Yohana 6
[1] Wo timinnin kɔ, Isa ni aa kɔbiladennu vɛ taala Galile kɔɔ kɔma. Kɔɔ wo tɔɔ le gbazan ko Tibɛliya.
[2] Jama ba tɛɛ a kɔ, k'a masɔlɔn ai tɛɛ aa kawanakolu yena jangalotɔlu ya ko lɔ.
[3] Isa ni aa kɔbiladennu ka jɛlɛ tini dɔ kɔkan k'ai sii je.
[4] Wo k'a talan Jahudiyalu ya Timinkunna Selilon ma tɛɛ vɛ sulunya.
[5] K'ai siinin to je, Isa k'a ɲa lawuli ka jama ba natɔ ye a ma. A do vɛɛ Fele yɛ: «M'i bulu san min ne ja sa jama min yi dɔnni kɛ?»
[6] Isa ka wo fɔ ka Fele lɔsuman. Ni wo tɛ, a tɛɛ k'a lɔn a kɛtɔ min kɛla.
[7] Fele k'a javi, a vɛɛ: «Hali baaleden dɔ ya kalo sein sala ka don bulu lɔ, mɔɔ bɛ tɛnala a dɔɔnin sɔlɔnna a lɔ.»
[8] Isa ya kɔbiladen min tɔɔ yi ko Andele, Simɔn Piɛl dɔɔni kɔni, wo vɛɛ Isa yɛ:
[9] «Kavelen dɔ yi jan, bulukala loolu ni jɛɛni fila y'a bolo. Kɛɛ wo kɛtɔ mindɛ ɲiala jama ba min ma?»
[10] Isa vɛɛ aa kɔbiladennu yɛ: «Ài yi mɔɔlu lasii duu ma.» Bin mɛsɛnni walanin tɛɛ wo ja. Mɔɔlu k'ai sii bin nɔ. Kɛ́ minnu tɛɛ jama lɔ, wolu tɛɛ mɔɔ waa loolu ɲɔɔn bɔ le.
[11] Isa ka bulu wo ta ka balika bɔ Ala yɛ, ka ban k'a fɔ ko bulu lɔ yi tala mɔɔ siininnu wotɛ. A ka jɛɛni gbazan kɛ wo ɲa le ma. Mɔɔ bɛ ka bulu ni jɛɛ sɔlɔn fɔɔ k'ai wasa.
[12] Mɔɔlu ka dɔnni kɛ k'ai fa mingɛ, Isa vɛɛ aa kɔbiladennu yɛ: «Ài yi bulu ni jɛɛ kulunkulun tɔlu ladɛn, sa ai kana tiɲa.»
[13] Ai k'a kulunkulun minnu ladɛn, wo ka gbɔlɔ tan ni fila lafa. Mɔɔlu ka dɔnni kɛ bulukala loolu lɔ ka a tɔ min to, wo le ve.
[14] Jama ka Isa ya kawanako tɔɔmase wo ye mingɛ, ai vɛɛ: «Mɔɔ Salati min ka kan ka na dunuɲa, wo le min ne jɔ!»
[15] Kɛɛ Isa ka bɔ ai tɛma kɔtunun ka taa a jɛlɛ ma tini dɔ kɔkan k'a masɔlɔn a tɛɛ k'a lɔn a lɔɔ tɛɛ ai la ka a kɛ aiya masa le fanga la.
[16] Wula dala senin, aa kɔbiladennu ka taa kɔɔ kawun na.
[17] Ai do ka don kulun dɔ kɔnɔ, ko ai yi kɔɔ tɛɛ ka taa Kapɛlɛnam so kɔnɔ. Su tɛɛ vɛ ko, kɛɛ Isa tɛɛ ma na ba.
[18] K'ai to kɔɔ kɔkan, fɔɲɛ ba vɛ bɔla ka kɔɔ lajaman kosɛvɛ.
[19] Ai tɛɛ ka kulun nabɔli haan fɔɔ kilo loolu ni wo tɛ ilo wɔɔlɔ. Ai do ka Isa taamatɔ ye kɔɔ kɔkan, a vɛ nala kulun dafɛ. Wo lɔ, ai bɛ ka siyan.
[20] Kɛɛ Isa vɛɛ ai yɛ: «Ài kà siyan, ǹe le.»
[21] Wo kɛ, ai ka diɲa ka a ladon kulun nɔ. Ai do ka se ai taaya lɔ telemanin.
[22] Wo duusagbɛ lon, jama min ka to kɔɔ kɔma, wolu k'a lɔn k'a fɔ ko kulun kelen ne tɛɛ je kunu. Ko Isa ma don kulun nɔ aa kɔbiladennu fɛ, mafɔ aa kɔbiladennu le ka bɔ je dein.
[23] Wo k'a talan kulun dɔlu tɛɛ vɛ na ka bɔ Tibɛliya so la. Fanma Isa tɛɛ ka balika bɔ Ala yɛ ka bulu di jama ma tɛɛ min ja, kulun wolu masuluyanin tɛɛ wo ja le la.
[24] Jama k'a ye mingɛ ko Isa ni aa kɔbiladennu tɛɛ tɛ je butu, ailu gbu vɛ donna kulun wolu lɔ ka taa a ɲininya lɔ Kapɛlɛnam.
[25] Ai ka a ye mingɛ kɔɔ kɔma, ai ka a maɲininga, ai vɛɛ: «Kalanmɔɔ, i senin jan waate mindɛ lɔ?»
[26] Isa k'ai javi, a vɛɛ: «Ǹ'i tuɲa fɔla ài yɛ, ài tɛ ǹ ɲininna ka ǹa kawanako tɔɔmaselu kɔlɔ lɔn, mafɔ ài na bulu min dɔnna k'ài fa kpekpe.
[27] Ài kà baale kɛ balo ko lɔ, min yi tiɲana, mafɔ min yi mɛnna ka nimaya banbali di ài ma. Ǹe Mɔɔnivin Tanin kɛtɔ wo suu le dila ài ma, baa ǹ Fa Ala v'a jiya ko a diɲanin m̀ ma.»
[28] Ai ka a maɲininga, ai vɛɛ: «Ala a fɛ m'i baale mindɛ suu kɛ a yɛ?»
[29] Isa vɛɛ: «Ala na mɔɔ min kelala, ài la wo tii la. A a fɛ ài yi min kɛ, wo le ve.»
[30] Ai vɛɛ: «Ile do, i kɛtɔ kawanako tɔɔmase mindɛ le kɛla fɔsa m'i wo ye ka limandeya i ma? I kɛtɔ mindɛ le kɛla?
[31] Mɔ bemanu na dɔnnifen dɔ dɔnna fuwa lɔ, min tɔɔ yi ko maana, iwo a sɛvɛnin teme kitabu kɔnɔ, ko: ‹A na balo dila ai ma ko ai y'a dɔn, balo min bɔnin haijɛnɛ.›»
[32] Wo kɛ, Isa vɛɛ ai yɛ: «Ǹ'i tuɲa fɔ ài yɛ, kela Musa na min dila ài ma, wo tɛɛ tɛ balo le min jiinin ka bɔ haijɛnɛ, mafɔ ǹ Fa Ala le yi balo bɛlɛbɛlɛ dila ài ma ka bɔ haijɛnɛ.
[33] K'a masɔlɔn mɔɔ min jiinin ka bɔ haijɛnɛ ka nimaya di dunuɲa mɔɔlu ma, Ala ya balo le ve.»
[34] Ai vɛɛ: «Kalanmɔɔ, i yi balo wo di mɔ ma waate bɛ.»
[35] Isa do vɛɛ ai yɛ: «Ǹe le balo le min yi nimaya dila. Mɔɔ mɔɔ vɛ nala m̀ ma, kɔɔn tɛnala wo tii minala butu. Ani mɔɔ mɔɔ vɛ lala ǹ na, jilɔɔ tɛnala wo tii minala butu.
[36] Kɛɛ ǹ n'a fɔla ài yɛ, ǹ ko ài vɛ ǹ ye, kɛɛ do ài do ma la ǹ na.
[37] Ǹ Fa Ala vɛ mɔɔ minnu dila m̀ ma, wo bɛ natɔle m̀ ma. Ni mɔɔ mɔɔ do ka na m̀ ma, ǹ tɛnala wo tii mataala ǹ na tuun.
[38] K'a masɔlɔn m̀ ma jii ka bɔ haijɛnɛ ka ǹe gbu sawo kɛ, fɔ ǹ kelaba sawo.
[39] Ǹ kelaba sawo le ne, ko a na mɔɔ minnu dila m̀ ma, wo suu suu kà tunun m̀ ma, mafɔ ǹ ai bɛ lawuli ka bɔ saya lɔ dunuɲa laban lon.
[40] Baa ǹ Fa a fɛ ko mɔɔ mɔɔ vɛ ǹe a Den yena ka la ǹ na, wo tii yi nimaya banbali sɔlɔnne, ani dunuɲa laban lon ǹ kɛtɔ wo tii lawulila ka bɔ saya lɔ.»
[41] Wo kɛ, Jahudiya kundiilu ka dakɔlɔ kuma damina Isa ya ko lɔ baa a k'a fɔ, a vɛɛ: «Ǹe le balo le, min jiinin ka bɔ haijɛnɛ.»
[42] Ai vɛɛ: «Jusufu den Isa le tɛ? Mɔ do ka a fa ni a ba lɔn. Mindɛ lɔ a a fɔla yi ne ko a bɔnin haijɛnɛ le?»
[43] Isa k'ai javi, a vɛɛ: «Ài dakɔlɔ kuma to je i ɲɔɔn wotɛ.
[44] Ǹ Fa Ala le na ǹ kelala, ani mɔɔ suu suu tɛ se nala m̀ ma, ni ǹ Fa Ala ma a masama ka a lana m̀ ma. Ǹe do kɛtɔ wo tii lawulila ka bɔ saya lɔ dunuɲa laban lon.
[45] A sɛvɛnin kelalu ya kitabulu kɔnɔ ko: ‹Ala gbu le kɛtɔ ai bɛ kalanna.› Wo le y'a ma, mɔɔ min bɛ v'i tolo malɔla ǹ Fa Ala kumakan ma ani ka kalan a ma, wo bɛ yi na m̀ ma.
[46] A tɛ k'a fɔ ko mɔɔ dɔ vɛ ǹ Fa Ala ye. Mɔɔ suu suu ma Ala ye ba, fɔ ǹe kelen min bɔnin a fɛlɔ.
[47] Ǹ'i tuɲa fɔ ài yɛ, mɔɔ mɔɔ vɛ lala ǹ na, nimaya banbali yi wo tii le bolo.
[48] Ǹe le balo le min yi nimaya dila.
[49] Ài bemanu na maana dɔnna fuwa lɔ, wo bɛ n'a kɛ, ai bɛ ka sa.
[50] Kɛɛ balo suu min jiinin ka bɔ haijɛnɛ, ni mɔɔ min ka wo dɔ dɔn, wo tii tɛnala faala feu.
[51] Ǹe le balo wo le, min jiinin ka bɔ haijɛnɛ ka nimaya di. Ni mɔɔ min ka balo wo suu dɔ dɔn, wo tii totɔ nimaya le lɔ kudein. Ǹe do yi balo min dila sa dunuɲa mɔɔlu yi nimaya sɔlɔn, wo yi ǹ falisoo le le.»
[52] Ka bɛn kuma wo ma, Jahudiya kundiilu v'i ɲɔɔn sɔsɔla, ai vɛɛ: «Kɛ́ min yi se a falisoo dila mɔ ma di k'a fɔ m'a dɔn?»
[53] Isa vɛɛ ai yɛ wo lɔ: «Ǹ'i tuɲa fɔ ài yɛ, ǹe min yi Mɔɔnivin Tanin ne, ni ài ma ǹ falisoo dɔn ani ka ǹ jeli min, ài tɛnala nimaya sɔlɔnna.
[54] Ni mɔɔ min do ka ǹ falisoo dɔn ani ka ǹ jeli min, nimaya banbali yi wo tii le bolo ani ǹ kɛtɔ a lawulila ka bɔ saya lɔ dunuɲa laban lon.
[55] K'a masɔlɔn ǹ falisoo yi balo bɛlɛ le le, ani ǹ jeli yi minnifen bɛlɛ le le.
[56] Wo lɔ, ni mɔɔ min ka ǹ falisoo dɔn ani ka ǹ jeli min, wo tii yi kafon ǹ kan ne, ani ǹe yi kafon a kan ne.
[57] Ǹ Fa Ala min yi nimayadiba le, wo le na ǹ kelala, ado ǹ'i ǹ nin na ale le fɛ. Wo ɲa kelen ma, ni mɔɔ mɔɔ ka ǹ falisoo dɔn, wo tii kɛtɔ nimaya sɔlɔnna ǹ fɛ.
[58] Balo min jiinin ka bɔ haijɛnɛ, wo le ne. Ài bemanu na balo min suu dɔ dɔnna fuwa lɔ ka ban ka sa, wo tɛ. Kɛɛ ni mɔɔ min ka balo min dɔ dɔnna, wo totɔ nimaya le lɔ kudein.»
[59] Isa ka kuma wolu fɔ k'a to mɔɔlu kalanna Aladalibon na Kapɛlɛnam.
[60] Aa kɔbiladennu siyama ka ko wolu mɛn mingɛ, ai vɛɛ: «Kuma min gbeleyanin dɛ! Jene yi se diɲala wo ma?»
[61] Isa tɛɛ k'a lɔn a jɛlɛ kɔnɔ k'a fɔ aa kɔbiladennu yi wo le fɔla ai da kɔlɔ. A vɛɛ ai yɛ wo lɔ: «Kuma min y'ài kunnɔtɛɛla?
[62] A yi di? Ài vɛ ǹe Mɔɔnivin Tanin jɛlɛtɔ yena ka seikɔ m̀ bɔya lɔ do?
[63] Lɔhɔlɔma Fɔɲɛ le yi nimaya dila, ni wo tɛ adamaden fanga tɛ foi ɲia. Ǹ na kuma minnu fɔla ài yɛ, wolu bɔnin Lɔhɔlɔma Fɔɲɛ le lɔ, ai do yi nimaya dila.
[64] Kɛɛ a dɔlu y'ài lɔ, minnu ma la ǹ na.» K'a ta Isa ya kawanili damina ma, a tɛɛ k'a lɔn minnu limandeyanin tɛ a ma ani min tii kɛtɔ a janvala.
[65] A do k'a dɔ la aa kuma kan kɔtunun, a vɛɛ: «Wo le n'a kɛla, ǹ n'a fɔla ài yɛ, ǹ ko mɔɔ suu suu tɛ se nala m̀ ma, ni ǹ ǹ Fa ma wo se di a ma.»
[66] Wo fɔnin, aa kɔbiladen siyama ka seikɔ. Ai do ma diɲa ka bila a kɔ butu.
[67] Wo lɔ, Isa k'a fɔ aa keladen mɔɔ tan ni fila yɛ, a vɛɛ: «Àilu do? Àilu gbazan a fɛ ka taa?»
[68] Simɔn Piɛl k'a javi, a vɛɛ: «Fanma, m'i taa jene kɔ ni ile tɛ? Nimaya banbali yi sɔlɔnna iya kumalu le fɛ.
[69] Mɔ vɛ limandeya k'a lɔn ko ile le Lɔhɔlɔma Mɔɔ le ka bɔ Ala fɛlɔ.»
[70] Isa vɛɛ ai yɛ: «M̀ ma ài mɔɔ tan ni fila le ta? Kɛɛ mɔɔ kelen y'ài lɔ min yi Soɛtana aa mɔɔ le.»
[71] Isa kain tɛɛ Judasi le ma, ni a yi Simɔn Sikaliyɔti den ne. A do tɛɛ Isa ya keladen mɔɔ tan ni fila dɔ le le, min kɛtɔ a janvala.