[1] Wo kɔ, Isa vɛɛ aa kɔbiladennu yɛ: «Sika t'a lɔ, kolu natɔ ka mɔɔlu lafili, kɛɛ mɔɔ min vɛ ko wolu lanala a mɔɔɲɔɔlu ma, gbalo yi wo tii yɛ!
[2] A fisayanin ne ai yi kawa ba sili wo tii kanna k'a lafili kɔɔ lɔ, jani a yi denni minnu dɔ kelen nafili.
[3] Wo lɔ, ai yi jando ài jɛlɛ lɔ. Ni ài badenma dɔ vɛ hakɛ tala ài la, ài y'a kili k'a fɔ a yɛ. Ni a do ka tube, ài y'a makoto.
[4] Ni wo tii ka to hakɛ tala ài la haan fɔɔ siɲa wolowulan tele kelen kɔlɔ, ni a ka na wo kelenkelenna bɛ lɔ k'a fɔ ko: ‹I jaani, ǹe makoto›, wo vɛ kɛla ài y'a makoto.»
[5] Aa keladennu k'a fɔ a yɛ, ai vɛɛ: «Fanma, i y'a dɔ la maa limandeya kan.»
[6] Fanma Isa k'ai javi, a vɛɛ: «Hali ni àiya limandeya dɔɔyanin iwo biyaki kolo, ài tɛɛ sene a fɔla jiliju min yɛ ko a yi bɔ a nɔ lɔ ka taa sɛnɛ kɔɔji lɔ. A do tɛɛ ài kan minale.»
[7] «A yi di? Ni iya bɔliden dɔ vɛ bɔla sɛnɛ buluwaya lɔ ni wo tɛ saa kunnasiiya ka na lu ma, jene y'ài tɛma, min a fɔ a yɛ ko ‹Na telemanin, m'i dɔmuni kɛ›?
[8] Wo tɛ kɛ! Fɔ a a fɔ a yɛ, a vɛɛ ‹Taa ǹa wulala lɔbɛn ǹ yɛ. I mafalin kobɛn ka na ǹa balo le. Fɔ m̀'ɛ banna dɔnnila k'a min, wo vɛ kɛla i natɔ i ta dɔnna.›
[9] Ni bɔliden k'aa kundii ya kuma wolu labato, jalasa wo yi balika bilale a yɛ wo lɔ? Wo tɛ kɛ!
[10] Àilu gbazan ta yi ten ne. Ài lɔnin baale min na, ni ài ka wo dafa, ài y'a fɔ ko ‹Ǹu yi bɔliden jɛlɛla le le. Mɔ na maa ke le kɛla dein.›»
[11] Ka Isa taatɔ to Jelusalɛm, a tɛɛ timinna Samali ni Galile dan na.
[12] A dontɔla so dɔ la, kunantɔ tan ka na a labɛn. Ai k'i lɔ dingila majaan nɔ
[13] k'ai kan nabɔ, ai vɛɛ: «Kundii Isa, i yi hina mɔ la.»
[14] Isa k'ai ye mingɛ, a vɛɛ ai yɛ: «Ài yi taa ài jɛlɛ jiya salakalasebalu la.» K'ai taatɔ to, ai bɛ la ka kɛnɛya.
[15] Ai lɔ kelen k'a ye mingɛ a vɛ kɛnɛya, a do vɛ seikɔla ka na Isa ma ka kɛ Ala tanune kan ba lɔ.
[16] A do v'i bilinna a sen kɔlɔ ka balika bɔ a yɛ. Samalika le tɛɛ a le.
[17] Isa k'a maɲininga, a vɛɛ: «Mɔɔ tan ne ma kɛnɛya? A tɔ kɔnɔ do?
[18] Mɔɔ ma seikɔ ka balika bɔ Ala yɛ fɔ kɔɔkanmɔɔ min dein?»
[19] Isa vɛɛ a yɛ: «I yi wuli, i yi taa. Iya limandeya vɛ i lakɛnɛya!»
[20] Lon dɔ, Falisi dɔlu ka Isa maɲininga, ai vɛɛ: «Ala ya masaya lankɛnɛmayatɔ waate mindɛ?» Isa k'ai javi, a vɛɛ: «Ala aa masaya tɛ nala tɔɔmase le k'a fɔ mɔɔ y'a ye,
[21] kumatɛ mɔɔ y'a fɔ ko: ‹A ye, a yi jan ne› ni wo tɛ ko: ‹A yi jan nɔ ve›. Jaa k'a masɔlɔn Ala ya masaya y'ài tɛma le.»
[22] Isa vɛɛ aa kɔbiladennu yɛ: «A lɔɔ kɛtɔ ài la, lon dɔ ka ǹe Mɔɔnivin Tanin ye hali ni a ka dan tele kelen ne ma, kɛɛ ài tɛnala ǹ yena.
[23] Mɔɔlu kɛtɔ a fɔla ài yɛ ko: ‹A ye, a yi jan ne› ni wo tɛ ko ‹A ye, a yi jan ve›. Àilu kɔni kà bila wolu kɔ.
[24] K'a masɔlɔn sanfɛlɛn yi ɲaala sangbolo fan dɔ lɔ ka taa fan dɔ lɔ teme, ǹe Mɔɔnivin Tanin nalon kɛtɔ ten ne.
[25] Kɛɛ jani wo yi kɛ, fɔ ǹ'i tɔlɔya ba sɔlɔn kunfɔlɔ le, ado bi mɔɔlu kɛtɔ ai banna ǹ nɔ.
[26] Ǹe Mɔɔnivin Tanin nalon kɛtɔ iwo kolu kɛnin teme sedina Nuho tele lɔ.
[27] Mɔɔlu tɛɛ dɔmuni kɛla k'i min. Ai tɛɛ fulu kɛla ani k'ai denmosolu gbazan di fulu la. Ai ka to wo la haan fɔɔ Nuho ka don kulunba kɔnɔ lon min na. Ado kɔɔ ba ka na k'ai bɛ halaki.
[28] Wo ɲa kelen ma, bema Luti tele lɔ, mɔɔlu tɛɛ dɔmuni kɛla k'i min, ani ka sanni ni felelilu kɛ, ai vɛ sɛnɛlu kɛla, ai vɛ bonnu lɔla.
[29] Kɛɛ Luti ka bɔ Sɔdɔm so kɔnɔ lon min na, taa ni taakawalu ka benben ka bɔ sangbolo lɔ, ka ai bɛ halaki.
[30] Ǹe Mɔɔnivin Tanin vɛ ǹ jɛlɛ jiyala lon min na, a kɛtɔ wo ɲa kelen ne ma.
[31] Ni wo lon ka mɔɔ min sɔlɔn bon kɔkan, wo tii kà jii bon kɔnɔ k'a fɔ a a bolofennu tala. Ni wo do ka mɔɔ min sɔlɔn sɛnɛ lɔ, wo tii kà seikɔ aa bon na.
[32] Ko min ka kɛ bema Luti moso la, ài y'ài hangili to wo lɔ.
[33] Mɔɔ min a fɛ ka a nin matanga, wo tii bɔnɔtɔ nimaya la. Ni do mɔɔ min vɛ bɔnɔla a ni la ka bɛn ǹe ma, wo tii kɛtɔ a ni matangala.
[34] Ǹ a fɔ ài yɛ, ǹ ko su wo lɔ, mɔɔ fila kɛtɔ lafen kelen nɔ, kelen minatɔ ka kelen to je.
[35] Moso fila kɛtɔ malo tuula i ɲɔɔn fɛ, kelen minatɔ ka kelen to je.»
[37] Kɔbiladennu ka Isa maɲininga, ai vɛɛ: «Fanma, wo kɛtɔ min ne?» Isa k'ai javi, a vɛɛ: «Su vɛ kɛla tɛɛ min ja, duwalu y'ai ladɛnna wo ja le.»