen tɔlu majaannin tɛɛ tɛ gbelema la, fɔ mɛtɛlɛ kɛmɛ ɲɔɔn. Wo lɔ, ai vɛ nala kulun nɔ ka jɔ sama, min lafanin tɛɛ jɛɛ la.

[9] Ai ka bɔ kulun nɔ mingɛ kawun na, ai ka taa bilanin ye, jɛɛ siinin tɛɛ a la. Ani bulu gbazan tɛɛ je.

[10] Wo kɛ, Isa vɛɛ ai yɛ: «Ài na jɛɛ min minala, ài yi na wo dɔ le jan.»

[11] Wo lɔ, Simɔn Piɛl ka don kulun kɔnɔ ka jɔ sama ka na a le kawun na. A do lafanin tɛɛ jɛɛ ba balu la. Wo bɛ ladɛnnin ka kɛ jɛɛ kɛmɛ ni biloolu ni sawa le. Kɛɛ jɛɛ ni a wala bɛ, jɔ lɔ ma fala.

[12] Wo kɛ, Isa vɛɛ ai yɛ: «Ài na m'i dabɔ dɔn.» Kɛɛ kɔbiladen wo suu suu ma a wakali ka a maɲininga k'a fɔ ko jene y'a le, baa ai tɛɛ k'a lɔn ko Fanma Isa le.

[13] Wo kɔ, Isa ka taa bulu ni jɛɛ dɔ ta ka a di ai ma.

[14] Min ka kɛ a siɲa sawana le le, Isa do tɛɛ a jɛlɛ jiyala aa kɔbiladennu la, a wulinin kɔ ka bɔ saya lɔ.

[15] Ai bannin dabɔla, Isa k'a fɔ Simɔn Piɛl yɛ, a vɛɛ: «Yaya den Simɔn, ǹ diyanin i yɛ teme, jalasa ǹ diyanin ne i yɛ ka timin dɔ minnu la?» Piɛl k'a javi, a vɛɛ: «Aan, Fanma! I k'a lɔn i diyanin ǹ yɛ.» Isa do vɛɛ a yɛ: «I i jando ǹa saadennu lɔ.»

[16] A do k'a fɔ a yɛ a siɲa filana lɔ, a vɛɛ: «Yaya den Simɔn, ǹ diyanin i yɛ?» Piɛl k'a javi, a vɛɛ: «Aan, Fanma. I k'a lɔn i diyanin ǹ yɛ.» Isa do vɛɛ a yɛ: «I yi ǹa saalu kunmafɛlɛn.»

[17] A do k'a fɔ a yɛ a siɲa sawana lɔ, a vɛɛ: «Yaya den Simɔn, ǹ diyanin i yɛ?» Piɛl ninna ka fin wo lɔ baa Isa tɛɛ vɛ a maɲininga fɔɔ siɲa sawa le ni a diyanin a yɛ. Wo lɔ, a k'a javi, a vɛɛ: «Fanma, i ka ko bɛ lɔn. I k'a lɔn i diyanin ǹ yɛ.» Isa do vɛɛ a yɛ: «Ǹa saalu balo.»

[18] A vɛɛ kɔtunun: «Ǹ'i tuɲa fɔ i yɛ, i kavelenya waate, i tɛɛ a fɛ ka taa tɛɛ min ja, i tɛɛ i lɔbɛn yi na ka taa wo ja. Kɛɛ i vɛ kɔlɔyala, i kɛtɔ i bolo lɔsamana ani mɔɔ gbɛlɛ kɛtɔ i silila ka taa i le tɛɛ dɔ lɔ, i t'a fɛ ka taa tɛɛ min ja.»

[19] A do ka kuma min fɔ ka Piɛl faaɲa le jiya, a faatɔ teme fɔsa Ala yi buɲali sɔlɔn. Wo fɔnin, Isa vɛɛ a yɛ: «Bila ǹ kɔ.»

[20] Piɛl k'i kɔdon ka kɔbiladen dɔ ye ai kɔ. Mɔɔ min diyanin tɛɛ Isa yɛ, wo le tɛɛ. Ale le tɛɛ wulala dɔnna Isa tɔɔfɛ wo lon, min k'a fɔ, a vɛɛ: «Fanma, jene kɛtɔ i janvala?»

[21] Piɛl ka wo tii ye mingɛ, a do vɛɛ Isa yɛ: «Fanma, min do? Mindɛ kɛtɔ a sɔlɔnna?»

[22] Isa vɛɛ a yɛ: «Ni ǹ a fɛ a kɛnɛ yi to fɔɔ m̀'ɛ nala lon min na, iya ko le wo le? Fɔ i yi bila ǹ kɔ.»

[23] Kuma wo ka jɛnzɛn Isa ya kɔbiladennu tɛma ko min tii tɛnala sala. Kɛɛ Isa tɛɛ m'a fɔ a yɛ ko a tɛnala sala, mafɔ a vɛɛ: «Ni ǹ a fɛ a kɛnɛ yi to fɔɔ m̀'ɛ nala lon min na, ya ko le wo le?»

[24] Kɔbiladen kelen wo le yi ko minnu seleya dila ani ka min bɛ sɛvɛ. Mɔ do k'a lɔn aa seleya yi tuɲa le le.

[25] Alalaa Isa ka ko siyama gbɛlɛlu kɛ. Ni wo kelenkelenna bɛ tɛɛ vɛ sɛvɛla, m̀ miliya lɔ sɛvɛli wo bɛ tɛɛ tɛ kun dunuɲa.