[1] Nisɔɔnminaba ni konyonkɛba gbɛlɛlu tɛɛ nala k'ai tolo malɔ Isa la.
[2] Wo lɔ, Falisi ni seliya kalanmɔɔlu vɛ dakɔlɔ kuma fɔla a ma, ai vɛɛ: «Kɛ́ min yi konyonkɛbalu lɔminala, haan ka dɔmuni kɛ ai fɛ.»
[3] Wo lɔ, Isa vɛ sana lala ai yɛ, a vɛɛ:
[4] «Kɛ́ mindɛ le y'ài lɔ, ni aa saa kelen vɛ tununna aa saa kɛmɛ tɛma, a tɛ a tɔ bikɔnɔ ni kɔnɔ to tuu kɔlɔ, ka taa saa tununnin ɲinin haan fɔɔ ka a ye?
[5] Ni a do ka a ye, a a lale a kanma sawa boloma.
[6] A vɛ sena lu ma, a a tɔva ni a siiɲɔɔlu kilile, a vɛɛ: ‹Ài na m'i sawa, baa m̀'ɛ ǹa saa tununnin ye.›
[7] Wo ɲa kelen ma, ǹ a fɔ ài yɛ, ǹ ko ni julumbutɔ kelen vɛ tubela, sawa min kɛtɔ haijɛnɛ ka bɛn ale kelen ma, wo suu tɛ kɛ hali mɔɔ telennin bikɔnɔ ni kɔnɔ ya ko lɔ, minnu mako tɛ tube la.»
[8] «Ni wo tɛ moso mindɛ le yi je, ni aa wɔligbanan kelen ka tunun aa wɔligbanan tan tɛma, a tɛnala fitina lamɛnɛnna ka bon natɛɛ k'a ɲinin kobɛn haan fɔɔ ka a ye?
[9] Ni do a ka a ye, a a tɔva ni a siiɲɔɔmalu kilile, a vɛɛ: ‹Ài na m'i sawa, baa m̀'ɛ ǹa wɔligban tununnin ye.›»
[10] Isa vɛɛ: «Wo ɲa kelen ma, ǹ a fɔ ài yɛ, ǹ ko ni julumbutɔ kelen ka tube, Ala ya mɛlɛkalu yi sawale wo lɔ.»
[11] Isa vɛɛ kɔtunun: «A ka kɛ kɛ́ dɔ le le, denkɛ fila tɛɛ min bolo.
[12] Lon dɔ, dɔɔmanda vɛɛ a fa yɛ: ‹Ǹ fa, i i bolofen bɛ lɔtala, ka ǹ ta kɛɛ di m̀ ma butu.› Wo lɔ, a fa k'a bolofennu lɔtala ai wotɛ.
[13] Tele dana timin kɔ, dɔɔmanda ka a bolofen bɛ madon a la ka taa taaman na jamana jaan dɔ lɔ. A ma ko suu suu kɛ je fɔ manamana haan fɔɔ ka a wɔli bɛ tiɲan.
[14] Aa wɔli bɛ ka ban mingɛ, wo waate le lɔ kɔɔn ba ka don jamana wo lɔ. Foi tɛɛ tɛ a bolo butu.
[15] Wo lɔ, a ka taa jamana wo duulen dɔ fɛlɔ, wo ka a kɛ kɔsɛkunnasiiba le aa sɛnɛ lɔ.
[16] A tɛɛ a fɛ mɔɔ dɔ y'a sɔ sɔsɔ fala dɔ sɔ kɔsɛlu tɛɛ min dɔnna, kɛɛ do mɔɔ ma foi di a ma.
[17] A hangili ka sei a ma mingɛ, a vɛɛ a jɛlɛ yɛ: ‹Ǹ fa aa baaleden bɛ yi kinin ba le sɔlɔnna k'i fa kpekpe. Ǹe do faatɔle jan kɔɔn bolo.›
[18] To ǹ'i wuli ka taa ǹ fa fɛlɔ, ǹ a fɔ a yɛ, ǹ ko: «Ǹ fa, m̀'ɛ hakɛ ta i la, ani Ala.
[19] Hɔlɔ tɛ ǹ ne k'a fɔ i y'a fɔ m̀ ma ko i den. I yi m̀ mina iwo iya baaleden dɔ.»›
[20] A do k'i wuli ka taa a fa fɛlɔ. Kɛɛ a fa ka to poon ka a natɔ ye tɛɛ majaan nɔ mingɛ, a hina ka don a la. A vɛ bɔlila ka taa a den nabɛn k'i fili a lɔ k'a sumu.
[21] Wo lɔ, a den vɛɛ a yɛ: ‹Ǹ fa, m̀'ɛ hakɛ ta i la ani Ala. Hɔlɔ tɛ ǹ ne k'a fɔ i y'a fɔ m̀ ma ko i den.›
[22] Kɛɛ a fa k'a fɔ aa bɔlidennu yɛ, a vɛɛ: ‹Ài yi taa falafala, ài yi ǹa pipɔ bɛ lɔ keinyanin ne ka a bila a kanna. Ài kɔina bila a bolokɔni la, ani ka samala don a sen na.
[23] Ài yi na nisi bolan nɔlɔnin ne k'a kannatɛɛ. Ài m'i tolon ba kɛ ka kinin ba dɔn
[24] k'a masɔlɔn ǹ den min tɛɛ vɛ sa, kɛɛ a a ni la kɔtunun. A tununnin ne tɛɛ, kɛɛ a vɛ ye butu.› Wo lɔ, ai vɛ feeti kɛla a ɲa gbu gbu ma.
[25] Wo waate lɔ, kɔlɔmanda tɛɛ sɛnɛ lɔ. A seikɔtɔla, a ma ka sulunya lu ma la mingɛ, a ka tolon ni dɔnkɛ kan mɛn.
[26] Wo lɔ, a ka bɔliden dɔ kili k'a maɲininga, a vɛɛ: ‹Ài yi mindɛ la je?›
[27] Wo vɛɛ a yɛ: ‹I dɔɔni vɛ na! I fa na nisi bolan nɔlɔnin kannatɛɛla a yɛ k'a masɔlɔn a den kɛnɛyanin vɛ na.›
[28] Kɛɛ a k'a joso lakuna bubale fɔɔ k'a ban donna lu ma. Wo lɔ, a fa ka bɔ ka taa a madiyaya lɔ.
[29] A do vɛɛ a fa yɛ: ‹I m'a ye? M̀'ɛ san siyama kɛ baalela i yɛ. M̀ m'i sɔsɔ lon kelen gbu. Kɛɛ haan bi, i ma hali banidenni kelen di m̀ ma k'a fɔ ǹe ni ǹ tɔvalu yi feeti kɛ.
[30] Ado i den min na ya nafolo tiɲala sungulunbalu la, a nanin mingɛ, i na nisi bolan nɔlɔnin kannatɛɛla a yɛ telemanin.›
[31] Wo fɔ, a fa vɛɛ a yɛ: ‹Ǹ den, i yi ǹ fɛ waate bɛ. Fen suu suu yi m̀ bolo, i ta le wo bɛ le.
[32] Kɛɛ a bɛnnin m'i feeti kɛ ka sawa, baa i dɔɔni tɛɛ vɛ sa, kɛɛ a a ni la kɔtunun. A tununnin tɛɛ, kɛɛ a vɛ ye butu.›»