Yohana 15
[1] Isa vɛɛ: «Ǹe le lɛzɛnju bɛlɛ le, ǹ Fa do yi gbelekunnasiiba le.
[2] Ni m̀ bolo min tɛ a dɛnna, ǹ Fa yi wo tɛɛle a la ka a bɔ je. Kɛɛ do ni m̀ bolo min vɛ kɛla a denna, a yi wo kun natɛɛle, fɔsa a a den siyama kɛ ka timin kunfɔlɔ ta la.
[3] Àilu la vɛ sɛnɛya butu ka bɛn ǹa kuma ma, ǹ na min fɔla ài yɛ.
[4] Ài kafonnin yi to ǹ kan, ǹe gbu kafonnin yi to ài kan. Jili bolo tɛ se a den kɛla a jɛlɛ ma, mafɔ a kafonnin yi to a ju le ma. Wo ɲa kelen ma, àilu gbazan tɛ se den kɛla ai jɛlɛ ma, mafɔ ài kafonnin yi to ǹ kan.
[5] Ǹe le lɛzɛnju le, àilu le do y'a bolo le. Ni mɔɔ min kafonnin ka to ǹ kan ani ni ǹe gbazan kafonnin ka to a kan, wo tii le kɛtɔ a denna kosɛvɛ. K'a masɔlɔn ài tɛ se foi kɛla ǹ kɔ.
[6] Ni mɔɔ min kafonnin ma to ǹ kan, wo tii kɛnin ne iwo jili bolo tɛɛnin, mɔɔlu yi min nafilila a yi ja. Wo suulu le la yi dɛnna k'ai ɲɛnin taa la.
[7] Ni ài kafonnin ka to ǹ kan ani ka ǹa kumalu to ài kɔnɔ, ài yi fen suu suu kɔ, ài yi wo madali Ala la, a do kɛtɔ wo dila ài ma.
[8] Ni ài ka den siyama kɛ, ǹ Fa ya buɲali la yi nkɛnɛmayale wo lɔ. Wo do kɛtɔ a jiya yi la ko ǹa kɔbiladen bɛlɛbɛlɛ le ài le.
[9] Ǹ Fa na ǹ kanuna teme, m̀'ɛ ài kanu ten. Wo lɔ, ài yi to ǹa kanundeya lɔ.
[10] Ni ài ka kɛ ǹa jamililu labatola, ài yi tole ǹa kanundeya lɔ iwo ǹ na ǹ Fa aa jamililu labatola teme ka to aa kanundeya lɔ.
[11] Wo lɔ, ǹ na kuma min bɛ fɔla ài yɛ, fɔsa ǹa sawa ɲɔɔzii yi kɛ ài lɔ ani fɔsa sawa wo yi dafa.
[12] Ǹa jamali le ne, ài y'ài ɲɔɔn kanu iwo ǹ na ài kanuna teme.
[13] Ni mɔɔ dɔ vɛ faala a tɔvalu ya ko lɔ, kanundeya suu suu tɛ timin wo la.
[14] Ni ài ka ǹa jamalilu kɛ, ài yi ǹ tɔva le le.
[15] Ǹ tɛnala a fɔla ài ma butu ǹa bɔliden k'a masɔlɔn bɔliden m'a lɔn aa kundii yi min na. Mafɔ ǹ a fɔla ài ma ko ǹ tɔva k'a masɔlɔn ǹ Fa na minnu fɔla ǹ yɛ, m̀'ɛ wo bɛ lase ài ma.
[16] Àilu ma ǹe ta. Kɛɛ ǹe le na ài tala ka ài lɔ, fɔsa ài taa den siyama kɛ minnu yi mɛnna. Wo vɛ kɛla, ài vɛ fen suu suu madalila ǹ Fa ma ǹ tɔɔ lɔ, a kɛtɔ wo dila ài ma.
[17] Ǹ ài lɔla ko minnu la, sa ài y'ài ɲɔɔn kanu.
[18] Ni ài ka gbeya dunuɲa mɔɔlu yɛ, ài y'a lɔn ko ǹe le gbeyanin ai yɛ kunfɔlɔ le.
[19] Ni do ài fɛ tɛɛ kɛ dunuɲa mɔɔlu la, ai tɛɛ ài kanule k'a masɔlɔn ài tɛɛ kɛle ai dɔ le. Kɛɛ ài fɛ tɛ dunuɲa mɔɔlu la, baa ǹ na ài tala k'ài bɔ ai tɛma. Wo le y'a ma, àiya ko gbeyanin ai yɛ.
[20] Ǹ na min fɔla ài yɛ kɔlɔkɔlɔ le, ài hangili yi to wo lɔ, ǹ ko: ‹Jɔn tɛ buɲala aa jɔnfa le.› Ni mɔɔlu vɛ ǹ tɔlɔya, ai kɛtɔ àilu gbazan tɔlɔyala. Kɛɛ ni ai ka ǹa kumalu labato, ai kɛtɔ àiya gbazan kumalu labato yi la.
[21] Ai kɛtɔ ài minala ten ne ka bɛn ǹa ko ma, baa ai ma ǹ kelaba lɔn.
[22] Ni ǹ tɛɛ ma na ka kuma ai fɛ, ai kɛkolu tɛɛ tɛ jate julumbu le, kɛɛ tandainɔ, jo tɛ ai bolo aiya julumbu kɛkolu lɔ.
[23] M̀ gbeyanin mɔɔ min yɛ, ǹ Fa gbazan gbeyanin wo tii yɛ.
[24] Ni ǹ tɛɛ ma kawanakolu kɛ ai ɲana k'a fɔ mɔɔ mɔɔ ma min suu kɛ ba bene, ai kɛkolu tɛɛ tɛ jate julumbu le. Kɛɛ tandainɔ, ai vɛ ban wo bɛ yena. Wo bɛ lɔ, ǹe ni ǹ Fa gbeyanin ai yɛ.
[25] Alalaa wo ka kɛ sa min sɛvɛnin aiya seliya kitabu lɔ, wo ma yi fa ko: ‹Ai ka ǹ nagbeyaɲɛ, kɛɛ kun tɛɛ tɛ wo la.›
[26] Kɛɛ Lailiba kɛtɔ nala, min yi Lɔhɔlɔma Fɔɲɛ le ka bɔ ǹ Fa Ala fɛlɔ. Ale le yi tuɲa lankɛnɛmayala ka bɛn Ala ma. A do kɛtɔ seleya dila ǹa ko lɔ.
[27] Ài vɛ to ǹ fɛ k'a ta ǹa kawanili damina ma, wo lɔ àilu gbazan kɛtɔ ǹ sele le le.»