[1] Lailon sɔɔma danin na, mosolu vɛ taala kabulu ma tulu sumadiyanin ni latikolon ne, ai na minnu lɔbɛnna.
[2] Ai do k'a ye ko kawa ba wo ma vɛ kulukulu ka bɔ kabulu da la.
[3] Ai ka don a kɔnɔ, kɛɛ ai ma Fanma Isa fuleni ye.
[4] K'ai to wo kɔnɔfili lɔ, kɛ́ fila ka bɔ gbɛ lɔ k'i lɔ ai dafɛ. Aiya faani gbɛnin tɛɛ pepe.
[5] Mosolu ka siyan bubale k'ai ten bilin duu ma. Kɛ́ fila wo k'a fɔ ai yɛ, ai vɛɛ: «Mindɛ lɔ ài yi nima ɲininna fulenilu tɛma?
[6] A tɛ jan. A v'i wuli ka bɔ saya lɔ. A na kuma min fɔla ài yɛ Galile, ài hangili yi to wo lɔ.
[7] A vɛɛ ko fɔ Mɔɔnivin Tanin yi don julumbutɔlu bolo kosa ai y'a gban kɔlɔman ma ka a faa. Kɛɛ tele fila a sawana, a wulitɔ ka bɔ saya lɔ.›»
[8] Wo fɔ, mosolu hangili ka bila Isa kumakannu lɔ.
[9] Ai do vɛ seikɔla ka bɔ kabulu dala ka ko wo bɛ ɲafɔ keladen mɔɔ tan ni kelen yɛ, ani mɔɔ tɔ bɛ.
[10] Moso minnu tɛɛ Moyamu Magidalaka ni Johana ni Janguba ba Moyamu ani ai dafɛmɔɔlu.
[11] Kɛɛ keladennu ka wo jate manamanakan ne le, ai do ma la a la feu.
[12] Wo bɛ n'a kɛ, Piɛl v'i wulila ka bɔli ka taa kabulu dala. A senin je, a k'i majii ka kabulu lɔfɛlɛn, kɛɛ a ma foi ye a lɔ fɔ kasange dein. A seikɔtɔla lu ma, a vɛ kawala ka bɛn ko min kɛnin.
[13] Wo lon kelen, Isa ya kɔbiladen fila tɛɛ taala soni dɔ la, min tɔɔ yi ko Emayusi. Ka bɔ Jelusalɛm ka se je, wo yi lɛlɛ fila ɲɔɔn taama le le.
[14] Ko min bɛ timinnin tele fila wo lɔ, ai tɛɛ balola wo kan.
[15] K'ai to balo ni sɔsɔyalila, Isa gbu k'i madon ai la ka taama ai fɛ.
[16] Ai ka a ye ai ɲa la, kɛɛ Ala k'a kɛ ai ɲanɔ ma to a ma.
[17] A do vɛɛ ai yɛ: «Ài tɛɛ balola mindɛ le kan siya la?» Ai do k'i lɔ ɲakɔlɔsili le.
[18] Ai lɔ kelen, min tɔɔ yi ko Kilopa, wo k'a javi, a vɛɛ: «Ile kelen ne lona le Jelusalɛm min m'a lɔn ko minnu timinnin tele fila min nɔ?»
[19] A k'ai maɲininga, a vɛɛ: «Ko suu mindɛ le kɛnin?» Ai vɛɛ a yɛ: «Ko min kɛnin Nazalɛtika Isa la. A tɛɛ kumala fanga le la ka ko balu kɛ k'a jiya bɛ la ko Ala ya ɲiminɲɛmɛ le tɛɛ.
[20] Maa salakalaseba kundii ni ɲamɔɔlu na a minala ka a don Lɔmukalu bolo, ko ai y'a faa. Wo lɔ, ai k'a gbaan kɔlɔman ma.
[21] Mɔ jei siinin tɛɛ ale la ko a kɛtɔ Isilanmɔɔlu kunmakala, kɛɛ a tele sawana le ne ko wolu timin kɔ.
[22] Wo bɛ n'a kɛ, moso dɔlu yi mɔ tɛma minnu na kuma dɔ fɔla ka mɔ kɔnɔfili bubale. Ai vɛɛ ko ai taanin kabulu dala bi sɔɔma danin na,
[23] kɛɛ ai ma a fuleni ye je. Ko ai na mɛlɛka dɔlu yena minnu n'a fɔla ai yɛ ko Isa y'a nin na.
[24] Wo le n'a kɛla, mɔ dafɛmɔɔ dɔlu gbazan taanin kabulu dala k'a talan iwo mosolu k'a fɔ teme. Ai do ma a ye je.»
[25] A do vɛɛ ai yɛ: «Àilu koɲayebalilu! Ài lasumannin ne limandeyala kelalu ya kumakan fɔnin bɛ maǃ
[26] Ài m'a lɔn k'a fɔ Masa Tɔɔmasenin tɛɛ tɔlɔyale, ka ban ka magbiliyali sɔlɔn?»
[27] Ko ko sɛvɛnin kitabulu kɔnɔ ka bɛn aa ko ma, Isa vɛ wo kɔlɔ fɔla ai yɛ ka damina kela Musa ya Taulati ma haan fɔɔ ka na a sii kela tɔ bɛ ya kitabulu la.
[28] Ai masulunyanin soni wo la, a k'a kɛ iwo a timintɔle.
[29] Kɛɛ ai k'a fɔ a yɛ k'a magbeleya, ai vɛɛ: «I jaani, i yi si mɔ fɛlɔ. Tele ma vɛ jii. Su kotɔle.» Wo lɔ, Isa ka don so kɔnɔ ko a yi si ai fɛlɔ.
[30] Ai k'i sii dɔnnikɛya lɔ mingɛ, a ka bulu ta ka balika bɔ Ala yɛ ka a lɔtala ai tɛ.
[31] Wo kɛ, ai ɲa la ka ka. Ai do k'a lɔn ko Isa le. Kɛɛ a ka tunun ai ma telemanin.
[32] Wo lɔ, ai k'a fɔ i ɲɔɔn yɛ, ai vɛɛ: «A tɛɛ kitabulu kɔlɔ ɲafɔla mɔ yɛ siya la mingɛ, mɔ joso ladiyanin tɛɛ wo saa lɔ, kɛlɛ?»
[33] Ai mɔɔ fila v'i wulila telemanin ka seikɔ Jelusalɛm. Ai senin, ai ka keladen mɔɔ tan ni kelen ani ai dafɛmɔɔlu ladɛnnin ye.
[34] Keladennu k'a fɔ mɔɔ fila wo yɛ, ai vɛɛ: «Maa Fanma v'i wuli jɔ! A na a jɛlɛ jiyala Simɔn na.»
[35] Wo kɛ, kɛ́ fila wo k'a ɲafɔ ai yɛ min kɛnin ai la siya la ani ai ka Isa lɔn ɲa min ma bulu lɔtala waate.
[36] K'ai to kumala, Isa gbu ka bɔ gbɛ lɔ ai tɛma, a vɛɛ ai yɛ: «Ala yi hɛlɛ kɛ ài yɛ.»
[37] Ai bɛ joso ka bɔ ka siyan bubale. A tɛɛ ai kɔnɔ ko sugboloni le.
[38] Isa do vɛɛ ai yɛ: «Mindɛ kɛnin ài yi siyanna? Mindɛ lɔ ài yi sikasikala ài josokun nɔ?
[39] Ài yi na, ài yi m̀ bolo ni ǹ sennu lasaa fɔsa ài y'a lɔn k'a fɔ ǹe gbu gbu le feu! Ài y'ài bolo tuu ǹ na ka ǹ nasaa, baa bu ni kolo tɛ sugboloni ma, iwo a yi m̀ ma teme.»
[40] Isa ka wo fɔ mingɛ, a ka a bolo ni a sennu jiya ai la.
[41] K'ai to sikasikala sawa boloma k'ai kawakoya, a vɛɛ ai yɛ: «Dɔmunifen dɔ y'ài bolo jan?»
[42] Wo lɔ, ai ka jɛɛ tiinin dɔ di a ma.
[43] A k'a ta k'a dɔn ai bɛ ɲana.
[44] Wo kɔ, a vɛɛ ai yɛ: «Ǹ tɛɛ ài fɛ mingɛ, ǹ tɛɛ minnu le fɔla ài yɛ, ǹ ko ko ko sɛvɛnin ka bɛn m̀ ma kela Musa ya Taulati lɔ, ni kela Dawuda ya Zabuli lɔ, ani kela dɔgbɛlɛlu ya kitabulu lɔ, ǹ ko fɔ wo bɛ ma yi fa.»
[45] Wo kɔ, a k'ai joso laka sa ai tɛɛ se kitabulu kɔlɔ ɲayena.
[46] A k'a fɔ ai yɛ kɔtunun, a vɛɛ: «A sɛvɛnin ten ne ko fɔ Masa Tɔɔmasenin yi tɔlɔya, kɛɛ tele fila a sawanan lɔn, a kɛtɔ i wulila ka bɔ saya lɔ.
[47] Ani ko ka damina Jelusalɛm ma, aa ko la yi se siboloma bɛ ma a tɔɔ lɔ, ko ai yi tube sa ai julumbulu lɔ yi koto.
[48] Àilu gbu le ko minnu masele le.
[49] Ǹ Fa na Lɔhɔlɔma Fɔɲɛ min lahedi tala ài yɛ, ǹ kɛtɔ wo lanala ài ma. Kɛɛ fɔ ài yi to so kɔnɔ haan fɔɔ Ala yi setiiya wo lajii ài ma.»
[50] Wo kɔ, a ka bɔ so kɔnɔ ai le ka taa se fɔɔ Betani fan nɔ. Ai senin je, a ka a bolo kɔlɔta ka duwawu kɛ ai yɛ.
[51] K'a to duwawula, a kɔlɔ ka ta ka bɔ ai tɛma ka jɛlɛ sangbolo lɔ.
[52] Ai do ka a bato ka ban ka seikɔ Jelusalɛm sawa boloma.
[53] Ai tɛɛ taala lɔhɔlɔmabonba la waate bɛ ka Ala tanu.