[1] Ǹ tɔva Teofele, ko minnu timinnin mɔ wotɛ jan, i k'a lɔn mɔɔ siyama v'i lɔja ka wo taliku sɛvɛ.
[2] Ai n'a sɛvɛla iwo mɔɔlu n'a ɲafɔla mɔ yɛ teme, minnu na ko wolu yena ai ɲa la k'a ta a jusii waate ma, ani minnu kelayanin tɛɛ samakan nasena.
[3] Ǹ tɔva kein Teofele, ǹe gbazan vɛ ko wo bɛ lasaa k'a ta a jusii waate ma. M̀'ɛ a ye wo lɔ a bɛnnin ǹ a bɛ sɛvɛ iwo kolu timinnin teme, ka a lataa i ma.
[4] Wo vɛ kɛla, i kɛtɔ a lɔnna ko i kalannin ko min na, wo yi tuɲa gbu gbu le le.
[5] Ko wolu ka damina waate min nɔ, wo k'a talan Helodi tɛɛ Jude koovi masaya la. Salakalaseba dɔ tɛɛ je, min tɔɔ yi ko Zakaliya. A tɛɛ Abiya ya baaledenjama le lɔ. A moso tɛɛ nabi Haluna bɔzɔn dɔ le le, min tɔɔ yi ko Elizabɛti.
[6] Ai mɔɔ fila tɛɛ mɔɔ telennin ne le Ala ɲakɔlɔ. Ai tɛɛ Mɔtii ya seliyalu ni jamalilu labatola ka aa siya taama.
[7] Wo bɛ n'a kɛ, den tɛɛ tɛ ai bolo, k'a masɔlɔn Elizabɛti tɛɛ densɔlɔnbali le le, ado ai mɔɔ fila tɛɛ vɛ kɔlɔya.
[8] Lon dɔ, a ka kɛ Zakaliya tɛɛ aa salakalaseba baale kɛla Ala ɲana, k'a masɔlɔn aa baaledenjama ta waate tɛɛ vɛ se.
[9] Ka bɛn aiya laana ma, ai ka tombola kɛ. Tombola ka Zakaliya mina sa a yi don lɔhɔlɔmabonba kɔnɔ ka wusulan ɲɛnin salakagbalan kɔkan.
[10] Ka a to wusulan ɲɛninna, jama ba tɛɛ Ala dalila kɛnɛma.
[11] Wo waate, Mɔtii ya mɛlɛka dɔ ka bɔ a yɛ gbɛ lɔ, k'i lɔ wusulan salakagbalan bolokinin fɛ.
[12] Zakaliya ka mɛlɛka ye mingɛ, a kɔnɔ ka fili. A ka siyan bubale.
[13] Kɛɛ mɛlɛka vɛɛ a yɛ: «Zakaliya, i kà siyan. Ala v'iya madailikan mɛn. I moso Elizabɛti kɛtɔ denkɛ sɔlɔnna i yɛ. I yi den tɔɔ la ko Yaya.
[14] I kɔnɔ diyatɔle bubale, ani mɔɔ siyama kɛtɔ sawala a sɔlɔn ko lɔ,
[15] k'a masɔlɔn a kɛtɔ mɔɔba le le Mɔtii ɲakɔlɔ. A do kà lɛzɛnji min feu, ni wo tɛ gbɛ suu suu. A joso lafatɔ Lɔhɔlɔma Fɔɲɛ la hali a ba kɔnɔ lɔ.
[16] A do kɛtɔ sabu le, Isilanmɔɔ siyama kɛtɔ ai fannɔseila ai Tii Ala ma.
[17] A taatɔ ɲafɛ setiiya lɔ ka Mɔtii ya siya lɔbɛn iwo kela Iliya n'a kɛla teme. A kɛtɔ den ni ai fanu wotɛ lɔbɛnna, ka kanminabalilu hangili jɛlɛma ka mɔɔ sɔvɛ hangili di ai ma, ani ka Ala ya mɔɔlu bila siya bɛlɛ kan.»
[18] Zakaliya ka mɛlɛka maɲininga, a vɛɛ: «Ǹ kɛtɔ a lɔnna di k'a fɔ ko tuɲa le wo le? Baa m̀'ɛ kɔlɔya ani m̀ moso gbazan vɛ kɔlɔya.»
[19] Mɛlɛka k'a javi, a vɛɛ: «Ǹe le Jibilu le min y'i lɔla Ala ɲakɔlɔ. Ale jɛlɛ na ǹ kelayala ka samakan kein min nase i ma.
[20] I tolo malɔ! I kɛtɔ bobo le, k'a masɔlɔn i ma la ǹ kumakannu la. A kɛtɔ ten ne haan fɔɔ ko minnu ma vɛ fala lon min.»
[21] Mɔɔlu tɛɛ Zakaliya makɔnɔna kɛnɛma. Ai kɔnɔlɔ ka fili k'a masɔlɔn a tɛɛ vɛ mɛn lɔhɔlɔmabonba kɔnɔ.
[22] Zakaliya bɔnin kɛnɛma, a ma se kumala ai yɛ. Ai do k'a lɔn wo lɔ k'a fɔ Ala vɛ fen dɔ jiya a la lɔhɔlɔmabonba kɔnɔ. A vɛ a bolo jatela ai yɛ, k'a to boboya lɔ.
[23] Zakaliya ya baale waate ka ban mingɛ, a ka seikɔ aa bon na.
[24] A ma mɛn wo kɔ, a moso Elizabɛti ka kɔnɔ ta. A do ka kalo loolu kɛ, a ma bɔ aa bon na.
[25] A vɛɛ: «Ǹ'i teme yi ne, Mɔtii ya ko kɛnin ne wo le. A na hinala ǹ na ka maaya bɔ ǹ ɲa la mɔɔlu tɛma.»
[26] A kɔnɔ kalo wɔɔlɔ, Ala ka mɛlɛka Jibilu kelaya Galile so dɔ la, min tɔɔ yi ko Nazalɛti.
[27] A ka taa se singbili dɔ ma je, min tɔɔ yi ko Moyamu. Kɛ́ foi tɛɛ m'i la ba a fɛ. A maminanin tɛɛ nabi Dawuda bɔzɔn dɔ bolo, min tɔɔ yi ko Jusufu.
[28] Mɛlɛka ka na a ma k'a fɔ a yɛ, a vɛɛ: «I ni ke, ile duwawuden. Ala y'i fɛ.»
[29] Folikan wo ka Moyamu kɔnɔfili kosɛvɛ. A v'i milila ko foli suu wo kɔlɔ yi mindɛ le.
[30] Mɛlɛka do vɛɛ a yɛ: «Moyamu, i kà siyan. Ala vɛ aa lɔhɔlɔma la i kan.
[31] I do kɛtɔ kɔnɔ tala ka denkɛ sɔlɔn. I y'a tɔɔla ko Isa.
[32] A do kɛtɔ mɔɔba le le. Ai kɛtɔ a fɔla a ma ko Ala Kɔlɔtaninba Den, ani Mɔtii Ala kɛtɔ a lasiila a bema Dawuda ya masayasiifen na.
[33] A siitɔ Janguba bɔzɔnnu kunna kudein. Aa masaya tɛ ban tuun!»
[34] Moyamu ka mɛlɛka maɲininga, a vɛɛ: «Wo yi se kɛla di, k'a masɔlɔn kɛ́ m'i la ba ǹ fɛ bene.»
[35] Mɛlɛka k'a javi, a vɛɛ: «Lɔhɔlɔma Fɔɲɛ jiitɔ i kan, ani Ala Kɔlɔtaninba ya setiiya bilintɔ i kunna. Wo boloma, i kɛtɔ den min sɔlɔnna, mɔɔlu kɛtɔ a fɔla a ma ko lɔhɔlɔma mɔɔ ani Ala Den.
[36] I mili i tɛnɛn Elizabɛti ma, min gbazan vɛ denkɛ kɔnɔ ta aa kɔlɔya waate lɔ. Ai tɛɛ a fɔla a ma ko densɔlɔnbali, kɛɛ a a kɔnɔ kalo wɔɔlɔna le lɔ.
[37] K'a masɔlɔn Ala tɛ kolila foi ma.»
[38] Moyamu vɛɛ: «Ǹ'i ǹ Tii Ala ya jɔn ne le. A yi kɛ ǹ yɛ iwo i n'a fɔla teme.» Wo kɔ, mɛlɛka ka bɔ Moyamu fɛ ka taa.
[39] A ma mɛn wo kɔ, Moyamu v'i wulila ka taa ɲagba le ka se Jude koovi so dɔ la, min yi tinima dingila lɔ.
[40] A do ka don Zakaliya ya bon na ka Elizabɛti fo.
[41] Elizabɛti ka Moyamu ya foli mɛn mingɛ, a den v'i lamaala gbiligbili a kɔnɔ. Wo waate, Lɔhɔlɔma Fɔɲɛ ka Elizabɛti joso lafa,
[42] a do ka a kan nabɔ k'a fɔ Moyamu yɛ, a vɛɛ: «Duwawuden ne i le mosolu tɛma. Den min y'i kɔnɔ, duwawuden ne wo gbazan ne!»
[43] Elizabɛti vɛɛ kɔtunun: «Ǹ'i jene le k'a fɔ ǹ Tii ba jɛlɛ yi na m̀ ma?
[44] Alalaa ǹ k'iya folikan mɛn mingɛ, ǹ den k'i lamaa ǹ kɔnɔ lɔ sawa boloma.
[45] Duwawuden ne i le, k'a masɔlɔn Mɔtii na min fɔla i yɛ, i vɛ limandeya k'a fɔ wo mafatɔ.»
[46] Moyamu vɛɛ wo lɔ: «Ǹ'i ǹ Tii buɲala ǹ joso lɔ.
[47] Ǹ kɔnɔ diyanin ǹa Lakisiliba Ala ya ko lɔ.
[48] Baa a hangili ka to aa jɔnmoso fanmajiinin nɔ. Wo boloma, ka damina bi haan ka taa, mɔɔlu kɛtɔ a fɔla ǹe ma ko duwawuden,
[49] k'a masɔlɔn Sebɛtii Ala vɛ ko ba kɛ ǹ yɛ. A tɔɔ magbiliyanin!
[50] Waate bɛ Ala yi hinala mɔɔlu la minnu yi siyanna a ɲa ani ai bɔzɔnnu.
[51] A vɛ kawanakolu kɛ a bolo fangama la. Fannɔbuɲa miliya tɛɛ minnu josokun na, a vɛ wolu lɔjɛnzɛn.
[52] A vɛ fanmalu lajii ka bɔ aiya masaya la, ka ban ka fandannu lajɛlɛ.
[53] A vɛ kɔɔntɔlu sɔ dɔnnifen kein sɔ fɔɔ k'ai fa kpekpe, ka ban ka banalu bolokolongbɛ bila.
[54] A nanin aa jɔnnu madɛmɛn ko lɔ, ǹu Isilanmɔɔlu, baa a ma ɲina aa hinandeya kɔ.
[55] iwo a ka lahadi banbali min ta mɔ bemanu yɛ, Ibulahima ni a bɔzɔnnu.»
[56] Moyamu ka to Elizabɛti fɛlɔ ka kalo sawa ɲɔɔn kɛ je. Wo kɔ, a ka seikɔ ka taa aa bon na.
[57] Elizabɛti moi lon ka se, a do ka denkɛ sɔlɔn.
[58] A siiɲɔɔ ni a badenmalu k'a mɛn mingɛ ko Mɔtii Ala vɛ hina a la ka ko ba min kɛ a yɛ, ai do vɛ sawala a fɛ.
[59] A sɔlɔn tele sein, ai bɛ ka na den makɛnɛkɛya lɔ. A lɔɔ tɛɛ ai la ka a tɔɔla a fa Zakaliya la.
[60] Kɛɛ a ba k'ai javi, a vɛɛ: «Ɛnɛn, a tɔɔ le ko Yaya.»
[61] Ai vɛɛ a yɛ: «Ài badenmalu lɔ mɔɔ tɔɔ tɛ ten.»
[62] Ai vɛ ai bolo jatela den fa yɛ, ka a maɲininga den tɔɔ ma.
[63] Zakaliya ka a bolo jatesii ko ai yi na wala le. Ai nanin a le, a ka sɛvɛli kɛ a kan, ko: «Den tɔɔ le Yaya.» Ai bɛ ka kawakoya wo lɔ.
[64] Telemanin, Zakaliya nɛɛ ka fɔlin. A do vɛ Ala tanula.
[65] Wo k'ai siiɲɔɔ bɛ masiyan. Ko min vɛ jɛnzɛnna Jude koovi tinima fan bɛ lɔ.
[66] Mɔɔ minnu ka a mɛn, wolu tɛɛ i milila, ai vɛɛ: «Den min kɛtɔ mɔɔ suu mindɛ le?» K'a masɔlɔn ai ka Ala ya setiiya ye den kan.
[67] Wo kɔ, Lɔhɔlɔma Fɔɲɛ ka Zakaliya joso lafa, a do vɛ kelaya kɛla, a vɛɛ:
[68] «Ǹu Isilanmɔɔlu yi Mɔtii Ala tanu, k'a masɔlɔn a vɛ na k'aa mɔɔlu madɛmɛn k'ai kunmaka.
[69] A vɛ Lakisiliba fangama lana mɔ ma ka bɔ aa jɔn Dawuda bɔzɔnnu lɔ.
[70] A vɛ wo kɛ iwo aa lɔhɔlɔma kelalu k'a fɔ teme haan fɔɔ waate jaan.
[71] Ko wo tii kɛtɔ mɔ mankalanna ka mɔ bɔ mɔ juulu bolo, ani ka mɔ bɔ mɔ lagbeyabalu fanga kɔlɔ.
[72] Ala na aa hinandeya jiyala mɔ bemanu la. k'a hangili to aa lɔhɔlɔma salatikan nɔ,
[73] a na min tala mɔ bema Ibulahima yɛ.
[74] Fɔsa a vɛ mɔ bɔla mɔ juulu bolo, mɔ kana siyan mɔɔ suu suu ɲa, fɔ ka ale Ala bato.
[75] A do vɛ wo kɛ sa m'i kɛ lɔhɔlɔma mɔɔ le ani mɔɔ telennin a ɲakɔlɔ maa dunuɲalɔtɛɛ bɛ lɔ.
[76] Ile ǹ den kɔni, ai kɛtɔ a fɔla i ma ko: ‹Ala Kɔlɔtaninba ya kela.› K'a masɔlɔn i taatɔ Mɔtii ɲa, ka aa siya lɔbɛn a yɛ,
[77] ani ka kisiko lɔnniya jiya aa mɔɔlu la, sa aiya julumbulu lɔ yi koto.
[78] K'a masɔlɔn Mɔtii Ala yi hinande le le ani ɲumayande, a kɛtɔ kɛnɛya labɔla mɔ yɛ gbesekele iwo telebɔ,
[79] fɔsa mɔɔ minnu siinin divi lɔ ani saya duulen kɔlɔ, kɛnɛya yi bɔ wolu yɛ, ani ka mɔ sen bila hɛlɛ siya kan.»
[80] Denni wo ka buɲa ka fanga sɔlɔn a joso lɔ. A ka taa to fuwa lɔ haan fɔɔ a ka a jɛlɛ lankɛnɛmaya Isilanmɔɔlu yɛ lon min.