[1] Wo waate lɔ, mɔɔ waa dana ka na ai ladɛn Isa laminin nɔ fɔɔ ai tɛɛ ai lɔla i ɲɔɔn sen kan. Ka Isa to jama tɛma, a vɛ aa kɔbiladennu kalanna kunfɔlɔ le, a vɛɛ: «Ài y'ài jando ài jɛlɛ lɔ Falisilu ya bululafununsɛɛ kanma, wo yi filangafoya le le.
[2] Fen doonnin suu suu tɛ je min la tɛnala nkɛnɛmayala. Gbono ko tɛ je k'a fɔ min tɛnala lɔnna.
[3] Wo le kɛtɔ a kɛla, ài na ko ko fɔla doon nɔ, mɔɔlu kɛtɔ wo mɛnna bala lɔ. Ài na ko ko fɔla kan majii lɔ sibon na, mɔɔlu lɔtɔ bon kɔkan ka wo fɔ gbanɔkan nɔ.
[4] Ǹ tɔvalu, ǹ a fɔ ài yɛ, ǹ ko mɔɔ minnu yi mɔɔ fali faala dein, ài kà siyan wolu ɲa, k'a masɔlɔn a se tɛ ai yɛ ka ko gbɛlɛ kɛ wo kɔ.
[5] Ài ka kan ka siyan min ɲa, ǹ kɛtɔ wo jiyala ài la. Setiiya yi min bolo ka mɔɔ fali faa, ka ban ka a lafili Jahanama, ài ka kan ka siyan wo tii le ɲa dein.
[6] Wɔli mɛsɛnni fila le, ai yi kɔnɔni loolu felela a la, kɛlɛ? Wo bɛ n'a kɛ, Ala jɔnin tɛ hali ai lɔ kelen ma.
[7] Àilu do, hali ài Fa Ala ka ài kunsi bɛ kɔndɛ lɔn. Wo lɔ, ài kà siyan, baa àilu kulu gbeleyanin vɛ kɔnɔni wo jilika jilika le.
[8] Ǹ a fɔ ài yɛ, ǹ ko ni mɔɔ min v'a fɔla mɔɔlu ɲana ko ǹe le ta y'a le, ǹe Mɔɔnivin Tanin gbazan kɛtɔ a fɔla Ala ya mɛlɛkalu ɲana, ǹ ko ǹe le ta yi wo tii le.
[9] Kɛɛ ni mɔɔ min v'a fɔla mɔɔlu ɲana ko ǹe ta tɛ a le, ǹe gbazan kɛtɔ a fɔla Ala ya mɛlɛkalu ɲana, ǹ ko ǹe ta tɛ wo tii le.
[10] Ni mɔɔ mɔɔ ka Alalɔnbaliyakan fɔ ǹe Mɔɔnivin Tanin ma, a ma yi sene kotola. Kɛɛ mɔɔ mɔɔ vɛ Alalɔnbaliyakan fɔla Lɔhɔlɔma Fɔɲɛ ma, wo tii ma tɛ se kotola tuun!
[11] Mɔɔlu vɛ ài minala ka taa ài le Aladalibon ɲamɔɔlu fɛ ani jamanatiilu ani kititɛɛbalu, ài ka kan ka min fɔ wo waate ka jo sɔlɔn, ài kà hamin wo lɔ.
[12] K'a masɔlɔn ài ka kan ka min fɔ, Lɔhɔlɔma Fɔɲɛ kɛtɔ wo jiya ài la wo waate kelen nɔ.»
[13] Kɛ́ dɔ ka to jama tɛma k'a fɔ Isa yɛ, a vɛɛ: «Kalanmɔɔ, i y'a fɔ ǹ kɔlɔkɛ yɛ a yi maa kɛɛ lɔtala, a yi ǹ ta di m̀ ma.»
[14] Isa k'a javi, a vɛɛ: «M̀ bɔ, jene na ǹ kɛla àiya kititɛɛba le, ni wo tɛ àiya kɛɛ lɔtalaba?»
[15] Wo kɔ, Isa k'a fɔ jama yɛ, a vɛɛ: «Ài yi jando ài jɛlɛ lɔ ka bɛn natabaya suu bɛ kanma, baa mɔɔ nin sumannin tɛ ka bɛn a bolofennu ma, hali a walanin ka kɛ.»
[16] Isa ka sana dɔ la ai yɛ, a vɛɛ: «Waate dɔ ka kɛ, nafolobatii dɔ ya sɛnɛ ka ɲia kosɛvɛ.
[17] A do tɛɛ i milila wo lɔ, a vɛɛ: ‹Ǹ a kɛ di? Baa sɛnɛfen ladaloya gbɛlɛ tɛ m̀ bolo butu.›
[18] A do vɛɛ: ‹Ǹ kɛtɔ ǹa bolon bɛ tela ka a bubatalu lɔ, ka ǹa sɛnɛfen ni m̀ bolofen bɛ ladalo ai kɔnɔ.
[19] Wo kɔ, ǹ kɛtɔ a fɔla ǹ jɛlɛ yɛ, ǹ ko: «Ile haijɛɛ tii, i nɔningɛ butu. Baa fen siyama ladalonin i bolo min kɛtɔ san siyama kɛla. Dɔnni ni minni kɛ wo lɔ, ka i jɛlɛ diyabɔ.»›
[20] Kɛɛ Ala vɛɛ a yɛ: ‹Ile hangilindan. Bi su min nɔ yi ne, i nunakili minatɔ i la. I na fen minnu ladɛnna i jɛlɛ yɛ, wolu kɛtɔ jene ta le wo lɔ?›»
[21] Wo kɔ, Isa vɛɛ: «Mɔɔ min yi nafolo ladɛnna a jɛlɛ yɛ ka ɲina Ala kɔ, wo ɲɔɔzii le kɛtɔ a sɔlɔnna.»
[22] Wo kɔ, Isa vɛɛ aa kɔbiladennu yɛ: «Ǹ a fɔ ài yɛ wo lɔ, ǹ ko ài ka hamin àiya nimaya lɔ k'a fɔ ài kɛtɔ mindɛ dɔnna, ni wo tɛ ài fali ya ko lɔ k'a fɔ ài kɛtɔ mindɛ le bilala ài kanna.
[23] Baa nimaya kulu gbeleyanin dɔnnifen ko le. Falikolo do kulu gbeleyanin feleyabɔ ko le.
[24] Ài yi mili ngalawɔnilu ma. Ai tɛ sɛnɛ kɛla, ai do tɛ sɛnɛfen kalila. Balawa ni bolon suu suu tɛ ai bolo. Ala do y'ai balola. Àilu do kulu gbeleyanin tɛ kɔnɔlu le?
[25] Jene y'ài tɛma, min yi se tele kelen kafonna a si kan ka bɛn aa hamin ma?
[26] Ni ài tɛ se hali wo koni wo suu kɛla, mindɛ lɔ ài yi haminna a tɔ bɛ lɔ?
[27] Ài yi mili bin feelelu ma, ai yi fɛlɛnna teme. Ai tɛ baale kɛla, ai do tɛ feleyabɔ ladanna. Kɛɛ ǹ a fɔ ài yɛ, ǹ ko hali nabi Sulimana ni a banaya, wo ma faani suu suu don min keinyanin ka se bin feele wo dɔ lɔ.
[28] Bin minnu yi tuu kɔlɔ bi, wolu ɲɛnintɔ taa la sinin. Wo bɛ n'a kɛ, Ala yi feelelu bilala ai ma, minnu kɛnin iwo aiya feleyabɔ. Àilu minnu ya limandeya dɔɔyanin, sika t'a lɔ, ni Ala yi wo kɛla binnu yɛ, a kɛtɔ feleyabɔ dila àilu gbazan ma.
[29] Ài do kà kɛ haminna k'ài hangili ɲaami àiya dɔnnifen ni minnifen ko lɔ.
[30] Baa Alalɔnbalilu le yi haminna ko suu wo lɔ. Ài Fa Ala do k'a lɔn k'a fɔ ài mako yi fen minnu bɛ la.
[31] Min fisayanin, àiya ko kunfɔlɔ yi kɛ fanmajii le Ala ya masaya kɔlɔ. Wo vɛ kɛla, wo bɛ yi dile ài ma.»
[32] Isa vɛɛ aa kɔbiladennu yɛ: «Ài kà siyan, ǹa saa jilikani, k'a masɔlɔn ài Fa Ala yi masaya dila ài ma sawa boloma.
[33] Ài y'ài bolofennu fele ka bolokolonnu sɔ wɔli wo la. Ài yi nafolo ladaloyalu ladan ài jɛlɛ yɛ haijɛnɛ, minnu tɛnala tiɲala. Ài yi nafolo ladɛn ài jɛlɛ yɛ haijɛnɛ, nafolo min tɛnala dɛsɛla. Son tɛ se donna wo ja ka suɲali kɛ, ado baabaa tɛ se tiɲali kɛla je.
[34] K'a masɔlɔn ya nafolo ladalonin tɛɛ min ja, i hangili gbazan yi wo le ja.»
[35] Isa vɛɛ kɔtunun: «Ài tɛsili baale ko lɔ k'àiya fitina lamɛnɛn to waate bɛ.
[36] Ài yi kɛ iwo bɔlidennu, minnu yi aiya kundii makɔnɔna bon na, fɔsa a vɛ nala ka bɔ fulusiliya lɔ ka da makɔnkɔn, ai yi da laka a yɛ telemanin.
[37] Kundii vɛ nala ka bɔliden minnu talan ai ɲana, ni ai ma sunɔɔ feu, ai kɛtɔ duwawuden ne le. Ǹ'i tuɲa fɔ ài yɛ, kundii kɛtɔ a tɛsilila baale ko lɔ ka bɔlidennu kili ko ai na ai sii dɔnnikɛya lɔ. A do kɛtɔ nala dɔnnifen ne ai yɛ.
[38] Wo lɔ, kundii vɛ nala su tɛma, ni wo tɛ donon kumun waate, ni a ka bɔliden minnu talan ai ɲana, wolu kɛtɔ duwawuden ne le.
[39] Kɛɛ ài yi ko min ɲaye. Ni bontii tɛɛ k'a lɔn k'a fɔ son natɔ waate min nɔ, a tɛɛ tole a ɲana. A tɛɛ tɛ diɲa son yi don aa bon na.
[40] Wo lɔ, àilu gbazan lɔbɛnnin yi to, baa ǹe Mɔɔnivin Tanin natɔ waate dɔ lɔ, ài hangili tɛ waate min ma.»
[41] Wo fɔnin, Piɛl ka Isa maɲininga, a vɛɛ: «Fanma, i yi sana min lala ǹu le yɛ baa mɔɔ bɛ?»
[42] Fanma Isa k'a javi, a vɛɛ: «Jene yi bɔliden sɔvɛ le ani hangilima, kundii kɛtɔ min nasiila bɔliden tɔlu kunna, sa a ai balo di ai ma aa waate lɔ?
[43] Ni kundii ka na ka bɔliden wo talan baale la, a kɛtɔ duwawuden ne le.
[44] Ǹ'i tuɲa fɔ ài yɛ, kundii kɛtɔ bɔliden wo le kɛla a bolofen bɛ kunnasiiba le.
[45] Kɛɛ do ni wo vɛ kɛla mɔɔ yon ne, tumado a kɛtɔ a milila, a vɛɛ: ‹Ǹa kundii vɛ mɛn, a tɛ nala bene.› Wo lɔ, a v'a bɔlidenɲɔɔlu gbasila, kɛ́ ni mosolu, ka ban ka taa dɔmuni kɛ, ani ka gbɛ min haan fɔɔ k'a ɲa laminin.
[46] Kɛɛ bɔliden ya kundii natɔ lon dɔ, a t'i milila lon min ma ani a jii tɛ waate min ma. A vɛ nala, a kɛtɔ a lɔtɛɛtɛɛla iwo limandeyabalilu.
[47] Ani bɔliden min tɛɛ ka a kundii sawo lɔn, kɛɛ a do ma a jɛlɛ lɔbɛn, ni wo tɛ ka a kundii sawo kɛ, wo vɛ kɛla, ai yi wo tii gbasile bubale!
[48] Kɛɛ ni bɔliden min tɛɛ ma a kundii sawo lɔn, ni a ka ko bɛnbali kɛ, min ne gbasili kaɲanin, ai yi bɔliden wo gbasile dɔɔnin. K'a masɔlɔn, ni Ala ka fen siyama di mɔɔ min ma, a kɛtɔ fen siyama makilila wo tii le la. Ni do ai ka fen siyama kalifa mɔɔ min na, ai kɛtɔ fen siyama ɲininna wo tii le la.»
[49] Isa vɛɛ kɔtunun: «Ǹ nanin ka duukolo kɛ taa le la, a do lɔɔ yi ǹ na a mɛnɛnni yi kɛ butu.
[50] Kɛɛ fɔ m̀ ma yi sun tɔlɔya lɔ kunfɔlɔ le, iwo ai yi mɔɔlu makola kɔɔ kɔlɔ teme. Jani wo yi ban, ǹ joso yi janin kɛla bakɛ.
[51] A y'ài kɔnɔ k'a fɔ ǹ nanin ka hɛlɛ le kɛ duukolo kan? Wo tɛ dɛ, fɔ ka mɔɔlu falan a ma.
[52] K'a damina bi ma, ni mɔɔ loolu vɛ kɛla demaya kelen nɔ, mɔɔ sawa lɔtɔle mɔɔ fila ɲa, ani mɔɔ fila yi lɔle mɔɔ sawa ɲa.
[53] Fa lɔtɔle a denkɛ la, denkɛ gbazan lɔtɔle a fa la. Ba lɔtɔle a denmoso la, denmoso gbazan lɔtɔle a ba la. Ani mamoso falantɔle a mama la.»
[54] Isa vɛɛ jama yɛ gbazan: «Ài vɛ sanfinnin yena teleben fan nɔ, ài y'a fɔle telemanin ko san yi nala. A do yi kɛla teme.
[55] Ani ài vɛ fɔɲɛ yena bɔla bolokinin fan nɔ, ài vɛɛ: ‹Tele ba le bɔtɔ bi.› A do yi kɛla ten ne.
[56] Àilu filangafolu! Ài senin sangbolo ni duukolo kɛɲa kɔlɔ lɔnna. Kɛɛ Ala yi ko minnu kɛla bi mɔɔlu tɛma, mindɛ lɔ ài tɛ se wo ko ɲayena?
[57] Mindɛ lɔ ài tɛ i milila ài jɛlɛ ma ka ko telenninnu kɛ.
[58] Ni mɔɔ dɔ vɛ kɛla taala i le kititɛɛba fɛ, ài vɛ kɛla taala, i i lɔja ka kɛlɛ ban jani ài yi se je. Ni wo tɛ, ni a ka i don kititɛɛba bolo, wo kɛtɔ i donna kasobon lakanaliba bolo. Wo gbazan kɛtɔ i bilala kaso la.
[59] Ǹ'i tuɲa fɔ ài yɛ, i tɛ bɔ je mafɔ i vɛ banna wɔli bɛ salala!»